Published on MAPNews (https://www.mapnews.ma/am)

Accueil > ⵢⴰⵏ ⵓⵙⴳⴳⵯⴰⵙ ⴷⴼⴼⵉⵔ ⵏ ⵜⵣⵓⵣⵜ, ⵉⴳⵔⴰⵡⵍ ⵓⵙⴽⴰⵏ ⵏ ⵜⴷⵓⵙⵉ ⴳ ⵍⵃⴰⵡⵣ

ⵢⴰⵏ ⵓⵙⴳⴳⵯⴰⵙ ⴷⴼⴼⵉⵔ ⵏ ⵜⵣⵓⵣⵜ, ⵉⴳⵔⴰⵡⵍ ⵓⵙⴽⴰⵏ ⵏ ⵜⴷⵓⵙⵉ ⴳ ⵍⵃⴰⵡⵣ

04 ⵛⵓⵜⴰⵏⴱⵉⵔ 2024 Version Imprimable
ⵍⵃⴰⵡⵣ - ⵢⴰⵏ ⵓⵙⴳⴳⵯⴰⵙ ⴷⴼⴼⵉⵔ ⵏ ⵜⵣⵓⵣⵜ, ⵜⴳⵔⴰⵡⵍ ⵜⵙⴳⴰ ⵏ ⵍⵃⴰⵡⵣ ⵙ ⵢⴰⵜ ⵜⴷⵉⵏⴰⵎⵉⵜ ⵉⵅⴰⵜⴰⵔⵏ ⴳ ⵎⵏⵏⴰⵡ ⵏ ⵉⴳⵔⵏ, ⴰⵎⵎⴰⵜ ⵏⵏⵙⵏ ⵜⴰⴷⵓⵙⵉ, ⵍⵍⵉ ⵓⴱⵉⴷⴷⵏ ⵅⴼ ⵎⵏⵏⴰⵡ ⵏ ⵉⵙⵏⵜⵉⵏ ⵉⴼⴼⵖⵏ ⴳ ⵓⵙⴰⵜⵉ ⵏ ⵓⵖⴰⵡⴰⵙ ⴰⵎⵇⵕⴰⵏ ⵏ ⵜⵓⵚⴽⴰ.

ⵉⵙⵏⵜⵉⵏ ⴰⴷ ⵔⴰⵏ ⴰⴷ ⵙⵙⵇⵕⵕⴱⵏ ⵜⵏⴰⴼⵓⵜⵉⵏ ⵉ ⵢⵎⵣⴷⴰⵖⵏ ⵍⵍⵉ ⵜⵓⵜ ⵜⵎⴰⴹⵓⵏⵜ ⵏ ⵜⵣⵓⵣⵜ ⴰⵙⵙ ⵏ 8 ⵛⵓⵜⴰⵏⴱⵉⵔ 2023, ⴷ ⴳⴰⵏ ⵢⴰⵜ ⵜⴽⵍⵉ ⵉⴷⴷⵓⵔⵏ ⴳ ⵓⵙⵉⴳⴳⵍ ⵏ ⵜⴳⵎⵉ ⴷ ⵓⵙⴷⵓⵙ ⵏ ⵜⵓⵚⴽⵉⵡⵜ ⵜⴰⵏⴰⴷⴷⴰⵡⵜ ⴳ ⵜⵙⴳⴰ, ⵙⵍⴰⵡⴰⵏ ⴰⴽⴽⵯ ⴳ ⵉⴳⵔ ⵏ ⵜⴷⵓⵙⵉ.

ⴷⴼⴼⵉⵔ ⵏ ⵢⴰⵏ ⵓⵙⴳⴳⵯⴰⵙ, ⵜⵍⵍⴰ ⵖⵉⵍ ⴰⴷ ⴳ ⵜⵙⴳⴰ ⵏ ⵍⵃⴰⵡⵣ ⵎⵏⵏⴰⵡⵜ ⵏ ⵜⵓⵚⴽⵉⵡⵉⵏ ⵏ ⵜⴷⵓⵙⵉ ⵉⵟⵟⴰⴼⵏ ⵉⵎⴰⵡⴰⵏⵏ ⵉⵎⴰⵢⵏⵓⵏⵏ, ⵉⵥⴹⴰⵕⵏ ⴰⴷ ⵔⴰⵔⵏ ⵅⴼ ⵜⵉⵔⴰⵜⵉⵏ ⵏ ⵉⵎⵣⴷⴰⵖⵏ ⵉⴷⵖⵔⴰⵏ ⴳ ⵉⴳⵔ ⵏ ⵓⴽⵛⵛⵓⵎ ⵙ ⵓⵙⵓⵊⵊⵉ.

ⵙ ⵓⵎⵢⴰⵡⴰⵙ ⴷ ⵜⵏⴱⴰⴹⵉⵏ ⵜⵉⵙⴳⴰⵡⴰⵏⵉⵏ ⴷ ⵎⵏⵏⴰⵡ ⵏ ⵉⵎⵙⴽⴰⵔⵏ ⵢⴰⴹⵏⵉⵏ, ⵜⵙⵙⵓⴼⵖ ⵜⵎⴰⵡⴰⵙⵜ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ ⵎⵏⵏⴰⵡ ⵏ ⵉⵙⵏⵜⵉⵏ ⵢⵉⵡⵉⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⵜⵉⵎⴰⵢⵏⵓⵜⵉⵏ.

ⵎⵍⴰⵏⵜ ⵜⵎⵓⵛⴰ ⵏ ⵜⵎⵓⵔⴰⵢⵜ ⵜⵙⴳⵔⴰⵡⴰⵏⵜ ⵏ ⵜⴷⵓⵙⵉ ⴷ ⵓⴼⵔⴰⴳ ⴰⵏⴰⵎⵓⵏ ⴳ ⵍⵃⴰⵡⵣ ⵙⵎⵎⵓⵙ ⵏ ⵉⵎⵎⴰⵙⵏ ⵏ ⵜⴷⵓⵙⵉ ⵍⵍⵉ ⵢⵜⵜⵓⵚⴽⴰⵏ ⴷ ⵉⵜⵜⵓⵙⵎⴰⵡⴰⵏ, ⵓⵍⴰ 32 ⵢⴰⴹⵏⵉⵏ ⵍⵍⵉ ⴰⵔ ⵙⵓⵍ ⵉⵜⵜⵓⵚⴽⴰⵏ.

ⴰⵎⵎⴰⵙ ⵏ ⵜⵎⵔⵙⵍⵉⵏ ⴰⴷ, ⵍⵍⴰⵏ ⵉⵎⵎⴰⵙⵏ ⵏ ⵜⴷⵓⵙⵉ ⵏ ⴰⵙⵏⵉ ⴷ ⵉⵎⵍⵉⵍ ⵍⵍⵉ ⵢⵟⵟⴰⴼⵏ ⵜⵏⴰⴼⵓⵜⵉⵏ ⵏ ⵜⴷⵓⵙⵉ ⵏ ⵜⵔⵡⴰ ⴷ ⵉⴼⵔⵅⴰⵏ, ⴷ ⵜⵉⴷⴰⵍⴰⵏ ⵏ ⵜⵔⵡⴰ, ⴷ ⵜⵉⴷⴰⵍⴰⵏ ⵏ ⴷⴼⴼⵉⵔ ⵏ ⵜⵔⵡⴰ ⴷ ⵓⵍⵜⵉⵍⵉⴼⵉⵣⵢⵓⵏ ⴰⴽⵉⴳⵔⴰⴼ.

ⴳ ⵜⵙⴳⵓⵔⵉⵡⵉⵏ ⵉ ⵜⵙⵏⵓⵔⴰⵢⵜ ⵜⵎⵖⵔⴰⴱⵉⵜ ⵏ ⵜⵏⵖⵎⴰⵙⵜ (ⵍⴰⵎⴰⴱ), ⵎⵍⴰⵏ ⵎⵏⵏⴰⵡ ⵏ ⵉⵎⵣⴷⴰⵖⵏ ⵏ ⵜⵙⴳⴰ ⴰⴷⴳⵉ ⵏⵏⵙⵏ ⵅⴼ ⵜⵖⴰⵔⴰ ⵏ ⵜⵏⴰⴼⵓⵜⵉⵏ ⵏ ⵜⴷⵓⵙⵉ ⵉⵜⵜⵢⴰⴽⴽⴰⵏ ⵉ ⵢⵎⵣⴷⴰⵖⵏ ⵉⴷⵖⵔⴰⵏ, ⵙⵍⴰⵡⴰⵏ ⴰⴽⴽⵯ ⵉ ⵎⴷⴷⵏ ⵍⵍⵉ ⵜⵓⵜ ⵜⵣⵓⵣⵜ.

ⵜⵏⵏⴰ ⵥⵀⵕⴰ ⵥⵥⵀⵕⴰⵡⵉ, ⵜⴰⴼⵔⵎⵍⵉⵜ ⴳ ⵓⵎⵎⴰⵙ ⵏ ⵜⴷⵓⵙⵉ ⵏ ⴰⵙⵏⵉ, ⵎⴰⵙ ⵜⵟⵟⴰⴼ ⵜⵓⵚⴽⵉⵡⵜ ⵏ ⵜⵙⵓⵜ ⵜⴰⵎⴰⵢⵏⵓⵜ ⴰⴷ ⵉⵎⴰⵡⴰⵏ ⴷ ⵓⵙⵔⵓⵙⵏ ⵉⵅⴰⵜⴰⵔⵏ ⴷ ⵓⴳⵓⵍⴰⴼ ⴰⵎⵙⵏⵉⵊⵊⵉ ⴰⵎⵖⵔⴰⵜ.

"ⴰⵡⵜⵜⴰⵙ ⵏⵏⵖ ⵉⴳⴰ ⴰⴷ ⵏⴼⴽ ⵉ ⵢⵎⵣⴷⴰⵖⵏ ⵏ ⵜⵙⴳⴰ ⵢⴰⴷ ⵓⵍⴰ ⵡⵉⵏⵏ ⵢⵓⵛⴽⴰⵏ ⵙⴳ ⵉⴹⵡⵡⴰⵕⵏ ⵉⵇⵕⵕⴱⵏ ⵜⴰⴽⵙⵙⴰ ⵉⵅⴰⵜⴰⵔⵏ ⴳ ⵎⵏⵏⴰⵡ ⵏ ⵉⴳⵔⵏ ⵉⵎⵙⵏⵉⵊⵊⵉⵏ, ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⴳⴳⵔⵏ ⵉ ⵜⴷⵓⵙⵉ ⵜ ⵜⵔⵡⴰ ⴷ ⵉⴼⵔⵅⴰⵏ", ⵎⴰ ⵢⴰⴷ ⵜⵏⵏⴰ.

ⵙⴳ ⵜⵣⵓⵣⵜ ⵏ ⵍⵃⴰⵡⵣ, ⵜⴹⴼⴰⵕ ⴱⴷⴷⴰ ⵜⵎⵓⵔⴰⵢⵜ ⵜⴰⵙⴳⵔⴰⵡⴰⵏⵜ ⵏ ⵜⴷⵓⵙⵉ ⵜⵉⵏⴰⴼⵓⵜⵉⵏ ⴳ ⵉⵎⵎⴰⵙⵏ ⵏ ⵜⴷⵓⵙⵉ ⵍⵍⵉ ⵢⵜⵜⵢⴰⴽⴽⴰⵏ, ⵙⵍⴰⵡⴰⵏ ⴰⴽⴽⵯ ⵙ ⵉⴼⵔⴷⵉⵙⵏ ⵏ ⵜⴷⵓⵙⵉ ⵉⵜⵜⵎⴰⵙⵙⴰⵏ.

ⵜⵓⴳⴳⴰⵣ ⴰⴷ ⵜⵜⵓⵙⴷⵓⵙⵏⵜ ⵙ ⵜⵏⴰⴼⵓⵜⵉⵏ ⵜⵉⵎⵙⵏⵉⵊⵊⵉⵏ ⵏ ⵓⵎⵉⵔⵉ ⵍⵍⵉ ⵜⵙⵔⵙ ⵜⵉⵎⵔⵙⵍⵜ ⵎⵓⵃⵎⵎⴷ ⵡⵉⵙⵙ ⵙⵎⵎⵓⵙ ⵏ ⵓⵎⵢⴰⵡⴰⵙ ⴳ ⴰⵎⵥⵎⵉⵥ, ⴷ ⵜⴰⵍⴰⵜ ⵏ ⵢⵄⵇⵓⴱ, ⴷ ⵡⵉⵔⴳⴰⵏ ⴷ ⴰⵙⵏⵉ ⴰⴼⴰⴷ ⴼⴽⵉⵏ ⵢⴰⵜ ⵜⵏⴰⴼⵓⵜ ⵏ ⵜⴷⵓⵙⵉ ⵉⵅⴰⵜⴰⵔⵏ ⵉ ⵢⵎⵣⴷⴰⵖⵏ ⵏ ⵜⵙⴳⴰ.

Source URL: https://www.mapnews.ma/am/actualites/%E2%B4%B0%E2%B5%8F%E2%B5%8E%E2%B5%8F%E2%B4%B0%E2%B4%B9/%E2%B5%A2%E2%B4%B0%E2%B5%8F-%E2%B5%93%E2%B5%99%E2%B4%B3%E2%B4%B3%E2%B5%AF%E2%B4%B0%E2%B5%99-%E2%B4%B7%E2%B4%BC%E2%B4%BC%E2%B5%89%E2%B5%94-%E2%B5%8F-%E2%B5%9C%E2%B5%A3%E2%B5%93%E2%B5%A3%E2%B5%9C-%E2%B5%89%E2%B4%B3%E2%B5%94%E2%B4%B0%E2%B5%A1%E2%B5%8D-%E2%B5%93%E2%B5%99%E2%B4%BD%E2%B4%B0%E2%B5%8F-%E2%B5%8F-%E2%B5%9C%E2%B4%B7%E2%B5%93%E2%B5%99%E2%B5%89-%E2%B4%B3-%E2%B5%8D%E2%B5%83%E2%B4%B0%E2%B5%A1%E2%B5%A3