ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵏ ⵓⵎⵙⵏⴰⵍⴰ ⵖ ⵏⵢⵓⵢⵓⵕⴽ ⴷ ⵎⴰⵙⵙⴰ ⵀⵉⵍⴰⵕⵉ ⴽⵍⵉⵏⵟⵓⵏ

04 ⴷⵓⵊⴰⵏⴱⵉⵔ 2013 Version Imprimable

ⵕⵕⴱⴰⵟ - ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⵙⵉⵏⴰⵙ ⵖ ⵏⵢⵓ ⵢⵓⵕⴽ, ⵢⴰⵏ ⵓⵎⵙⵏⴰⵍⴰ ⴷ ⵎⴰⵙⵙⴰ ⵀⵉⵍⴰⵕⵉ ⴽⵍⵉⵏⵟⵓⵏ, ⵖⵎⴽⵍⵍⵉ ⵙ ⵉⵏⵏⴰ ⵢⴰⵏ ⵓⵙⵉⵡⴹ ⵏ ⵓⴱⵔⵙⵉⵔⴰ ⴰⴳⵍⴷⴰⵏ.

ⵉⴳⵉⵡⵔ ⴰⴷ ⵍⵍⵉ ⵢⵉⴳⴰⵏ ⵢⴰⵏ ⵓⵣⵎⵓⵣⵣⵓ ⵏ ⵓⵙⵏⴼⵍ ⵅⴼ ⵎⵏⵏⴰⵡ ⵏ ⵉⵙⵏⵜⴰ, ⴰⵔ ⵉⵎⵎⴰⵍ ⵜⵉⴷⴷⵓⴽⵍⴰ ⵉⵍⵍⴰⵏ ⴳⵔ ⵜⴰⵡⵊⴰ ⵜⴰⴳⵍⴷⴰⵏⵜ ⴷ ⵜⴰⵡⵊⴰ ⵏ ⴽⵍⵉⵏⵟⵓⵏ, ⵓⵍⴰ ⵙⵓⵍ ⴰⵜⵉⴳ ⵍⵍⵉ ⵜⴼⴰ ⵎⴰⵙⵙⴰ ⴽⵍⵉⵏⵟⵓⵏ ⵉ ⵍⵎⵖⵔⵉⴱ ⴷ ⵓⴳⴷⵓⴷ ⵏⵏⵙ.

ⵎⴰⵙⵙⴰ ⵀⵉⵍⴰⵕⵉ ⴽⵍⵉⵏⵟⵓⵏ ⵜⴽⴽⴰⵜⵜⵉⵏ ⵜⴳⴰ ⵜⴰⵎⵖⴰⵔⵜ ⵜⴰⵎⵣⵡⴰⵔⵓⵜ ⵏ ⵉⵡⵏⴰⴽⵏ ⵉⵎⵓⵏⵏ ⵏ ⵎⴰⵔⵉⴽⴰⵏ ⴳⵔ 1993 ⴷ 2001, ⵍⵍⵉ ⵖ ⵉⴳⴰ ⴱⵉⵍ ⴽⵍⵉⵏⵜⵓⵏ ⴰⵏⵙⵙⵉⵅⴼ, ⵜⴳ ⵉⵍⵎⵎⴰ ⵜⴰⵏⴼⵍⵓⵙⵜ ⵜⴰⵎⴰⵜⴰⵢⵜ ⴳⵔ 2009 ⴷ 2013 ⵍⵍⵉⵖ ⵉⴳⴰ ⴱⴰⵕⴰⴽ ⵓⴱⴰⵎⴰ ⴰⵏⵙⵙⵉⵅⴼ ⵜⵉⴽⵍⵉⵜ ⵉⵣⵡⴰⵔⵏ.

ⴰⵍⵎⵓⵇⵇⴰⵔ ⴰⴷ ⵉⵍⵍⴰ ⵖ ⵓⵙⴰⵜⵉ ⵏ ⵓⵔⵣⴰⴼ ⵍⵍⵉ ⵢⵉⵙⴽⴰⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵎⴰⵔⵉⴽⴰⵏ, ⵖⵎⴽⵍⵍⵉ ⵙ ⵉⵏⵏⴰ ⵓⵙⵉⵡⴹ.

ⵉⵎⵓⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵖ ⵓⵎⵙⵏⴰⵍⴰ ⵢⴰⴷ ⴷ ⴱⴰⴱ ⵏ ⵜⴰⵜⵜⵓⵢⵜ ⵜⴰⴳⵍⴷⴰⵏⵜ ⴰⴳⵍⴷⵓⵏ ⵎⵓⵍⴰⵢ ⵕⵛⵉⴷ.

Dernière modification : 04 ⴷⵓⵊⴰⵏⴱⵉⵔ 2013

Source URL: https://www.mapnews.ma/am/activites-royales/%E2%B5%89%E2%B5%99%E2%B4%BD%E2%B5%94-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94-%E2%B4%B0%E2%B4%B3%E2%B5%8D%E2%B5%8D%E2%B5%89%E2%B4%B7-%E2%B5%A2%E2%B4%B0%E2%B5%8F-%E2%B5%93%E2%B5%8E%E2%B5%99%E2%B5%8F%E2%B4%B0%E2%B5%8D%E2%B4%B0-%E2%B5%96-%E2%B5%8F%E2%B5%A2%E2%B5%93%E2%B5%A2%E2%B5%93%E2%B5%95%E2%B4%BD-%E2%B4%B7-%E2%B5%8E%E2%B4%B0%E2%B5%99%E2%B5%99%E2%B4%B0-%E2%B5%80%E2%B5%89%E2%B5%8D%E2%B4%B0%E2%B5%95%E2%B5%89-%E2%B4%BD%E2%B5%8D%E2%B5%89%E2%B5%8F%E2%B5%9F%E2%B5%93%E2%B5%8F#comment-0