Published on MAPNews (https://www.mapnews.ma/am)

Accueil > ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵏ ⵉⵏⴰⵡ ⵉ ⵜⴰⵎⵜⵜⵉ ⴳ ⵓⵣⵎⵣⵣⵓ ⵏ ⵜⵎⴽⵜⵉⵜ ⵜⵉⵙⵙ 38 ⵏ ⵜⵡⴰⴷⴰ ⵜⴰⵣⴳⵣⴰⵡⵜ
  1. Accueil
  2. Activités royales

ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵏ ⵉⵏⴰⵡ ⵉ ⵜⴰⵎⵜⵜⵉ ⴳ ⵓⵣⵎⵣⵣⵓ ⵏ ⵜⵎⴽⵜⵉⵜ ⵜⵉⵙⵙ 38 ⵏ ⵜⵡⴰⴷⴰ ⵜⴰⵣⴳⵣⴰⵡⵜ

06 ⵏⵓⵡⴰⵏⴱⵉⵔ 2013 Version Imprimable
ⵕⵕⴱⴰⵟ - ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⴽⵕⴰⵙ, ⵢⴰⵏ ⵉⵏⴰⵡ ⵉ ⵜⴰⵎⵜⵜⵉ ⴳ ⵓⵣⵎⵣⵣⵓ ⵏ ⵜⵎⴽⵜⵉⵜ ⵜⵉⵙⵙ 38 ⵏ ⵜⵡⴰⴷⴰ ⵜⴰⵣⴳⵣⴰⵡⵜ ⵉⵣⵉⵏ.

ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⵉⵙ ⴳⴰⵏⵜ ⴽⵓⵍⵍⵓ ⵜⵉⵡⴰⴷⴰⵜⵉⵏ ⵉⵜⵜⴰⵡⵙⴽⴰⵔⵏ, ⵙ ⵜⴰⵔⴰⵜ ⵏ ⴱⴰⴱ ⵏ ⵡⴰⴷⴷⵓⵔ, ⵔⴰⵏⵜ ⴰⴷ ⵙⴷⵓⵙⵏⵜ ⵉⵣⵔⴼⴰⵏ ⵉⵖⵔⵉⵎⵏ ⴷ ⵉⵙⵔⵜⵉⵏ ⴷ ⴰⴷ ⴹⴼⵕⵏⵜ ⵜⵏⴽⵔⴰ ⵙ ⵜⴰⵙⵓⵜ ⵜⴰⵎⴰⵢⵏⵓⵜ ⵏ ⵉⵣⵔⴼⴰⵏ, ⴰⵛⴽⵓ ⵢⴳⴰ ⴰⵡⵜⵜⴰⵙ ⴰⴷ ⵉⵟⵟⴼ ⵓⵏⵎⵓⵔⵉ ⴰⵎⵖⵔⴰⴱⵉ ⵢⴰⵜ ⵜⴰⵎⵓⵔⵉ ⵉⵙⵎⴷⵏ.

ⵉⵔⵏⵓ ⵢⵏⵏⴰ ⴱⴰⴱ ⵏ ⵡⴰⴷⴷⵓⵔ, ⴱⴷⴰⵏ ⵎⵏⵏⴰⵡ ⵏ ⵉⵙⴽⵍⴽⵍⵏ ⵉⵎⵇⵔⴰⵏⵉⵏ, ⴳ ⵓⵙⴰⵜⵉ ⵏ ⵢⴰⵜ ⵜⵡⴰⴷⴰ ⴰⴳⴼⵍⴰⵏ ⵍⵍⵉ ⵉⵣⵔⴽⵏ ⵜⵥⵍⴰⵢⵉⵏ ⵜⵉⵏⴰⵎⵓⵔⵉⵏ.

ⵜⴰⴳⵍⴷⵉⵜ ⴰⵔ ⵜⵓⵇⴱⴰⵍ ⴰⵣⵖⴰⵏ ⵉⵜⵜⵓⵚⴽⴰⵏ ⵎⴰⵛ ⵜⵓⴳⵉ ⴽⵔⴰ ⵏ ⵜⵉⴳⴰⵡⵉⵏ ⵉⵥⵍⴰⵢⵏⵉⵏ ⵍⵍⵉ ⵔⴰⵏⵜ ⴰⴷ ⵓⵙⵙⵏⵜ ⵜⴰⵡⵍⴰⴼⵜ ⵏⵏⵙ ⴷ ⵉⵎⵄⵉⵏⵏ ⵏⵏⵙ ⴰⵎⵎⴰⵙ ⵏ ⵉⵣⵔⴼⴰⵏ ⵏ ⵓⴼⴳⴰⵏ ⴷ ⵜⵉⴳⵎⵉ.

ⵉⵙⵙⴽⵜⵉ ⴱⴰⴱ ⵏ ⵡⴰⴷⴷⵓⵔ, ⴼ ⵖⵉⴽⴰⵏⵏ, ⴰⵏⴰⵡ ⵏ ⵜⵉⴳⵎⵉ ⵉⵏⵎⵏⴰⴹⵏ ⴳ ⵜⴰⵙⴳⴰⵜⵉⵏ ⵏ ⵉⴼⴼⵓⵙ, ⵍⵍⵉ ⵢⴰⵜ ⵉⴼⴽⴰ ⵓⵙⵇⵇⵉⵎ ⴰⴷⵎⵙⴰⵏ ⴷ ⴰⵏⴰⵎⵓⵏ ⴷ ⴰⵡⵏⴹⴰⵏ, ⵎⴰⵢⴰⴷ ⵉⴳⴰⵏ ⵢⴰⵏ ⵓⵏⴰⵡ ⵏ ⵜⵉⴳⵎⵉ ⵉⵔⴰⵏ ⴰⴷ ⵉⵙⵏⴼⵍ ⵢⴰⵜ ⵜⴰⵙⵔⵜⵉⵜ ⵍⵍⵉ ⵔⴰⴷ ⵢⵉⵍⵉ ⴳ ⵢⴰⵏ ⵉⴳⵉⵔ ⵢⴰⴳⴳⵓⴳⵏ ⴳ ⴽⵔⴰ ⵢⴳⴰⵜ ⵉⴳⵔ.

ⴰⵎⵎⴰⵙ ⵏ ⵜⴰⴷⴰⵎⵙⴰ, ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⵉⵙ ⵔⴰⴷ ⵜⵜⵓⵚⴽⴰⵏ ⵎⵏⵏⴰⵡ ⵏ ⵉⵙⵏⵜⵉⵏ ⵉⵎⵇⵔⴰⵏ ⵏ ⵓⵙⵙⴰⵔⵓ ⴰⴼⴰⴷ ⴰⴷ ⵜⵖⵍⵉ ⵜⵎⵔⵏⵉⵡⵜ ⵜⴰⴷⴰⵎⵙⴰⵜ ⴷ ⴰⴷ ⵉⵍⵉⵏ ⵜⴰⵎⴰⵅⵉⵕⵜ ⵓⵍⴰ ⵉⵙⵡⵓⵔⵉⵏ ⴷ ⴰⴷ ⵜⵙⵙⵔⵇⴱ ⵜⴰⴷⴰⵎⵙⴰ ⵜⴰⵏⴰⵎⵓⵏⵜ ⴷ ⵜⴱⴷⴰⴷⵜ.

ⴰⵎⵎⴰⵙ ⵏ ⵜⵉⴼⵔⵉⵙⵜ ⵜⴰⵏⴰⵎⵓⵏⵜ, ⵔⴰⴷ ⵢⴰⵡⵉ ⴰⵏⴰⵡ ⴰⴷ ⵢⴰⵜ ⵜⴰⵙⵔⵜⵉⵜ ⵜⴰⵎⴰⵢⵏⵓⵜ ⵏ ⵜⵡⵉⵣⵉ ⴷ ⵓⵙⵓⵎⵓ ⴷ ⵓⵃⵟⵟⵓ ⵏ ⵜⵉⵣⵉ ⵏ ⵉⵙⵎⵉⵍⵏ ⵉⵏⵍⵎⴰⴹⵏ ⴷ ⵜⴰⵏⴽⵔⴰ ⵙ ⵜⵉⴳⵎⵉ ⵜⴰⵏⴼⴳⴰⵏⵜ, ⵎⴰⵢⴰⴷ ⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⴰⵎⵎⴰ ⴳ ⵜⵉⴼⵔⵉⵙⵜ ⵜⴰⴷⵍⵙⴰⵏⵜ, ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⵉⵙ ⵔⴰⴷ ⵉⵏⴽⵔ ⵓⵏⴰⵡ ⴰⴷ ⵙ  ⵜⵉⴷⵍⵙⴰⵏ ⴷ ⵜⵥⵍⴰⵢⵉⵏ ⵉⴷⵖⵔⴰⵏⵉⵏ, ⵙ ⵓⵙⴽⵛⵎ ⵏ ⵜⴷⵍⵙⴰ ⵢⴰⴷ ⴳ ⵉⵖⴰⵡⴰⵙⵏ ⵉⵏⵎⵍⴰⵏ ⴷ ⴰⵙⵓⵜⴳ ⵏ ⵓⵢⴷⴰ ⴰⵎⵙⴷⴰⴳ ⴷ ⵓⵙⵔⵇⴱ ⵏ ⵜⵓⴳⵉ ⵉⵙⵔⵇⴱⵏ ⴳ ⵜⴰⵎⵏⴰⴹⵜ.

ⵉⵙⴷⴷⵉⴷ ⴷⴰⵖ ⴱⴰⴱ ⵏ ⵡⴰⴷⴷⵓⵔ ⵜⴰⴳⵯⵎⴰⵏⵉⵜ ⵜⴰⴼⵔⵉⵇⵉⵜ ⵏ ⵜⴳⵍⴷⵉⵜ, ⵖⵉⴽ ⵍⵍⵉ ⵎⵍⴰⵏ ⵉⵔⵣⴰⴼⵏ ⵍⵍⵉ ⵢⵙⴽⵔ ⵙ ⵜⵉⵎⵉⵣⴰⵔ ⵜⵉⴼⵔⵉⵇⵉⵢⵏ ⵣⵓⵏⴷ ⵎⴰⵍⵉ, ⴷ ⵉⵙⵏⵜⵉⵏ ⵏ  ⵜⵉⴳⵎⵉ ⵉⴽⵎⴰⵎⵏ ⵉⴼⴽⴰⵏ ⵜⴰⵣⵡⵓⵔⵉⵜ ⵉ ⵜⴳⵎⵉ ⵜⴰⵏⴼⴳⴰⵏⵜ ⴷ ⵓⵎⵙⵎⵉⵏⵉ ⵏ ⵉⵣⴷⴰⵢⵏ ⵉⵙⴳⴷⵏ ⴳⵔ ⵉⴳⴷⵓⴷⵏ ⴰⴷ ⴷ ⵍⵎⵖⵔⵉⴱ ⵡⵍⴰ ⵍⴰⵎⵉⵔ ⵏ ⵉⵎⵓⵎⵏⵏ.

ⵉⵙⴰⵡⵍ ⵙⵓⵍ ⴱⴰⴱ ⵏ ⵡⴰⴷⴷⵓⵔ ⵅⴼ ⴰⵙⴱⴷⴷⵉ ⵉⵙⴷⵉⴷⵉⵏ ⵏ ⵜⵏⴼⵔⵓⵜ ⴳ ⵚⵚⵃⵕⴰ ⴷ ⵜⴰⵖⴰⵔⵜ ⵓⵍⴰ ⵅⴼ ⵜⴰⵎⵢⴰⴷⴰⵙⵜ ⵉⴼⴼⵓⴳⵏⴰⵏ ⵍⵍⵉ ⵢⴹⴼⴰⵕ ⵍⵎⵖⵔⵉⴱ ⴷⴰⵜ ⵏ ⵜⵎⵔⵏⵉⵡⵜ ⵜⴰⵎⵣⵣⵉⵜ ⵍⵍⵉ ⵢⵓⵛⴽⴰⵏ ⵙⴳ ⵉⴼⵕⵉⵇⵢⴰ ⵏⵖⴷ ⴰⴽⴽⵯ ⵓⵕⵓⴱⴱⴰ, ⵎⴰⵢⴰⴷ ⵉⴳⴰⵏ ⵢⴰ ⵜ ⵜⵎⵢⴰⴷⴰⵙⵜ ⵍⵍⵉ ⵢⵣⵔⴽⵏ ⵉⵙⵓⵖⵏⵏ ⵉⴳⵔⴰⵖⵍⴰⵏ ⵏ ⵜⴳⵍⴷⵉⵜ ⴷ ⵉⵣⵔⴼⵏ ⵏ ⵉⵣⵡⴰⴳⵏ.

 

Dernière modification : 06 ⵏⵓⵡⴰⵏⴱⵉⵔ 2013
Source URL: https://www.mapnews.ma/am/activites-royales/%E2%B5%89%E2%B5%8F%E2%B5%8F%E2%B4%B0-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94-%E2%B4%B0%E2%B4%B3%E2%B5%8D%E2%B5%8D%E2%B5%89%E2%B4%B7-%E2%B5%A2%E2%B4%B0%E2%B5%8F-%E2%B5%89%E2%B5%8F%E2%B4%B0%E2%B5%A1-%E2%B5%89-%E2%B5%9C%E2%B4%B0%E2%B5%8E%E2%B5%9C%E2%B5%9C%E2%B5%89-%E2%B4%B3-%E2%B5%93%E2%B5%A3%E2%B5%8E%E2%B5%A3%E2%B5%A3%E2%B5%93-%E2%B5%8F-%E2%B5%9C%E2%B5%8E%E2%B4%BD%E2%B5%9C%E2%B5%89%E2%B5%9C-%E2%B5%9C%E2%B5%89%E2%B5%99%E2%B5%99-38-%E2%B5%8F-%E2%B5%9C%E2%B5%A1%E2%B4%B0%E2%B4%B7%E2%B4%B0#comment-0