Published on MAPNews (https://www.mapnews.ma/am)

Accueil > ⵜⵙⴳⵓⵔⴰ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⵍⴱⴷⵓ ⴰⵎⴰⴷⴷⵓⴷ ⵏ ⵓⵏⵍⵎⴰⴷ ⴰⵙⴽⴽⴰ ⵏ ⴰⵙⵙ ⵏ ⵓⵙⵉⵎⵡⴰⵙ ⵙ "ⵓⵙⵍⵎⴷ ⵏ ⵜⵉⵍⵉⵜ"

ⵜⵙⴳⵓⵔⴰ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⵍⴱⴷⵓ ⴰⵎⴰⴷⴷⵓⴷ ⵏ ⵓⵏⵍⵎⴰⴷ ⴰⵙⴽⴽⴰ ⵏ ⴰⵙⵙ ⵏ ⵓⵙⵉⵎⵡⴰⵙ ⵙ "ⵓⵙⵍⵎⴷ ⵏ ⵜⵉⵍⵉⵜ"

30 ⵛⵓⵜⴰⵏⴱⵉⵔ 2021 Version Imprimable
ⵕⵕⴱⴰⵟ - ⵜⵙⴳⵓⵔⴰ ⵜⵎⴰⵡⴰⵙⵜ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴷ ⵓⵙⵍⵎⴰⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ ⵎⴰⵙ ⵔⴰⴷ ⵉⴱⴷⵓ ⵓⵙⵍⵎⴰⴷ ⴰⵙⴽⴽⴰ ⵏ ⴰⵙⵙ ⵏ ⵓⵙⵉⵎⵡⴰⵙ ⵖⵉⴽ ⵍⵍⵉ ⵢⵜⵜⵓⵙⴳⵓⵔⴰ ⴳ ⴰⴽⴽⵯ ⵜⵎⵔⵙⴰⵍⵉⵏ ⵏ ⵓⵙⵍⵎⴷ ⴷ ⵜⵎⵙⴷⴰⵡⵉⵏ ⴷ ⵉⵎⵎⴰⵙⵏ ⵏ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴳ ⵉⴳⵔ ⴰⴳⴷⵓⴷⴰⵏ ⴷ ⵓⵙⵍⵉⴳ, ⵓⵍⴰ ⴳ ⵜⵉⵏⵎⴰⵍ ⵏ ⵉⴽⴰⴱⴰⵕⵏ ⵉⴱⵕⵕⴰⵏⵉⵢⵏ, ⵙ ⵡⴰⵏⴰⵡ ⵏ ⵓⵙⵍⵎⴰⴷ ⵙ ⵜⵉⵍⵉⵜ, ⵉ ⴰⴽⴽⵯ ⵉⵔⵉⵎⵏ ⴷ ⵉⵙⵡⵉⵔⵏ.

ⵜⵓⵛⴽⴰⴷ ⵙⵓⵍ ⵜⵖⵜⴰⵙⵜ ⴰⴷ ⴷⴼⴼⵉⵔ ⵏ ⵓⵙⴼⵓⴳⵍⵓ ⵏ ⵡⴰⴷⴷⴰⴷ ⵏ ⵓⴱⴰⵢⵢⵓⵕ ⴳ ⵜⵎⴰⵣⵉⵔⵜ ⴳ ⵉⵎⴰⵍⵍⴰⵙⵏ ⵉⵣⵔⵉⵏ, ⵜⴼⵔⴰ ⵜⵏⵏⴰ ⵜⵎⴰⵡⴰⵙⵜ ⵎⴰⵙ ⵜⵜⵓⴼⴽⴰ ⵜⵥⵉⴹⵕⴰ ⵙ ⵓⵙⵍⵎⴰⴷ "ⵙ ⵡⴰⴳⴳⵓⴳ" ⵉ ⵢⵏⵍⵎⴰⴷⵏ ⵍⵍⵉ ⵔⴰⵏⵜ ⵜⵡⵊⴰⵏⵉⵏ ⵏⵏⵙⵏ ⵖⵉⴽ ⴰⵏⵏ.  

ⵉⵔⵏⴰ ⵢⵏⵏⴰ ⵡⵙⵉⵡⴹ ⵎⴰⵙ ⴰⴼ ⴰⴷ ⵉⵏⴼⵔⵓ ⵡⴽⵛⵛⵓⵎ ⴰⵏⵍⵎⴰⴷ ⵉ ⴰⴽⴽⵯ ⵉⵏⵍⵎⴰⴷⵏ ⴷ ⵜⵏⵍⵎⴰⴷⵉⵏ ⴷ ⵉⵙⵜⴰⵢⵏ ⵉⵏⵍⵎⴰⴷⵏ ⴷ ⵉⵎⵙⵜⴳⴳⴰⵔⵏ ⴷ ⵓⵣⵔⴰⴽ ⵏ ⵙⵙⵍⴰⵎⵜ ⵏⵏⵙⵏ, ⵜⵡⵡⵓⵔⵉ ⵜⵎⴰⵡⴰⵙⵜ ⵙ ⵓⵣⴷⵓⵢ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ ⵉⵙⵎⴰⵢⵏⵓⵏ ⵓⴱⵕⵓⵟⵓⴽⵓⵍ ⴰⴷⵓⵙⴰⵏ ⵍⵍⵉ ⵔⴰⴷ ⵜⵜⵓⴹⴰⵕ ⴳ ⴰⴽⴽⵯ ⵜⵎⵔⵙⴰⵍⵉⵏ ⵉⵏⵍⵎⴰⴷⵏ ⴷ ⵜⵎⵙⴷⴰⵡⵉⵏ ⴷ ⵉⵎⵎⴰⵙⵏ ⵏ ⵓⵙⵎⵓⵜⵜⴳ ⵉⴳⴷⵓⴷⴰⵏ ⴷ ⵉⵙⵍⵉⴳⵏ ⴷ ⵜⵉⵏⵎⵍⵏ ⵏ ⵉⴽⴰⴱⴰⵕⵏ ⵉⴱⵕⵕⴰⵏⵉⵢⵏ, ⵎⴰ ⵢⴰⴷ ⵉⵥⴹⴰⵕ ⴰⴷ ⵉⵜⵜⵓⵥⵕⴰ ⴳ ⵜⵡⵡⵓⵔⵜ ⵜⴰⵎⴰⴷⴷⵓⴷⵜ ⵏ ⵜⵎⴰⵡⴰⵙⵜ, ⵙ ⵓⵙⴷⴷⵉⴷ ⵎⴰⵙ ⵉⵅⵚⵚⴰ ⴰⴷ ⵓⵍⵜⵖⵏ ⵉⵎⴰⴽⵏ ⵏ ⵓⵃⵟⵟⵓ ⵉⵜⵜⵓⵣⴳⵉⵔⵏ ⵅⴼ ⵓⵔⴰⵢ ⵙⴳ ⵓⴱⴰⵢⵢⵓⵕ "ⴽⵓⴼⵉⴷ-19". 

ⴳ ⵓⵙⴰⵜⵉ ⴷⵖ, ⵜⵖⵕⴰ ⵜⵎⴰⵡⴰⵙⵜ ⵜⵉⵏⵍⵎⴰⴷⵉⵏ ⴷ ⵉⵏⵍⵎⴰⴷⵏ ⴷ ⵜⵡⵊⵊⴰ ⵏⵏⵙⵏ ⴰⴷ ⵔⵏⵓⵏ ⴰⵍⵜⵖ ⵉⴳⴳⵓⵜⵏ ⴳ ⵜⵎⵀⵍⴰ ⵏ ⵜⴳⵣⵣⴰⵢⵜ ⵍⵍⵉ ⵔⴰⴷ ⵜⵇⵇⴰⵎⴰ ⴷⴼⴼⵉⵔ ⵏ ⵍⴱⴷⵓ ⵏ ⵓⵏⵍⵎⴰⴷ ⴳ ⵓⵙⵡⵉⵔ ⵏ ⴰⴽⴽⵯ ⵉⵎⴰⵙⵙⵏ ⵏ ⵜⴳⵣⵣⴰⵢⵜ, ⵓⵍⴰ ⵉⴳⵣⵣⵓⵎⵏ ⵉⵙⵙⴰⵢⵏ ⵉⵥⵍⵉⵏ ⵙ ⵓⵣⵎⵎⵣⵓ ⴷⴰⵖ, ⵙⵡⴰ ⵅⴼ ⵓⵙⵏⵓⴱⴳ ⵏ ⵜⴳⵣⵣⴰⵢⵜ ⵜⴰⵎⵣⵡⴰⵔⵓⵜ ⵏⵖⴷ ⵜⵉⵙⵙ ⵙⵏⴰⵜ.

ⴳ ⵓⵣⵎⵎⵣⵓ ⴷⵖ, ⵜⵙⵎⵏⵉⴷ ⵜⵎⴰⵡⴰⵙⵜ ⵉⵙⵏⵉⵎⵔⵏ ⵏⵏⵙ ⴷ ⵓⵙⵎⵖⵔ ⵏⵏⵙ ⵉ ⴰⴽⴽⵯ ⵉⵙⵜⴰⵢⵏ ⵉⵙⵍⵎⴰⴷⵏ ⴷ ⵉⵎⵙⵙⵓⴳⵓⵔⵏ ⵅⴼ ⵜⵓⴳⴳⴰⵣ ⵍⵍⵉ ⵢⵙⵔⵙⵏ ⴰⴼⴰⴷ ⵏ ⵓⵙⵓⵊⴷ ⵉⴼⵓⵍⴽⵉ ⴷ ⵜⵔⵏⵓⵏⵜ ⵏ ⴰⴽⴽⵯ ⵜⵎⵀⵍⵉⵡⵉⵏ ⵏ ⵓⵙⵓⵊⴷ ⵏ ⵓⵙⴳⴳⵯⴰⵙ ⴰⵏⵍⵎⴰⴷ 2021-2022, ⵓⵍⴰ ⵜⵖⵕⴰ ⴰⴽⴽⵯ ⵜⵡⵊⴰⵏ ⴷ ⵉⵎⴷⵔⴰⵡⵏ ⵢⴰⴹⵏⵉⵏ ⴰⴷ ⵎⵎⵓⵙⵙⵓⵏ ⵉⴳⵔⴰⵡⵏ ⵏ ⵓⵍⴰⵢ ⵏ ⵓⵏⴳⵔⴰⵡ ⴰⵏⵍⵎⴰⴷ ⴷ ⴰⴷ ⴰⵢⵜⵏ ⵜⵜⵓⴼⴽⴰ ⵎⴰⴷ ⵉⵅⵚⵚⴰⵏ ⴰⴼ ⴰⴷ ⵙⴽⵔⵏ ⵜⵍⴰⵍⵉⵏ ⵏⵏⵙⵏ ⴳ ⵓⵙⵍⵉⴷ ⵉⵛⵇⵇⴰⵏ ⵍⵍⵉ ⵜⵙⵙⵏ ⵜⵎⴰⵣⵉⵔⵜ ⵏⵏⵖ.

 

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B5%9C%E2%B5%99%E2%B4%B3%E2%B5%93%E2%B5%94%E2%B4%B0-%E2%B5%9C%E2%B5%8E%E2%B4%B0%E2%B5%A1%E2%B4%B0%E2%B5%99%E2%B5%9C-%E2%B5%8F-%E2%B5%93%E2%B5%99%E2%B4%B3%E2%B5%8E%E2%B5%89-%E2%B4%B0%E2%B5%8F%E2%B4%B0%E2%B5%8E%E2%B5%93%E2%B5%94-%E2%B5%8D%E2%B4%B1%E2%B4%B7%E2%B5%93-%E2%B4%B0%E2%B5%8E%E2%B4%B0%E2%B4%B7%E2%B4%B7%E2%B5%93%E2%B4%B7-%E2%B5%8F-%E2%B5%93%E2%B5%8F%E2%B5%8D%E2%B5%8E%E2%B4%B0%E2%B4%B7-%E2%B4%B0%E2%B5%99%E2%B4%BD%E2%B4%BD%E2%B4%B0-%E2%B5%8F-%E2%B4%B0%E2%B5%99%E2%B5%99-%E2%B5%8F-%E2%B5%93%E2%B5%99%E2%B5%89%E2%B5%8E%E2%B5%A1%E2%B4%B0%E2%B5%99-%E2%B5%99-%E2%B5%93%E2%B5%99%E2%B5%8D%E2%B5%8E%E2%B4%B7