ⵍⴽⵎⵏⵜ ⴽⴽⵓⵥ ⵏ ⵜⵍⴰⵢⵉⵏ ⵙ ⵜⵓⵏⵙ ⵓⵙⵉⵏⵜ ⵜⵡⵉⵙⵉ ⵜⴰⵎⵙⴰⴼⴰⵔⵜ ⵜⴰⵖⴰⵡⴰⵍⵜ ⵍⵍⵉ ⵢⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ

19 ⵢⵓⵍⵢⵓⵣ 2021 Version Imprimable

ⵜⵓⵏⵙ - ⵍⴽⵎⵏⵜ ⴳ ⵜⴼⴰⵡⵜ ⵏ ⴰⵙⵙ ⵏ ⵓⵢⵏⴰⵙ ⴳ ⵓⵣⴰⴳⵯⵣ ⴰⵎⴰⴹⵍⴰⵏ ⵏ ⵇⵕⵟⴰⵊ ⴽⴽⵓⵥ ⵏ ⵜⵍⴰⵢⵉⵏ ⴳ ⵓⵙⴰⵜⵉ ⵏ ⵜⵍⴳⴳⵯⵉⵜ ⵏ ⵡⴰⴹⵓ ⵏ ⵓⵙⵙⴰⵢ ⵏ ⵜⵡⵉⵙⵉ ⵜⴰⵖⴰⵡⴰⵍⵜ ⵍⵍⵉ ⵢⴼⴽⴰ ⴱⴰⴱ ⵏ ⵡⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵜⵓⵣⵏⵉⵏ ⵏⵏⵙ ⴰⴷ ⴷⴷⵓⵏ ⵙ ⵜⵓⵏⵙ ⵍⵍⵉ ⵉⴱⴷⴷⵉⵏ ⴷⴰⵜ ⵓⴱⴰⵢⵢⵓⴹ "ⴽⵓⴼⵉⴹ-19".

ⴼ ⵖⵉⴽⴰⵏⵏ, ⵜⵍⴽⵎ ⵜⵎⵓⵜⵜⵔⵜ ⵏ ⵜⵍⴰⵢⵉⵏ ⵉⴹⴼⴰⵕⵏ ⵉ ⵜⴳⴰⵍⵍⵉⵏ ⵏ ⵡⴰⴹⵓ ⵉⴷⴷⴰⵏ ⵙ ⵜⵓⵏⵙ ⴰⵔ ⴷⵖⵉ 12 ⵜⵢⵍⴰⵍⵜ ⵢⵓⵙⵉⵏ 134 ⵟⵓⵏ ⴷ 689 ⴽⵉⵍⵓⴳⵕⴰⵎ ⵏ ⵜⵡⵉⵙⵉ.

ⵜⵉⵡⵉⵙⵉ ⵜⴰⵙⴰⴼⴰⵔⵜ ⴰⴷ ⵜⵙⵎⴰⵏ ⵙⵉⵏ ⵉⴳⵣⵣⵓⵎⵏ ⵏ ⵍⵉⵏⵄⴰⵛ ⵉⵜⵎⵎⴰⵏ ⴷ ⵉⵙⵉⵎⴰⵏⵏ, ⵉⵟⵟⴰⴼⵏ ⵜⵥⵥⵉⴹⵕⴰ ⵏ 100 ⵜⵉⵙⵉ. ⵍⵍⴰⵏ ⴳⵉⵙ ⵙⵓⵍ 100 ⵓⵙⵏⴼⵓⵙ ⴷ ⵙⵉⵏ ⵉⵎⵙⵢⴰⴼⵓⵏ ⵏ ⵍⵓⴽⵙⵉⵊⵉⵏ ⵏ ⵜⵥⵥⵉⴹⵕⴰ ⵏ 33 ⴰⵎⵉⵜⵔⵓ ⴳ ⵜⵙⵔⴰⴳⵜ ⵉ ⴽⵜⴰ ⵢⴳⴰⵜⵜ ⵢⴰⵏ ⴳⵉⵜⵙⵏ. ⵔⴰⴷ ⵜⴷⴷⵓ ⵜⵡⵉⵙⵉ ⵢⴰⴷ ⴰⵎⵎⴰⵙ ⵏ ⵜⵢⵍⴰⵍⵉⵏ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵏ ⵉⴳⵏⵏⴰ.

ⵜⴽⵛⵎ ⵜⵖⵜⴰⵙⵜ ⴰⴷ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⴳ ⵓⵙⴰⵜⵉ ⵏ ⵜⴱⴷⴰⴷⵜ ⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵜⴰⵜⵓⵏⵙⵉⵜ, ⵓⵍⴰ ⵜⴰⴳⵎⴰⵜ ⵉⵙⵎⴰⵏⵏ ⵙⵉⵏ ⵉⵏⵎⴰⵏⴷ.

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B5%8D%E2%B4%BD%E2%B5%8E%E2%B5%8F%E2%B5%9C-%E2%B4%BD%E2%B4%BD%E2%B5%93%E2%B5%A5-%E2%B5%8F-%E2%B5%9C%E2%B5%8D%E2%B4%B0%E2%B5%A2%E2%B5%89%E2%B5%8F-%E2%B5%99-%E2%B5%9C%E2%B5%93%E2%B5%8F%E2%B5%99-%E2%B5%93%E2%B5%99%E2%B5%89%E2%B5%8F%E2%B5%9C-%E2%B5%9C%E2%B5%A1%E2%B5%89%E2%B5%99%E2%B5%89-%E2%B5%9C%E2%B4%B0%E2%B5%8E%E2%B5%99%E2%B4%B0%E2%B4%BC%E2%B4%B0%E2%B5%94%E2%B5%9C-%E2%B5%9C%E2%B4%B0%E2%B5%96%E2%B4%B0%E2%B5%A1%E2%B4%B0%E2%B5%8D%E2%B5%9C-%E2%B5%8D%E2%B5%8D%E2%B5%89-%E2%B5%A2%E2%B4%BC%E2%B4%BD%E2%B4%B0-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94