Published on MAPNews (https://www.mapnews.ma/am)

Accueil > ⵢⵓⵣⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵜ ⵜⴱⵔⴰⴷⵜ ⵉ ⵜⵇⵉⵛⵛⵉⵜ ⵜⵄⵕⴰⴱⵜ ⵜⵓⵕⵓⴱⴱⵉⵜ ⵜⴰⵎⵣⵡⴰⵔⵓⵜ
  1. Accueil
  2. Activités royales

ⵢⵓⵣⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵜ ⵜⴱⵔⴰⴷⵜ ⵉ ⵜⵇⵉⵛⵛⵉⵜ ⵜⵄⵕⴰⴱⵜ ⵜⵓⵕⵓⴱⴱⵉⵜ ⵜⴰⵎⵣⵡⴰⵔⵓⵜ

25 ⴱⵕⴰⵢⵕ 2019 Version Imprimable
ⵛⴰⵕⴰⵎ ⵛⵛⵉⵅ (ⵎⵉⵚⵕⴰ) - ⵢⵓⵣⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ , ⴰⴷ ⵜ ⵉⵏⵚⵕ ⵕⵕⴱⵉ, ⵢⴰⵏ ⵉⵏⴰⵡ ⵉ ⵜⵇⵉⵛⵛⵉⵜ ⵜⵄⵕⴰⴱⵜ ⵜⵓⵕⵓⴱⴱⵉⵜ ⵜⴰⵎⵣⴰⵡⵔⵓⵜ, ⵍⵍⵉ ⵢⵕⵥⵎⵏ ⵜⵡⵓⵔⵉⵡⵉⵏ ⵏⵏⵙ ⵉⴹ ⵍⵍⵉ ⵏ ⴰⵙⵙ ⵏ ⵓⵙⵎⴰⵙ ⴳ ⵛⴰⵕⴰⵎ ⵛⵛⵉⵅ ⴳ ⵎⵉⵚⵕⴰ.

ⵉⵖⵕⴰ ⵜⴰⴱⵔⴰⵜ ⵜⴳⵍⴷⴰⵏⵜ ⴰⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵙⵄⴷ ⴷⴷⵉⵏ ⵍⵄⵜⵎⴰⵏⵉ.

ⴳ ⵜⴱⵔⴰⴷⵜ ⴰⴷ, ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⴳⵍⵉⴷ ⵎⴰⵙⵙ ⵖⵓⵕ ⵜⵇⵛⵛⵉⵜ ⴰⴷ, ⵍⵍⵉ ⵢⵙⵎⴰⵏⵏ ⴳ ⵡⵙⵙⴰⵏ ⴰⴷ ⴰⴷⴷⵓⵔ ⴰⵅⴰⵜⴰⵔ ⴷⴰⵔ ⵓⵎⴰⴹⴰⵍ ⴰⵄⵕⴰⴱ, ⴰⵛⴽⵓ ⵜⵙⵔⵙ ⴰⵎⵙⴰⵡⴰⵍ ⵍⵍⵉ ⵖⵓⵔⵙ ⴰⵏⵙⴰ ⴰⵅⴰⵜⴰⵔ ⴳ ⵓⵖⴰⵡⴰⵙ ⵏ ⵜⵓⵇⵇⵏⵉⵏ ⵏⵏⵙ ⴷ ⵎⵏⵏⴰⵡ ⵏ ⵉⵎⴷⵔⴰⵡⵏ ⵏⵏⵙ, ⵙⴳ ⵉⵡⴰⵏⴽⵏ ⴷ ⵉⴳⵔⴰⵡⵏ ⵏ ⵜⵎⵍⵢⵜⵉⵏ ⵜⵉⵙⴳⵡⵉⵏ ⴷ ⵉⵎⵏⵥⵢⵉⵏⵏ.

ⵉⵍⵍⴰ ⵡⴷⴷⵓⵔ ⴰⴷ ⴳ ⴰⵏⵙⴰ ⵏ ⵓⴽⵎⵓⵔ ⴰⵊⵖⵕⴰⴼⵉ ⴷ ⵉⵙⴽⴽⵉⵏ ⵉⵄⴷⴰⵏ ⴳ ⵓⵎⵣⵔⵓⵢ, ⴷ ⵉⴳⴰ ⴼ ⵖⵉⴽⴰⵏⵏ ⵢⴰⵜ ⵜⵙⵓⵖⵍⵜ ⵏ ⵢⴰⵜ ⵜⵏⴰⵢⵜ ⵉⵛⵛⴰⵔⵏ ⴷ ⵜⵢⴰⴼⵓⵜ ⵏ ⵜⵓⴳⴳⴰⵣ ⵜⵉⵏⴼⴳⴰⵏⵉⵏ ⴷ ⵏ ⵓⵅⵎⵎⴻⵎ ⴷ ⵜⵉⴷⵍⵙⴰⵏⵉⵏ ⵉⵎⴰⵜⴰⵢⵏ, ⵍⵍⵉ ⵖⵓⵕⵙⵏ ⵉⵥⵓⵕⴰⵏ ⴳ ⵓⵎⵙⴰⵡⴰⵍ ⴷ ⴰⵙⵏⴼⵍ ⵉⵙⵓⵍⵏ ⴳⵔ ⵜⵖⵔⵎⵉⵏ ⵜⵉⵄⵕⴰⴱⵉⵏ ⵏ ⵜⵓⵕⵕⵓⴱⵉⵢⵏ, ⵎⴰ ⵢⴰⴷ ⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵜⴱⵔⴰⵜ ⴰⴷ.

ⴼ ⵖⵉⴽⴰⵏⵏ, ⵜⵙⴽⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⵎⵏⵏⴰⵡ ⵏ ⵉⵔⵉⵎⵏ ⵉⵎⵢⴰⴼⵓⵏⵏ ⴳ ⵜⵓⵇⵇⵏⵉⵏ ⵏⵏⵙ ⴷ ⵓⵎⴷⵔⴰⵡ ⵓⵕⵕⵓⴱⵉ ⵏⵏⵙ, ⴰⵎⵎⴰⵙ ⵏ ⵎⵏⵏⴰⵡ ⵏ ⵉⴽⵓⴷⵏ ⵉⵣⵔⵉⵏ, ⵍⵍⵓⵎⵏ ⴳ ⵓⵙⴰⵜⵉ ⵏ ⵓⴷⴷⴰⴷ ⴰⵍⴰⵢ, ⴷ ⵜⵔⴰ ⴰⴷ ⵜⵍⴽⵎ ⵜⴽⵍⵉⵜⵏ ⵏ ⵜⴷⵔⴰⵡⵜ ⵏ ⵓⵙⵡⵉⵔ ⵢⴰⵜⵜⵓⵢⵏ ⴷ ⵢⴰⴹⵏⵉⵏ ⴳ ⵡⵙⵙⴰⵏ ⴰⴷ ⵢⵓⵛⴽⴰⵏ, ⴷ ⵜⵓⵊⴰⴷ ⴱⴷⴷⴰ ⴰⴼ ⴰⴷ ⵜⴰⵙⵉ ⴰⵎⵢⴰⵡⴰⵙ ⴰⵄⵕⴰⴱ ⴷ ⵓⵕⵓⴱⴱⵉ ⴰⵔ ⵜⴷⵔⴰⵡⵜ ⵉⴼⵓⵍⴽⵉⵏ, ⵍⵍⵉ ⵢⵓⵙⵉⵏ ⵉⴳⵍⵉ ⵏ ⴰⵢⴷⴰ ⴰⴷⵍⵙⴰⵏ ⴷ ⴰⵖⵔⵎⴰⵏ ⵏ ⴽⵔⴰ ⵢⴳⴰⵜⵜ ⵜⵉⴼⴰⵡⵜ, ⴷ ⵜⵙⴽⵔ ⵙⴳ ⵓⵎⵙⴰⵙ ⴳⵔⴰⵜⵙⵏ ⵢⴰⵏ ⵓⵍⴰⵡⴰⵢ ⵏ ⵓⵙⴱⵉⴷⴷ ⵏ ⵜⵓⵇⵇⵏⵉⵏ ⵉⴷⵓⵙⵉⵏ ⴷ ⵉⵙⵙⵍⴳⵉⵏ, ⵉⴱⵉⴷⴷⵏ ⵅⴼ ⵜⴰⵙⵉⵍⴰ ⵏ ⵉⴱⵖⵓⵔⵏ ⵉⵛⵛⴰⵔⵏ ⴷ ⵏ ⵓⵣⵔⴰⴽ ⴰⵙⵏⴼⵍ ⴷ ⵏ ⵓⵎⵙⴰⵡⵍ ⵉⵜⵜⵓⵙⴽⴰⵏ, ⵎⴰ ⵢⴰⴷ ⵉⵔⵏⵓ ⵢⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⵉⵎⵍⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⴰⵏⴰⵣⵓⵕ ⵏⵏⵙ ⵎⵔⴰ ⴰⴷ ⵉⴳ ⴰⴼⴰ ⵢⴰⴷ ⴰⵣⵎⵣ ⴳ ⵍⴱⴷⵓ ⵏ ⵓⵙⵔⵙ ⵏ ⵢⴰⵏ ⵓⵙⵏⵜⵉ ⴰⵎⵣⵓⵍ ⴷ ⵉⵎⵉⴽⴰⵏⵉⵣⵎⵏ ⵏⵏⵙ, ⵎⴰ ⵢⴰⴷ ⵉⴳⴰⵏ ⵢⴰⵜ ⵜⵖⴰⵡⵙⴰ ⵓⵔ ⵉⵛⵇⵇⴰⵏ ⴰⵛⴽⵓ ⵍⵍⴰⵏ ⵉⵎⵉⴽⴰⵏⵉⵣⵎⵏ ⵉⵙⴱⴷⵉⴷⵏ, ⵍⵍⵓⵎⵏ "ⴰⵎⵙⴰⵡⵍ ⵏ 5+5" ⴷ "ⵜⴰⵎⵓⵏⵜ ⵅⴼ ⵉⵍⵍ ⵓⵎⵍⵉⵍ ⴰⵏⴰⵎⵎⴰⵙ", ⵎⴰ ⵢⴰⴷ ⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵉⵎⵍⴰ ⴰⵏⴰⵣⵓⵔ ⵏⵏⵙ ⴰⴷ ⵜⵙⵙⵏ ⵜⵎⵓⵏⵜ ⴰⴷ ⵍⴱⴷⵓ ⴰⵎⴰⵢⵏⵓ ⴳ ⵓⵣⵣⴳⵉⵔ ⵏ ⵉⵏⴳⵎⴰⵎⵏ ⵏⵏⵙ ⴷ ⴰⵍⵍⴰⵙ ⵏ ⵉⵎⵓⵙⵙⵓⵜⵏ ⵏ ⵉⵖⵡⴰⵙⵏ ⵏⵏⵙ, ⵎⵔⴰ ⴰⴷ ⵉⵜⵜⵢⴰⴽⴽⴰ ⵢⴰⵏ ⴰⴷⵃⵉ ⴰⴷⴷⵓⵙ ⵏ ⵓⵎⵢⴰⵡⴰⵙ ⴰⵄⵕⴰⴱ-ⵓⵕⵓⴱⴱⵉ.

"ⵏⵓⵎⵥ ⴰⵣⵎⵣ ⴰⴷ ⵎⵔⴰ ⴰⴷ ⵏⵖⵕ ⴰⴷ ⵉⵍⵉⵏ ⵉⴳⵔⴰⵡⵏ ⵉⵄⵕⴰⴱⵏ ⴳ ⵜⵙⴳⴰ, ⴰⵎⵎⴰⵙ ⵏⵏⵙⵏ ⵜⴰⵎⵓⵏⵜ ⵏ ⵍⵎⵖⵔⵉⴱ ⴰⵄⵕⴰⴱ ⵍⵍⵉ ⵖ ⵏⵍⵍⴰ, ⴰⴼ ⴰⴷ ⵙⴽⵔⵏ ⵜⵉⵍⴰⵍⵜ ⵏⵏⵙⵏ ⴳ ⵓⵙⴷⵓⵙ ⵏ ⵜⵓⵇⵇⵏⵉⵏ ⴷ ⵜⴷⵔⴰⵡⵜ ⵏⵏⵖ ⴷ ⵓⵎⴷⵔⴰⵡ ⵓⵕⵓⴱⴱⵉ, ⴷ ⴰⴷ ⵏⵣⵣⵔⵉ ⵜⵉⵎⵓⴽⵔⵉⵙⵉⵏ ⵜⵉⵙⵔⵜⴰⵏⵉⵏ ⴷ ⵜⵉⵎⵣⴰⵔⴰⵢⵏ ⵜⵉⵙⵏⵔⴰⵏⵉⵏ ⵉⴱⵉⴷⴷⵏ ⴳ ⵓⵖⴰⵔⴰⵙ ⵏ ⵜⴰⵡⴷⴰ ⵏ ⵓⵃⵕⵛ ⴷ ⵜⴳⵎⵉ", ⵎⴰ ⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⵉⵇⵇⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵜⴰⴱⵔⴰⵜ ⵏⵏⵙ ⵙ ⵓⵙⴷⴷⵉⴷ ⵏ ⵜⴳⵍⴷⵉⵜ ⵏ ⵍⵎⵖⵔⵉⴱ ⵏ ⵓⵍⵜⴰⵖ ⵏⵏⵙ ⵉⴼⵓⵍⴽⵉⵏ ⴷ ⵉⵎⵢⴰⵖⵏ ⴳ ⴽⵔⴰ ⵢⴳⴰⵜⵜ ⵜⴰⴷⵉⵏⴰⵎⵉⵜ ⵜⴰⵎⴰⵢⵏⵓⵜ ⵉⵥⴹⴰⵕⵏ ⴰⴷ ⵜⴰⵙⵉ ⵡⵎⵙⴰⵡⵍ ⴰⵄⵕⴰⴱ - ⵓⵕⵓⴱⴱⵉ ⴰⵔ ⵓⵙⵡⵉⵔ ⵏ ⵓⵎⵙⴰⵡⴰⵍ ⵉⵕⵡⴰⵏ, ⵎⴰ ⵔⴰⴷ ⵢⴰⵡⵉ ⴰⴼⵓⵍⴽⵉ ⵉ ⵜⵎⵉⵣⴰⵔ ⵏ ⵙⵏⴰⵜ ⵏ ⵜⵙⴳⴰⵜⵉⵏ, ⴷ ⵔⴰⴷ ⵉⵙⴽⵔ ⵜⵉⵔⴰⵜⵉⵏ ⵏ ⵉⴳⴷⵓⴷⵏ ⵏⵏⵙⵏⵜ.

Dernière modification : 25 ⴱⵕⴰⵢⵕ 2019
Source URL: https://www.mapnews.ma/am/activites-royales/%E2%B5%A2%E2%B5%93%E2%B5%A3%E2%B5%8F-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94-%E2%B4%B0%E2%B4%B3%E2%B5%8D%E2%B5%8D%E2%B5%89%E2%B4%B7-%E2%B5%A2%E2%B4%B0%E2%B5%9C-%E2%B5%9C%E2%B4%B1%E2%B5%94%E2%B4%B0%E2%B4%B7%E2%B5%9C-%E2%B5%89-%E2%B5%9C%E2%B5%87%E2%B5%89%E2%B5%9B%E2%B5%9B%E2%B5%89%E2%B5%9C-%E2%B5%9C%E2%B5%84%E2%B5%95%E2%B4%B0%E2%B4%B1%E2%B5%9C-%E2%B5%9C%E2%B5%93%E2%B5%95%E2%B5%93%E2%B4%B1%E2%B4%B1%E2%B5%89%E2%B5%9C-%E2%B5%9C%E2%B4%B0%E2%B5%8E%E2%B5%A3%E2%B5%A1%E2%B4%B0%E2%B5%94%E2%B5%93%E2%B5%9C