Published on MAPNews (https://www.mapnews.ma/am)

Accueil > ⵜⵉⵙⵎⵓⵏⴰⵢ  ⵜⵉⵙⴳⵯⵙⴰⵏⵉⵏ   ⵏ   ⵜⴼⵏⵉⵇⵜ   ⵜⴰⵥⵕⴼⴰⵏⵜ  ⴷ   ⵉⴱⴰⵏⴽⵏ   ⵉⴳⵔⴰⵖⵍⴰⵏⵏ .. ⴰⵖⴳⵯⵎⵎⵉ   ⵏ   ⵍⵎⵖⵔⵉⴱ, ⴰⵎⵓⴷⴷⵓ  ⵉⵙⵙⵔⵇⴱⵏ  ⵙⴳ   ⵓⵎⵣⵔⵓⵢ  ⵏ   ⵜⴳⵍⴷⵉⵜ    ⴰⵇⴱⵓⵔ   ⴷ  ⵡⴰⵢⴷⴰ  ⵏⵏⵙ   ⴰⴱⴰⵖⵓⵔ.

ⵜⵉⵙⵎⵓⵏⴰⵢ  ⵜⵉⵙⴳⵯⵙⴰⵏⵉⵏ   ⵏ   ⵜⴼⵏⵉⵇⵜ   ⵜⴰⵥⵕⴼⴰⵏⵜ  ⴷ   ⵉⴱⴰⵏⴽⵏ   ⵉⴳⵔⴰⵖⵍⴰⵏⵏ .. ⴰⵖⴳⵯⵎⵎⵉ   ⵏ   ⵍⵎⵖⵔⵉⴱ, ⴰⵎⵓⴷⴷⵓ  ⵉⵙⵙⵔⵇⴱⵏ  ⵙⴳ   ⵓⵎⵣⵔⵓⵢ  ⵏ   ⵜⴳⵍⴷⵉⵜ    ⴰⵇⴱⵓⵔ   ⴷ  ⵡⴰⵢⴷⴰ  ⵏⵏⵙ   ⴰⴱⴰⵖⵓⵔ.

10 ⴽⵟⵓⴱⵕ 2023 Version Imprimable
ⵎⵕⵕⴰⴽⵯⵛ -  ⴷ  ⴽⵉⵢⵢⵉ   ⴰⵔ   ⵜⵜⵎⵓⵔⵔⵓⵢⵜ  ⵙⴳ   ⵓⵙⴰⵢⵔⴰⵔ   ⵉⵜⵜⵓⵥⵍⴰⵢⵏ  ⵙ   ⵓⵙⴱⵔⵔⴽ   ⵏ    ⵜⵉⵍⴰⵍ   ⵏ   ⵜⵙⵎⵓⵏⴰⵢ   ⵜⵉⵙⴳⵯⵙⴰⵏⵉⵏ   ⵏ   ⵜⴼⵏⵉⵇⵜ   ⵏ   ⵜⵥⵕⴼⵜ  ⴷ    ⵉⴱⴰⵏⴽⵏ   ⵉⴳⵔⴰⵖⵍⴰⵏⵏ  ⴳ    ⵎⵕⵕⴰⴽⵛ,  ⴰⵔ  ⴷ   ⵉⵍⴷⴷⵉ  ⵉⵥⵕⵉ   ⵏⵏⴽ   ⵢⴰⵜ   ⵜⵣⴷⴷⵓⵖⵜ   ⵉⵎⵣⴰⵔⴰⵢⵏ,  ⵙ   ⵜⴼⵍⵡⵉⵏ   ⵜⵉⵅⴰⵜⴰⵔⵉⵏ   ⴷ   ⵓⵜⵡⴰⵍ  ⴰⵎⴰⵥⴽⴰⵡ   ⴰⵎⵖⵔⵉⴱⵉ    ⴰⵕⵚⵍⵉ   ⵓⵔ  ⴰⵔ  ⵜⵜ   ⵜⴻⵜⵜⵣⴳⴰⵍ   ⵜⵉⵟⵟ, ⵉⵣⴷⵉ   ⵓⵙⴽⴽⵉⵏ  ⵙ   ⵓⵖⴳⵯⵎⵎⵉ   ⵏ   ⵍⵎⵖⵔⵉⴱ   ⵏⵏ    ⵉⵜⵜⴰⵡⵉⵏ   ⴰⵏⵔⵣⵓⴼ   ⴳ   ⵓⵎⵓⴷⴷⵓ   ⵉⵙⵙⵔⵇⴱⵏ   ⵙⴳ   ⵓⵎⵣⵔⵓⵢ   ⵏ   ⵜⴳⵍⴷⵉⵜ   ⴰⵇⴱⵓⵔ   ⴷ   ⵡⴰⵢⴷⴰ   ⵏⵏⵙ   ⴰⴷⵍⵙⴰⵏ   ⴷ    ⵓⵏⴼⴳⴰⵏ   ⴰⴱⴰⵖⵓⵔ.

ⴰⵖⴳⵯⵎⵎⵉ   ⵏ   ⵍⵎⵖⵔⵉⴱ,  ⵉⵜⵜⵓⵙⵏⵎⴰⵍⴰⵏ   ⵙⴳ   ⴷⴰⵔ   ⵓⵙⵉⵔⴰ   ⴰⵏⴰⵎⵓⵔ   ⴰⵎⵖⵔⵉⴱⵉ   ⵏ   ⵜⵎⴰⵍⵍⴰⵢⵜ,  ⴳ  ⵢⴰⵜ   ⵜⵊⵓⵎⵎⴰ   ⵏⵏⴰ   ⵢⵉⵡⴹⵏ   900  ⵏ  ⵉⴷ   ⵏⵎⵉⵜⵔⵓ   ⴰⵎⴽⴽⵓⵥ, ⴷⴰ  ⵉⵙⵙⵎⵏⵉⴷ   ⵉ   ⵎⴰⴷ   ⵉⴳⴰⵏ   14   ⵏ  ⵢⵉⴼⴹ  ⵏ   ⵓⵎⴷⵔⴰⵡ  ⴳ   ⵜⵙⵎⵓⵏⴰⵢ   ⴰⴷ,  ⵜⴰⵎⵍⴷⴰ  ⵏ   ⵜⵡⴰⴼⵉⵜ  ⵏ   ⵜⴳⵍⴷⵉⵜ   ⵙ   ⵉⵙⴳⴰⵔ  ⵏⵏⵙ   ⵉⵎⵢⴰⵏⴰⵡⵏ  ⵉⵎⵣⵔⴰⵢⵏ,  ⴷ   ⵉⴷⵍⵙⴰⵏⵏ   ⴷ   ⵉⴷⵎⵙⴰⵏⵏ.

ⴳ   ⵜⵡⵉⵍⴰ   ⵜⴰⵎⵢⴰⵖⵜ  ⵉⴳⴰⵏ  ⵡⴰⵥ,  ⴷⴰ  ⵉⴳⴳⴰⵔ ⵓⵖⴳⵯⵎⵎⵉ   ⵜⵉⴼⴰⵡⵜ   ⵅⴼ   ⵜⴷⵍⵙⴰ   ⵜⴰⵎⵖⵔⵉⴱⵉⵜ   ⴷ   ⵡⴰⵢⴷⴰ   ⵏⵏⵙ   ⴰⵇⴱⵓⵔ,  ⵙ  ⵜⵎⵔⵏⵉⵡⵜ  ⵏ   ⵜⵢⴰⴼⵓⵜⵉⵏ   ⵏⵏⴰ   ⵉⵍⴽⵎ   ⵍⵎⵖⵔⵉⴱ  ⴳ   ⵢⵉⴳⵔⴰⵏ  ⵉⵎⵏⵏⴰⵡⵏ,  ⵎⴽⵍⵍⵉ   ⵉⵙⵙⵎⵏⵉⴷ   ⵢⴰⵜ  ⵜⵓⵣⵍⴰⵎⵜ   ⵅⴼ   ⵜⴰⵏⵏⴰⵢⵜ  ⵜⵉⵎⵉⵖⵉⵙⵜ  ⵏ   ⴱⴰⴱ   ⵏ   ⵡⴰⴷⴷⵓⵔ   ⴰⴳⵍⵍⵉⴷ   ⵎⵓⵃⵎⵎⴰⴷ   ⵡⵉⵙ   ⵚⴹⵉⵚ,  ⵉ  ⵢⴰⵏ   ⵢⵉⵎⴰⵍ   ⵉⴳⴰⵏ   ⴱⴰⵀⵔⴰ   ⴰⵙⵓⵍⴰⵏ,  ⴷ   ⵉⵙⵍⵍⵡⵉ   ⴷ    ⵓⴱⵓⵖⵍⵓ.  

 ⵉⴳⴰ   ⵓⵖⴳⵯⵎⵎⵉ  ⴰⴷ   ⵉⵥⵍⵉⵏ,  ⵢⴰⵏ   ⵓⵎⵓⴷⴷⵓ  ⵉⵙⵙⵔⵇⴱⵏ   ⴳ   ⵉⵎⴰⴹⵍⴰⵏⵏ   ⵏ   ⵍⵎⵖⵔⵉⴱ   ⵙⴳ   ⴽⵕⴰⴹ   ⵉⵙⴰⵢⵔⴰⵔⵏ   ⵙ   ⵉⵙⵏⵜⴰⵍ   ⵉⵎⵣⴰⵔⴰⵢⵏ,  ⵉⵣⴷⵉ   ⵓⵙⴽⴽⵉⵏ  ⵙ  ⵓⵙⴰⵢⵔⴰⵔ   ⵏ   "ⵍⵎⵖⵔⵉⴱ,  ⴰⴽⴰⵍ  ⵏ   ⵉⵏⵎⵓⵇⵇⴰⵔⵏ" ⵏⵏⴰ  ⵉⴳⴳⴰⵔⵏ   ⵜⵉⴼⴰⵡⵜ  ⵅⴼ   ⵓⵙⵎⵢⵉⵡⵏ   ⵏ    ⵜⴳⵍⴷⵉⵜ   ⵙ   ⵓⵎⵣⵔⵓⵢ  ⵏⵏⵙ,  ⴷ  ⵓⵎⴰⴷⴰⵏ  ⵏⵏⵙ  ⴷ  ⵓⵡⴰⵏⴽ  ⵏⵏⵙ   ⴰⵇⴱⵓⵔ.

 ⴷⴰ   ⵉⵥⵕⵕⴰ   ⵓⵙⴰⵢⵔⴰⵔ   ⵡⵉⵙ  ⵙⵉⵏ  " ⵍⵎⵖⵔⵉⴱ, ⴰⴽⴰⵍ   ⵏ   ⵜⵉⴼⴰⵡⵉⵏ" ⴰⵏⵔⵣⵓⴼ   ⵙ   ⵉⴼⵓⴽⵙⵏ  ⵉⵎⵖⵔⵉⴱⵉⵢⵏ  ⴷ   ⵡⴰⵎⵎⴰⴽ   ⵏ  ⵜⵓⴷⵔⵜ  ⵏ   ⵉⵎⵖⵔⴰⴱⵉⵢⵏ   ⴳ   ⵢⵉⴳⵔⴰⵏ   ⴰⴽⴽⵯ, ⴳⵉⵙ  ⵙ   ⵜⵥⵍⴰⵢⵜ,  ⴰⵜⵡⴰⵍ   ⴰⵎⴰⵥⴽⴰⵡ,  ⴷ   ⵜⵏⵉⴹⵉ   ⴷ   ⵉⵙⴼⵓⴳⵍⵓⵜⵏ   ⴷ   ⵜⵎⵖⵔⵉⵡⵉⵏ   ⵜⵉⵇⴱⵓⵔⵉⵏ,  ⴷ  ⵉⵙⵏⴼⵍⵓⵍⵏ   ⵉⵜⵔⴰⵔⵏ.

ⴳ  ⵜⵙⴳⴰ  ⵏⵏⵙ,  ⴷⴰ  ⵉⴼⵙⵙⵔ  ⵓⵙⴰⵢⵔⴰⵔ   ⵡⵉⵙ  ⴽⵕⴰⴹ  "ⵍⵎⵖⵔⵉⴱ,  ⴰⴽⴰⵍ   ⵏ   ⵉⵣⵎⵣⵣⴰ   ⵉⵎⵣⵡⴰⵔⵏ,   ⵜⵉⴱⵖⵓⵔⵉⵏ   ⵏ    ⵜⴷⵎⵙⴰ   ⵜⴰⵎⵖⵔⵉⴱⵉⵜ   ⴷ   ⵜⵥⵉⴹⴰⵕ ⵜⵉⵎⵇⵇⵔⴰⵏⵉⵏ   ⵏⵏⴰ  ⵢⴰⴽⴽⴰ  ⵉ   ⵉⵎⵙⵙⴰⵔⵓⵜⵏ   ⵉⴱⵕⵕⴰⵏⵏ   ⴷ   ⵉⴷⵖⵔⴰⵏⵏ   ⵙ   ⵉⵙⴽⵉⵍ.

 ⵙ   ⵜⵎⵔⵏⵉⵡⵜ    ⵏ    ⵉⵙⴰⵢⵔⴰⵔⵏ   ⴰⴷ   ⵙ   ⴽⵕⴰⴹ,  ⵉⵜⵜⵓⵙⴽⴰⵔ   ⵓⵥⵍⴰⵢ   ⵙ   ⵓⵎⵢⴰⵡⴰⵙ  ⴷ   ⵜⵙⴷⴰⵡⵉⵜ   ⵜⴰⴳⵍⴷⴰⵏⵜ   ⵏ    ⵜⵡⵊⵊⴰ   ⵏ   ⵓⴹⴰⵕ,  ⴰⵙⴰⵢⵔⴰⵔ   ⵢⵓⵙⵉⵏ   ⵜⴰⵎⴰⵜⴰⵔⵜ   ⵏ  "ⵍⵎⵖⵔⵉⴱ,  ⴰⴽⴰⵍ   ⵏ   ⵜⵡⵊⵊⴰ   ⵏ  ⵓⴹⴰⵕ" ⵏⵏⴰ  ⵉⵜⵜⴰⵡⵉⵏ   ⵜⵉⵎⴽⵜⵉⵜ   ⵙ   ⵜⵢⴰⴼⵓⵜⵉⵏ   ⵜⵉⵎⵣⵔⴰⵢⵉⵏ  ⵏⵏⴰ   ⵉⵍⴽⵎ   ⵍⵎⵖⵔⵉⴱ   ⴳ   ⵜⴽⵓⵙⵜ   ⵏ   ⵓⵎⴰⴹⴰⵍ   ⵉⴳⴳⵯⵔⴰⵏ  ⴳ   ⵇⴰⵟⴰⵕ. 

ⴳ   ⵜⵙⴳⵓⵔⵉ   ⵉ   ⵜⵙⵏⵓⵔⴰⵢⵜ   ⵏ   ⵍⵎⵖⵔⵉⵏ   ⵍⵄⴰⵕⴰⴱⵉ   ⵏ   ⵉⵏⵖⵎⵉⵙⵏ,  ⵉⵙⵙⵉⵙⴼⵉⵡ   ⵓⵏⵎⵀⴰⵍ  ⴰⵎⴰⵜⴰⵢ   ⵏ   ⵓⵙⵉⵔⴰ   ⴰⵏⴰⵎⵓⵔ  ⴰⵎⵖⵔⵉⴱⵉ   ⵏ   ⵜⵎⴰⵍⵍⴰⵢⵜ,  ⵄⴰⴷⵉⵍ   ⵍⴼⴰⵇⵉⵔ, ⵎⴰⵙ  ⴷ   ⴰⵙⵉⵔⴰ   ⵉⵙⴷⴷⵔ   ⴰⵙⵏⵎⴰⵍⴰ   ⵏ   ⵜⵎⵙⴰⵔⵜ   ⵜⴰⴳⵔⴰⵖⵍⴰⵏⵜ  ⵜⴰⵎⴰⵏⴰⵔⵜ   ⴰⴼⴰⴷ   ⴰⴷ   ⵉⵙⵏⵢⵓⴷⴷⵔ   ⵙⴳ   ⵓⵎⴰⵢⵏⵓ  ⵉ   ⵜⴰⵏⵉⵍⴰ  ⵏ    ⵍⵎⵖⵔⵉⴱ   ⴳ  ⵜⵉⵣⵉ   ⵜⴰⵣⴳⵔⴰⵔⵜ  ⵙⴳ  09  ⴰⵔ  14   ⴽⵟⵓⴱⵕ. 

ⵉⵙⴷⴷⵉⴷ   ⵎⴰⵙⵙ   ⵍⴼⴰⵇⵉⵔ   ⵎⴰⵙ  ⴷ   ⴰⵖⴳⵯⵎⵎⵉ   ⴰⴷ   ⴷⴰ  ⵉⵙⵙⵉⵙⴼⵉⵡ   ⵜⴰⴷⵍⵙⴰ  ⵜⴰⵎⵖⵔⵉⴱⵉⵜ  ⴷ   ⵡⴰⵢⴷⴰ   ⴰⵇⴱⵓⵔ   ⴳ   ⵢⵉⴳⵔⴰⵏ   ⵉⵎⵣⴰⵔⴰⵢⵏ   ⴷ    ⵜⴰⵏⵏⴰⵢⵜ   ⵜⵉⵎⵉⵖⵉⵙⵜ   ⵏ   ⴱⴰⴱ   ⵏ   ⵡⴰⴷⴷⵓⵔ   ⴰⴳⵍⵍⵉⴷ, ⵉ   ⵢⴰⵏ   ⵢⵉⵎⴰⵍ  ⵉⴳⴰⵏ   ⴰⵙⵓⵍⴰⵏ   ⴷ   ⵍⵎⵖⵔⵉⴱ   ⴰⵜⵔⴰⵔ, ⵢⵓⵎⵥⵏ  ⴰⴱⵔⵉⴷ   ⵏ   ⵡⴰⵍⴰⵢ  ⴷ   ⵓⴱⵓⵖⵍⵓ   ⵙ   ⵓⵔⴳⴳⵉⴳ.

ⵉⵙⵎⴰⵏⴰⵔ   ⵎⴰⵙ  ⴷ   ⴰⵙⵏⵎⴰⵍⴰ   ⵏ   ⵓⵖⴳⵯⵎⵎⵉ   ⴰⴷ   ⵓⵙⵍⵉⴷ   ⵉⵡⴰⵜⵙ   ⵙ   ⵓⴷⵙⵍⴰⵏ  ⴰⵙⵙⵓⵎⵔ  ⵏ   ⵉⵔⵉⵎ  ⴰⵙⵎⵢⵉⵡⵏ   ⵏ   ⵉⵏⵔⵣⴰⴼ, ⵔⴰⴷ  ⵜⵏ  ⵢⴰⵊⵊ   ⴰⴷ   ⵙⵙⴰⴳⴳⵯⵉⵏ   ⵅⴼ   ⵍⵎⵖⵔⵉⴱ   ⴷ   ⵓⵣⵔⵔⵓⵢ  ⵏⵏⵙ   ⵉⴷⵓⵙⵏ  ⵏⵏⴰ   ⵉⵣⴷⵉⵏ  ⴳⴰⵎ  ⵏⵏⵙ   ⴷ  ⵖⵉⵍⴰⴷ  ⵏⵏⵙ  ⴷ  ⵢⵉⵎⴰⵍ   ⵏⵏⵙ  ⵏⵏⴰ   ⵉⵍⵍⴰⵏ   ⴷⵖⵉ  ⴳ   ⵓⵣⵎⵣ   ⵏ  ⵓⴽⴰⵔⴰⴷ   ⴷ   ⵜⵓⵙⴽⴰ.

ⵙ   ⵓⵢⴰ,  ⵔⴰⴷ   ⵉⵙⵙⵉⵙⴼⵉⵡ   ⵓⵖⴳⵯⵎⵎⵉ   ⵏ   ⵍⵎⵖⵔⵉⴱ  ⵉ   ⵓⵎⴰⴹⴰⵍ   ⴰⴽⴽⵯ  ⴰⵏⵛⵜ  ⵏ   ⵜⵎⵔⵉⵙⵜ  ⵏ   ⵜⴳⵍⴷⵉⵜ,  ⴷ  ⴰⵏⵛⵜ  ⵏ   ⵓⴷⵡⴰⵙ  ⴷ  ⵓⵏⴰⴷⴰⴷ   ⵏ   ⵜⵏⴼⴽⵉⵢⵉⵏ   ⵏⵏⵙ  ⴳ   ⵓⵍⴽⴰⵎ   ⵏ   ⵓⴱⵓⵖⵍⵓ   ⴷ  ⵡⴰⵍⴰⵢ  ⴳ   ⵜⴷⵉⵏⴰⵎⵉⵜ   ⵜⴰⵖⵉⵍⴰⵏⵜ  ⵏⵏⴰ   ⴳ  ⵉⵍⵜⵖ  ⵙⴳ   ⵓⵙⵙⵏⵜⵉ   ⵏ   ⵙⵏⴰⵜ   ⵜⵎⵔⴰⵡⵉⵏ  ⵏ   ⵜⵙⵓⵜ  ⴰⴷ,  ⴷⴷⵓ   ⵏ   ⵜⵏⴰⵔⴰ   ⵜⵉⵎⵉⵖⵉⵙⵜ  ⵏ   ⴱⴰⴱ   ⵏ   ⵡⴰⴷⴷⵓⵔ   ⴰⴳⵍⵍⵉⴷ   ⵎⵓⵃⵎⵎⴰⴷ   ⵡⵉⵙ   ⵚⴹⵉⵚ

Source URL: https://www.mapnews.ma/am/actualites/%E2%B5%9C%E2%B4%B0%E2%B4%B7%E2%B4%B0%E2%B5%8E%E2%B5%99%E2%B4%B0/%E2%B5%9C%E2%B5%89%E2%B5%99%E2%B5%8E%E2%B5%93%E2%B5%8F%E2%B4%B0%E2%B5%A2%C2%A0-%E2%B5%9C%E2%B5%89%E2%B5%99%E2%B4%B3%E2%B5%AF%E2%B5%99%E2%B4%B0%E2%B5%8F%E2%B5%89%E2%B5%8F%C2%A0-%C2%A0%E2%B5%8F%C2%A0-%C2%A0%E2%B5%9C%E2%B4%BC%E2%B5%8F%E2%B5%89%E2%B5%87%E2%B5%9C%C2%A0-%C2%A0%E2%B5%9C%E2%B4%B0%E2%B5%A5%E2%B5%95%E2%B4%BC%E2%B4%B0%E2%B5%8F%E2%B5%9C%C2%A0-%E2%B4%B7%C2%A0-%C2%A0%E2%B5%89%E2%B4%B1%E2%B4%B0%E2%B5%8F%E2%B4%BD%E2%B5%8F%C2%A0-%C2%A0%E2%B5%89%E2%B4%B3%E2%B5%94%E2%B4%B0%E2%B5%96%E2%B5%8D%E2%B4%B0%E2%B5%8F%E2%B5%8F-%E2%B4%B0%E2%B5%96%E2%B4%B3%E2%B5%AF%E2%B5%8E%E2%B5%8E%E2%B5%89%C2%A0-%C2%A0%E2%B5%8F%C2%A0