ⵏⵙⴰⵇⵇⵙⴰ ⵎⴰⵙⵙ ⴱⵍⵄⵉ ⵅⴼ ⵜⵓⵥⵍⴰⵢⵉⵏ ⵏ ⵓⵏⵎⴰⵍⴰ ⴰⴷ ⵏⵏⵙ ⴰⵎⴰⵢⵏⵓ, ⴷ ⵜⵉⵍⴰⵍ ⵏⵏⵙ ⴳ ⵓⵣⵓⵣⵣⵔ ⵏ ⵓⵜⵓⵢ ⵏ ⵡⵉⵏⵏⴰ ⵉⵔⴰⵏ ⴰⴷ ⵉⵍⵎⴷ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ .
ⵉⵔⴰⵔ ⴰⵖ ⵓⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ, ⵉⵏⵏⴰ ⵎⴰⵙⴷ ⵜⵉⵙⵏⵙⵉ ⵏ -ⴰⵍⵎⵎⵓⴷ- ⵉⵙⴽⵔⵜ ⵙⴳ ⵓⴷⵍⵉⵙ ⴰⵎⴰⵢⵏⵓ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵓⵙⵡⵉⵔ ⵏⵏⵙ ⴰⵎⵣⵡⴰⵔⵓ, ⴰⴼⴰⴷ ⴰⴷ ⵉⵖⵉ ⵓⵏⵍⵎⴰⴷ ⴰⴷ ⵢⴰⵎⵥ ⴽⵉⴳⴰⵏ ⵏ ⵜⵓⵎⵍⴰⵢⵉⵏ ⴳ ⵢⴰⵜ ⵜⵉⵣⵉ ⵉⴷⵔⵓⵙⵏ, ⴰⵔ ⴰⵙ ⵉⵙⵙⵍⵎⴰⴷ ⴰⵡⴷ ⵜⵉⵎⴰⵎⴽⵉⵏ ⴷ ⵜⵖⴰⵔⴰⵙⵉⵏ ⵉⵀⵉⵢⵢⴰⵏ ⴳ ⵎⴰⴷ ⵉⵣⵍⵉⵏ ⵙ ⵜⵡⵏⵖⴰ .
ⴳ ⵜⵙⴳⴰ ⵢⴰⴹⵏ, ⵉⵏⵏⴰ ⵎⴰⵙⵙ ⴱⵍⵄⵉ ⵎⴰⵙⴷ ⴰⵏⵎⴰⵍⴰ ⴰⴷ ⵉⵣⴹⴰⵕ ⴰⴷ ⵜ ⵉⵙⵎⵔⵙ ⴽⵓⵢⴰⵏ ⴱⵍⴰ ⵉⵣⴷⵉ ⴷ ⵜⵔⴰⵜⵙⴰ ⵏ ⵍⴰⵏⵜⵉⵔⵏⵉⵜ, ⵉⴳ ⵢⴰⵏ ⵓⵏⵎⴰⵍⴰ ⵏⵏⴰ ⴳ ⵉⵍⵍⴰ ⵓⵙⴼⴰⵍⴽⵉ ⴳ ⵎⵙⴰⵙⴰⵏ ⵓⴽⵯⵍⴰⵏ, ⵎⴰ ⴰⴷ ⴰⴷ ⵉⵜⵜⴰⵊⵊⴰⵏ ⴰⵣⵣⴰⵏ ⴰⴷ ⵢⵉⵔⵉ ⴰⴷ ⵉⵙⵎⴻⵔⵙ ⴰⵏⵎⴰⵍⴰ ⴷⴷⵖ ⵏⵏⴰ ⵉⴳⴰⵏ ⵢⴰⵜ ⵜⵡⵡⵓⵔⵉ ⵉⴷⵓⵙⵏ ⴳ ⵢⵉⴳⵔ ⵏ ⵓⵙⴱⵓⵖⵍⵓ ⵏ ⵜⴱⵉⴷⴰⵖⵓⵊⵉⵜ ⴷ ⵜⵎⴰⵎⴽⵉⵏ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⵏⵏⵖ ⵜⴰⵎⴰⵣⵉⵖⵜ .
ⵉⵙⴽⵔ ⵓⵙⵍⵎⴰⴷ ⵎⴰⵙⵙ ⴱⵍⵄⵉ ⴰⵡⴷ ⴰⵙⵎⴰⵜⵜⵉ ⵏ ⵜⵓⵍⵍⵉⵙⵉⵏ ⵙⴳ ⵜⵏⴼⵓⵍⵉⵏ ⴰⵔ ⴰⵏⵎⴰⵍⴰ ⴰⵍⵉⴽⵜⵕⵓⵏⵉ, ⵏⵏⴰ ⵉⴳⴰⵏ ⴰⵎ ⵉⵙⴼⵔⵉⵙⵏ ⵙ ⵉⵎⵙⵍⵉ ⴷ ⵜⵡⵍⴰⴼⵜ ⵙ ⵓⵖⵓⴷⵓ ⵉⴷⵓⵙⵏ, ⵉⵙⵙⵓⵙⵎ ⵎⴰ ⴰⵏⵏ ⵉⵎⵙⵜⴳⴳⴰⵔⵏ ⴷ ⵉⵙⵍⵎⴰⴷⵏ ⴰⴽⴽⵯ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵏⵏⴰ ⵔⴰⴷ ⵙⵉⵙ ⵉⵙⵡⵡⵓⵔⵉ ⴳ ⵜⵉⵏⵎⴰⵍ ⵜⵉⵎⵖⵔⵉⴱⵉⵢⵢⵉⵏ ⴳ ⵢⵉⴳⵔ ⵏ ⵓⵙⵙⵍⵎⴷ ⵏ ⵜⵓⵜⵍⴰⵢⵜ ⴷ ⵓⵙⴽⴽⵉⵍ ⴰⵎⴰⵣⵉⵖ .
ⴳ ⵎⴰⴷ ⵉⵥⵍⵉⵏ ⵙ ⵜⵙⵡⵉⵏⴳⵎⵜ ⵜⴰⵎⵣⵡⴰⵔⵓⵜ ⵏ ⵓⵙⴽⴽⵉⵔ ⵏ ⵓⵏⵎⴰⵍⴰ ⴷⴷⵖ, ⵉⵏⵏⴰ ⵎⴰⵙⵙ ⴱⵍⵄⵉ ⵎⴰⵙ ⵉⵔⴰ ⴰⴷ ⵉⵙⴽⵔ ⵢⴰⵏ ⵓⴹⴼⵓⵕ ⵏ ⵜⵉⵜⵉⵇⵏⵉⵢⵉⵏ ⵜⵉⵎⴰⵢⵏⵓⵜⵉⵏ ⵏⵏⴰ ⵉⵣⴷⵉⵏ ⴷ ⵓⵣⵎⵣ ⴰⴷ ⵏ ⵜⵙⵏⵎⴰⵍⴰⵢⵜ ⴰⴼⴰⴷ ⴰⴷ ⵎⵎⴰⵜⵜⵉⵏ ⵉⵙⵍⵎⴰⴷⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴰⵡⴷ ⵏⵜⵜⵏⵉ ⵙ ⵜⵎⴰⵜⵔⴰⵔⵜ ⴳ ⵜⵎⴰⵎⴽⵉⵏ ⵏ ⵓⵙⵙⵍⵎⴷ, ⵙⴷ ⵉⵇⵇⴰⵏ ⵓⴹⴼⵓⵕ ⵏ ⵜⵉⵜⵉⵇⵏⵉⵢⵢⵉⵏ ⵜⵉⵍⵉⴽⵜⵕⵓⵏⵉⵏ ⵉ ⴽⵓ ⵎⴰⴷ ⵉⴳⴰⵏ ⴰⵙⵍⵎⴰⴷ, ⵙⵍⴰⵡⴰⵏ ⴰⴽⴽⵯ ⴰⵙⵍⵎⴰⴷ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⴳ ⵜⵉⵏⵎⵍ ⵜⴰⵎⵖⵔⵉⴱⵉⵜ .
ⴰⵙⵎⵔⵙ ⵏ ⵜⵙⵏⵙⵉ ⴷⴷⵖ ⵉⵣⴹⴰⵕ ⴰⴷ ⵢⴰⵊⵊ ⴽⵉⴳⴰⵏ ⵏ ⵉⵏⵍⵎⴰⴷⵏ ⴰⴷ ⵉⵔⵉⵏ ⴰⵍⵎⵎⵓⴷ ⵏ ⵉⵙⴽⴽⵉⵍⵏ ⵏ ⵜⵓⵜⵍⴰⵢⵜ ⵜⴰⵎⴰⵣⵉⵖⵜ ⵢⴰⵡⵙ ⴰⵙⵏ ⴰⵡⴷ ⴳ ⵓⵙⴷⵓⵙ ⵏ ⵜⵣⵎⵎⴰⵔ ⵏⵏⵙⵏ ⴳ ⵢⵉⴳⵔ ⴰⴷ .