ⵔⴰⴷ ⵜⵙⵡⵡⵓⵔⵉ ⵜⵏⴱⴰⴹⵜ ⴳ ⵓⵣⴳⵏ ⵡⵉⵙⵙ ⵙⵉⵏ ⵏ ⵓⵏⴱⴰⴹ ⵏⵏⵙ ⴳ ⵓⵙⴷⵓⵙ ⵏ ⵜⴷⵉⵏⴰⵎⵉⵜ ⵏ ⵓⵙⵙⴰⵔⵓ ⴷ ⵜⵓⵚⴽⴰ ⵏ ⵜⵡⵡⵓⵔⵉ (ⴰⵅⵏⵏⵓⵛ)

29 ⵖⵓⵛⵜ 2024 Version Imprimable

ⵕⵕⴱⴰⵟ - ⵉⵙⴷⴷⵉⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵄⴰⵣⵉⵣ ⴰⵅⵏⵏⵓⵛ, ⴰⵙⵙ ⵏ ⵓⴽⵡⴰⵙ ⴳ ⵕⵕⴱⴰⵟ, ⵎⴰⵙ ⵔⴰⴷ ⵜⵙⵡⵡⵓⵔⵉ ⵜⵏⴱⴰⴹⵜ ⴳ ⵓⵣⴳⵏ ⵡⵉⵙⵙ ⵙⵉⵏ ⵏ ⵓⵏⴱⴰⴹ ⵏⵏⵙ ⴳ ⵓⵙⴷⵓⵙ ⵏ ⵜⴷⵉⵏⴰⵎⵉⵜ ⵏ ⵓⵙⵙⴰⵔⵓ ⴷ ⵜⵓⵚⴽⴰ ⵏ ⵜⵡⵡⵓⵔⵉ.

ⵉⵎⵍⴰ ⵎⴰⵙⵙ ⴰⵅⵏⵏⵓⵛ ⴳ ⵢⴰⵜ ⵜⵙⴳⵓⵔⵉ ⴳ ⵓⵕⵥⵥⵓⵎ ⵏ ⵓⵙⵇⵇⵉⵎ ⵏ ⵜⵏⴱⴰⴹⵜ ⵎⴰⵙ ⵉⵣⴷⵉ ⵓⵙⴷⵓⵙ ⵏ ⵜⵙⵉⵍⴰ ⵏ ⵓⵡⴰⵏⴽ ⴰⵏⴰⵎⵓⵏ ⵍⵍⵉ ⵢⵔⴰ ⴱⴰⴱ ⵏ ⵡⴰⴷⴷⵓⵔ ⴷ ⵜⵡⵡⵓⵔⵉ ⵏ ⵜⵏⴱⴰⴹⵜ ⴳ ⵓⵣⴳⵏ ⵡⵉⵙⵙ ⵙⵉⵏ ⵏ ⵓⵏⴱⴰⴹ ⵏⵏⵙ ⴳ ⵓⵙⴷⵓⵙ ⵏ ⵜⴷⵉⵏⴰⵎⵉⵜ ⵏ ⵓⵙⵙⴰⵔⵓ ⴷ ⵜⵓⵚⴽⴰ ⵏ ⵜⵡⵡⵓⵔⵉ ⵙ ⵜⵉⵍⵉⵜ ⵏ ⵓⵎⵏⴰⴹ ⵏ ⵓⵙⵙⴰⵔⵓ ⵍⵍⵉ ⵔⴰⴷ ⵢⴰⵡⵙ ⴳ ⵜⵎⵔⵏⵉⵡⵜ ⵜⴰⴷⴰⵎⵙⴰⵏⵜ ⵜⴰⵙⵓⵍⴰⵏⵜ ⵖⵎⴽⵍⵍⵉ ⵉⵣⵎⵎⴻⵎ ⴱⴰⴱ ⵏ ⵡⴰⴷⴷⵓⵔ.

ⵉⵔⵏⴰ ⵢⵏⵏⴰ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⵎⴰⵙ ⵔⴰⴷ ⵉⵍⵉⵏ ⴳ ⵓⴽⵛⵛⵓⵎ ⴰⵙⵔⵜⴰⵏ ⵉⵡⵜⵜⴰⵙⵏ ⵉⵅⴰⵜⴰⵔⵏ ⵍⵍⵉⴷ ⵉⵇⵇⴰⵏ ⵜⵓⴳⴳⴰⵙ ⵉⴳⴳⵓⵜⵏ ⵅⴼ ⵓⵣⴰⴳⵣ ⵏ ⵜⵙⵔⵜⵉⵜⵉⵏ ⵜⵉⴳⴷⵓⴷⴰⵏⵉⵏ ⵍⵍⵉⵙ ⵜⵍⵜⴰⵣⵎ ⵜⵏⴱⴰⴹⵜ ⴷ ⵍⵎⴰⵄⵇⵓⵍ ⴰⴼⴰⴷ ⵢⵉⵍⵉ ⴰⵙⵔⵙ ⵏ ⵉⵙⵉⵜⵏ ⵍⵍⵉ ⵢⵍⵍⴰⵏ ⴳ ⵓⵖⴰⵡⴰⵙ ⵎⴰⵢⴰⴷ ⵔⴰⵙⵜ ⵢⴰⵊⵊ ⴳ ⵓⵙⵡⵉⵔ ⵏ ⵜⵎⵙⵙⵓⴳⵓⵔⵜ ⵍⵍⵉⵙⵜ ⵉⵜⵜⵓⵙⵎⴳⵍ ⴱⴰⴱ ⵏ ⵡⴰⴷⴷⵓⵔ.

ⵖⵎⴽⵍⵍⵉ ⴷ ⵉⵙⵙⴽⵜⵉ ⴰⵅⵏⵏⵓⵛ ⵜⴰⵏⵏⴰⵢⵉⵏ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⵍⵍⵉⴷ ⵢⵓⵛⴽⴰⵏ ⴳ ⵉⵏⴰⵡ ⵏ ⵜⴼⵓⴳⵍⴰ ⵏ ⵓⴷⴰⴱⵓ, ⵉⵔⵏⴰ ⵢⵏⵏⴰ ⵎⴰⵙ ⵉⴳⴰ ⵎⴰⵢⴰⴷ ⴰⴱⵔⵉⴷ ⵏ ⵜⵡⵡⵓⵔⵉ ⵏ ⵜⵏⴱⴰⴹⵜ ⵙⵍⴰⵡⴰⵏ ⴰⴽⴽⵯ ⴳ ⵎⴰⴷ ⵉⵥⵍⵉⵏ ⵙ ⵜⵖⴰⵡⵙⴰ ⵜⴰⵙⵜⵔⴰⵜⵉⵊⵉⵜ ⵏ ⵡⴰⵎⴰⵏ.

ⵉⵙⴷⴷⵉⴷ ⵎⴰⵙ ⵜⵎⴰⵏ ⵜⵉⵜⴰⵔ ⵏ ⵜⵏⴱⴰⴹⵜ ⴷ ⵜⵙⴽⵜⵉⵜ ⵏ ⵓⴱⵔⵉⴷ ⵉⵥⵍⵉⵏ ⵙ ⵓⵖⴰⵡⴰⵙ ⵏ ⵓⵔⵣⴼ ⵏ ⵜⵥⵕⴼⵜ ⵏ ⵓⵙⴳⴳⵯⴰⵙ ⵏ 2025 ⵍⵍⵉ ⵢⵍⴽⵎⵏ ⴰⴽⴽⵯ ⵉⴳⵔⴰⵏ ⵏ ⵜⵎⴰⵡⴰⵙⵉⵏ ⴳ ⵍⴱⴷⵓ ⵏ ⵡⴰⵢⵢⵓⵔ ⴰⴷ.

Source URL: https://www.mapnews.ma/am/actualites/%E2%B5%9C%E2%B4%B0%E2%B5%99%E2%B5%94%E2%B5%9C%E2%B5%89%E2%B5%9C/%E2%B5%94%E2%B4%B0%E2%B4%B7-%E2%B5%9C%E2%B5%99%E2%B5%A1%E2%B5%A1%E2%B5%93%E2%B5%94%E2%B5%89-%E2%B5%9C%E2%B5%8F%E2%B4%B1%E2%B4%B0%E2%B4%B9%E2%B5%9C-%E2%B4%B3-%E2%B5%93%E2%B5%A3%E2%B4%B3%E2%B5%8F-%E2%B5%A1%E2%B5%89%E2%B5%99%E2%B5%99-%E2%B5%99%E2%B5%89%E2%B5%8F-%E2%B5%8F-%E2%B5%93%E2%B5%8F%E2%B4%B1%E2%B4%B0%E2%B4%B9-%E2%B5%8F%E2%B5%8F%E2%B5%99-%E2%B4%B3-%E2%B5%93%E2%B5%99%E2%B4%B7%E2%B5%93%E2%B5%99-%E2%B5%8F-%E2%B5%9C%E2%B4%B7%E2%B5%89%E2%B5%8F%E2%B4%B0%E2%B5%8E%E2%B5%89%E2%B5%9C-%E2%B5%8F-%E2%B5%93%E2%B5%99%E2%B5%99%E2%B4%B0%E2%B5%94%E2%B5%93-%E2%B4%B7