Published on MAPNews (https://www.mapnews.ma/am)

Accueil > ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵅⴼ ⵢⴰⵜ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⴷ ⵉⵙⵎⵙⴰⵙⴰⵏ ⴰⴼⴰⴷ ⴰⴷ ⵏⵏⴰⵍⵏ ⵜⵉⵏⵥⵕⵉⵏ ⴷ ⵉⵙⴷⵉⴷⵉⵏ ⵏ ⵓⵔⴳⴳⵉⴳ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ
  1. Accueil
  2. Activités royales

ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵅⴼ ⵢⴰⵜ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⴷ ⵉⵙⵎⵙⴰⵙⴰⵏ ⴰⴼⴰⴷ ⴰⴷ ⵏⵏⴰⵍⵏ ⵜⵉⵏⵥⵕⵉⵏ ⴷ ⵉⵙⴷⵉⴷⵉⵏ ⵏ ⵓⵔⴳⴳⵉⴳ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ

06 ⴷⵓⵊⴰⵏⴱⵉⵔ 2013 Version Imprimable
ⴱⴰⵔⵉⵣ - ⵉⵖⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⵙⵙ ⵏ ⵓⵙⵉⵎⵡⴰⵙ, ⵅⴼ ⵢⴰⵜ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⴷ ⵉⵙⵎⵙⴰⵙⴰⵏ ⵍⵍⵉ ⵢⵙⵎⴰⵏⵏ ⵜⵉⴳⴰⵡⵜ ⵏ ⵜⵏⴼⵔⵓⵜ ⴷ ⴰⵙⵓⴼⵖ ⵏ ⵜⵉⴳⵎⵉ ⵜⴰⵏⴼⴳⴰⵏⵜ ⴷ ⴰⵃⵟⵟⵓ ⵏ ⵜⵎⴰⴳⵉⵜ ⵜⴰⴷⵍⵙⴰⵏⵜ ⴷ ⵜⴰⵙⴳⴷⵜ ⴰⴼⴰⴷ ⴰⴷ ⵜⵏⵏⴰⵍ ⵜⵉⵏⵥⵕⵉⵏ ⴷ ⵉⵙⴷⵉⴷⵉⵏ ⵏ ⵓⵔⴳⴳⵉⴳ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ.

ⵉⵅⵚⵚⴰ ⴰⴷ ⵟⵟⴼⵏ ⵉⴼⵔⵉⵇⵉⵢⵏ ⵜⴰⵎⵙⵜⴳⴳⴰⵔⵜ ⵜⴰⵎⵣⵡⴰⵔⵓⵜ ⴳ ⵓⵙⵓⴼⵖ ⴷ ⵓⵙⵜⴰⵍ ⵏ ⵜⵉⴳⴰⵡⵜ ⵏ ⵓⵔⴰⵢ ⵏ ⵉⵎⵏⵣⴰⵖⵏ ⴷ ⵏ ⵓⵙⵡⵓⴷⴷⵓ ⵏ ⵜⵙⵙⴰⵙⵜ ⴷ ⵓⵃⵟⵟⵓ ⵏ ⵜⵏⴰⴳⵔⵉⵜ, ⵙ ⵜⵉⵏⵎⴰⵍⴰⵢⵉⵏ ⵉⵏⵎⵏⴰⴹⵏ, ⴱⵍⴰ ⴽⵔⴰ ⵢⴳⴰⵜ ⵓⴽⴰⵙⴰⵢ ⵏⵖⴷ ⵜⵉⵡⵏⴳⵉⵎⵉⵏ ⵎⵉⵔⵉⵅⴼⵏ ⵍⵍⵉ ⵓⵔ ⵉⵟⵟⴰⴼⵏ ⴽⵔⴰ ⵢⴳⴰⵜ ⵜⵉⵕⵡⵉ, ⵎⴰⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⴳ ⵢⴰⵜ ⵜⵓⵣⵉⵏⵜ ⵉⵜⵜⵓⴼⴽⴰⵏ ⵉ ⵢⵎⴷⵔⴰⵡⵏ ⴳ ⵓⴳⵉⵔ ⵏ ⵍⵉⵍⵉⵣⵉ ⵅⴼ ⵜⴰⵏⴰⴳⵔⵉⵜ ⴷ ⵜⴰⵏⴼⵔⵓⵜ ⴳ ⵉⴼⵔⵉⵇⵢⴰ (ⴱⴰⵔⵉⵣ, ⵙⴳ 06 ⴰⵔ 07 ⴷⵓⵊⴰⵏⴱⵉⵔ 2013), ⵍⵍⵉ ⵜ ⵉⵖⵔⴰⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵄⴱⴷⵍⵉⵍⴰⵀ ⴱⵏⴽⵉⵔⴰⵏ.

ⵉⵅⵚⵚⴰ ⵖ ⴰⵙⵙ ⴰⴷ ⴰⴷ ⵢⵉⵍⵉ ⵢⴰⵏ ⵓⵎⵢⴰⵡⴰⵙ ⵉⵙⴷⵓⵙⵏ ⴳⵔ ⵉⵏⵎⵏⴰⴹⵏ ⴷ ⵢⴰⵜ  ⵜⴰⴷⵔⴰⵡⵜ  ⵉⵎⵓⵙⵙⵓⵏ ⵏ ⵉⵎⵙⵉⵎⵓⵔⵏ ⵉⴳⵔⴰⵖⵍⴰⵏⵏ, ⵖⵉⴽⵍⵍⵉ ⵜⵎⵍⴰ ⵜⵉⴳⴰⵡⵜ ⵉⵏⵎⵙⵍⵍⵏ ⴷ ⵉⵕⵡⴰⵏ ⵏ ⵎⴰⵍⵉ, ⵉⵔⵏⵓ ⵢⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵍⵍⵉ ⵢⵣⵓⵍⵏ ⵜⵉⴳⴰⵡⵜ ⵜⴰⵎⵣⵓⵍⵜ ⵏ ⴼⵕⴰⵏⵚⴰ ⴷ ⵏ ⵓⵏⵙⵙⵉⵅⴼ ⴼⵕⴰⵏⵚⵡⴰ ⵀⵓⵍⴰⵏⴹ ⴳ ⵎⴰⵍⵉ, ⵍⵍⵉ ⵢⵙⴷⵓⵙⵏ ⵙ ⵓⵙⵓⵖⵏ ⵏ ⵎⵏⵏⴰⵡ ⵏ ⵜⵎⵉⵣⴰⵔ ⵏ ⵉⴼⵔⵉⵇⵢⴰ ⴷ ⵏ ⵜⴳⵔⴰⵡⵜ ⵜⴰⴷⴰⵎⵙⴰⵜ ⵏ ⵉⵡⴰⵏⴽⵏ ⵏ ⵉⴼⵔⵉⵇⵢⴰ ⵏ ⵜⴰⴳⵓⵜ.

ⵉⵏⵏⴰ ⵙⵓⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵙ ⵉⵅⵚⵚⴰ, ⴰⴼⴰⴷ ⵉⵏⵏⵍ ⵓⵖⴰⵍ ⵏ ⵓⵔⵉⵜⵍ ⵏ ⵍⵅⴰⵍⵉⵊ ⵏ ⵖⵉⵏⵢⴰ, ⴰⴷ "ⵜⴹⴼⴰⵕ ⵜⴳⴰⵡⵜ ⵏⵏⵖ ⵉⵔⵉⵎ  ⵍⵍⵉ ⵢⵍⵍⴰⵏ ⴳ ⵜⵛⵛⴰⵡⵜ ⵏ ⵉⴼⵔⵉⵇⵢⴰ ⵓⵍⴰ ⵉⵙⵖⵍⴼⵏ ⵢⵓⵎⵙⵉⵙⵏ ⵏ ⵓⴳⵉⵔ ⵏ ⵢⴰⵡⵓⵏⴷⵉ, ⵍⵍⵉ ⵢⵙⴰⵡⵍⵏ ⵅⴼ ⵜⵓⵎⴰⵏⵜ ⴰⴷ".

ⴰⵎⵎⴰ ⵡⵢⵢⴰⵡ ⵡⵉⵙⵙ ⵙⵉⵏ ⵏ ⵜⵎⵢⴰⴷⴰⵙⵜ ⵜⴰⵖⵣⵓⵔⴰⵏⵜ ⴰⴷ, ⵉⵙⵓⵎⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵓⵙⴷⵓⵙ ⵏ ⵓⵎⵢⴰⵡⴰⵙ ⵅⴼ ⵓⵍⴰⵢ ⴰⴷⵎⵙⴰⵏ ⴷ ⵜⵉⴳⵎⵉ ⵜⴰⵏⴼⴳⴰⵏⵜ ⵜⴰⵙⵓⵍⴰⵏⵜ ⴳ ⵉⴼⵔⵉⵇⵢⴰ, ⴰⵛⴽⵓ ⴼ ⵖⵉⴽⴰⵏⵏ ⴽⴰ ⴰⵙ ⵔⴰⴷ ⵉⵥⴹⴰⵕ ⵜⵏⴰⴳⵔⵉⵜ ⴰⴷ ⵜⵉⵍⵉ.

ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⵉⵙ ⵙⵓⵍ ⵜⵍⵍⴰ ⵉⴼⵔⵉⵇⵢⴰ ⴳ ⴱⵕⵕⴰ ⵏ ⵓⵎⵓⵙⵙⵓ ⵏ ⵓⵙⵖⵏⵣⵉ ⴷ ⵏ ⵓⵙⵙⴰⵔⵓ ⴳ ⵓⵙⵡⵉⵔ ⴰⵎⴰⴹⵍⴰⵏ. ⴼ ⵖⵉⴽⴰⵏⵏ, ⵉⵅⵚⵚⴰ ⴰⴷ ⵎⵓⵏⵜ ⵜⵉⴳⴰⵡⵉⵏ ⵉⵎⵅⴰⵙⵏⵜ ⴰⵎⵎⴰⵙ ⵏ ⵓⵎⵏⵥⴰⵡ ⴷ ⴰⴷ ⵢⵉⵍⵉ ⵢⴰⵏ ⵓⵙⵓⵖⵏ ⵏ ⵜⴳⵔⴰⵡⵜ ⵜⴰⴳⵔⴰⵖⵍⴰⵏⵜ.

ⵉⵔⵏⵓ ⵢⵏⵏⴰ ⵡⴳⵍⵍⵉⴷ ⵉⵙ ⵉⵙⵔⵙ ⵍⵎⵖⵔⵉⴱ ⵉⴼⵔⵉⵇⵢⴰ ⴳ ⵜⵓⵥⵥⵓⵎⵜ ⵏ ⵜⴰⵙⵔⵜⵉⵜ ⵏⵏⵙ ⵏ ⴱⵕⵕⴰ, ⵉⵙⴽⵔ ⵉⵙⵏⵜⵉⵏ ⵉⴽⵎⴰⵎⵏ ⵍⵍⵉ ⵢⵙⵙⴱⵖⵔⵏ ⵎⵏⵏⴰⵡ ⵏ ⵜⵎⵉⵣⴰⵔ ⵏ ⵓⵎⵏⵥⴰⵡ, ⵉⴳⴰ ⴼ ⵖⵉⴽⴰⵏⵏ ⴰⵙⵙⴰⵔⵓⵔ ⴰⴼⵔⵉⵇⵉ ⴰⵎⵣⵡⴰⵔⵓ ⴳ ⵓⴷⵖⴰⵔ ⵏ ⵉⴼⵔⵉⵇⵢⴰ ⵏ ⵜⴰⴳⵓⵜ ⴷ ⵡⵉⵙⵙ ⵙⵉⵏ ⴰⵎⵎⴰⵙ ⵏ ⴽⵓⵍⵍⵓ ⵡⵎⵏⵥⴰⵡ.

ⴰⵎⵎⴰ ⵜⴰⵔⵙⵍⵜ ⵜⵉⵙⵙ ⴽⵕⴰⴹ ⵏ ⵜⵙⵟⵕⴰⵜⵉⵊⵉⵜ ⴰⴷ ⵜⴳⴰⵜ ⴰⵃⵟⵟⵓ ⵏ ⵜⵎⴰⴳⵉⵜ ⵜⴰⴷⵍⵙⴰⵏⵜ ⴷ ⵜⴰⵙⴳⴷⵜ. ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵙ ⵉⴼⴽⴰ ⵍⵎⵖⵔⵉⴱ ⴽⵓⵍⵍⵓ ⵜⵓⴳⴳⴰⵣ ⵏⵏⵙ ⴰⴼⴰⴷ ⴰⴷ ⵉⴼⵔⴳ ⵍⵉⵙⵍⴰⵎ ⴰⵙⵓⵏⵏⵢ ⵉⵍⴷⵓⴷⵉⵏ ⴷ ⵉⵎⵙⵓⵔⵓⴼⵏ ⴷ ⵉⵕⵥⵎⵏ. ⴼ ⵖⵉⴽⴰⵏⵏ, ⵉⵙⵙⴽⵜⵉ ⵡⴳⵍⵍⵉⴷ ⴰⵖⴰⵡⴰⵙ ⵏ ⵓⵙⵎⵓⵜⵜⴳ ⴳ ⵍⵎⵖⵔⵉⴱ ⵏ 500 ⵉⵎⴰⵎ ⴰⵎⴰⵍⵉ, ⵍⵍⵉ ⵢⴰⴷ ⵉⴱⴷⴰⵏ ⴳ ⵓⵣⵔⴰⴽ ⵏ ⵍⵎⴷⵀⴱ ⵏ ⵍⵉⵎⴰⵎ ⵎⴰⵍⵉⴽ.

ⵉⵏⵏⴰ ⵙⵓⵍ ⴱⴰⴱⴰ ⵏ ⵡⴰⴷⴷⵓⵔ ⵉⵙ ⵢⴰⴳⵍ ⴰⵣⵣⴳⵉⵔ ⵏ ⴽⵔⴰ ⵢⴳⴰⵜ ⵜⴰⵙⵟⵕⴰⵜⵉⵊⵉⵜ ⵏ ⵜⵉⴳⵎⵉ ⴰⵙⵓⵍⴰⵏ ⴳ ⵉⴼⵔⵉⵇⵢⴰ ⴷ ⵜⵉⵍⴰⵍⵜ ⵜⴰⵎⵇⵇⵔⴰⵏⵜ ⵏ ⵜⵉⵏⵎⴰⵍⴰⵢⵉⵏ ⵉⵏⵎⴰⴹⵏ.

ⵉⵅⵚⵚⴰ ⴰⴷ ⵜⵉⵍⵉ ⵢⴰⵜ ⵜⴰⵎⵢⴰⴷⴰⵙⵜ ⵜⴰⵎⴰⵢⵏⵓⵜ ⵉⴳⴰⵏ ⵜⴰⵎⵅⴰⵙⵜ ⴷ ⵜⴰⴼⴼⵓⴳⵏⴰⵜ ⴷ ⵜⴰⵎⴰⴽⴽⴰⵢⵜ, ⴰⴼⴰⴷ ⴰⴷ ⵜⵏⵏⴰⵍ ⵜⵓⵎⴰⵏⵜ ⵏ ⵜⵣⵡⴰⴳⵜ, ⵉⵔⵏⵓ ⵢⵏⵏⴰ ⵉⵙ ⴱⵃⵃⵔⴰ ⵉⴹⴼⴰⵕ ⵍⵎⵖⵔⵉⴱ ⵢⴰⵜ ⵜⴰⵙⵔⵜⵉⵜ ⵜⴰⵎⴰⵢⵏⵓⵜ ⵏ ⵜⵣⵡⴰⴳⵜ.

Dernière modification : 06 ⴷⵓⵊⴰⵏⴱⵉⵔ 2013
Source URL: https://www.mapnews.ma/am/activites-royales/%E2%B5%89%E2%B5%96%E2%B5%94%E2%B4%B0-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94-%E2%B4%B0%E2%B4%B3%E2%B5%8D%E2%B5%8D%E2%B5%89%E2%B4%B7-%E2%B5%85%E2%B4%BC-%E2%B5%A2%E2%B4%B0%E2%B5%9C-%E2%B5%9C%E2%B5%8E%E2%B5%A2%E2%B4%B0%E2%B4%B7%E2%B4%B0%E2%B5%99%E2%B5%9C-%E2%B5%9C%E2%B4%B0%E2%B5%96%E2%B5%A3%E2%B5%93%E2%B5%94%E2%B4%B0%E2%B5%8F%E2%B5%9C-%E2%B4%B7-%E2%B5%89%E2%B5%99%E2%B5%8E%E2%B5%99%E2%B4%B0%E2%B5%99%E2%B4%B0%E2%B5%8F-%E2%B4%B0%E2%B4%BC%E2%B4%B0%E2%B4%B7-%E2%B4%B0%E2%B4%B7-%E2%B5%8F%E2%B5%8F%E2%B4%B0%E2%B5%8D%E2%B5%8F#comment-0