Published on MAPNews (https://www.mapnews.ma/am)

Accueil > ⵉⵙⴼⵓⴳⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵜⴼⵓⴳⵍⴰ ⵜⴰⵎⴰⴹⵍⴰⵏⵜ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ

ⵉⵙⴼⵓⴳⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ ⵙ ⵜⴼⵓⴳⵍⴰ ⵜⴰⵎⴰⴹⵍⴰⵏⵜ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ

22 ⴱⵕⴰⵢⵕ 2023 Version Imprimable
ⵕⵕⴱⴰⵟ - ⵉⵙⴼⵓⴳⵍⴰ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ, ⵓⵙⵙⴰⵏ ⵣⵔⵉⵏ  ⴳ ⵕⵕⴱⴰⵟ ⵙ ⵡⴰⵙⵙ ⴰⵎⴰⴹⵍⴰⵏ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ, ⵏⵏⴰ ⵉⵎⵙⴰⵙⴰⵏ ⴷ 21 ⴱⵕⴰⵢⵕ ⵏ ⴽⵓ ⴰⵙⴳⴳⵯⴰⵙ, ⴷⴷⵓ ⵏ ⵜⵎⴰⵜⴰⵔⵜ ⵜⵉⵡⵉⵙⵉ ⵏ ⵜⵎⴰⵣⵉⵖⵜ ⴳ ⵓⵙⵙⵍⵎⴷ ⴰⵎⵢⴰⵏⴰⵡ ⵏ ⵜⴷⵍⵙⵉⵡⵉⵏ .

ⵉⵎⵢⴰⵔ ⵓⵙⵉⵏⴰⴳ ⵙⴳ ⵍⵍⵉⵖ ⵉⵜⵜⵓⵙⴽⴰⵔ ⴰⴷ ⵉⵙⴼⵓⴳⵍⵓ ⵙ ⵡⴰⵙⵙ ⴰⴷ ⴰⵎⴰⴹⵍⴰⵏ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴰⴼⴰⴷ ⴰⴷ ⵉⵙⴱⵔⵣ ⵜⵉⵍⴰⵍ ⵏ ⵜⵓⵜⵍⴰⵢⵜ ⵜⴰⵢⵎⵎⴰⵜ ⵙⵍⴰⵡⴰⵏ ⴰⴽⴽⵯ ⵜⴰⵎⴰⵣⵉⵖⵜ ⴰⴼⴰⴷ ⴰⴷ ⵜⵜⵓⴼⵔⴰⴳ .

ⴳ ⵜⴳⵓⵔⵉ ⵏⵏⵙ ⵙ ⵜⵎⵍⴷⴰ ⴰⴷ , ⵉⵏⵏⴰ ⵎⴰⵙⵙ ⵃⵎⴰⴷ ⴱⵓⴽⵓⵙ ⵎⴰⵙⴷ ⴰⵙⴼⵓⴳⵍⵓ ⴰⴷ ⵉⴷⴷⴰⴷ ⴰⴼⴰⴷ ⴰⴷ ⵉⵙⴱⴰⵢⵢⵏ ⴰⵎⵢⴰⵏⴰⵡ ⴰⴷⵍⵙⴰⵏ ⴷ ⵡⵉⵏ ⵜⵓⵜⵍⴰⵢⵉⵏ , ⴰⴼⴰⴷ ⴰⴷ ⴰⴷⴼⵏ ⴰⴽⴽⵯ ⵉⵡⴷⴰⵏ ⴳ ⵉⴳⵔ ⴰⴷ .

ⵉⴱⴷⵔ ⴰⵡⴷ ⴰⴷⴷⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏⵏⴰ ⵉⴱⵓⵖⵍⴰⵏ ⵙ ⵜⵣⵎⵎⴰⵔ ⵏ ⵉⵜⴳⴰⵔⵏ ⵏ ⵓⴷⵓⵙⵜⵓⵔ ⵏ 2011, ⵢⵉⵏⵉ ⵎⴰⵙ ⵜⵍⵍⴰ ⵖⵉⵍⴰⴷ ⴳ ⵜⵉⵏⵎⴰⵍ ⴷ ⵜⵙⴷⴰⵡⵉⵜⵉⵏ, ⵉⵣⴰⵢⴷ ⵉⵏⵏⴰ ⵎⴰⵙⴷ ⵜⵓⵜⵍⴰⵢⵜ ⵜⴰⵢⵎⴰⵜ ⴰⵔ ⵜⵜⴰⵡⵙ ⴳ ⵓⵙⴽⵓ ⴷ ⵓⵙⴱⵓⵖⵍⵓ ⵏ ⵜⵣⵎⵎⴰⵔ ⵏ ⵡⴰⵣⵣⴰⵏ ⵍⵍⵉⵖ ⴰⵔⴰⵙ ⵜⵙⵙⵍⵎⴰⴷ ⴽⵉⴳⴰⵏ ⵏ ⵡⴰⵜⵉⴳⵏ ⵢⴰⵜⵜⵓⵢⵏ .

ⴳ ⵜⵙⴳⴰ ⵏⵏⵙ, ⵉⵏⵏⴰ ⵓⵏⵎⵀⴰⵍ ⵏ ⵓⵎⴰⵔⵉⵙ ⵏ ⵍⵢⵓⵏⵉⵙⴽⵓ ⴷⴰⵔ ⵜⵎⵓⵔⴰ ⵜⵉⵎⵖⵔⴰⴱⵉⵢⵢⵉⵏ ⵎⴰⵙⵙ ⵉⵔⵉⴽ ⴼⴰⵍⵜ, ⵎⴰⵙⴷ ⵜⵓⵜⵍⴰⵢⵜ ⵜⴰⵢⵎⵎⴰⵜ ⴷⴰⵔⵙ ⴰⵜⵉⴳ ⵢⴰⵜⵜⵓⵢⵏ,ⵉⵙⵙⵖⵥⵏ ⵎⴰⵙⴷ ⵉⵇⵇⴰⵏ ⴰⴷ ⵜⵜⵓⵙⵍⵎⴰⴷ ⵉ ⵡⴰⵣⵣⴰⵏ ⵓⵔⴷ ⵖⴰⵙ ⵜⵓⵜⵍⴰⵢⵜ ⵜⵓⵏⵚⵉⴱⵜ ⵏ ⵜⵎⴰⵣⵉⵔⵜ ⵏⵏⵙ ⵎⴰⵛⴰⵏ ⵜⵓⵜⵍⴰⵢⵜ ⵏⵏⵙ ⵜⴰⵢⵎⵎⴰⵜ .

ⵉⵏⵏⴰ ⴷⴰⵖ ⵎⴰⵙ ⵔⴰⴷ ⵜⵙⴽⵔ ⵜⵎⴰⵜⵔⴰⵔⵜ ⵢⴰⵏ ⵓⵎⵓⴽⵔⵉⵙ ⵉ ⵜⵓⵜⵍⴰⵢⵜ ⵜⴰⵢⵎⵎⴰⵜ , ⴷ ⵎⴰⵙⴷ ⴽⵉⴳⴰⵏ ⵏ ⵜⵓⵜⵍⴰⵢⵉⵏ ⵜⵉⵢⵎⵎⴰⵜⵉⵏ ⵔⴰⴷ ⵏⵖⵓⴱⵓⵏⵜ ⴳ ⵓⵎⴰⴹⴰⵍ , ⵍⵍⵉⵖ ⵔⴰⴷ ⵜⵙⵙⴼⵔⴽ ⵍⵢⵓⵏⵉⵙⴽⵓ ⵜⵉⵏⴱⴰⴹⵉⵏ ⵙ ⵡⴰⵜⵉⴳ ⵏ ⵡⴰⵏⵏⴰⵍ ⵏ ⵜⵓⵜⵍⴰⵢⵉⵏ ⵍⵍⵉⵖ ⵜⵙⴽⴰ ⵅⴼ ⵓⵎⵢⴰⵏⴰⵡ ⴰⴷⵍⵙⴰⵏ ⴷ ⵡⵉⵏ ⵜⵓⵜⵍⴰⵢⵉⵏ ⴰⴼⴰⴷ ⴰⴷ ⵉⵜⵜⵓⵙⴽⵓ ⵢⴰⵏ ⵡⴰⵎⵓⵏ ⴰⵙⵓⵍⴰⵏ .

ⵉⵥⵍⵉ ⵓⵏⵎⵓⵇⵇⴰⵔ ⴷⴷⵅ ⵏⵏⴰ ⴳ ⵉⵡⵙⵏ ⵉⴷⵉⴱⵍⵓⵎⴰⵙⵉⵢⵢⵏ, ⵙ ⵓⴼⵙⴰⵔ ⵏ ⵢⴰⵏ ⵓⴼⵉⴷⵢⵓ ⵏ ⵜⵙⵏⵜⵓⵜⵉⵏ ⵅⴼ ⵓⵙⵉⵏⴰⴳ ⴰⴳⵍⴷⴰⵏ ⵏ ⵜⵓⵙⵙⵏⴰ ⵜⴰⵎⴰⵣⵉⵖⵜ , ⴷ ⴽⵉⴳⴰⵏ ⵏ ⵜⵖⵔⵉ ⵏ ⵜⵎⴷⵢⴰⵣⵜ.

ⴰⵎⵓⵏ ⴰⴳⵔⴰⵖⵍⴰⵏ ⵙ ⵓⵎⴰⵜⴰ ⴰⵔ ⵉⵙⴼⵓⴳⵍⵓ ⵙ ⵡⴰⵙⵙ ⴰⴷ ⵙⴳ ⵓⵙⴳⴳⵯⴰⵙ ⵏ 2002 ⴰⴼⴰⴷ ⴰⴷ ⵉⵙⴱⵓⵖⵍⵓ ⴰⵎⵢⴰⵏⴰⵡ ⵏ ⵜⵓⵜⵍⴰⵢⵉⵏ ⴷ ⵓⴷⵍⵙⴰⵏ ,ⵍⵍⵉⵖ ⴰⵔ ⵜⵜⴼⵔⴰⴳⵏⵜ ⵜⵓⵜⵍⴰⵢⵉⵏ ⵜⴰⴷⵍⵙⴰ ⴷ ⵜⵎⵢⵓⵔⵉⵏ ⵜⵉⵇⵇⴱⵓⵔⵉⵏ , ⴷ ⵓⵙⴽⵓ ⵏ ⵉⵜⴳⴰⵔⵏ ⴷ ⵡⴰⵜⵉⴳⵏ ⵏ ⵜⵏⴼⵔⵓⵜ ⴷ ⵓⴼⵔⴰ ⴷ ⵓⵡⵇⵇⵔ ⵏ ⵡⴰⵢⵢⴰⴹ .

Source URL: https://www.mapnews.ma/am/actualites/%E2%B5%9C%E2%B4%B0%E2%B4%B7%E2%B5%8D%E2%B5%99%E2%B4%B0/%E2%B5%89%E2%B5%99%E2%B4%BC%E2%B5%93%E2%B4%B3%E2%B5%8D%E2%B4%B0-%E2%B5%93%E2%B5%99%E2%B5%89%E2%B5%8F%E2%B4%B0%E2%B4%B3-%E2%B4%B0%E2%B4%B3%E2%B5%8D%E2%B4%B7%E2%B4%B0%E2%B5%8F-%E2%B5%8F-%E2%B5%9C%E2%B5%93%E2%B5%99%E2%B5%99%E2%B5%8F%E2%B4%B0-%E2%B5%9C%E2%B4%B0%E2%B5%8E%E2%B4%B0%E2%B5%A3%E2%B5%89%E2%B5%96%E2%B5%9C-%E2%B5%99-%E2%B5%9C%E2%B4%BC%E2%B5%93%E2%B4%B3%E2%B5%8D%E2%B4%B0-%E2%B5%9C%E2%B4%B0%E2%B5%8E%E2%B4%B0%E2%B4%B9%E2%B5%8D%E2%B4%B0%E2%B5%8F%E2%B5%9C-%E2%B5%8F-%E2%B5%9C%E2%B5%93%E2%B5%9C%E2%B5%8D%E2%B4%B0%E2%B5%A2%E2%B5%9C-%E2%B5%9C%E2%B4%B0%E2%B5%A2%E2%B5%8E%E2%B5%8E%E2%B4%B0%E2%B5%9C