ⴳ ⵓⵎⵏⵉⴷ ⴰⴷ ⵏⵉⵜ, ⵉⴼⴽⴰ ⵓⴳⵎⴰⵎ ⴰⴱⵕⵍⴰⵎⴰⵏⵉ ⵙⴳ ⵓⴽⴰⴱⴰⵔ ⵏ ⵉⵏⵙⵉⵎⴰⵏⵏ ⵎⴰⵙⵙ ⵎⵓⵏⵚⵉⴼ ⵟⵟⵓⴱ ⵢⴰⵏ ⵓⵙⵇⵇⵙⵉ ⵉⵜⵜⵢⴰⵔⴰⵏ ⵉ ⵜⵏⵖⵍⴰⴼⵜ ⵏ ⵓⵙⵎⴰⵜⵜⵉ ⵓⵟⵜⵓⵏⴰⵏ ⴷ ⵓⵙⴳⴳⴷ ⵏ ⵜⵎⵀⵍⴰ, ⴰⵙⵇⵇⵙⵉ ⴰⴷ ⵉⵥⵍⵉ ⵙ ⵜⵙⵜⵕⴰⵜⵉⵊⵉⵢⵉⵏ ⵏ ⵡⴰⴷⴰⴼ ⵏ ⵉⵎⵛⵓⵎⵔⵏ ⴰⵢⵜ ⵜⵓⴳⴳⵉⵡⵉⵏ ⵜⵉⵎⴰⵜⴰⵢⵉⵏ ⵏⵏⴰ ⵉⵙⵙⴳⵎⴹⵏ ⴼ ⵓⵏⵇⵇⵉⵙ ⵏ 20 ⵢⵓⵍⵢⵓⵣ ⴳ ⵜⴰⵣⵣⵓⵍⵉⵡⵉⵏ ⵜⵉⵎⵓⵏⴰⵏⵉⵏ.
ⵜⴰⵖⵓⵍ ⵜⵎⵏⵜⵉⵍⵜ ⴰⴷ ⵙ ⵓⵙⴳⴳⵯⴰⵙ ⵏ 2011 ⵍⵍⵉⵖ ⵜⴼⴽⴰ ⵜⵏⴱⴰⴹⵜ ⵏ ⵎⴰⵙⵙ ⵄⴱⴱⴰⵙ ⵍⴼⴰⵙⵉ ⵜⴰⵎⵍⴷⴰ ⵏ ⵓⵙⵡⵡⵓⵔⵉ ⵉ ⴽⵉⴳⴰⵏ ⵏ ⵉⵎⵛⵓⵎⵔⵏ ⴰⵢⵜ ⵜⵓⴳⴳⵉⵡⵉⵏ ⵜⵉⵎⴰⵜⴰⵢⵉⵏ ⴱⵍⴰ ⵜⴰⴱⵔⵣⴰ ⴳ ⵓⵙⴰⵜⵉ ⵏ ⵜⴰⵣⵣⵓⵍⵉⵏ ⵜⵉⵎⵓⵏⴰⵏⵉⵏ, ⵎⴽⵍⵍⵉ ⵉⵜⵜⵓⵙⴳⵎⴹ ⵓⵏⵇⵇⵉⵙ ⵏ 20 ⵢⵓⵍⵢⵓⵣ ⴳ ⵓⵙⴳⴳⵯⴰⵙ ⴰⵏⵏ ⵏⵉⵜ ⴷ ⵉⵎⵙⵜⴳⴳⴰⵔⵏ ⵏ ⴰⵢⵜ ⵜⵓⴳⴳⵉⵡⵉⵏ ⵜⵉⵎⴰⵜⴰⵢⵉⵏ ⴰⴼⴰⴷ ⴰⴷ ⴰⵙⵏ ⵜⵜⵓⵙⴽⴰⵔⵏ ⵉⴷⵖⴰⵔⵏ ⵏⵏⵙⵏ ⴳ ⵜⴰⵣⵣⵓⵍⵉⵏ ⵜⵉⵎⵓⵏⴰⵏⵉⵏ, ⴰⴼⴰⴷ ⴰⴷ ⵜⵉⵍⵉ ⵜⴷⵔⵉⵎⵜ ⵏ ⵓⵙⵡⵡⵓⵔⵉ ⵏⵏⵙⵏ ⴳ ⵜⵙⴷⵔⵉⵎⵜ ⵏ ⵓⵙⴳⴳⵯⴰⵙ ⵏ 2012 , ⵎⴰⵛⴰⵏ ⵍⵍⵉⵖⴷ ⵜⵓⵛⴽⴰ ⵜⵏⴱⴰµⴹⵜ ⵏ ⴱⵏⴽⵉⵔⴰⵏ ⵓⵔ ⴰⵙⵏ ⵜⵙⴽⵉⵔ ⵙ ⵉⵙⵙⵓⵜⵓⵔⵏ ⵏⵏⵙⵏ.
ⴳ ⵜⵙⴳⴰ ⵢⴰⴹⵏⵉⵏ, ⵜⵓⴳⵉ ⵜⵏⴱⴰⴹⵜ ⵏ ⵖⵉⵍⴰⴷ, ⵙ ⵉⵙⵎ ⵏ ⵎⴰⵙⵙⴰ ⵖⵉⵜⴰ ⵎⵣⵓⵔ ⵏⵏⴰ ⵉⴳⴰⵏ ⵜⴰⵏⵖⵍⴰⴼⵜ ⵏ ⵓⵎⵎⵓⵜⵜⵉ ⵓⵟⵟⵓⵏⴰⵏ ⴷ ⵓⵙⴳⴳⴷ ⵏ ⵜⵎⵀⵍⴰ ⴰⴼⴰⴷ ⴰⴷ ⵜⵓⵔⵔⵉ ⵙ ⵓⵙⵡⵡⵓⵔⵉ ⵓⵙⵔⵉⴷ.
ⵜⵣⴰⵢⴷ ⵎⴰⵙⵙ ⵎⵣⵓⵔ ⵎⴰⵙⴷ ⵍⵍⵉⵖⴷ ⵉⴼⴼⴰⵖ ⵓⵙⵍⴳⵏ ⵏⵏⴰ ⵉⵜⵜⵉⵏⵉⵏ ⵓⵔ ⵙⵓⵍ ⵉⵍⵍⴰ ⵓⵙⵡⵡⵓⵔⵉ ⵙ ⵜⵖⴰⵔⴰⵙⵜ ⵜⵓⵙⵔⵉⴷⵜ, ⵎⴰ ⴰⵏⵏ ⴰⵔⴰⴷ ⵓⵔ ⵉⵙⵙⵉⴷⵉⵔ ⴰⵏⵇⵇⵉⵙ ⵏ 20 ⵢⵓⵍⵢⵓⵣ ⵍⵍⵉⵖ ⵉⴳⴰ ⵎⴳⴰⵍ ⵏ ⵉⵙⵍⴳⴰⵏⵏ ⵓⵏⴱⵉⴹⵏ ⵉⵎⴰⵢⵏⵓⵜⵏ, ⵏⵏⴰ ⵉⵙⴽⵓⵏ ⴼ ⵓⵎⵃⵉⵣⵡⴰⵔ ⴷ ⵓⵏⴰⵥⴰⵕ ⴼ ⵜⵡⵡⵓⵔⵉⵡⵉⵏ ⴷ ⵜⴰⵣⵓⵍⵉⵏ ⵜⵉⵎⵓⵏⴰⵏⵉⵏ ⴰⴼⴰⴷ ⴰⴷ ⵜⴼⴽ ⵜⴰⵎⵍⴷⴰ ⵉ ⴽⵓⵍⵍⵓ ⵡⵉⵏⵏⴰ ⵢⵓⵎⵥⵏ ⵜⵓⴳⴳⵉⵡⵉⵏ ⵜⵉⵙⴷⴰⵡⴰⵏⵉⵏ ⵜⵉⵎⴰⵜⴰⵢⵉⵏ.