ⴱⴰⴽⵓ.. ⵉⵙⵙⵉⵅⴼ ⵎⴰⵙⵙ ⴰⵅⵏⵓⵛ ⴰⴽⴰⴱⴰⵔ ⴰⵎⵖⵔⵉⴱⵉ ⵉⴷⵔⴰⵏ ⴳ ⵜⵉⵏⴰⵡⵜ ⵏ ⵓⵏⵣⵡⵉ “ⴽⵓⴱ 29”

12 ⵏⵓⵡⴰⵏⴱⵉⵔ 2024 Version Imprimable

ⴱⴰⴽⵓ - ⵉⵙⵏⵓⴱⴳ ⵓⵏⵙⵙⵉⵅⴼ ⵏ ⵜⴳⴷⵓⴷⵏⵜ ⵏ ⴰⴷⵔⵉⴱⵉⴷⵊⴰⵏ ⵉⵍⵀⴰⵎ ⵄⴰⵍⵉⵢⵢⵉⴼ ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵉⵎⵜⵜⴰ ⵉⵎⵓⵏⵏ ⴰⵏⵟⵓⵏⵢⵓ ⴳⵓⵜⵉⵔⵉⵛ ⴰⵙⵙ ⵏ ⵓⵙⵉⵏⴰⵙ ⴳ ⵓⴱⴰⵔⴰⵣ ⵓⵍⴰⵎⴱⵉ ⵏ ⴱⴰⴽⵓ ⴰⵏⵙⵙⵉⵅⴼ ⵏ ⵜⵏⴱⴰⴹⵜ ⵄⴰⵣⵉⵣ ⴰⵅⵏⵓⵛ ⵍⵍⵉ ⵉⵙⵙⵉⵅⴼⵏ ⴰⴽⴰⴱⴰⵔ ⴰⵎⵖⵔⵉⴱⵉ ⵉⴷⵔⴰⵏ ⴳ ⵜⴰⵙⵙⵓⵜⵍⵜ ⵜⵉⵙⵙ 29 ⵏ ⵜⵉⵏⴰⵡⵜ ⵏ ⵉⴳⵎⴰⵎⵏ ⴳ ⵜⴰⵎⵢⴰⵇⵇⴰⵏⵜ ⵏ ⵜⵉⵎⵜⵜⴰ ⵉⵎⵓⵏⵏ ⵅⴼ ⵓⵙⵏⴼⵍ ⵏ ⵓⵏⵣⵡⵉ “ⴽⵓⴱ 29 “ ⵍⵍⵉ ⵉⵜⵜⵓⵙⵏⵎⴰⵍⴰⵏ ⴳ ⴱⴰⴽⵓ.

ⵉⵎⵓⵏ ⵓⵏⵙⵙⵉⵅⴼ ⵏ ⵜⵏⴰⴱⴹⵜ ⴷ ⵜⵎⴰⵡⴰⵙⵜ ⵏ ⵓⵎⵓⵜⵜⵉ ⵏ ⵜⵥⴹⴰⵕⵜ ⴷ ⵜⵉⴳⵎⵉ ⵜⴰⵙⵓⵍⴰⵏⵜ ⴷ ⵓⵎⵙⵇⴰⴷ ⵏ ⵍⵎⵖⵔⵉⴱ ⴳ ⴰⴷⵔⵉⴱⵉⴷⵊⴰⵏ ⵎⵓⵃⵎⵎⴷ ⵄⴰⴷⵉⵍ ⴰⵎⴱⴰⵔⵛ.

ⵉⵔⵣⴼ ⵎⴰⵙⵙ ⴰⵅⵏⵓⵛ ⵎⵏⵏⴰⵡ ⵏ ⵉⴷⵖⴰⵔⵏ ⵏ ⵉⵙⴰⵢⵔⴰⵔⵏ ⵏ ⵜⵉⴳⵍⴷⵉⵜ ⵏ ⵍⵎⵖⵔⵉⴱ ⴷ ⴰⴷⵔⵉⴱⵉⴷⵊⴰⵏ ⵍⵍⵉ ⵉⵍⵍⴰⵏ ⴳ ⵜⴰⵙⴳⴰ ⵜⴰⵥⵕⵡⴰⵍⵜ ⴳ ⵓⴱⴰⵔⴰⵣ ⵓⵍⴰⵎⴱⵉ ⴳ ⴱⴰⴽⵓ ⵉⵙⵙⴼⵍⴷ ⵉ ⵉⵙⴼⵔⴰ ⵅⴼ ⵜⵉⵡⵓⵔⵉⵡⵉⵏ ⵏ ⵜⵉⵎⵉⵣⴰⵔ ⵙⵏⴰⵜ ⴳ ⵉⴳⵔ ⵏ ⵓⵏⵣⵡⵉ ⵙⵍⴰⵡⴰⵏ ⴰⴽⴽⵯ ⴳ ⵉⴳⵔ ⵏ ⵜⵉⵥⴹⴰⵕⵉⵏ ⵜⵉⵎⴰⵢⵏⵓⵜⵉⵏ.

ⵉⴳⴰ ⵓⵏⵎⵓⵇⵇⴰⵔ ⴰⴷ ⴰⴳⵔⴰⵖⵍⴰⵏ ⵙⴳ 11 ⴰⵔ 22 ⵏⵓⵡⴰⵏⴱⵉⵔ ⴰⵣⵎⵣⵣⵓ ⴰⴼⴰⴷ ⴰⵔⵣⵣⵓ ⵅⴼ ⵜⴰⵎⵔⵏⵉⵡⵜ ⵍⵍⵉ ⵉⵜⵜⵓⵙⴽⴰⵔⵏ ⴳ ⵉⴳⵔ ⵓⵙⴱⴷⴷ ⵏ ⵉⵙⵏⴼⴰⵍⵏ ⵏ ⵓⵏⵣⵡⵉ ⴷ ⵉⴱⵔⵉⴷⵏ ⵎⵏⵉⴷ ⵏ ⵜⴰⵎⵓⴽⵔⵉⵙⵜ ⴰⴷ.

ⵔⴰⴷ ⵜⵙⴰⵡⵍ ⵜⵉⵏⴰⵡⵜ ⴰⴷ ⵙⵍⴰⵡⴰⵏ ⴰⴽⴽⵯ ⵅⴼ ⵓⵙⵙⵥⵕⴼ ⵏ ⵓⵏⵣⵡⵉ ⴰⴼⴰⴷ ⴰⵎⵢⴰⵡⴰⵙ ⵏ ⵜⵉⵎⵉⵣⴰⵔ ⴳ ⵜⵓⴳⴳⴰⵙ ⵏ ⵓⵙⴱⴷⴷ ⵏ ⵍⵖⴰⵣⴰⵜ ⵉⵔⵖⴰⵏ ⴷ ⵓⵃⵟⵟⵓ ⵏ ⵉⴼⴳⴰⵏⵏ ⴷ ⵜⵉⴱⵔⵉⴷⵉⵏ ⵏ ⵜⵓⴷⵔⵜ ⵙⴳ ⵜⵉⵎⵓⴽⵔⵉⵙⵉⵏ ⵏ ⵓⵏⵣⵡⵉ ⵙⵍⴰⵡⴰⵏ ⴰⴽⴽⵯ ⵉⵎⵓⵏⵏ ⵉⴹⴰⵄⴼⵏ.

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B4%B1%E2%B4%B0%E2%B4%BD%E2%B5%93-%E2%B5%89%E2%B5%99%E2%B5%99%E2%B5%89%E2%B5%85%E2%B4%BC-%E2%B5%8E%E2%B4%B0%E2%B5%99%E2%B5%99-%E2%B4%B0%E2%B5%85%E2%B5%8F%E2%B5%93%E2%B5%9B-%E2%B4%B0%E2%B4%BD%E2%B4%B0%E2%B4%B1%E2%B4%B0%E2%B5%94-%E2%B4%B0%E2%B5%8E%E2%B5%96%E2%B5%94%E2%B5%89%E2%B4%B1%E2%B5%89-%E2%B5%89%E2%B4%B7%E2%B5%94%E2%B4%B0%E2%B5%8F-%E2%B4%B3-%E2%B5%9C%E2%B5%89%E2%B5%8F%E2%B4%B0%E2%B5%A1%E2%B5%9C-%E2%B5%8F-%E2%B5%93%E2%B5%8F%E2%B5%A3%E2%B5%A1%E2%B5%89-%E2%80%9C%E2%B4%BD%E2%B5%93%E2%B4%B1-29%E2%80%9D