1- ⵎⴰⴷ ⵉⴳⴰⵏ ⴰⵥⵓⵕ ⵏ ⵓⵙⴼⵓⴳⵍⵓ ⵙ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵉⴹ ⵏ ⵉⵏⵏⴰⵢⵔ ?
ⴳ ⵉⵙⴰⴽⵓⴷⵏ ⴰⴽⴽⵯ ⵉⵇⵇⴱⵓⵔⵏ ⵓⵔ ⵉⵜⵜⵓⵙⵙⴰⵏ ⵓⵥⵓⵕ ⴷ ⵓⵎⵣⵔⵓⵢ ⵏ ⵉⴹ ⵏ ⵉⵏⵏⴰⵢⵔ ( ⵉⵅⴼ ⵏ ⵓⵙⴳⴳⵯⴰⵙ ⵏⵖⴷ ⵜⴰⴳⴳⵓⵔⵜ ⵏ ⵓⵙⴳⴳⵯⴰⵙ) ⵎⴰⵛⴰⵏ ⵜⵉⵣⵔⴰⵡⵉⵏ ⵏⵏⴰ ⵉⵙⴰⵡⵍⵏ ⴼ ⵓⵙⵏⵜⵍ ⴰⴷ ⵏⵏⴰⵏ ⵎⴰⵙⴷ ⴰⵙⴰⴽⵓⴷ ⴰⴷ ⴷ ⵜⵎⵢⵓⵔⵜ ⴰⴷ ⴷⴰⵔⵙ ⵜⵉⵣⵉ ⵙ ⵜⵎⵙⵙⵓⵜⵍⵜ ⵏ ⵜⴽⵔⵣⴰ( ⴰⵙⴳⴳⵯⴰⵙ ⴰⴽⵔⵣⴰⵏ ) ⴷ ⵜⵎⵢⵓⵔⵉⵏ ⵏⵏⴰ ⴷⵉⵙ ⵉⵜⵜⵎⵓⵏⴰⵏ ⵍⵍⵉ ⵉⴳⴰⵏ ⵢⴰⵜ ⵓⵏⵏⵓⵔⵣ ⵙ ⵓⵙⴳⴳⵯⴰⵙ ⴰⴽⵔⵣⴰⵏ ⵉⴱⵓⵖⵍⴰⵏ .
ⴰⵢⵍⵍⵉ ⵏⵙⵙⵏ ⴳ ⴽⵉⴳⴰⵏ ⵏ ⵉⵙⵓⴳⴰⵎ ⵓⵔⵜⴰ ⵉⵍⵍⵉ ⵍⵉⵙⵍⴰⵎ ⵎⴰⵙⴷ ⵉⵎⵣⴷⴰⵖ ⵏ ⵉⵣⵣⵍⵎⴹ ⵏ ⵉⴼⵔⵉⵇⵢⴰ ⴽⴽⴰⵏⵜⵉⵏ ⴰⵔ ⵙⴽⴰⵔⵏ ⵜⵉⵎⵢⵓⵔⵉⵏ ⴳ ⵓⵙⵏⵜⵉ ⵏ ⵡⴰⵢⵢⵓⵔ ⵏ ⵉⵏⵏⴰⵢⵔ, ⴽⴽⴰⵏⵜⵜⵉⵏ ⵉⵎⴰⵙⵉⵃⵉⵏ ⵏ ⵉⴼⵔⵉⵇⵢⴰ ( ⵣⵓⵏⴷ ⵓⵖⵓⵙⵟⵓⵚ ⴷ ⵜⵉⵔⵜⵓⵍⵢⴰⵏ ) ⴳⴰⵏ ⵎⴳⴰⵍ ⵏ ⵜⵎⵢⵓⵔⵉⵏ ⴷⴷⵖ ⵍⵍⵉⵖ ⴳⴰⵏⵜ ⵜⵉⵇⵇⴱⵓⵔⵉⵏ .
ⵍⵍⵉⵖ ⵉⵍⵍⴰ ⵓⵎⵓⵙⵙⵓ ⴰⴷⵍⵙⴰⵏ ⴰⵎⴰⵣⵉⵖ ⴽⴽⵓⵎⵔⴰⵡ ⵏ ⵢⵉⵔⵏ ⵉⵜⵜⵓⵣⴷⴰⵢ ⵓⵙⵏⵜⵉ ⵏ ⵓⵙⴳⴳⵯⴰⵙ ⴰⴽⵔⵣⴰⵏ ⴷ ⵓⵎⵣⵔⵓⵢ ⴰⵙⵔⵜⴰⵏ ⵏ ⵎⵉⵙⵕ ⵜⴰⵇⵇⴱⵓⵔⵜ ⵍⵍⵉⵖ ⵓⵍⵉⵏ ⵉⵍⵉⴱⵉⵢⵢⵏ ( ⵉⵎⴰⵣⵉⵖⵏ ⵉⵇⵇⴱⵓⵔⵏ ⵏⵏⴰ ⵢⴰⵣⴹⵏ ⵉ ⵎⵉⵙⵕ ) ⵙ ⵓⴷⴰⴱⵓ ⵏ ⵎⵉⵙⵕ ⵍⵍⵉⵖ ⵉⵙⴽⵔ ⵛⵉⵛⴰⵏⴳ ⵉ ⵜⵡⵊⴰ ⵜⴰⵏⴱⴱⴰⴹⵜ ⵜⵉⵙⵙ 22 ⴰⵎⵣⵔⵓⵢ ⴰⴷ ⴰⵙⴰ ⵙⴽⴰⵔⵏ ⴽⵔⴰ ⵏ ⵉⵎⵣⵔⵓⵢⴰⵏⵏ ⴰⵙⴰⴽⵓⴷ ⵙ ⵓⵙⴳⴳⵯⴰⵙ 950 ⵓⵔⵜⴰ ⵜⵍⵍⵉ ⵜⵍⴰⵍⵉⵜ ⵏ ⵄⵉⵙⴰ .
ⵙⵉⵏ ⵉⵙⴰⴽⵓⴷⵏ ⴰⴷ ( ⴰⵙⴳⴳⵯⴰⵙ ⴰⴽⵔⵣⴰⵏ ⴷ ⵍⵍⵉⵖ ⵢⵓⵍⵉ ⵛⵉⵛⴰⵏⴳ ⵙ ⵓⴷⴰⴱⵓ ⵏ ⵎⵉⵙⵕ ) ⵜⵍⵍⴰ ⵜⵣⴷⴰⵢⵜ ⵜⴰⵎⵣⵔⵓⵢⴰⵏⵜ ⴳⵔⴰⵜⵙⵏ ⵏⵏⴰ ⵢⴰⴽⴽⴰⵏ ⴰⵙⵏⵜⵉ ⵉ ⵓⵙⴰⴽⵓⴷ ⴷ ⵓⵎⵣⵔⵓⵢ ⴰⴽⵔⵣⴰⵏ, ⴰⵎⵣⵔⵓⵢ ⴰⴷ ⵏⵏⴰ ⵅⴼ ⵙⴽⴰⵏⵜ ⴽⵉⴳⴰⵏ ⵏ ⵜⴰⵍⵍⴰⵙⵉⵏ ⵏ ⵓⵎⵣⵔⵓⵢ ⴷ ⵜⵓⵍⵍⵉⵙⵜ ⵏ Le mythe fondateur.
2 - ⵎⴰⵎⵏⴽ ⴰⴷ ⴳⴰⵏⵜ ⵜⴱⵔⵉⴷⵉⵏ ⵏⵉⵖ ⵜⵉⵎⴰⵎⴽⵉⵏ ⵏ ⵓⵙⴼⵓⴳⵍⵓ ⴰⴷ ?
ⵜⵉⴱⵔⵉⴷⵉⵏ ⵏ ⵓⵙⴼⵓⴳⵍⵓ ⵖⵓⵔⵙⵏⵜ ⵜⵎⴰⵜⴰⵔⵜ ⵜⴰⵙⴳⴰⵡⴰⵏⵜ ⴷ ⵜⵎⵓⵔⴰⵏⵜ, ⵉⵛⵇⵇⴰ ⴰⴷ ⵙ ⵜⵜ ⵏⵙⵜⵉ ⴳⵔ ⵜⴰⴷⵙⵍⴰⵏⵜ ⴷ ⵡⴰⵔ ⵜⵉⵏⴷⵉ, ⵎⵉⵏⵣⵉ ⴽⵔⴰ ⵉⴳⴰⵜ ⵜⴰⵖⵔⵉⴷⵜ ⵖⵓⵔⵙ ⴰⵜⵉⴳ ⵏⵏⵙ, ⴷ ⵎⴰ ⴰⴷ ⵉⴳⴰⵏ ⴰⵡⵜⵜⴰⵙ ⵏ ⴽⵔⴰ ⵉⴳⴰⵜ ⵜⴰⴷⵍⵙⴰ, ⴷ ⵎⴰ ⴰⵏ ⴰⵙ ⵜⵜⴰⵡⵙⵙⴰⵏ ⴳⵔ ⵜⴷⵍⵙⴰ ⵏ ⵓⵎⴰⴹⴰⵍ, ⵜⵉⵎⴰⵎⴽⵉⵏ ⴰⴷ ⵖⵓⵔⵙⵏⵜ ⵜⴰⵣⴷⴰⵢⵜ ⵙ ⵜⴼⵍⵍⴰⵃⵜ (ⵜⴰⵢⵔⵣⴰ ⴷ ⵜⴰⴽⵙⵙⴰⴱⵜ) ⵎⵉⵏⵣⵉ ⵏⵜⵜⴰⵜ ⴰⴷ ⵉⴳⴰⵏ ⴰⵏⴱⴷⴰⴷ ⵏ ⵉⵙⵓⴳⴰⵎ ⵉⴷⵎⵙⴰⵏ ⵏ ⵜⴰⵡⵊⵉⵡⵉⵏ ⴷ ⵜⵔⵓⴱⴱⴰ ⵜⵉⵏⴼⴳⴰⵏⵉⵏ.
ⴳ ⵎⴰⴷ ⵉⵥⵍⵉⵏ ⵙ ⵜⴽⵙⵙⴰⴱⵜ, ⴰⵔ ⵏⵥⵕⵕⴰ ⵜⵉⵏⴷⵉ ⵏⵏⵙ ⴳ ⵜⵎⵏⴰⴹⵉⵏ ⵏⵏⴰ ⴳ ⵙⵓⵍⵏ ⵉⵍⵣⴷⴰⵖⵏ ⵏⵏⵙ ⴷⵔⵔⵏ ⵙ ⵜⴰⵢⵙⵙⴰ, ⵙⵍⴰⵡⴰⵏ ⴰⴽⴽⵯ ⵜⴰⵢⵙⵙⴰ ⵜⴰⵎⴳⵔⴰⵡⵜ, ⴰⵔ ⵜⴳⴳⴰ ⵜⴰⵡⵔⵓⵜ ⵏ ⵜⴽⵙⵙⴰⴱⵜ ⴳ ⵓⵅⴼ ⵏ ⵓⵙⴳⴳⵯⴰⵙ ⵜⵉⵏ ⵓⵙⵄⴷⵉ , ⴰⵔ ⴰⵙ ⵜⵜⵉⵏⵉⵏ " ⵀⴰⵏ ⴰⵅⵙⵉⵡⵏ ⴳⴰⵏⵜ ⵜⵉⵏⴽ", ⴷ ⵡⴰⵍⵍⵉ ⵉⴳⴰⵏ ⴰⵙⵄⴷⵉ ⵉⴳⴰⵜ ⵡⴰⵍⵍⵉ ⵢⵓⴼⴰⵏ ⴰⵖⵔⵎⵉ ⵏ ⵜⵉⵢⵏⵉ ⵍⵍⵉ ⵉⵍⵍⴰⵏ ⴳ ⵜⵉⵔⵎⵜ ⵏ ⵜⵎⵍⴷⴰ ⴰⴷ (ⵜⴳⵯⵍⵍⴰ).
ⵎⴰⴷ ⵉⵥⵍⵉⵏ ⴷ ⵜⴰⵢⵔⵣⴰⵏⵖⴷ ⵜⴰⴽⵔⵣⴰ , ⴰⵔ ⵜⵜⵉⵍⵉ ⴳ ⵡⴰⵏⴰⵡ ⵏ ⵜⵉⵔⴰⵎ ⵍⵍⵉ ⵉⵜⵜⵉⵍⵉⵏ ⴳ ⵜⵎⵍⴷⴰ ⴰⴷ, ⵍⵍⴰⵏ ⴳ ⴽⵔⴰ ⵏ ⵜⵎⵏⴰⴹⵉⵏ ⴰⵔ ⵜⵜⵉⵏⵉⵏ ⵅⴰⵙ ⴰⴷ ⵓⵔ ⵢⵉⵍⵉ ⵓⵖⵔⵓⵎ ⴳ ⵜⵉⵔⵎⵜ ⵏ ⵉⴹ ⵏ ⵉⵏⵏⴰⵢⵔ, ⵎⵉⵏⵣⵉ ⵉⵇⵇⵓⵕ , ⴷ ⵉⴳⴰ ⴳⴰⵔ ⴳ ⵢⵉⴹ ⴰⴷ ⵍⵍⵉ ⵙ ⵔⴰⴷ ⵙⴱⵔⵔⴽⵏ ⴰⵙⴳⴳⵯⴰⵙ ⴰⴷ ⵓⵔ ⵜⵇⵇⴰⵔ (ⴰⵏⴰⵎⴽ ⵏⵏⵙ ⵉⴳⴰ ⴰⵏⵎⵎⴰⵔ ⴷ ⵓⴷⴷⵉⵙ) , ⵎⴰ ⴰⴷ ⴰⵔ ⵜ ⵏⵜⴼⴰⵙⴰⵔ ⵙ ⵎⴰⵅ ⴳ ⴽⵔⴰ ⵏ ⵜⵎⵏⴰⴹⵉⵏ ⴰⵔ ⵜⵜⵉⵔⵉⵏ ⵜⵉⵔⴰⵎ ⴰⴷ ⵇⵇⵓⵔⵏⵜ , ⴰⴷ ⵓⵔ ⵜⵇⵇⵓⵕ ⵜⵉⵔⵎⵜ ⵣⵓⵏⴷ ⵜⴰⴳⵯⵍⵍⴰ ⵏⵉⵖ ⵙⴽⵙⵓ , ⵏⵉⵖ ⵓⵔⴽⵉⵎⵏ ⵏⵉⵖ ⵍⴱⵙⵉⵙ.
ⵉⵛⵇⵇⴰ ⴰⴷ ⴽⵓⵍⵍⵓ ⵏⴱⴷⵔ ⵜⵉⵎⵢⵓⵔⵉⵏ ⴷ ⵜⴱⵔⵉⴷⵉⵏ ⵏ ⵓⵙⴼⵓⴳⵍⵓ ⴳ ⵎⴰⵕⵕⴰ ⵜⵓⵎⵏⴰⴹⵉⵏ ⵏ ⵍⵎⵖⵜⵉⴱ, ⵏⵉⵖ ⵉⵇⵇⴰⵏ ⴷ ⴰⴷ ⵢⵉⵍⵉ ⵓⵙⵡⵉⵏⴳⵎ ⵅⴼ ⵓⴼⴰⵔⵙ ⵏ ⴽⵔⴰ ⵏ ⵓⴷⵍⵉⵙ ⴰⴷ ⴳⵉⵙ ⵉⵍⵉⵏⵜ ⵎⴰⵕⵕⴰ ⵜⵉⵎⵢⵓⵔⵉⵏ ⵏ ⴽⵔⴰ ⵉⴳⴰⵜ ⵜⴰⵎⵏⴰⴹⵜ ⵜⴰⴼⵍⵍⴰⵃⵜ (ⵉⴷⵔⴰⵔⵏ , ⵉⵣⴰⵖⴰⵔⵏ...) ⵎⵉⵏⵣⵉ ⵜⵉⵎⵥⵍⴰⵢ ⵏ ⵜⴼⵍⵍⴰⵃⵜ ⴷⴰⵔⵙ ⵜⵉⵏⴷⵉ ⵅⴼ ⵡⴰⵏⴰⵡ ⵏ ⵜⵉⵔⴰⵎ ⵍⵍⵉ ⵉⵜⵜⵉⵍⵉⵏ ⴳ ⵜⵎⵢⵓⵔⵉⵏ ⴰⴷ.
3- ⵎⴰⴷ ⴳⴰⵏ ⵉⵙⵏⴼⴰⵍⵏ ⵏⵏⴰ ⵉⵍⵍⴰⵏ ⴳ ⵜⴼⵓⴳⵍⵉⵡⵉⵏ ⵙ ⵓⵙⴳⴳⵯⴰⵙ ⴰⴷ ?
ⵜⵉⴼⵓⴳⵍⵉⵡⵉⵏ ⵏ ⴷⵖⵉ ⵖⵓⵔⵙⵏ ⵢⴰⵜ ⵜⵎⴰⵜⴰⵔⵜ ⵏ ⵜⵎⴰⴳⵉⵜ, ⵎⵉⵏⵣⵉ ⵍⵍⴰⵏⵜ ⴳ ⵓⵙⴰⵜⵉ ⵏ ⵜⵓⵜⵔⴰ ⵙ ⵜⵓⴳⵜⵜ ⵏ ⵉⵣⵔⴼⴰⵏ ⵉⴷⵍⵙⴰⵏ ⵏⵏⴰ ⵔⴰⴷ ⵉⵙⴷⵓⵙ ⴰⵎⵏⴰⴷ ⴰⵎⴰⵣⵉⵖ ⴳ ⵜⴷⵍⵙⴰ ⵜⴰⵏⴰⵎⵓⵔⵜ .
ⵓⵔ ⴳⵉⵙ ⵜⵓⵔⴷⴰ ⵎⴰⵙ ⵔⴰⴷ ⵏⵥⵕ ⵜⵓⴳⵜⵜ ⵏ ⵡⴰⵏⴰⵡⵏ ⵉⵎⴰⵢⵏⵓⵜⵏ ⵏⵏⴰ ⵓⵔ ⵏⵎⵢⴰⵔ ⴳ ⵜⵎⵢⵓⵔⵉⵏ ⵏ ⵜⴼⵓⴳⵍⴰ ⵙ ⵉⴹ ⵏ ⵉⵏⵏⴰⵢⵔ ⵙⵍⴰⵡⴰⵏ ⴰⴽⴽⵯ ⴳ ⵜⵎⴷⵉⵏⵉⵏ, ⴰⵔ ⵏⵥⵕⵕⴰ ⴰⵡⴷ ⵎⴰⵙ ⵉⵍⵍⴰ ⵢⴰⵏ ⵓⵃⵟⵟⵓ ⵅⴼ ⵜⵎⵢⵓⵔⵉⵏ ⵜⵉⵇⴱⵓⵔⵉⵏ ⵙⵍⴰⵡⴰⵏ ⴰⴽⴽⵯ ⵎⴰⴷ ⵉⵥⵍⵉⵏ ⵙ ⵜⵉⵔⴰⵎ ⵜⵉⵇⴱⵓⵔⵉⵏ , ⵉⵇⵇⴰⵏ ⴷ ⴰⴷ ⵓⵔ ⵏⵜⵜⵓ ⵍⴰⵙ ⵉⵎⴰⵙⵙⵏ ⵏ ⵓⵎⵙⴰⵡⴰⴹ ⴰⵏⴰⵎⵓⵏ ⴰⴷ ⵉⵙⵙⵔⵅⴰⵏ ⵎⴰ ⴰⵏ, ⵎⴰ ⴰⴷ ⴰⴷ ⵢⵓⵊⵊⴰⵏ ⵉⵙⵏⴼⴰⵍ ⴰⴷ ⵅⴰⵜⵔⵏ , ⵎⴰⵛⵛ ⴰⵙⴼⵓⴳⵍⵓ ⵙ ⵉⵅⴼ ⵏ ⵓⵙⴳⴳⵯⴰⵙ ⴰⴷ ⵓⵔ ⵖⵓⵔⵙ ⵜⴰⵣⴷⴰⵢⵜ ⵖⴰⵙ ⵙ ⵢⵉⴳⵔ ⴰⵎⴰⵣⵉⵖ , ⵎⴰⵛⵛ ⴰⵔ ⵜ ⵏⵜⵜⴰⴼⴰ ⴰⵡⴷ ⴳ ⵜⵍⵏⴰⴹⵉⵏ ⵏⵏⴰ ⵓⵔ ⵉⵙⴰⵡⴰⵍⵏ ⵙ ⵜⵎⴰⵣⵉⵖⵜ.
ⴰⴼⵔⴰⴳ ⵏⵉⵖ ⴰⵃⵟⵟⵓ ⵅⴼ ⴽⵔⴰ ⵏ ⵡⴰⵢⴷⴰ ⵎⴽ ⴷⴰ ⵉⴳⴰ ⵉⵇⵇⴰⵏ ⴷ ⴰⴷ ⵢⵉⵍⵉ ⴳ ⵜⵉⵣⵡⵉⵔⵉ ⵙ ⵜⵉⵏⴷⵉ ⵏ ⵜⵙⵎⴽⵯⵜⵉⵜ ⵜⴰⵎⵣⵔⵓⵢⵜ ⵜⴰⵏⴰⵎⵓⵏⵜ, ⴷ ⴰⵔ ⵜⵜⵉⵏⵉⵖ ⵎⴰⵙ ⵜⵉⴱⵔⵉⴷⵉⵏ ⵏ ⵓⵃⵟⵟⵓ ⵏⵏⵙ ⵉⴳⴰⵜ ⴰⴷ ⵜ ⵏⵣⵎⴻⵎⵎ ⴰⴼⴰⴷ ⴰⴷ ⵉⵙⵓⵍ ⵙ ⵜⴰⵙⵓⵜⵉⵏ ⵏⵏⴰ ⴷ ⵉⴽⴽⴰⵏ ⴷⴰⵜ, ⴰⵡⴷ ⴰⴷ ⵢⵉⵍⵉ ⴳ ⵜⵍⴳⴰⵎⵜ ⵏ ⵡⴰⵢⴷⴰ ⴰⵏⴰⵎⵓⵔ ⴷ ⴰⴷ ⵉⴳ ⴰⵢⴷⴰ ⴰⴳⵔⴰⵖⵍⴰⵏ , ⵜⴰⵡⵓⵔⵉ ⵅⴼ ⵎⴰ ⴰⴷ ⵜⵔⴰ ⵜⵓⴳⵜⵜ ⵏ ⵜⵣⵎⵎⴰⵔ ⵙⴳ ⴷⴰⵔ ⵡⵉⵍⵍⵉ ⴷⴰⵔ ⵜⴰⵣⴷⴰⵢⵜ ⵙ ⵎⴰⴷ ⵉⵥⵍⵉⵏ ⵙ ⵓⵎⵏⵉⴷ ⴰⴷⵍⵙⴰⵏ.
ⴰⵡⴷ ⵜⴰⵖⵜⵙⵜ ⴰⴷ ⵉⴼ ⵉⵅⴼ ⵏ ⵓⵙⴳⴳⵯⴰⵙ ⴰⵎⴰⵣⵉⵖ ⵜⴰⵏⵏⵓⵕⵥⵎⵜ ⵜⵓⵏⵚⵓⴱⵜ, ⵔⴰⴷ ⵉⴳ ⵢⴰⵜ ⵜⵖⴰⵡⵙⴰ ⵍⵍⵉ ⵔⴰⴷ ⵉⵙⴷⵓⵙ ⴰⵙⵙⵖⵥⵏ ⵓⵏⵚⵉⴱ ⴷ ⵓⵎⵔⵙⴰⵍ ⵙ ⵜⵓⵙⵏⵏⴰ ⴷ ⵜⴷⵍⵙⴰ ⵜⴰⵎⴰⵣⵉⵖⵜ, ⵎⴰⵙ ⵉⴳⴰ ⵢⴰⵏ ⵓⴼⵔⴷⵉⵙ ⴰⴷⵙⵍⴰⵏ ⵏ ⵜⴷⵍⵙⴰ ⵜⴰⵎⵖⵔⵉⴱⵓⵢⵜ, ⴷ ⵔⴰⴷ ⵉⵙⴷⵓⵙ ⴰⵡⴷ ⵜⵉⵣⴷⴰⵢⵉⵏ ⵏ ⵓⵣⵔⵓⵢ ⵏⵏⴰ ⴰⵖ ⵉⵙⵎⵓⵏ ⴷ ⵜⵎⵉⵣⴰⵔ ⵏ ⵜⴰⴼⵔⵉⵇⵜ ⵏ ⵉⵥⵥⵍⵎⴹ, ⵔⴰⴷ ⵉⴼⴽ ⵢⴰⵏ ⵓⵥⵏⵥⴰⵔ ⵉ ⵢⴰⵜ ⴳ ⵜⵎⵥⵍⴰⵢ ⵏ ⵜⴷⵍⵙⴰ ⵏⵏⴰ ⵙ ⵜⴻⵜⵜⴰⵡⵙⵙⴰⵏ ⵜⵖⵔⵎⴰ ⵏ ⵜⵎⵏⴰⴹⵜ ⵏ ⵉⴼⴼⵓⵙ ⵉ ⵢⵉⵍ ⴰⵎⵍⵍⴰⵍ ⴰⵏⴰⵎⵎⴰⵙ.