Published on MAPNews (https://www.mapnews.ma/am)

Accueil > ⵉⵏⴰⵡ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⴳ ⵜⵇⵉⵛⵛⵉⵜ ⵜⴰⵎⵖⵔⴰⴱⵉⵢⵜ- ⵜⴰⵅⴰⵍⵉⵊⵉⵢⵜ ⴳ ⵕⵕⵉⵢⴰⴹ
  1. Accueil
  2. Activités royales

ⵉⵏⴰⵡ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⴳ ⵜⵇⵉⵛⵛⵉⵜ ⵜⴰⵎⵖⵔⴰⴱⵉⵢⵜ- ⵜⴰⵅⴰⵍⵉⵊⵉⵢⵜ ⴳ ⵕⵕⵉⵢⴰⴹ

20 ⵉⴱⵔⵉⵔ 2016 Version Imprimable
ⵕⵕⵉⵢⴰⴹ - ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⴽⵕⴰⵙ ⴳ ⵕⵕⵉⵢⴰⴹ, ⴳ ⵉⵏⵏⴰⵡ ⵏⵏⵙ ⵙ ⵓⵣⵎⵣⵣⵓ ⵏ ⵓⵕⵥⵥⵓⵎ ⵏ ⵜⵇⵉⵛⵛⵉⵜ ⵜⴰⵎⵖⵔⴰⴱⵉⵢⵜ- ⵜⴰⵅⴰⵍⵉⵊⵉⵢⵜ ⴳ ⵕⵕⵉⵢⴰⴹ, ⵎⴰⵙ ⵉⵙⵙⵓⵙⵎⵜ ⵛⵉⴳⴰⵏ ⴰⴷ ⵉⴷⵔⵓ ⴳ ⵜⵇⵉⵛⵛⵉⵜ ⴰⴷ ⵍⵍⵉ ⴳ ⴰⵎⵓⵏ ⴰⵢⵜ ⴳⵎⴰⵙ ⵉⵏⴱⴷⴰⴷⵏ ⵏ ⵜⵎⵉⵣⴰⵕ ⵏ ⵍⵅⴰⵍⵉⵊ.

ⴳ ⵜⵉⵣⵡⵓⵔⵉ ⵏ ⵉⵏⴰⵡ ⴰⴷ, ⵉⵙⵏⵉⵎⵕ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵏ ⵙⵙⴰⵄⵓⴷⵢⴰ, ⴰⴳⵍⵍⵉⴷ ⵙⴰⵍⵎⴰⵏ ⴱⵏⵏ ⵄⴰⴱⴷ ⵍⵄⵣⵉⵣ ⴰⵍ ⵙⴰⵄⵓⴷ ⵍⵍⵉ ⵉⵙⵏⵓⴱⴳⵏ ⵜⴰⵇⵉⵛⵛⵉⵜ ⴰⴷ, ⴷ ⵉⵢⵏⴱⴷⴰⴷⵏ ⴰⴽⴽⵯ ⵏ ⵜⵎⵉⵣⴰⵕ ⵏ ⵍⵅⴰⵍⵉⵊ ⵍⵍⵉ ⴳⵉⵙ ⵉⴷⵔⵓⵏ.

ⴷ ⵉⵙⵏⵉⵎⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⵜⵉⵎⵉⵣⴰⵕ ⵏ ⵍⵅⴰⵍⵉⵊ ⵅⴼ ⵜⵡⵉⵣⵉ ⵜⴰⴽⵎⴰⵎⵜ ⴷ ⵜⵡⵏⴳⵉⵎⵜ ⵉ ⵍⵎⵖⵔⵉⴱ ⵃⵎⴰ ⴰⴷ ⵉⵙⴽⵔ ⵉⵙⵏⵜⵉⵜⵏ ⵏⵏⵙ ⵉⵏⴳⵎⵓⵜⵏ ⴷ ⵉⵎⵣⴰⵖ ⵅⴼ ⵜⵎⵙⴰⵔⵉⵏ ⵏⵏⵙ.

ⵙ ⵓⵣⵎⵣⵣⵓ ⴰⴷ, ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⵙⵏⵉⵎⵔ ⵏⵏⵙ ⵉ ⵜⵡⵉⵣⵉ ⵉⵣⴷⵉⵏ ⵏ ⵜⵎⵉⵣⴰⵕ ⵏ ⵍⵅⴰⵍⵉⵊ ⵉ ⵍⵎⵖⵔⵉⴱ ⴳ ⴰⵎⵣⴰⵖ ⵅⴼ ⵜⴰⵎⵓⵏⵜ ⵏ ⵡⴰⴽⴰⵍ ⵏⵏⵙ, ⵍⵍⵉ ⵖ ⵜⴳⴰ ⴳ ⵜⵏⵣⵔⵓⴼⵜ ⵜⵎⵖⵔⴰⴱⵉⵢⵜ ⵜⴰⵎⵙⴰⵔⵜ ⵏⵏⵙⵏ.

ⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴳ ⵉⵏⵏⴰⵡ ⵏⵏⵙ ⵙ ⵓⵣⵎⵣⵣⵓ ⵏ ⵓⵕⵥⵥⵓⵎ ⵏ ⵜⵇⵉⵛⵛⵉⵜ ⵜⴰⵎⵖⵔⴰⴱⵉⵢⵜ- ⵜⴰⵅⴰⵍⵉⵊⵉⵢⵜ ⴳ ⵕⵕⵉⵢⴰⴹ, ⵎⴰⵙ «ⵜⵏⵣⵔⵓⴼⵜ ⵜⵎⵖⵔⴰⴱⵉⵢⵜ ⵜⴳⴰ ⵜⴰⵎⵙⴰⵔⵜ ⵏ ⵜⵎⵉⵣⴰⵕ ⵏ ⵍⵅⴰⵍⵉⵊ.

ⵙ ⵓⵙⵏⵜⵉ ⴰⴷ, ⵉⵙⴽⵜⵉⴷ ⴱⴰⴱ ⵏ ⵡⴰⴷⴷⵓⵔ ⵎⴰⵙ « ⴳ ⵓⵙⴳⴳⵯⴰⵙ ⵏ 1975 ⴰⵎⵓⵏ ⵉⴽⴰⴱⴰⵔⵏ ⵙⴳ ⵙⵙⴰⵄⵓⴷⵢⴰ ⴷ ⵍⴽⵡⵉⵜ ⴷ ⵇⴰⵟⴰⵕ ⴷ ⵙⴰⵍⵟⴰⵏⴰⵜ ⵄⵓⵎⵎⴰⵏ ⴷ ⵍⵉⵎⴰⵕⴰⵜ ⴳ ⵜⵡⴰⴷⴰ ⵜⴰⵣⴳⵣⴰⵡⵜ ⵉⵙⴽⵔ ⵍⵎⵖⵔⵉⴱ ⵃⵎⴰ ⴰⴷ ⵉⵔⴰⵔ ⵜⵉⵙⴳⴳⵉⵡⵉⵏ ⵏ ⵉⴼⴼⵓⵙ ⵏⵏⵙ, ⵍⵍⵉ ⵉⵥⵍⵉⵏ ⵙ ⵜⵉⵍⵉⵜ ⵏ ⵉⴳⵎⴰⵜⵏⵖ ⴱⴰⴱ ⵏ ⵡⴰⴷⴷⵓⵔ ⵛⵛⵉⵅ ⵎⵓⵃⵎⵎⴷ ⴱⵏⵏ ⵣⴰⵢⴷ ⴰⵍ ⵏⴰⵀⵢⴰⵏ, ⴰⵎⴽⴽⵓⵙⵓ ⵏ ⵜⴳⵍⴷⵉⵜ ⵏ ⴰⴱⵓⴹⴰⴱⵉ ⴷⴰⵔ ⵜⵍⵍⴰ ⴳ ⵜⵉⵣⵉ ⴰⵏⵏ 14 ⵏ ⵓⵙⴳⴳⴰⵙ.

ⴷ ⵉⵏⵏⴰ ⵙⵓⵍ ⴱⴰⴱ ⵏ ⵡⴰⴷⴷⵓⵔ ⵎⴰⵙ ⵙⴳ ⵜⵉⵣⵉ ⴰⵏⵏ, « ⵓⵔ ⵓⵊⵊⵉⵏⵜ ⵜⵎⵉⵣⴰⵔ ⵏ ⵍⵅⴰⵍⵉⵊ ⵜⵓⴳⴳⵯⴰⵣ ⵏⵏⵙⵏⵜ ⵃⵍⴰ ⴰⴷ ⴰⵡⵙⵏⵜ ⵉ ⵍⵎⵖⵔⵉⴱ ⴰⴷ ⵉⵃⵟⵓ ⵜⴰⵎⵓⵏⵜ ⵏ ⵡⴰⴽⴰⵍ ⵏⵏⵙ, ⴷ ⵓⵎⵣⴰⵖ ⵅⴼ ⵡⴰⴽⴰⵍ ⵏⵏⵙ, ⴷ ⵎⴰⵢⴰⴷ ⵜⵙⴷⴷⵉⴷⵎⵜ ⴳ ⵜⵎⵓⵔⴽⵉⵙ ⵜⴰⵎⴳⴳⵯⴰⵔⵓⵜ ⴷ ⵓⵏⴼⵍⵓⵙ ⴰⵎⴰⵜⵜⴰⵢ ⵏ ⵜⴰⵎⵓⵏⵜ ⵏ ⵜⵎⵜⵜⴰ ».

ⴷ ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⵎⴰⵙ ⵜⴰⵎⴷⵔⴰⵡⵜ ⵏ ⵍⵎⵖⵔⵉⴱ ⴷ ⵜⵎⵉⵣⴰⵕ ⵏ ⵍⵅⴰⵍⵉⵊ ⵜⵙⴷⵓⵙ ⵙ ⵜⴰⴼⵍⵙⵜ ⵙ ⵢⴰⵏ ⵉⵎⴰⵍ ⴷ ⵓⵎⵙⴰⵙⴰ ⵏ ⵜⴰⵏⵏⴰⵢⵉⵏ ⵅⴼ ⵜⴰⵎⵙⴰⵔⵉⵏ ⵉⵛⵛⴰⵔⵏ.

ⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴳ ⵉⵏⵏⴰⵡ ⵏⵏⵙ, ⵎⴰⵙ « ⵜⴰⵎⴷⵔⴰⵡⵜ ⵍⵎⵖⵔⵉⴱ- ⵜⵉⵎⵉⵣⴰⵕ ⵏ ⵍⵅⴰⵍⵉⵊ ⵓⵔ ⴷ ⵜⵓⵛⴽⵉ ⵖⴰⵙⵙⴰⴷ, ⴷ ⵓⵔ ⵜⴱⴷⴷⵉ ⵅⴼ ⵜⵏⴰⴼⵓⵜ ⵜⴰⵎⵙⵓⵜⵍⵜ, ⵎⴰⵛ ⵢⵓⵛⴽⴰⴷ ⵓⵙⴷⵓⵙ ⴰⴷ ⴳ ⵜⴰⴼⵍⵙⵜ ⵉⵣⴷⴷⵉⴳⵏ ⵙ ⵢⴰⵏ ⵉⵎⴰⵍ ⴷ ⵓⵎⵙⴰⵙⴰ ⵏ ⵜⴰⵏⵏⴰⵢⵉⵏ ⵅⴼ ⵜⴰⵎⵙⴰⵔⵉⵏ ⵉⵛⵛⴰⵔⵏ ».

 ⴳ ⵓⵙⵏⵜⵉ ⴰⴷ,  ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⵍⵎⵖⵔⵉⴱ ⴷ ⵜⵎⵉⵣⴰⵕ ⵏ ⵍⵅⴰⵍⵉⵊ « ⵣⴹⴰⵕⵏ ⴰⴷ ⵙⴽⵔⵏ ⵜⴰⵙⵉⵍⴰ ⵉⵣⵉⵍⵏ ⵉ ⵜⵎⴷⵔⴰⵡⵜ ⵜⴰⵙⵜⵔⴰⵜⵉⵊⵉⵢⵜ, ⵉⴳⴰⵏ ⵜⴰⵢⴰⴼⵓⵜ ⵏ ⵓⴱⵔⵉⴷ ⵉⵖⵓⴷⴰⵏ ⵏ ⵓⵎⵢⴰⵡⴰⵙ, ⴳ ⵓⵙⵡⵉⵔ ⴰⵙⵉⵏⵔⴰⵏ, ⵙ ⵜⵉⵔⵉⵜ ⵏⵏⵖ ⵉⵛⵛⴰⵔⵏ ».

ⴳ ⵓⵙⵏⵜⵉ ⴰⴷ, ⵉⵙⴷⴷⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, « ⵎⴰⵙ ⵎⵇⵇⴰⵕ ⵢⴰⴳⴳⵓⴳ ⵓⵣⴰⵔⵓ ⴳⵔ ⵍⵎⵖⵔⵉⴱ ⴷ ⵜⵎⵉⵣⴰⵔ ⵏ ⵍⵅⴰⵍⵉⵊ, ⵎⴰⵛ ⵜⵙⵎⵓⵏⴰⵖ, ⴽⵃⴰⵎⴷⵓ ⵍⵍⴰⵀ, ⵉⵣⴷⴰⵢⵏ ⵉⴷⵓⵙⵏ, ⵓⵔ ⵉⴱⴷⴷⵉⵏ ⵖⴰⵙ ⵅⴼ ⵜⵓⵜⵍⴰⵢⵜ ⴷ ⵓⵙⴳⴷ ⴷ ⵜⵖⵔⵎⴰ ».

ⴷ ⵉⵙⴽⵜⵉⴷ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⵍⵎⵖⵔⵉⴱ ⴷ ⵜⵎⵉⵣⴰⵔ ⵏ ⵍⵅⴰⵍⵉⵊ ⵜⵍⵍⴰ ⴷⴰⵔⵙⵏ ⵢⴰⵜ ⵜⴰⵏⵥⵕⵜ ⵉⵛⵛⴰⵔⵏ, ⵙⵍⴰⵡⵏ ⴰⴽⴽⵯ, ⴳ ⵢⵉⴳⵔ ⵏ ⵜⵏⴼⵔⵓⵜ.


 

Fichier attaché :
Icône image sm_le_roi_prononce_un_discours_au_sommet_maroc-pays_du_golfe-g.jpg
Dernière modification : 20 ⵉⴱⵔⵉⵔ 2016
Source URL: https://www.mapnews.ma/am/activites-royales/%E2%B5%89%E2%B5%8F%E2%B4%B0%E2%B5%A1-%E2%B5%8F-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94-%E2%B4%B0%E2%B4%B3%E2%B5%8D%E2%B5%8D%E2%B5%89%E2%B4%B7-%E2%B5%8E%E2%B5%93%E2%B5%83%E2%B5%8E%E2%B5%8E%E2%B4%B7-%E2%B5%A1%E2%B5%89%E2%B5%99%E2%B5%99-%E2%B5%9A%E2%B4%B9%E2%B5%89%E2%B5%9A-%E2%B4%B3-%E2%B5%9C%E2%B5%87%E2%B5%89%E2%B5%9B%E2%B5%9B%E2%B5%89%E2%B5%9C-%E2%B5%9C%E2%B4%B0%E2%B5%8E%E2%B5%96%E2%B5%94%E2%B4%B0%E2%B4%B1%E2%B5%89%E2%B5%A2%E2%B5%9C-%E2%B5%9C%E2%B4%B0%E2%B5%85%E2%B4%B0%E2%B5%8D%E2%B5%89%E2%B5%8A%E2%B5%89%E2%B5%A2%E2%B5%9C-%E2%B4%B3#comment-0