ⴰⵔⵣⴰⴼ ⴰⴳⵍⴷⴰⵏ ⵉ ⵜⵖⵔⴰⵎⵜ ⵏ ⴼⴰⵙ .. ⴰⵙⴷⵓⵙ ⵏ ⵓⵎⵏⵉⴷ ⵏ ⵜⴷⵓⵙⵉ ⵙ ⵓⵕⵥⵥⵓⵎ ⵏ ⵉⵙⵏⵜⵉⵜⵏ ⵉⵎⴰⵢⵏⵓⵜⵏ ⵏ ⵜⵡⵉⵣⵉ

19 ⵉⵏⵏⴰⵢⵔ 2015 Version Imprimable

ⴼⴰⵙ - ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⵙⴰⵎⴰⵙ ⴳ ⵜⵙⴳⴰ ⵏ ⴼⴰⵙ, ⴰⵕⵥⵥⵓⵎ ⵏ ⵜⵡⵓⵔⵉⵡⵉⵏ ⵏ ⵙⵉⵏ ⵉⵙⵏⵜⵉⵜⵏ ⵏ ⵜⵡⵉⵣⵉ ⵏ ⵓⵏⵟⵟⴰⴼ ⵉⴽⵯⵛⵎⵏ ⴳ ⵓⵎⵏⵉⴷ ⵏ ⵜⴷⵓⵙⵉ ⴳ ⵓⵙⵡⵉⵔ ⵏ ⵜⵎⴰⵥⵓⵏⵜ ⵜⴰⵔⵓⵃⴰⵏⵉⵢⵜ ⴳ ⵜⴳⵍⴷⵉⵜ.

ⵙⵉⵏ ⵉⵙⵏⵜⵉⵜⵏ ⴰⴷ ⵍⵍⵉ ⵔⴰⴷ ⵜⵙⴽⴰⵔ ⵜⵎⵔⵙⵍⵜ ⵏ ⵎⵓⵃⵎⵎⴷ ⵡⵉⵙⵙ ⵙⵎⵎⵓⵙ ⵏ ⵜⵡⵉⵣⵉ, ⵃⵎⴰ ⴰⴷ ⵉⵙⴽⴰⵔ ⵏ ⵢⴰⵏ ⵓⵏⴰⵎⵎⴰⵙ ⵏ ⵓⵣⵔⴰⵢ ⴷ ⵓⵙⵓⵊⵊⵉ ⵏ ⵡⵉⵏⵏⴰ ⴳ ⵉⵍⵍⴰ ⵚⴽⵕ ⴳ ⵜⵙⵓⵏⴹⵜ ⵏ ⵍⵎⴰⵔⵉⵏⵢⵉⵏ, ⴷ ⵓⵏⴰⵎⵎⴰⵙ ⵏ ⵓⵙⵎⵓⵔ ⵏ ⵉⴷⴰⵎⵏ ⴳ ⵜⵙⵓⵏⴹⵜ ⵏ ⵣⵡⵡⴰⵖⴰ, ⵙ ⵢⴰⵏ ⵡⴰⵜⵉⴳ ⵉⵍⴽⴰⵎⵏ 17 ⵏⵉⴷ ⵎⵍⵢⵓⵏ ⵏ ⴷⴷⵔⵀⵎ.

ⴷ ⵔⴰⴷ ⵉⵍⴽⴰⵎ ⵓⵏⴰⵎⵎⴰⵙ ⵏ ⵓⵣⵔⴰⵢ ⴷ ⵓⵙⵓⵊⵊⵉ ⵏ ⵡⵉⵏⵏⴰ ⴳ ⵉⵍⵍⴰ ⵚⴽⵕ ⴰⵜⵉⴳ ⵏ 5 ⵏⵉⴷ ⵎⵍⵢⵓⵏ ⵏ ⴷⴷⵔⵀⵎ, ⴷ ⵓⵙⴰⵔⵎ ⵏ ⵓⵙⴼⵙⵉ ⴰⵎⵙⵏⵉⵊⵊⵉ, ⴷ ⵜⴷⴰⵍⴰ ⵏ ⵓⵙⴳⵏⴰⴼ ⵏⵏⴰⵀⴰⵔⵉ, ⴷ ⵓⵙⴰⵢⵔⴰⵔ ⵏ ⵓⵣⵔⴰⵢ, ⴷ ⵓⵏⵡⴰⵍ, ⴷ ⵢⴰⵜ ⵜⴷⴰⵍⴰ ⵏ ⵎⵏⵏⴰⵡⵜ ⵏ ⵉⵎⵢⴰⵏⴰⵡⵏ, ⴷ ⵢⴰⵏ ⵓⵙⴰⵢⵔⴰⵔ ⴰⵎⵙⵎⵓⵏ.

ⴷ ⴰⵏⴰⵎⵎⴰⵙ ⵏ ⵏ ⵓⵙⵎⵓⵔ ⵏ ⵉⴷⴰⵎⵏ, ⵔⴰⴷ ⵢⴰⵡⵙ ⴳ ⵓⵙⴼⵙⵉⵙ ⵏ ⵡⴰⵙⵙⴰⵙ ⴳ ⵜⵏⴰⴼⵓⵜ ⵏ ⵓⵙⵓⵊⵊⵉ ⵏ ⵜⴳⵥⵍⵉⵏ ⴳ ⵓⵏⴰⵎⵎⴰⵙ ⴰⵙⴳⵏⴰⴼ ⵏ « ⵍⵃⴰⵙⴰⵏ ⵡⵉⵙⵙ ⵙⵙⵉⵏ » ⴳ ⵜⵖⵔⴰⵎⵜ ⵏ ⴼⴰⵙ.

ⴰⵜⵉⴳ ⵏ ⵓⵙⵏⵜⵉ ⴰⴷ ⵔⴰⴷ ⵉⵍⴽⴰⵎ 12 ⵎⵍⵢⵓⵏ ⵏⵉⴷ ⴷⴷⵔⵀⵎ, ⴰⴼⴰⴷ ⵉⵥⴹⴰⵕ ⴰⴷ ⵢⴰⵙⵉ 300 ⵏ ⵓⵎⵓⴹⵉⵏ ⵉⵡⴰⵙ, ⴷ ⵔⴰⴷ ⴷⵉⴳⵙ ⵜⵉⵍⵉ 60 ⵏ ⵉⵎⵉⵙ ⵏ ⵓⵙⵎⵓⵔ, ⴷ ⵜⴷⴰⵍⴰⵜⵉⵏ ⵏ ⵓⵙⴰⵔⵎ ⵏ ⵓⵙⴼⵙⵉ.

ⵉⵜⵜⵓⵣⵎⵎⴰⵎ ⵎⴰⵙⴷ ⴰⵙⵡⵓⴷⴷⵓ ⵏ ⵉⵙⵏⵜⵉⵜⵏ ⴰⴷ ⵔⴰⴷ ⵉⴳ ⵡⵉⵏ ⵜⵎⵙⵎⵓⵏⵉⵏ ⵜⵉⴷⵖⵔⴰⵏⵉⵏ, ⵙ ⵜⵎⴷⵔⴰⵡⵜ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ.

Dernière modification : 19 ⵉⵏⵏⴰⵢⵔ 2015

Source URL: https://www.mapnews.ma/am/activites-royales/%E2%B4%B0%E2%B5%94%E2%B5%A3%E2%B4%B0%E2%B4%BC-%E2%B4%B0%E2%B4%B3%E2%B5%8D%E2%B4%B7%E2%B4%B0%E2%B5%8F-%E2%B5%89-%E2%B5%9C%E2%B5%96%E2%B5%94%E2%B4%B0%E2%B5%8E%E2%B5%9C-%E2%B5%8F-%E2%B4%BC%E2%B4%B0%E2%B5%99-%E2%B4%B0%E2%B5%99%E2%B4%B7%E2%B5%93%E2%B5%99-%E2%B5%8F-%E2%B5%93%E2%B5%8E%E2%B5%8F%E2%B5%89%E2%B4%B7-%E2%B5%8F-%E2%B5%9C%E2%B4%B7%E2%B5%93%E2%B5%99%E2%B5%89-%E2%B5%99-%E2%B5%93%E2%B5%95%E2%B5%A5%E2%B5%A5%E2%B5%93%E2%B5%8E-%E2%B5%8F-%E2%B5%89%E2%B5%99%E2%B5%8F%E2%B5%9C%E2%B5%89%E2%B5%9C%E2%B5%8F-%E2%B5%89%E2%B5%8E%E2%B4%B0%E2%B5%A2%E2%B5%8F%E2%B5%93%E2%B5%9C%E2%B5%8F-%E2%B5%8F#comment-0