"ⴽⵓⴼⵉⴷ-19": ⴷⴷⴰⵏⵜ ⴽⵕⴰⴹ ⵜⵉⵢⵍⴰⵍⵉⵏ ⵙ ⵜⵓⵏⵙ, ⵓⵙⵉⵏⵜ ⵜⵡⵉⵙⵉ ⵜⴰⵎⵙⴰⴼⴰⵔⵜ ⵜⴰⵖⴰⵡⴰⵍⵜ ⵍⵍⵉ ⵢⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ

15 ⵢⵓⵍⵢⵓⵣ 2021 Version Imprimable

ⵍⵇⵏⵉⵟⵕⴰ - ⴷⴷⴰⵏⵜ ⴽⵕⴰⴹ ⵜⵉⵢⵍⴰⵍⵉⵏ ⵜⵉⵄⵚⴽⵕⵉⵏ, ⴽⵓ ⵢⴰⵜ ⵜⵓⵙⵉ 13.5 ⵟⵓⵏ ⵏ ⵜⵡⵉⵙⵉ ⵜⴰⵎⵙⴰⴼⴰⵔⵜ, ⴳ ⵜⴼⴰⵡⵜ ⵏ ⴰⵙⵙ ⵏ ⵓⴽⵡⴰⵙ ⵙⴳ ⵜⵙⵉⵍⴰ ⵏ ⵡⴰⴹⵓ ⵡⵉⵙⵙ ⴽⵕⴰⴹ ⵏ ⵜⴳⴳⴰⵍⵉⵏ ⵜⵉⴳⵍⴷⴰⵏⵉⵏ ⵏ ⵡⴰⴹⵓ ⴳ ⵍⵇⵏⵉⵟⵕⴰ ⵙ ⵜⵓⵏⵙ, ⴳ ⵓⵙⴰⵜⵉ ⵏ ⵜⵡⵉⵙⵉ ⵜⴰⵎⵙⴰⴼⴰⵔⵜ ⵏ ⵓⵖⴰⵡⵍ ⵍⵍⵉ ⵢⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵉⴹⵏ ⵏⵏⵙ ⴰⴷ ⵜⵜⵓⵣⵏ ⵙ ⵜⵎⴰⵣⵉⵔⵜ ⵜⴰⵎⴰⵖⵔⴰⴱⵉⵜ ⴰⴷ ⵍⵍⵉ ⵢⵙⵙⵏ ⵓⵅⵛⵏ ⵏ ⵡⴰⴷⴷⴰⴷ ⵏ ⵓⴱⴰⵢⵢⵓⵕ ⵉⵣⴷⵉⵏ ⴷ "ⴽⵓⴼⵉⴷ-19".

ⵉⴼⴽⴰ ⵢⴰⴷ ⵍⵍⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⵉⴹⵏ ⵢⴰⵜⵜⵓⵢⵏ ⵏⵏⵙ ⴰⴷ ⵜⵜⵓⵣⵏ ⵜⵡⵉⵙⵉ ⵜⴰⵎⵙⴰⴼⴰⵔⵜ ⵏ ⵓⵖⴰⵡⵍ ⴰⴷ ⵉ ⵜⵎⴰⵣⵉⵔⵜ ⵜⴰⵎⴰⵖⵔⴰⴱⵉⵜ ⵓⵍⵜⵎⴰⵜ ⴰⴷ.

ⵜⵉⵡⵉⵙⵉ ⵜⴰⵙⴰⴼⴰⵔⵜ ⴰⴷ ⵜⵙⵎⴰⵏ ⵙⵉⵏ ⵉⴳⵣⵣⵓⵎⵏ ⵏ ⵍⵉⵏⵄⴰⵛ ⵉⵜⵎⵎⴰⵏ ⴷ ⵉⵙⵉⵎⴰⵏⵏ, ⵉⵟⵟⴰⴼⵏ ⵜⵥⵥⵉⴹⵕⴰ ⵏ 100 ⵜⵉⵙⵉ. ⵍⵍⴰⵏ ⴳⵉⵙ ⵙⵓⵍ 100 ⵓⵙⵏⴼⵓⵙ ⴷ ⵙⵉⵏ ⵉⵎⵙⵢⴰⴼⵓⵏ ⵏ ⵍⵓⴽⵙⵉⵊⵉⵏ ⵏ ⵜⵥⵥⵉⴹⵕⴰ ⵏ 33 ⴰⵎⵉⵜⵔⵓ ⴳ ⵜⵙⵔⴰⴳⵜ ⵉ ⴽⵜⴰ ⵢⴳⴰⵜⵜ ⵢⴰⵏ ⴳⵉⵜⵙⵏ. ⵔⴰⴷ ⵜⴷⴷⵓ ⵜⵡⵉⵙⵉ ⵢⴰⴷ ⴰⵎⵎⴰⵙ ⵏ ⵜⵢⵍⴰⵍⵉⵏ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵏ ⵉⴳⵏⵏⴰ.

ⵜⴽⵛⵎ ⵜⵖⵜⴰⵙⵜ ⴰⴷ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⴳ ⵓⵙⴰⵜⵉ ⵏ ⵜⴱⴷⴰⴷⵜ ⴳⵔ ⵜⴳⵍⴷⵉⵜ ⵏ ⵍⵎⵖⵔⵉⴱ ⴷ ⵜⴳⴷⵓⴷⴰⵏⵜ ⵜⴰⵜⵓⵏⵙⵉⵜ, ⵓⵍⴰ ⵜⴰⴳⵎⴰⵜ ⵉⵙⵎⴰⵏⵏ ⵙⵉⵏ ⵉⵏⵎⴰⵏⴷ.

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B4%BD%E2%B5%93%E2%B4%BC%E2%B5%89%E2%B4%B7-19-%E2%B4%B7%E2%B4%B7%E2%B4%B0%E2%B5%8F%E2%B5%9C-%E2%B4%BD%E2%B5%95%E2%B4%B0%E2%B4%B9-%E2%B5%9C%E2%B5%89%E2%B5%A2%E2%B5%8D%E2%B4%B0%E2%B5%8D%E2%B5%89%E2%B5%8F-%E2%B5%99-%E2%B5%9C%E2%B5%93%E2%B5%8F%E2%B5%99-%E2%B5%93%E2%B5%99%E2%B5%89%E2%B5%8F%E2%B5%9C-%E2%B5%9C%E2%B5%A1%E2%B5%89%E2%B5%99%E2%B5%89-%E2%B5%9C%E2%B4%B0%E2%B5%8E%E2%B5%99%E2%B4%B0%E2%B4%BC%E2%B4%B0%E2%B5%94%E2%B5%9C-%E2%B5%9C%E2%B4%B0%E2%B5%96%E2%B4%B0%E2%B5%A1%E2%B4%B0%E2%B5%8D%E2%B5%9C-%E2%B5%8D%E2%B5%8D%E2%B5%89-%E2%B5%A2%E2%B4%BC%E2%B4%BD%E2%B4%B0-%E2%B4%B1%E2%B4%B0%E2%B4%B1-%E2%B5%8F