Published on MAPNews (https://www.mapnews.ma/am)

Accueil > ⵜⵉⵔⵔⴰ ⵏ ⵜⴰⵢⵙⵉ ⵜⴰⵎⴰⵙⵉⵖⵜ ⵜⴰⵎⵉⵡⴰⵏⵜ ⴰⵔ ⵙⵙⵓⵙⵄⵓ ⵏ ⵎⵉⴷⴷⵏ ⵉⴷⴷⴰⵏ ⵉ ⵜⴰⵢⵙⵉ ⴰⴷ ⵜⴰⴳⵍⴰⵏⵜ

ⵜⵉⵔⵔⴰ ⵏ ⵜⴰⵢⵙⵉ ⵜⴰⵎⴰⵙⵉⵖⵜ ⵜⴰⵎⵉⵡⴰⵏⵜ ⴰⵔ ⵙⵙⵓⵙⵄⵓ ⵏ ⵎⵉⴷⴷⵏ ⵉⴷⴷⴰⵏ ⵉ ⵜⴰⵢⵙⵉ ⴰⴷ ⵜⴰⴳⵍⴰⵏⵜ

26 ⴷⵓⵊⴰⵏⴱⵉⵔ 2023 - par : (ⵉⵙⴽⵔ ⵜ ⵊⴰⵎⴰⵍ ⴷⴷⵉⵏ ⴱⵏ ⵍⵄⴰⵕⴱⵉ) Version Imprimable
ⵕⵕⴱⴰⵟ -  ⵜⴰⵖⵓⵍ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵉⵜⵜⵢⴰⵔⴰⵏ ⴰⵔ ⵜⴻⵜⵜⴰⵡⵉ ⵜⵉⴹⵜ ⵏ ⵡⵉⴷⴰ ⵉⵙⴰⵡⴰⵍⵏ ⵙ ⵜⵎⴰⵣⵉⵖⵜ ⵍⵍⵉⵖ ⵜⵜ ⵉⵡⵉⵏ ⴳ ⵓⵙⵏⴼⵍⵓⵍ ⵓⵍⴰ ⵉⵔⵣⵣⵓⵜⵏ ⵉⵜⵜⵉⵢⵙⴽⴰⵔⵏ ⵙ ⵜⵓⵜⵍⴰⵢⵜ ⵏⵏⵙⵏ.

ⵎⴰⵢⴰⴷ ⵜⵉⵡⵉ ⵜ ⵉⴷ ⵜⴰⵖⴰⵔⴰⵙⵜ ⵍⵍⵉ ⵙ ⵙⵡⵡⵓⵔⵉⵏ ⵉⵎⵙⵏⴼⵍⵓⵍⵏ ⵓⵍⴰ ⵉⵎⵔⵣⵓⵜⵏ ⵍⵍⵉ ⵢⵓⵔⴰⵏ ⵜⴰⵢⵙⵉ ⵜⴰⵎⵖⵔⵉⴱⵉⵜ ⵜⴰⵎⴰⵣⵉⵖⵜ ⵍⵍⵉ ⴰⴷⵍⵉ ⵉⴳⴰⵏ ⵜⴰⵎⵉⵡⴰⵏⵜ, ⵙⵎⵎⴰⵜⵜⵉⵏ ⵜⵜ ⵣⴳ ⵡⴰⵡⴰⵍ ⴼⴰⴷ ⴰⴷ ⵜⴳ ⴰⵔⵔⴰⵜⵏ ⵍⵍⵉ ⵙ ⵉⵣⵎⵔ ⴽⵓ ⵢⴰⵏ ⴰⴷ ⵜⵏ ⵢⴰⴼ ⵉⵖⵔ ⵜⵏ.

ⵏⵏⴰⵏ ⵜⵓⴳⵜⵜ ⵏ ⵉⵎⵔⵣⵓⵜⵏ ⴳ ⵢⵉⴳⵔ ⵏ ⵜⵎⴰⵣⵉⵖⵜ ⵎⴰⵙⴷ ⴰⵙⵎⵎⴰⵜⵜⵉ ⵏ ⵜⴰⵢⵙⵉ ⵜⴰⵎⵉⵡⴰⵏⵜ ⵙ ⵜⵉⵔⵔⴰ, ⵙ ⵜⵄⵕⴰⴱⵜ ⴷ ⵜⴰⴼⵕⴰⵏⵙⵉⵙⵜ ⵏⵖ ⵜⵉⴼⵉⵏⴰⵖ, ⵉⴼⴽⴰ ⵜⴰⵢⴰⴼⵓⵜ ⵏⵏⵙ ⵉⴳ ⴰⵖⴱⴰⵍⵓ ⵍⵍⵉ ⴳ ⵔⴰⴷ ⵜⵜⴰⴳⵎⵏ ⵉⵎⵔⵣⵓⵜⵏ.

ⵙⵙⵓⵎⴰⵏⵏ ⵜⵓⴳⵜⵜ ⵏ ⵉⵎⵔⵣⵓⵜⵏ ⵎⴰⵙⴷ ⴰⵎⵎⴰⵜⵜⵉ ⵣⴳ ⵓⵎⵉⵡⴰⵏ ⵙ ⵓⵎⵉⵔⴰⵢ ⴳ ⵜⴰⵢⵙⵉ ⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵉⵔⴰ ⴰⴷ ⵏⵉⵜ ⵏⵙⵙⵏ ⵉⵣⵍⵙ ⵏⵏⵖ ⴷ ⴰⵢⴷⴰ ⵢⵓⵙⵉ ⴳ ⵉⵙⵡⵉⵔⵏ ⵏ ⵡⴰⵎⵓⵏ ⵓⵍⴰ ⴰⵎⵢⵉⵡⵏ, ⴷ ⵜⵖⴰⵔⴰⵙⵜ ⵍⵍⵉ ⵙ ⵏⵥⴹⴰⵕ ⴰⴷ ⵜ ⵙⵉⵙ ⵏⴰⵔⴰ ⴼⴰⴷ ⴰⴷ ⵢⴰⵥ ⵉ ⴽⵓ ⵢⴰⵏ, ⴳ ⵉⴷⵍⵉⵙⵏ ⴷ ⵜⵓⵛⴽⵉⵏⵉⵏ ⴷ ⵉⵔⵣⵣⵓⵜⵏ.

ⵉⴳⴰ ⵏⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵜⵓⴳⴳⴰⵙ ⵏⵏⵙ ⴳ ⵢⵉⴳⵔ ⴰⴷ, ⵉⴳ ⵎⴰⵢⴰⴷ ⵣⴳ ⵜⵡⵡⵓⵔⵉⵡⵉⵏ ⵍⵍⵉ ⴰⵙ ⵉⵜⵜⵉⵢⴼⴽⴰⵏ ⴳ ⵓⵎⴰⵀⵉⵕ ⵍⵍⵉ ⵙ ⵉⵜⵜⵉⵢⵙⴽⴰⵔ ⵓⵙⵉⵏⴰⴳ, ⵎⴽⵍⵍⵉ ⵙ ⵜⵏⵏⴰ ⵜⵏⵜⴰⵎⵜ ⵜⵉⵉⵙ ⴽⵕⴰⴹⵜ ⵎⴰⵙⴷ ⵣⴳ ⵜⵡⵡⵓⵔⵉⵡⵉⵏ ⵏ ⵓⵙⵉⵏⴰⴳ "ⴰⴷ ⵉⵙⵎⵓⵏⴰ ⵢⴰⵔⴰ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵢⴰⵔⵉ ⵜⵜ, ⵢⴰⵡⵙ ⴳ ⵓⵣⵓⵣⵣⵔ ⵏⵏⵙ".

ⴳ ⵜⵙⴳⴰ ⴰⴷ, ⵉⵏⵏⴰ ⵍⵎⵃⴼⵓⴹ ⴰⵙⵎⴰⵀⵔⵉ, ⴰⵎⵔⵣⵓ ⵏ ⵡⴰⵎⵎⴰⵙ ⵏ ⵉⵔⵣⵣⵓⵜⵏ ⵏ ⵓⵎⵣⵔⵓⵢ ⴳ ⵓⵙⵉⵏⴰⴳ, ⵎⴰⵙⴷ ⴳⵔ ⵜⵡⵡⵓⵔⵉⵡⵉⵏ ⵏ ⵜⵔⵙⵍⵜ ⵜⴰⴷⵍⵙⴰⵏⵜ ⵉⴳⴰ ⵜⵜ ⵜⵉⵔⵔⴰ ⵜⵓⵙⵏⴰⵏⵜ ⵏ ⵜⴰⵢⵙⵉ ⵜⴰⵎⴰⵣⵉⵖⵜ ⵙ ⵡⴰⵏⴰⵡⵏ ⵏⵏⵙ, ⴷ ⵉⵇⵇⴰⵏ ⴷ ⴰⴷ ⵏⵙⵎⵔⵙ ⵜⴰⵍⵍⴰⵙⵜ ⵜⴰⵎⵉⵡⴰⵏⵜ ⴼⴰⴷ ⴰⴷ ⵏⵍⴽⵎ ⴰⵡⵜⵜⴰⵙ ⴰⴷ.

ⵉⵏⵏⴰ ⵓⵙⵎⴰⵀⵔⵉ, ⴳ ⵜⴳⵓⵔⵉ ⵏⵏⵙ ⵉ ⵜⵙⵏⵓⵔⴰⵢⵜ ⵜⴰⵎⵖⵔⵉⴱⵉⵜ ⵉ ⵉⵏⵖⵎⵉⵙⵏ, ⵎⴰⵙⴷ ⴰⵔⴰⵢ ⵏ ⵜⴰⵢⵙⵉ ⵜⴰⵎⵉⵡⴰⵏⵜ ⵜⴰⵎⴰⵣⵉⵖⵜ ⵔⴰⴷ ⵢⵉⵍⵉ ⵙ ⵜⵉⵔⵔⴰ ⵏⵏⵙ ⴷ ⵓⵙⴼⵙⵉ ⵏⵏⵙ ⵙ ⵜⵖⴰⵔⴰⵙⵜ ⵉⴳⴰⵏ ⵜⵓⵙⵏⴰⵏⵜ.

ⵉⵎⵍ ⵎⴰⵙ ⵉⵍⵍⴰ ⵏⴰⵃⵢⴰ ⴳ ⵜⵖⴰⵔⴰⵙⵜ ⵏ ⵜⵡⵡⵓⵔⵉ ⴳ ⴽⵓ ⵉⴳⵔ, ⵙ ⵓⵎⴷⵢⴰ ⴳ ⵢⵉⴳⵔ ⵏ ⵓⵎⵣⵔⵓⵢ ⵓⵙⵡⵡⵓⵔⵉ ⵅⴼ ⵜⴰⵍⵍⴰⵙⵜ ⵜⴰⵎⵉⵡⴰⵏⵜ, ⵣⵓⵏⴷ ⵜⵉⵣⵉ ⵏ ⵓⵙⴷⴷⵓⵔⵔⵓⵢ ⴷ ⴷⴰⵜ ⵏⵏⵙ ⴷ ⵓⵎⵣⵔⵓⵢ ⴰⵜⵔⴰⵔ ⴼⴰⴷ ⴰⴷ ⵢⵉⵍⵉ ⵓⵙⴽⴽⵉⵔ ⵏ ⵢⴰⵜ ⵜⴰⵏⵏⴰⵢⵜ ⵉⵥⵍⵉⵏ ⴷ ⵜⵉⵔⵔⴰ ⵏⵏⵙ.

ⵉⵙⵎⴷ ⵎⴰⵙⴷ ⵜⴰⵡⵡⵓⵔⵉ ⴳ ⵜⵙⴳⴰ ⴰⴷ ⴰⵔ ⵜⴻⵜⵜⵓⵎⴰⵏ ⵓⵍⴰ ⴳ ⵢⵉⴳⵔ ⵏ ⵜⵙⴽⵍⴰ ⵍⵍⵉ ⵉⵟⵟⴰⴼⵏ ⵜⵓⴳⵜⵜ ⵏ ⵓⴷⵎⴰⵡⵏ, ⵎⴽⵍⵍⵉ ⵉⴳⴰ ⵓⵍⴰ ⵢⵉⴳⵔ ⵏ ⵜⴰⵏⵜⵔⵓⴱⵓⵊⵉⵜ ⴷ ⵜⵙⵓⵙⵢⵓⵍⵓⵊⵉⵜ ⵍⵍⵉⵖ ⴰⵔ ⵙⵙⵎⵔⴰⵙⵏ ⵉⵎⵔⵣⵓⵜ ⵏⵏⵙ ⵉⵔⵣⵣⵓⵜⵏ ⴳ ⵜⵉⵍⴰⵡⵜ, ⴷ ⴰⵔ ⵙⵎⵓⵏⴰⵏ ⵜⴰⵍⵍⴰⵙⵉⵏ ⵜⵉⵎⵉⵡⴰⵏⵉⵏ, ⵢⵉⵏⵉ ⵎⴰⵙ ⵢⵓⵡⵙ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⴽⵉⴳⴰⵏ ⴳ ⵜⵡⵡⵓⵔⵉ ⴰⴷ.

ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵎⴰⵜⴰ ⵏⵏⵙ ⵜⴳⴰ ⵜⴰⵎⵉⵡⴰⵏⵜ, ⵔⴰⴷ ⵜⴰⴼⵜ ⵡⵉⴷ ⵉⵙⴰⵡⴰⵍⵏ ⵙ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵎⴰⵛⵛ ⵓⵔ ⵉⵙⵙⵏ ⴰⴷ ⵜⵜ ⵢⴰⵔⴰ ⴰⵛⴽⵓ ⵓⵔ ⴱⴰⵀⵔⴰ ⵜⵜⵉⵢⵙⵙⴰⵏⵏ ⵉⵙⴽⴽⵉⵍⵏ ⵏⵏⵙ, ⵖⴰⵏ ⴰⴷ ⵅⴼ ⵔⴰⴷ ⵜⴰⵡⵙ ⵜⵉⵔⵔⴰ ⵏ ⵜⵓⵙⵙⵔⴰ ⵜⴰⵎⴰⵣⵉⵖⵜ ⴼⴰⴷ ⴰⴷ ⵖⴰⵎⴰⵏ ⵡⴰⵔⵔⴰⵜⵏ ⴰⴷ ⵣⵔⵉⵏ ⵙ ⵜⴰⵙⵓⵜⴰ ⵙ ⵜⴰⵢⵢⴰ, ⵎⵉⵏ ⴰⴷ ⵊⵍⵓⵏ.

ⵎⴰⵢⴰⴷ ⴰⴷ ⵅⴼ ⴰⵔ ⵜⵜⵉⵏⵉⵏ ⵉⵎⵔⵣⵓⵜⵏ ⴳ ⵢⵉⴳⵔ ⴰⵎⴰⵣⵉⵖ ⵎⴰⵙ ⵜⵥⴹⴰⵕ ⵜⵉⵔⵔⴰ ⴰⴷ ⵜⴳ ⵢⴰⵏ ⵓⵙⴰⵢⵔⵓⵔ ⵉ ⵉⵎⵔⵣⵓⵜⵏ ⵜⴳ ⵓⵍⴰ ⵉⴳⵔ ⵉⴱⵓⵖⵍⴰⵏ ⵏ ⵓⵛⵏⵓⴱⴱⵛ ⴷ ⵉⵔⵣⵣⵓⵜⵏ ⵉⴽⴰⴷⵉⵎⵉⵢⵏ ⴳ ⵢⴰⵏ ⵢⵉⴳⵔ ⵏ ⵜⵉⵔⵔⴰ ⵉⵎⵓⵏⵏ.

ⴳ ⵓⵙⵡⵉⵔ ⵏ ⵜⵙⴽⵍⴰ, ⵉⵏⵏⴰ ⵍⵃⵓⵙⴰⵢⵏ ⴰⵎⵓⵥⴰⵢ, ⴰⵎⵙⵏⵓⴱⴱⵛ ⴳ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ,  ⴳ ⵢⴰⵜ ⵜⴳⵓⵔⵉ, ⵎⴰⵙⴷ ⴰⵎⵎⵓⵜⵜⵉ ⵣⴳ ⵓⵙⵏⴼⵍⵓⵍ ⴰⵎⵉⵡⴰⵏ ⵙ ⵓⵎⵉⵔⴰⵢ ⵢⵉⵡⵙ ⴰⴷ ⵏⵥⵕ ⵢⴰⵜ ⵜⴰⵙⵓⵜ ⵜⴰⵎⴰⵢⵏⵓⵜ ⵏ ⵉⵎⴷⵢⴰⵣⵏ ⵍⵍⵉ ⵉⵜⵜⴰⵔⵎⵏ ⴰⴷ ⴰⵔⴰⵏ ⵜⴰⵎⴷⵢⴰⵣⵜ ⴷ ⵉⵙⵙⴰⵏ ⴳ ⵜⵓⴷⵔⵜ ⵜⴰⴽⵓⵢⴰⵙⵜ, ⵉⴼⴽ ⵜⵓⴷⵔⵜ ⴰⴹⵏⵉ ⵉ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ ⴼⴰⴷ ⴰⴷ ⵜⴽⵛⵎ ⴳ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ.

ⵉⵙⵙⵓⵎⴰⵏ ⵎⴰⵙⴷ ⵜⵉⵔⵔⴰ ⴰⴷ ⵔⴰⴷ ⵜⵙⵎⴷ ⴰⴱⵔⵉⴷ ⵏ ⵓⵙⵏⴼⵍⵓⵍ ⵏ ⵜⵎⴷⵢⴰⵣⵜ, ⵙⵍⴰⵡⴰⵏⴷ ⴰⴽⴽⵯ ⵜⴰⵍⵍⴰⵙⵜ ⵜⴰⵎⵉⵡⴰⵏⵜ ⵍⵍⵉ ⵉⵎⵎⵓⵜⵜⵉⵏ ⵙ ⵜⴰⵍⵍⴰⵙⵜ ⵜⴰⵎⵉⵔⴰⵢⵜ, ⴰⵛⴽⵓ ⵜⴰⵢⵙⵉ ⵜⴰⵎⴰⵣⵉⵖⵜ ⵍⵍⵉ ⴰⴷⵍⵉ ⵉⴳⴰⵏ ⵜⴰⵎⵉⵡⴰⵏⵜ ⵜⵎⵎⵓⵜⵜⵉ ⵙ ⵜⵉⵔⵔⴰ ⵙ ⵜⵡⵡⵓⵔⵉ ⵏ ⵜⵓⴳⵜⵜ ⵏ ⵉⵎⵙⵏⴼⵍⵓⵍⵏ ⵍⵍⵉ ⴰⵙ ⴷ ⵉⵙⵎⴷⵏ ⵜⴰⵍⵖⵉⵡⵉⵏ ⴰⴹⵏⵉ ⵏ ⵓⵙⴼⴰⵍⴽⵉ ⴳ ⵓⵙⵡⵉⵔ ⵏ ⵜⵎⴷⵢⴰⵣⵜ ⴷ ⵓⵏⴳⴰⵍ ⵓⵍⴰ ⵜⵓⵍⵍⵉⵙⵜ.

ⴰⵔ ⵉⵥⵕⵕⴰ ⵓⵎⵓⵥⴰⵢ ⵎⴰⵙⴷ ⵜⵉⵖⴰⵔⴰⵙⵉⵏ ⵜⵉⵎⴰⵢⵏⵓⵜⵉⵏ ⵍⵍⵉ ⵜⴼⴽⴰ ⵜⵉⵔⵔⴰ ⵜⵓⴷⵊⴰ ⵜⴰⵙⴽⵍⴰ ⵜⴰⵎⴰⵣⵉⵖⵜ ⵜⴰⵎⵉⵔⴰⵢⵜ ⴰⴷ ⵜⵍⴽⵎ ⵢⴰⵏ ⵓⵙⵡⵉⵔ ⵢⴰⵜⵜⵓⵢⵏ, ⵖⵉⵍⴰ "ⴰⵔ ⵏⵙⴰⵡⴰⵍ ⵅⴼ ⵜⵓⴳⵜⵜ ⵏ ⵉⵎⴷⵢⴰⵣⵏ ⴷ ⵉⵏⴼⵔⴰⵏⵏ ⴷ ⵉⵎⴰⵔⴰⵜⵏ ⵏ ⵜⵙⵓⵜⴰ ⵜⴰⵎⴰⵢⵏⵓⵜ ⵉⵙⵏⴼⵍⵓⵍⵏ ⴳ ⵢⵉⴳⵔ ⵏ ⵜⵎⴰⵣⵉⵖⵜ".

ⵉⵙⵎⴷ ⵎⴰⵙ ⵜⵜⵉⴼⴽⴰⵏⵜ ⵜⵖⴰⵔⴰⵙⵉⵏ ⴰⴹⵏⵉ ⴼⴰⴷ ⴰⴷ ⵜⴱⵓⵖⵍⵓ ⵜⵓⵜⵍⴰⵢⵜ ⴷ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⴷ ⵜⴼⴽⴰ ⵢⴰⵏ ⵡⵓⴷⵎ ⵉⴳⴰⵏ ⴰⵎⴰⵢⵏⵓ ⵉ ⵜⵡⵡⵓⵔⵉⵡⵉⵏ ⵜⵉⵙⴽⵍⴰⵏⵉⵏ ⵍⵍⵉ ⵔⴰⴷ ⵉⴼⴽ ⵢⴰⵏ ⵓⵖⴰⵔⴰⵙ ⴰⵎⴰⵢⵏⵓ ⵉ ⵜⴰⵢⵙⵉ ⵜⴰⵎⵉⴽⴰⵏⵜ ⴼⴰⴷ ⴰⴷ ⵜⴳ ⵜⴰⵎⵉⵔⴰⵢⵜ , ⵢⵉⵏⵉ ⵎⴰⵙ ⵎⴰⵢⴰⴷ ⵉⵣⵔⵉ ⵙ ⴽⴰⴷⴰ "ⴰⵢⵍⵍⵉ ⵙ ⴰⵔ ⵢⴰⴷⵍⵉ ⵏⵜⵜⵡⴰⵔⴳⴰ ⴳ ⵓⵣⵎⵣ ⵏ ⵜⵜⴰⵎⵔⴰⵡⵉⵏ ⴷ ⵜⵜⵥⴰⵎⵔⴰⵡⵉⵏ ⵏ ⵜⴰⵙⵓⵜⴰ ⵍⵍⵉ ⵉⵣⵔⵉⵏ, ⵍⵍⵉⵖ ⵏⵍⴽⵎ ⵖⴰⵙⵙⴰ ⵢⴰⵏ ⵓⵙⵡⵉⵔ ⴱⴰⵀⵔⴰ ⵢⴰⵜⵜⵓⵢⵏ ⵏ ⵓⵙⴳⵓⴷⵉ ⵏ ⵉⵙⵏⴼⵍⵓⵍⵏ ⵉⵙⴽⵍⴰⵏⵏ ⴳ ⵢⵉⴳⵔⴰⵏ ⵏ ⵜⵎⴷⵢⴰⵣⵜ ⴷ ⵜⵓⵍⵍⵉⵙⵜ ⴷ ⵓⵏⴳⴰⵍ".

ⵖⵉⵍⴰ ⵍⵍⵉⵖ ⵜⵍⵍⴰ ⵜⵉⵔⵔⴰ ⵛⴰⵖⵓⵍ ⴰⵔ ⵏⵙⴰⵡⴰⵍ ⵅⴼ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ ⵜⴰⵜⵔⴰⵔⵜ ⴷ ⵜⵓⵍⵍⵉⵙⵜ ⴷ ⵓⵏⴳⴰⵍ ⴰⵎⴰⵣⵉⵖ ⴳ ⵜⵓⴳⵜⵜ ⵏ ⵓⵙⵏⴼⵍⵓⵍ ⴷ ⵜⵉⵔⵎⵉⵜⵉⵏ ⵜⵉⵙⴽⵍⴰⵏⵉⵏ, ⴰⵡⵜⵜⴰⵙ ⴳⵉⵙ ⵉⴳⴰⵜ ⴰⴷ ⵏⵙⵙⵓⵎⴰⵏ ⵜⴰⵢⵙⵉ ⵏⵏⴼ ⵜⴰⵎⴰⵣⵉⵖⵜ ⵙ ⵢⴰⵜ ⵜⵖⴰⵔⴰⵙⵜ ⵉⵜⵜⵢⴰⵔⴰⵏ ⵜⴳ ⵜⴰⵜⵔⴰⵔⵜ, ⴷ ⴰⴷ ⵜⵖⴰⵎⴰ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵓⵙⴽⴰ ⵏⵏⵙ ⵜⴰⵎⵣⵔⵓⵢⴰⵏⵜ ⵍⵍⵉ ⵉⵍⵍⵓⵣⵣⴰⵏ ⴳ ⵜⵓⴳⵜⵜ ⵏ ⵉⴷⵖⴰⵔⵏ, ⵙⵍⴰⵡⴰⵏ ⴷ ⴰⴽⴽⵯ ⴷⴰⵔ ⵡⵉⴷⴰ ⵙⵉⵙ ⵉⵙⴰⵡⴰⵍⵏ.

ⵜⵉⵔⵔⴰ ⴷⴰⵔⵙ ⵜⵓⴳⵜⵜ ⵏ ⵓⴷⵎⴰⵡⴰⵏ ⵓⵙⵏⴰⵏⵏ ⴷ ⵔⴰⴷ ⵜⴰⵔⵉ ⵜⴰⵢⵙⵉ ⵜⴰⴷⵍⵙⴰⵏⵜ ⴷ ⵓⵙⵏⴼⵍⵓⵍ ⴰⵎⴰⵣⵉⵖ ⴰⴷ ⵓⵔ ⵉⵊⵍⵓ, ⵎⴽⵍⵍⵉ ⵏⵣⵎⵔ ⴰⴷ ⵏⵙⵎⵔⵙ ⵜⴰⵜⵉⴽⵏⵓⵍⵓⵊⵉⵜ ⵜⴰⵎⵓⵟⵟⵓⵏⵜ ⵍⵍⵉ ⵔⴰⴷ ⵢⴰⵡⵙ ⵓⵍⴰ ⵏⵜⵜⴰⵜ ⴳ ⵓⵃⵟⵟⵓ ⵏ ⵜⴰⵢⵙⵉ ⵏⵏⵖ.

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B5%9C%E2%B5%89%E2%B5%94%E2%B5%94%E2%B4%B0-%E2%B5%8F-%E2%B5%9C%E2%B4%B0%E2%B5%A2%E2%B5%99%E2%B5%89-%E2%B5%9C%E2%B4%B0%E2%B5%8E%E2%B4%B0%E2%B5%99%E2%B5%89%E2%B5%96%E2%B5%9C-%E2%B5%9C%E2%B4%B0%E2%B5%8E%E2%B5%89%E2%B5%A1%E2%B4%B0%E2%B5%8F%E2%B5%9C-%E2%B4%B0%E2%B5%94-%E2%B5%99%E2%B5%99%E2%B5%93%E2%B5%99%E2%B5%84%E2%B5%93-%E2%B5%8F-%E2%B5%8E%E2%B5%89%E2%B4%B7%E2%B4%B7%E2%B5%8F-%E2%B5%89%E2%B4%B7%E2%B4%B7%E2%B4%B0%E2%B5%8F-%E2%B5%89-%E2%B5%9C%E2%B4%B0%E2%B5%A2%E2%B5%99%E2%B5%89-%E2%B4%B0%E2%B4%B7-%E2%B5%9C%E2%B4%B0%E2%B4%B3%E2%B5%8D%E2%B4%B0%E2%B5%8F%E2%B5%9C