Published on MAPNews (https://www.mapnews.ma/am)

Accueil > ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⴰⴼⵓⴳⵍⴰ ⵏ ⵓⵕⵥⵥⵓⵎ ⴷ ⵏ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵉⵏ ⵉⴳⴳⵔⵏ ⵉ ⵓⵙⵏⵜⵉ ⵏ ⵓⵙⵙⵓⴼⵖ ⴳ ⵍⵎⵖⵔⵉⴱ ⵏ ⵜⴳⵣⵣⴰⵢⵜ ⵏ "ⴽⵓⴼⵉⴷ-19" ⴷ ⵜⴳⵣⵣⴰⵢⵉⵏ ⵢⴰⴹⵏⵉⵏ
  1. Accueil
  2. Activités royales

ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⴰⴼⵓⴳⵍⴰ ⵏ ⵓⵕⵥⵥⵓⵎ ⴷ ⵏ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵉⵏ ⵉⴳⴳⵔⵏ ⵉ ⵓⵙⵏⵜⵉ ⵏ ⵓⵙⵙⵓⴼⵖ ⴳ ⵍⵎⵖⵔⵉⴱ ⵏ ⵜⴳⵣⵣⴰⵢⵜ ⵏ "ⴽⵓⴼⵉⴷ-19" ⴷ ⵜⴳⵣⵣⴰⵢⵉⵏ ⵢⴰⴹⵏⵉⵏ

05 ⵢⵓⵍⵢⵓⵣ 2021 Version Imprimable
ⴼⴰⵙ - ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⵢⵏⴰⵙ 5 ⵢⵓⵍⵢⵓⵣ 2021 ⴳ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ ⵏ ⴼⴰⵙ, ⵜⴰⴼⵓⴳⵍⴰ ⵏ ⵓⵕⵥⵥⵓⵎ ⴷ ⵏ ⵓⵙⴳⵎⴹ ⵏ ⵜⵎⵢⴰⵇⵇⴰⵏⵉⵏ ⵉⴳⴳⵔⵏ ⵉ ⵓⵙⵏⵜⵉ ⵏ ⵓⵙⵙⵓⴼⵖ ⴳ ⵍⵎⵖⵔⵉⴱ ⵏ ⵜⴳⵣⵣⴰⵢⵜ ⵏ "ⴽⵓⴼⵉⴷ-19" ⴷ ⵜⴳⵣⵣⴰⵢⵉⵏ ⵢⴰⴹⵏⵉⵏ.

ⵉⵔⴰ ⵓⵙⵏⵜⵉ ⵢⴰⴷ ⴰⴷ ⵉⵙⵙⵓⴼⵖ ⴳ ⵜⵎⴰⵣⵔⵜ ⵏⵏⵖ ⵜⴰⴳⵣⵣⴰⵢⵜ ⵏ "ⴽⵓⴼⵉⴷ", ⵓⵍⴰ ⵎⵏⵏⴰⵡ ⵏ ⵜⴳⵣⵣⴰⵢⵉⵏ ⵉⴷⴷⵓⵔⵏ ⵢⴰⴹⵏⵉⵏ, ⴰⴼⴰ ⴷ ⵉⵃⴱⵓ ⵍⵎⵖⵔⵉⴱ ⵎⴰⴷ ⵜ ⵉⵅⵚⵚⴰⵏ ⴰⵎⵎⴰⵙ ⵏ ⵜⴳⵣⵣⴰⵢⵜ ⴰⴷ, ⵓⵍⴰ ⴰⴼ ⴰⴷ ⵜⴳ ⵜⴳⵍⴷⵉⵜ ⵜⵎⴰⵣⵉⵔⵜ ⵜⴰⵎⵣⵡⴰⵔⵓⵜ ⵏ ⵜⴰⵜⵉⴽⵏⵓⵍⵓⵊⵉⵜ ⵜⴰⴱⵢⵓⵍⵓⵊⵉⵜ ⴳ ⵓⵏⵎⵥⴰⵡ ⴰⴼⵔⵉⵇⵉ ⴷ ⵓⵎⴰⴹⴰⵍ ⴳ ⵉⴳⵔ ⵏ ⵜⵎⴳⵓⵔⵉ "ⴰⵙⵎⵓⵙⵙⵓ ⴷ ⵓⵙⵖⵍⵍⴼ" (fill & finish).

ⵢⵓⵛⴽⴰⴷ ⵓⵙⵏⵜⵉ ⵢⴰⴷ ⴷⴼⴼⵉⵔ ⵏ ⵜⵎⴷⵔⴰⵡⵜ ⵜⴰⴳⴷⵓⴷⴰⵏⵜ ⵜⵓⵙⵍⵉⴳⵜ, ⴷ ⵉⵔⴰ ⴰⴷ ⵉⵍⴽⵎ, ⴳ ⵓⵣⵎⵣ ⵉⵎⵥⵥⵉⵏ, ⵉ ⵜⵥⵥⵉⴹⵕⴰ ⵏ ⵜⵙⵢⴰⴼⵓⵜ ⵏ 5 ⵏ ⵉⵎⵍⵢⵓⵏⵏ ⵏ ⵜⴳⵣⵣⴰⵢⵉⵏ ⵏ "ⴽⵓⴼⵉⴷ-19" ⴽⵔⴰ ⵢⴳⴰⵜⵜ ⴰⵢⵢⵓⵔ, ⴷⴰⵜ ⴰⴷ ⵜ ⵉⵣⵔⵉ ⵉⵎⵉⴽ ⵙ ⵉⵎⵉⴽ ⴳ ⵓⵣⵎⵣ ⴰⵏⴰⵎⵎⴰⵙ. ⵔⴰⴷ ⵓⵙⵎⵓⵏ ⵢⴰⵏ ⵓⵙⵙⴰⵔⵓ ⵏ 500 ⵓⵎⵍⵢⵓⵏ ⵏ ⴷⴷⵓⵍⴰⵕ. 

ⵢⵓⵛⴽⴰⴷ ⵓⵕⵥⵥⵓⵎ ⵏ ⵜⵎⴷⵔⴰⵡⵜ ⴰⴷ ⴳ ⵓⵙⴰⵜⵉ ⵏ ⵓⵎⵙⵏⴰⵍⴰ ⴰⵜⵉⵍⵉⴼⵓⵏⵉ ⵏ ⴰⵙⵙ ⵏ 31 ⵖⵓⵛⵜ 2020 ⴳⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴷ ⵎⴰⵙⵙ ⵛⵉ ⵊⵉⵏⴱⵉⵏ, ⴰⵏⵙⵙⵉⵅⴼ ⵏ ⵜⴳⴷⵓⴷⴰⵏⵜ ⵜⴰⵎⴷⵏⴰⵏⵜ ⵏ ⵛⵛⵉⵏⵡⴰ. 

ⴳ ⵍⴱⴷⵓ ⵏ ⵜⴼⴼⵓⴳⵍⴰ ⵢⴰⴷ, ⴷ ⴷⴼⴼⵉⵔ ⵏ ⵜⴳⵓⵔⵉ ⵏ ⵓⵎⴰⵡⵙⴰⵙ ⵏ ⵜⴷⵓⵙⵉ, ⵉⵙⵎⵏⴷ ⵎⴰⵙⵙ ⵙⴰⵎⵉⵔ ⵎⴰⵛⵓⵕ, ⴰⵎⵓⵣⴰⵢ ⵉⴳⵔⴰⵖⵍⴰⵏ ⴳ ⵜⴰⵜⵉⴽⵏⵓⵍⵓⵊⵉⵜ ⵜⴰⴱⵢⵓⵍⵓⵊⵉⵜ ⵜⴰⵎⴳⵓⵔⴰⵏⵜ ⴷ ⴰⵎⴰⵔⵉ ⵏ ⵓⵏⵙⵙⵉⵅⴼ ⵏ "ⵙⴰⵎⵙⵓⵏⴳ ⴱⵢⵓⵍⵓⵊⵉⴽⵙ", ⴰⵙⵏⵜⵉ ⵢⴰⴷ ⵏ ⵓⵙⵙⵓⴼⵖ ⴳ ⵍⵎⵖⵔⵉⴱ ⵏ ⵜⴳⵣⵣⴰⵢⵜ ⵏ "ⴽⵓⴼⵉⴷ-19" ⴷ ⵜⴳⵣⵣⴰⵢⵉⵏ ⵢⴰⴹⵏⵉⵏ.

ⴷⴼⴼⵉⵔ ⵏ ⵖⵉⴽⴰⵏⵏ, ⵉⵙⴰⵡⵍ ⵓⵏⵙⵙⵉⵅⴼ ⴰⵏⵎⵀⴰⵍ ⴰⵎⴰⵜⴰⵢ ⵏ ⵓⴳⵔⴰⵡ "ⵙⵉⵏⵓⴼⴰⵕⵎ", ⵎⴰⵙⵙ ⵍⵢⵓ ⵊⵉⵏⴳⵣⵉⵏ, ⴳ ⵜⵓⴳⴳⵓⴳⵜ ⵙⴳ ⵛⵛⵉⵏⵡⴰ. ⵉⵙⵎⵏⴷ ⵙⵓⵍ ⵓⵏⵙⵙⵉⵅⴼ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵎⵙⵙⵓⵔⵜ "ⵔⵉⵙⵉⴼⴰⵕⵎ", ⵎⴰⵙⵙ ⵎⴰⵕⴽ ⴼⵓⵏⴽ, ⴰⵙⵏⵜⵉ ⵏ ⵓⵙⵔⴰⵙ ⵏ ⵜⵥⵥⵉⴹⵕⴰ ⵏ ⵓⵙⵙⵓⴼⵖ ⵏ ⵜⴳⵣⵣⴰⵢⵜ ⴳ ⵍⵎⵖⵔⵉⴱ. 

ⴳ ⵓⵣⵎⵣⵣⵓ ⵢⴰⴷ, ⴽⵕⴰⴹ ⵜⵎⵢⴰⵇⵇⴰⵏⵉⵏ ⵉⴷⴷⵓⵔⵏ ⴰⴷ ⵉⵜⵜⵓⵙⴳⵎⴹⵏ ⴷⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ. ⵉⴳⴰ ⵍⵃⴰⵍ:

1. ⵜⴰⵎⵙⵙⴽⵜⵉⵜ ⵏ ⵓⵎⵢⴰⵡⴰⵙ ⵅⴼ ⵜⴳⵣⵣⴰⵢⵜ ⵏ "ⴽⵓⴼⵉⴷ-19" ⴳⵔ ⴰⵡⴰⵏⴽ ⴰⵎⵖⵔⴰⴱⵉ ⴷ ⵓⴳⵔⴰⵡ ⵓⵏⵙⴼⴰⵔ ⴰⵏⴰⵎⵓⵔ ⵏ ⵛⵛⵉⵏⵡⴰ (SINOPHARM), ⵍⵍⵉ ⵙⴳⵎⴹⵏ ⵓⵎⴰⵡⵙⴰⵙ ⵏ ⵜⴷⵓⵙⵉ, ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ, ⴷ ⵓⵏⵙⵙⵉⵅⴼ ⵏ ⵓⴳⵔⴰⵡ "ⵙⵉⵏⵓⴼⴰⵕⵎ", ⵎⴰⵙⵙ ⵍⵢⵓ ⵊⵉⵏⴳⵣⵉⵏ. 

2. ⵜⴰⵎⵙⵙⴽⵜⵉⵜ ⵏ ⵜⵎⵢⴰⵇⵇⴰⵏⵜ ⵉⴳⴳⵔⵏ ⵉ ⵓⵙⵔⴰⵙ ⵏ ⵜⵥⵥⵉⴹⵕⴰ ⵏ ⵓⵙⵓⴼⴼⵖ ⵏ ⵜⴳⵣⵣⴰⵢⵜ ⴳ ⵜⴳⵍⴷⵉⵜ ⵏ ⵍⵎⵖⵔⵉⴱ ⴳⵔ ⵓⵡⴰⵏⴽ ⴰⵎⵖⵔⴰⴱⵉ ⴷ ⵜⵎⵙⵙⵓⵔⵜ "ⵔⵉⵙⵉⴼⴰⵕⵎ" (Recipharm), ⵍⵍⵉ ⵢⵙⴳⵎⴹ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ, ⴷ ⵓⵏⵙⵙⵉⵅⴼ ⵏ ⵓⵙⵇⵇⵉⵎ ⵏ ⵜⵎⵙⵙⵓⴳⵓⵔⵜ ⵏ ⵜⴼⵏⵉⵇⵜ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵏ ⵓⵙⵙⴰⵔⵓ, ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ, ⴷ ⵓⵏⵙⵙⵉⵅⴼ ⴰⵏⵎⵀⴰⵍ ⴰⵎⴰⵜⴰⵢ ⵏ ⵜⵎⵙⵙⵓⵔⵜ "ⵔⵉⵙⵉⴼⴰⵕⵎ" (Recipharm), ⵎⴰⵙⵙ ⵎⴰⵕⴽ ⴼⵓⵏⴽ, ⴷ ⵓⵙⵎⵢⴷⴰⵡ ⵏ ⵓⴳⵔⴰⵡ ⵏ ⵍⴰⴱⵏⴰⴽ ⵏ ⵍⵎⵖⵔⵉⴱ, ⵎⴰⵙⵙ ⵄⵜⵎⴰⵏ ⴱⵏⵊⵍⵍⵓⵏ. 

3. ⵜⴰⵎⵖⵓⵏⵜ ⵏ ⵜⵉⴽⴽⵉ ⵏ ⵓⵡⴰⵏⴽ ⵏ ⵍⵎⵖⵔⵉⴱ ⵏ ⵓⵙⵔⵓⵙⵏ ⵏ ⵓⴽⵜⵜⵓⵔ ⵉⵙⵉⵣⴷⴳⵏ ⵏ ⵜⵎⵙⵙⵓⵔⵜ ⵜⵎⵖⵔⴰⴱⵉⵜ (ⵙⵓⵜⵉⵎⴰ) ⵅⴼ ⵓⵙⵓⴼⴼⵖ ⵏ ⵜⴳⵣⵣⴰⵢⵜ ⵏ "ⴽⵓⴼⵉⴷ-19" ⵉⴹⴼⴰⵕⵏ ⵉ ⵜⵎⵙⵙⵓⵔⵜ "ⵙⵉⵏⵓⴼⴰⵕⵎ", ⴳⵔ ⵓⵡⴰⵏⴽ ⵏ ⵍⵎⵖⵔⵉⴱ ⴷ ⵜⵎⵙⵙⵓⵔⵜ "ⵙⵓⵜⵉⵎⴰ", ⵍⵍⵉ ⵙⴳⵎⴹⵏ ⵓⵎⴰⵡⵙⴰⵙ ⵏ ⵜⴷⵓⵙⵉ, ⵎⴰⵙⵙ ⵅⴰⵍⵉⴷ ⴰⵢⵜ ⵟⵟⴰⵍⴱ, ⴷ ⵜⵏⵙⵙⵉⵅⴼⵜ ⵜⴰⵏⵎⵀⴰⵍⵜ ⵜⴰⵎⴰⵜⴰⵢⵜ ⵏ "ⵙⵓⵜⵉⵎⴰ", ⵎⴰⵙⵙⴰ ⵍⴰⵎⵢⴰ ⵜⵜⴰⵣⵉ. 

ⵃⴰⴹⵕⵏ ⴳ ⵜⴼⵓⴳⵍⴰ ⵢⴰⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵙⵄⴷ ⴷⴷⵉⵏ ⵍⵄⵜⵎⴰⵏⵉ, ⴷ ⵓⵎⵛⵛⵉⵡⵕ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵎⴰⵙⵙ ⴼⵓⴻⴰⴷ ⵄⴰⵍⵉ ⵍⵀⵉⵎⵎⴰ, ⴷ ⵓⵎⴰⵡⵙⴰⵙ ⵏ ⵜⵖⴰⵡⵙⵉⵡⵉⵏ ⵏ ⴱⵕⵕⴰ ⴷ ⵓⵎⵢⴰⵡⴰⵙ ⴰⴼⵔⵉⵇⵉ ⴷ ⵉⵎⵖⵔⴰⴱⵉⵏ ⵉⵣⴷⵖⵏ ⴳ ⴱⵕⵕⴰ, ⵎⴰⵙⵙ ⵏⴰⵚⵕ ⴱⵓⵕⵉⵟⴰ, ⴷ ⵓⵏⵙⵙⵉⵅⴼ ⵏ ⵜⵜⵉⵊⴰⵔⵉ ⵡⴰⴼⴰ ⴱⴰⵏⴽ, ⵎⴰⵙⵙ ⵎⵓⵃⵎⵎⴷ ⴽⵜⵜⴰⵏⵉ, ⴷ ⵓⵏⵙⵙⵉⵅⴼ ⴰⵏⵎⵀⴰⵍ ⴰⵎⴰⵜⴰⵢ ⵏ ⵍⴱⴰⵏⴽ ⵓⵎⴷⵏⴰⵏ, ⵎⴰⵙⵙ ⵎⵓⵃⵎⵎⴷ ⴽⴰⵔⵉⵎ ⵎⵓⵏⵉⵔ. 

Dernière modification : 05 ⵢⵓⵍⵢⵓⵣ 2021
Source URL: https://www.mapnews.ma/am/activites-royales/%E2%B5%89%E2%B5%99%E2%B5%99%E2%B5%89%E2%B5%85%E2%B4%BC-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94-%E2%B4%B0%E2%B4%B3%E2%B5%8D%E2%B5%8D%E2%B5%89%E2%B4%B7-%E2%B5%9C%E2%B4%B0%E2%B4%BC%E2%B5%93%E2%B4%B3%E2%B5%8D%E2%B4%B0-%E2%B5%8F-%E2%B5%93%E2%B5%95%E2%B5%A5%E2%B5%A5%E2%B5%93%E2%B5%8E-%E2%B4%B7-%E2%B5%8F-%E2%B5%93%E2%B5%99%E2%B4%B3%E2%B5%8E%E2%B4%B9-%E2%B5%8F-%E2%B5%9C%E2%B5%8E%E2%B5%A2%E2%B4%B0%E2%B5%87%E2%B5%87%E2%B4%B0%E2%B5%8F%E2%B5%89%E2%B5%8F-%E2%B5%89%E2%B4%B3%E2%B4%B3%E2%B5%94%E2%B5%8F-%E2%B5%89-%E2%B5%93%E2%B5%99%E2%B5%8F%E2%B5%9C%E2%B5%89-%E2%B5%8F