ⵉⵙⵙⵉⵅⴼ ⵍⵎⵖⵔⵉⴱ ⴳ ⵍⵇⴰⵀⵉⵔⴰ ⵢⴰⵜ ⵜⵙⵎⵓⵏⵉ ⵏ ⵓⵙⵓⵊⴷ ⵏ ⵜⵙⵓⵜⵍⵜ ⵜⵉⵙⵙ ⵚⴹⵉⵚ ⵏ ⵓⵎⵢⴰⵡⴰⵙ ⴰⵄⵔⴰⴱ ⴰⵔⵓⵙⵉ

24 ⵏⵓⵡⴰⵏⴱⵉⵔ 2021 Version Imprimable

ⵍⵇⴰⵀⵉⵔⴰ - ⵉⵙⵙⵉⵅⴼ ⵓⵎⵙⵇⴰⴷ ⵏ ⵍⵎⵖⵔⵉⴱ ⴳ ⵍⵇⴰⵀⵉⵕⴰ , ⴰⵎⴰⵔⵉ ⴰⵎⵖⴰⵍⴰⵍ ⵏ ⵜⴳⵍⴷⵉⵜ ⴷⴰⵔ ⵏ ⵜⵙⴷⴰⵡⵉⵜ ⵏ ⵉⵡⴰⵏⴽⵏ ⵉⵄⵔⴰⴱⵏ ⵎⴰⵙⵙ ⴰⵃⵎⴰⴷ ⵜⵜⴰⵣⵉ ⴰⵙⵙⵏ ⵓⵙⵉⵏⴰⵙ ⵢⴰⵜ ⵜⵙⵎⵓⵏⵉ ⴳ ⵓⵙⵡⵉⵔ ⵏ ⵉⵎⴰⵔⵉⵏ ⵉⵎⵖⵍⴰⵍⵏ ⴳ ⵜⵙⴷⴰⵡⵉⵜ ⵉⵣⵍⵉⵏ ⵙ ⵓⵙⵓⵊⴷ ⵏ ⵜⵙⵓⵜⵍⵜ ⵜⵉⵙⵙ ⵚⴹⵉⵚ ⵏ ⵓⵙⴳⵔⴰⵡ ⵏ ⵓⵎⵢⴰⵡⴰⵙ ⴰⵄⵔⴰⴱ ⴰⵔⵓⵙⵉ .

ⴳ ⵜⵙⵎⵓⵏⵉ ⴰⴷ ⵎⵍⴰⵏ ⵏ ⵓⵜⵉⵎⵏ ⵍⵍⵉ ⵔⴰⴷ ⵙⴼⵙⵔⵏ ⴳ ⵜⵙⵓⵜⵍⵜ ⵜⵉⵙⵙ ⵚⴹⵉⵚ ⵏ ⵓⵙⴳⵔⴰⵡ ⵍⵍⵉ ⵔⴰⴷ ⵉⵎⴰⵏⵏ ⴳ ⵓⵙⵡⵉⵔ ⵏ ⵉⵎⴰⵡⵙⴰⵙⵏ ⵏ ⴱⵕⵕⴰ ⴳ ⵜⵖⵔⵎⵜ ⵏ ⵎⵕⵕⴰⴽⵯⵛ ⴳ ⵓⵙⵙⴰⵏ 14 ⴷ 15 ⴷⵓⵊⴰⵏⴱⵉⵔ ⵢⵓⵛⴽⴰⵏ ⵉⵣⵍⵉⵏ ⵙ ⵓⵙⵏⵜⵉ ⵏ ⵓⵖⴰⵡⴰⵙ ⵏ ⵜⵡⵓⵔⵉ ⴷ ⵓⵙⵏⵜⵉ ⵏ ⵓⵙⵉⵡⴹ ⵏ ⵓⵇⵇⵏ ⴷⵓⵍⴰ ⴰⵖⴰⵡⴰⵙ ⵏ ⵜⵡⵓⵔⵉ ⴷ ⵓⵖⴰⵡⴰⵙ ⴰⵎⵙⴰⴽⵔ ⵍⵍⵉ ⵉⵍⵍⴰ ⴳⵉⵙ ⴰⵖⴰⵡⴰⵙ ⵏ ⵓⵎⵢⴰⵡⴰⵙ ⵉⵛⵛⴰⵔⵏ ⴳ ⵓⵣⵎⵣ ⵢⵓⵛⴽⴰⵏ .

ⴳⵯⴰⵏⵉⵏ ⴰⴷ ⵉⵎⵍⴰ ⵓⵙⴳⵔⴰⵡ ⵏ ⵎⵕⵕⴰⴽⵯⵛ ⵜⵢⴰⴼⵓⵜⵉⵏ ⵏ ⵜⵙⵓⵜⵍⵜ ⵜⵉⵙⵙ ⵙⵎⵎⵓⵙⵜ ⵍⵍⵉ ⵜⵎⴰⵏⵏ ⴳ ⵎⵓⵙⴽⵓ ⴳ 16 ⵉⴱⵔⵉⵔ 2019 ⴷ ⴰⵖⴰⵡⴰⵙ ⵏ ⵜⵡⵓⵔⵉ (2019-2021) ⵉⵔⴰ ⵏ ⵓⵣⵣⵉⴳⵔ ⵏ ⵉⵎⵏⵣⴰⵢⵏ ⴷ ⵉⵡⵜⵜⴰⵙⵏ ⵏ ⵓⵙⴳⵔⴰⵡ .

ⵔⴰⴷ ⵉⵎⴹⴰⴽⴰⵕ ⵓⵍⴰ ⵅⴼ ⵜⵖⴰⵡⵙⵉⵡⵉⵏ ⵜⵙⴳⴰⵡⵉⵏ ⴷ ⵉⵎⴰⴹⵍⴰⵏⵉⵏ ⴳ ⵉⵣⵡⵓⵔⴰ ⵏⵏⵙ ⵜⵖⴰⵡⵙⴰ ⵜⴰⴼⵉⵍⵉⵚⵟⵉⵏⵉⵜ ⴷ ⵜⵙⵙⴰⵙⵜ ⵜⴰⵙⵓⵔⵉⵜ ⴷ ⵜⵖⴰⵡⵙⴰ ⵜⴰⵍⵉⴱⵉⵜ ⴷ ⴰⴷⴷⴰⴷ ⴳ ⵍⵢⴰⵎⴰⵏ ⵓⵍⴰ ⵓⵍⴰⵢ ⴷ ⵜⵢⴰⴽⴽⴰ ⵏ ⵜⵥⴹⴰⵕⵜ ⴷ ⵓⵎⵢⴰⵡⴰⵙ ⴳⵔ ⵉⵡⴰⵏⴽⵏ ⵉⴷⵔⴰⵏⵉⵏ ⴳ ⵡⴰⵙⵉⴼⵏ ⴷ ⵓⵙⴱⵉⴷⴷ ⵏ ⵓⵙⴼⵙⵔ ⵏ ⵙⵙⵍⴰⵃ ⵏ ⴷⴷⴰⵎⵔ ⴰⵖⵣⵓⵔⴰⵏ ⵢⴰⴹⵏⵉⵏ ⴷ ⵜⵖⴰⵡⵙⵉⵡⵉⵏ ⵜⵉⴷⵍⵙⴰⵏⵉⵏ ⴷ ⵉⵏⴰⵎⵓⵏⵉⵏ ⴷ ⵉⴷⵎⵙⴰⵏⵉⵏ ⵉⵅⵚⵚⴰⵏ ⵙⵏⴰⵜ ⵜⴼⵓⵍⵉⵏ.

ⵉⵙⵙⴽⴽⵯⵜⵉ ⵎⴰⵙ ⵓⵙⴳⵔⴰⵡ ⵉⵎⴰⵏ ⵙⵎⵓⵏⵉⵏ ⵏⵏⵙ ⴳⵔ ⵎⵓⵙⴽⵓ ⴷ ⵢⴰⵜ ⵜⴰⵎⴰⵣⵓⵏⵜ ⵜⴰⵄⵔⴰⴱⵜ .

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B5%89%E2%B5%99%E2%B5%99%E2%B5%89%E2%B5%85%E2%B4%BC-%E2%B5%8D%E2%B5%8E%E2%B5%96%E2%B5%94%E2%B5%89%E2%B4%B1-%E2%B4%B3-%E2%B5%8D%E2%B5%87%E2%B4%B0%E2%B5%80%E2%B5%89%E2%B5%94%E2%B4%B0-%E2%B5%A2%E2%B4%B0%E2%B5%9C-%E2%B5%9C%E2%B5%99%E2%B5%8E%E2%B5%93%E2%B5%8F%E2%B5%89-%E2%B5%8F-%E2%B5%93%E2%B5%99%E2%B5%93%E2%B5%8A%E2%B4%B7-%E2%B5%8F-%E2%B5%9C%E2%B5%99%E2%B5%93%E2%B5%9C%E2%B5%8D%E2%B5%9C-%E2%B5%9C%E2%B5%89%E2%B5%99%E2%B5%99-%E2%B5%9A%E2%B4%B9%E2%B5%89%E2%B5%9A-%E2%B5%8F-%E2%B5%93%E2%B5%8E%E2%B5%A2%E2%B4%B0%E2%B5%A1%E2%B4%B0%E2%B5%99-%E2%B4%B0%E2%B5%84%E2%B5%94%E2%B4%B0%E2%B4%B1