Published on MAPNews (https://www.mapnews.ma/am)

Accueil > ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⴼⴰⵙ ⵢⴰⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ
  1. Accueil
  2. Activités royales

ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⴼⴰⵙ ⵢⴰⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ

17 ⴽⵟⵓⴱⵕ 2021 Version Imprimable
ⴼⴰⵙ - ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⵙⴰⵎⴰⵙ ⴳ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ ⴳ ⴼⴰⵙ, ⵢⴰⵏ ⵓⵙⵇⵇⵉⵎ ⵉⵎⴰⵡⵙⴰⵙⵏ ⵉⴳⴰⵏ ⵉ ⵢⵙⵡⴰⵍⴰⵏ ⵉⵎⴰⵜⴰⵢⵏ ⵏ ⵓⵙⵏⵜⵉ ⵏ ⵓⵙⵍⴳⵏ ⵏ ⵓⵥⵕⴼ ⵏ ⵓⵙⴳⴳⴰⵙ 2022, ⴰⴹⴼⵕ ⵏ ⵢⴰⵏ ⵓⵙⵏⵜⵉ ⴰⵙⵍⴳⴰⵏⵏ ⵏ ⵓⵙⵓⴷⵙ ⴷ ⵎⵏⵏⴰⵡ ⵏ ⵉⵎⵙⴰⵙⴰⵏ ⵉⴳⵔⴰⵖⵍⴰⵏ, ⵓⵍⴰ ⵎⵏⵏⴰⵡ ⵏ ⵉⵙⵜⴰⵢⵏ ⴳ ⵜⵓⵙⵖⵏⵉⵏ ⵢⴰⵜⵜⵓⵢⵏ, ⵎⴰ ⵢⴰⴷ ⵉⵏⵏⴰ ⵢⴰⵏ ⵓⵙⵉⵡⴹ ⵍⵍⵉ ⵢⵖⵕⴰ ⵓⵎⵙⵉⵡⵍ ⵙ ⵢⵉⵙⵎ ⵏ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ, ⵎⴰⵙⵙ ⵄⴱⴷⵍⵃⵇⵇ ⵍⵎⵔⵉⵏⵉ.

ⵉⵏⵏⴰ ⵡⵙⵉⵡⴹ ⵎⴰⵙ ⵖⵉⴽ ⵍⵍⵉ ⵢⵏⵏⴰ ⵓⵎⵏⵏⵉ ⵡⵉⵙⵙ 49 ⵏ ⵓⴷⵓⵙⵜⵓⵔ, ⵜⵙⵎⵏⴷ ⵜⵎⴰⵡⵙⴰⵙⵜ ⵏ ⵜⴷⵎⵙⴰ ⴷ ⵓⵥⵕⴼ ⵢⴰⵜ ⵜⵏⴽⴷⴰ ⴷⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵅⴼ ⵉⵙⵡⴰⵍⴰⵏ ⵉⵎⴰⵜⴰⵢⵏ ⵏ ⵓⵙⵏⵜⵉ ⵏ ⵓⵙⵍⴳⵏ ⵏ ⵓⵥⵕⴼ ⵏ ⵓⵙⴳⴳⴰⵙ ⵏ 2022.

ⵉⵙⵡⴰⵍⴰⵏ ⵉⵎⴰⵜⴰⵢⵏ ⴰⴷ ⴱⴷⴷⵏ ⵅⴼ ⴽⴽⵓⵥ ⵏ ⵉⵙⴳⵓⵎⵏ, ⵎⴰ ⵢⴰⴷ ⵉⴳⴰⵏ:

ⵡⵉⵙⵙ ⵢⴰⵏ, ⴰⵙⴷⵓⵙ ⵏ ⵜⵙⵉⵍⴰ ⵏ ⵓⵕⵥⵥⵓⵎ ⵏ ⵜⴷⵎⵙⴰ ⵜⴰⵏⴰⵎⵓⵔⵜ , ⴰⴼ ⴰⴷ ⵥⴹⵕⵏ ⴰⴽⴽ ⵉⴳⵔⵏ ⴰⴷ ⵙⵙⴳⵔⴰⵡⵍⵏ ⵜⴰⴷⵉⵏⴰⵎⵉⵜ ⵏⵏⵙⵏ, ⴷ ⴰⴷ ⵙⵙⵖⵍⵉⵏ ⵜⵥⵥⵉⴹⵕⴰ ⵏⵏⵙⵏ ⴰⴷ ⵃⵟⵟⵓⵏ ⵜⵡⵓⵔⵔⵉⵡⵉⵏ ⴷ ⴰⴷ ⵙⵙⵓⴼⵏ ⵅⵜⵉⵏⵏ ⵢⴰⴹⵏⵉⵏ.

ⵡⵉⵙⵙ ⵙⵉⵏ, ⴰⵙⴷⵓⵙ ⵏ ⵉⵎⵉⴽⴰⵏⵉⵣⵎⵏ ⵏ ⵓⵙⵙⴽⵛⵎ ⴷ ⵓⵣⵣⵉⴳⵣ ⴳ ⵓⵙⵎⴰⵜⴰ ⵏ ⵓⵔⴰⵢ ⴰⵏⴰⵎⵓⵏ, ⴰⵎ ⵉⴳⵔ ⴰⵎⵣⵡⴰⵔⵓ ⵍⵍⵉ ⵎⵓ ⵢⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵏ ⵓⴱⵖⵓⵔ ⵉⵎⵇⵇⵓⵕⵏ. ⵉⴳⴰ ⵙⵓⵍ ⵍⵃⴰⵍ ⴰⵙⵎⴰⵜⴰ ⵓⵎⵉⴽⴽ ⵙ ⵉⵎⵉⴽⴽ ⵏ ⵜⵡⵉⵙⵉⵏ ⵜⵉⵡⵊⴰⵏⵉⵏ ⵙ ⵓⵙⵓⴼⴼⵖ ⵏ ⵙⵉⵊⵊⵉⵍ ⴰⵏⴰⵎⵓⵏ ⵉⵙⵢⵉⵡⴰⵏⵏ.

ⵡⵉⵙⵙ ⴽⵕⴰⴹ, ⴰⵙⴷⵓⵙ ⵏ ⵓⴷⴳⴰⵔ ⴰⵏⴼⴳⴰⵏ ⵙ ⵓⴹⴼⴼⵉⵕ ⵏ ⵓⵙⵇⵇⵓⵍ ⵉⵅⵚⵚⴰⵏ ⵅⴼ ⴰⴷ ⵜⵥⴹⵕ ⵜⵉⵏⵎⵍ ⵜⴰⴳⴷⵓⴷⴰⵏⵜ ⴰⴷ ⵜⵔⴰⵔ ⵜⵉⵍⴰⵍⵜ ⵏⵏⵙ ⴳ ⵓⵙⵙⵍⴽⵎ ⵏ ⵜⵓⵙⵙⵏⴰ ⴷ ⵜⴳⵎⵉ ⵜⴰⵏⴰⵎⵓⵏⵜ. ⴳ ⵢⴰⵜ ⵜⵙⴳⴰ ⵢⴰⴹⵏⵉⵏ, ⵙ ⵜⵙⵏⵙⵉ ⵏ ⵉⵙⵡⴰⵍⴰⵏ ⵉⴳⵍⴷⴰⵏ ⵢⴰⵜⵜⵓⵢⵏ, ⵔⴰⴷ ⵜⵕⵥⵎ ⵜⵏⴱⴰⴹⵜ ⵢⴰⵏ ⵍⵉⵚⵍⴰⵃ ⴰⵏⵖⴱⵓ ⵏ ⵓⵏⴳⵔⴰⵡ ⵏ ⵜⴷⵓⵙⵉ, ⴰⴼ ⴰⴷ ⴷⴰⵖ ⵉⵄⴷⵍ ⵉⴳⵔ ⵏ ⵜⴷⵓⵙⵉ ⴷ ⴰⴷ ⵜⵎⵓⵏ ⵜⵏⴱⴰⴹⵜ ⴷ ⵓⵙⵎⴰⵜⴰ ⵏ ⵓⵔⴰⵢ ⴰⵏⴰⵎⵓⵏ.

ⵡⵉⵙⵙ ⴽⴽⵓⵥ, ⴰⵙⴷⵓⵙ ⵏ ⵉⴳⵔ ⴰⴳⴷⵓⴷⴰⵏ ⴷ ⵉⵎⵉⴽⴰⵏⵉⵣⵎⵏ ⵏ ⵜⵏⴱⴹⴰⴹⵜ, ⵙ ⵓⵙⴼⵙⵙⵓⵙ ⵏ ⵓⵙⵔⵙ ⵏ ⵓⵙⵏⵜⵉ ⵏ ⵜⵎⵏⴰⴹⵜ ⵜⴰⵎⵉⵔⵉⵡⵜ, ⴰⵙⵔⵙ ⵏ ⵜⵎⴳⴳⵉⵜⵉⵏ ⵉⵅⵚⵚⴰⵏ ⵉ ⵡⵙⵙⵓⴼⵖ ⵏ ⵓⵙⵍⴳⵏ ⴰⵙⴰⵜⵉ ⵏ ⵍⵉⵚⵍⴰⵃ ⵏ ⵜⵎⵔⵙⵍⵉⵏ ⴷ ⵜⵎⵙⵙⵏⵜⵉⵜⵉⵏ ⵜⵉⴳⴷⵓⴷⴰⵏⵉⵏ.

ⴷⴼⴼⵉⵔ ⵏ ⵖⵉⴽⴰⵏⵏ, ⵉⴹⴼⵕ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ ⵢⴰⵏ ⵓⵙⵏⵜⵉ ⵏ ⵓⵙⵍⴳⵏ ⵏ ⵓⵙⵏⵎⴰⵍⴰ ⵉⴳⴳⵔⵏ ⵉ ⵓⵙⵜⴰⵢ ⴳ ⵜⵙⵖⵉⵏⵉⵏ ⵜⵉⵎⴰⵜⴰⵢⵉⵏ. ⵉⵔⴰ ⵓⵙⵏⵜⵉ ⵢⴰⴷ ⴰⴷ ⵉⵙⵙⴽⵛⵎ ⵜⵎⵔⵙⵍⵉⵏ ⴰⴷ ⴰⵎⵎⴰⵙ ⵏ ⵜⵍⴳⴰⵎⵜ ⵏ ⵜⵎⵔⵙⴰⵍⵉⵏ ⵜⵉⵙⵜⵕⴰⵜⵉⵊⵉⵢⵏ:

- ⵜⴰⵙⵏⵓⵕⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵍⴳⵏ ⵏ ⵜⵡⵓⵔⵉⵡⵉⵏ ⵉⵣⴷⵉⵏ ⴷ ⵍⵇⵇⵉⵏⴱ ⵍⵀⵉⵏⴷⵉ

- ⵜⴰⵙⵏⵓⵕⴰⵢⵜ ⵜⴰⵏⴰⵎⵓⵔⵜ ⵏ ⵓⵙⵡⵓⴷⴷⵓ ⴰⵙⵜⵕⴰⵜⵉⵊⵉ ⵏ ⵜⴷⵔⴰⵡⵉⵏ ⵏ ⵓⵡⴰⵏⴽ ⴷ ⵓⴹⴼⴼⵉⵕ ⵏ ⵜⵡⵡⵓⵔⵉⵡⵉⵏ ⵏ ⵜⵎⵔⵙⵍⵉⵏ ⴷ ⵜⵎⵙⵙⵏⵜⵉⵜⵉⵏ ⵜⵉⴳⴷⵓⴷⴰⵏⵉⵏ

- ⵜⴰⵙⵏⵓⵕⴰⵢⵜ ⵜⴰⵏⴰⵎⵓⵔⵜ ⵏ ⵡⴰⵎⴰⵏ ⴷ ⵜⴳⴰⵏⵉⵏ

ⵉⴳⴰ ⵙⵓⵍ ⵍⵃⴰⵍ ⴰⵙⴱⴷⴷⵍ ⵏ "ⵜⴰⵎⵙⵙⵓⵔⵜ ⵏ ⵉⵙⵙⴰⵔⵓⵏ ⵏ ⵜⵥⴹⴰⵕⵜ", ⵍⵍⵉ ⵔⴰⴷ ⵉⴳ ⵍⵉⵙⵎ ⵏⵏⵙ "ⵜⴰⵎⵙⵙⵓⵔⵜ ⵏ ⵓⵜⵡⴰⵍ ⵏ ⵜⵥⴹⴰⵕⵜ".

ⵜⴰⵔⵏⵓⵜ ⵏ ⴽⵕⴰⴹ ⵜⵎⵔⵙⵍⵉⵏ ⴰⵎⵎⴰⵙ ⵏ ⵜⵍⴳⴰⵎⵜ ⵏ ⵜⵎⴰⵡⴰⵙⵉⵏ ⵜⵉⴳⴷⵓⴷⴰⵏⵉⵏ ⵍⵍⵉ ⴰⵔ ⵉⵙⵜⵜⵉ ⵡⵙⵇⵇⵉⵎ ⵏ ⵉⵎⴰⵡⵙⴰⵙⵏ ⵉⵎⵙⵜⴳⴳⴰⵔⵏ ⵏⵏⵙⵏ. ⵉⴳⴰ ⵍⵃⴰⵍ ⵜⵉⵎⵔⵙⵍⵜ ⵏ ⵜⵡⵓⵔⵉⵡⵉⵏ ⵜⵉⵏⴰⵎⵓⵏⵉⵏ ⵏ ⵜⵎⴰⵡⴰⵙⵜ ⵏ ⵓⵙⵎⵙⴰⵙⴰ ⵏ ⵡⴰⴽⴰⵍ ⴰⵏⴰⵎⵓⵔ, ⴰⵥⴽⴰⵡ, ⴰⵣⴷⴷⵓⵖ, ⵜⴰⵙⵔⵜⵉⵜ ⵏ ⵜⵖⵔⵎⵜ, ⴷ ⵜⵎⴰⵡⴰⵙⵜ ⵏ ⵡⴰⵎⴰⵏ ⴷ ⵜⴳⴰⵏⵉⵏ ⵏ ⵜⵎⴰⵡⴰⵙⵜ ⵏ ⵜⴳⵎⵔⵜ ⵜⴰⵢⵍⴰⵏⵜ.

ⵓⴽⵓⵙ ⵏ "ⵓⵙⵇⵇⵉⵎ ⵏ ⵜⵙⵖⵏⵣⵉⵜ ⴷ ⵉⵙⵉⴼⴰⴹ" ⴰⵎⵎⴰⵙ ⵏ ⵜⵍⴳⴰⵎⵜ ⵏ ⵜⵎⵔⵙⵍⵉⵏ ⵜⵉⴳⴷⵓⴷⴰⵏⵉⵏ, ⴷⴼⴼⵉⵔ ⵍⵍⵉⵖ ⵉⴼⴼⵖ ⵓⵙⵍⴳⵏ ⵏ ⵓⴼⵙⵙⵓⵢ ⴷ ⵓⴽⵓⵙ ⵏ ⵓⵙⵇⵇⵉⵎ ⴰⴷ.

ⴳ ⵓⵙⴰⵜⵉ ⵏ ⵓⵙⵓⴷⵙ ⵏ ⵉⴳⵔⵏ ⵏ ⵓⵎⵢⴰⵡⴰⵙ ⴷ ⵏ ⵜⴷⵔⴰⵡⵜ ⵉⵙⵎⴰⵏⵏ ⵍⵎⵖⵔⵉⴱ ⴷ ⵎⵏⵏⴰⵡ ⵏ ⵜⵎⵉⵣⴰⵔ ⵜⴳⵎⴰⵜⵉⵏ ⴷ ⵜⵉⵎⴷⴷⵓⴽⴰⵍⵉⵏ, ⵉⴹⴼⵕ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ ⵙⴰ ⵏ ⵉⵎⵙⴰⵙⴰⵏ ⵉⴳⵔⴰⵖⵍⴰⵏ, ⴰⵎⵎⴰⵙ ⵏⵏⵙⵏ ⴽⴽⵓⵥ ⵉⵙⵉⵏⵔⴰⵏⵉⵏ ⴷ ⴽⵕⴰⴹ ⵉⴳⵜⵉⵔⴰⵏⵉⵏ.

ⵖⵉⴽ ⵍⵍⵉ ⵢⵏⵏⴰ ⵓⵎⵏⵏⵉ ⵡⵉⵙⵙ 49 ⵏ ⵓⴷⵓⵙⵜⵓⵔ, ⴷ ⵙ ⵜⵙⵓⵎⵔⵜ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ ⴷ ⵙ ⵜⵙⵏⵜⴰⵢⵜ ⵏ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵢⵏ ⵣⴷⵖⵏⵉⵏ ⴳ ⴱⵕⵕⴰ, ⵉⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⴰⴷ ⵉⵙⵜⵉ:

- ⵎⴰⵙⵙ ⵎⵓⵃⵎⵎⴷ ⴱⵏⵛⵄⴱⵓⵏ, ⴰⵎⵙⴽⴰⴷ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴷⴰⵔ ⵜⴳⴷⵓⴷⴰⵏⵜ ⵜⴰⴼⵕⴰⵏⵚⴰⵡⵉⵜ

- ⵎⴰⵙⵙ ⵢⵓⵙⴼ ⵄⵎⵕⴰⵏⵉ, ⴰⵎⵙⴽⴰⴷ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴷⴰⵔ ⵜⵎⵓⵏⵜ ⵜⵓⵕⵓⴱⴱⵉⵜ

Dernière modification : 17 ⴽⵟⵓⴱⵕ 2021
Source URL: https://www.mapnews.ma/am/activites-royales/%E2%B5%89%E2%B5%99%E2%B5%99%E2%B5%89%E2%B5%85%E2%B4%BC-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94-%E2%B4%B0%E2%B4%B3%E2%B5%8D%E2%B5%8D%E2%B5%89%E2%B4%B7-%E2%B4%B3-%E2%B4%BC%E2%B4%B0%E2%B5%99-%E2%B5%A2%E2%B4%B0%E2%B5%8F-%E2%B5%93%E2%B5%99%E2%B5%87%E2%B5%87%E2%B5%89%E2%B5%8E-%E2%B5%8F-%E2%B5%89%E2%B5%8E%E2%B4%B0%E2%B5%A1%E2%B5%99%E2%B4%B0%E2%B5%99%E2%B5%8F