Published on MAPNews (https://www.mapnews.ma/am)

Accueil > ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵢⴰⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ
  1. Accueil
  2. Activités royales

ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵢⴰⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ

28 ⵢⵓⵏⵢⵓ 2021 Version Imprimable
ⴼⴰⵙ - ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⵢⵏⴰⵙ 28 ⵢⵓⵏⵢⵓ 2021 ⴳ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ ⵏ ⴼⴰⵙ, ⵢⴰⵏ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ, ⵉⴳⴰⵏ ⵉ ⵡⴹⴼⴼⵉⵔ ⵏ ⵙⵉⵏ ⵉⵙⵏⵜⵉⵏ ⵏ ⵓⵙⵍⴳⵏ ⴰⵙⴰⵜⵉ, ⴷ ⵢⴰⵏ ⵓⵙⵏⵜⵉ ⵏ ⵓⵙⵍⴳⵏ ⴷ ⵏ ⵎⵏⵏⴰⵡ ⵏ ⵉⵙⵏⵜⵉⵏ ⵏ ⵉⵎⵕⵚⵓⵎⵏ ⴷ ⵜⵎⵢⴰⵇⵇⴰⵏⵉⵏ ⵜⵉⴳⵔⴰⵖⵍⴰⵏⵉⵏ.

ⴳ ⵍⴱⴷⵓ ⵏ ⵜⵡⵡⵓⵔⵉⵡⵉⵏ ⵏ ⵓⵙⵇⵇⵉⵎ ⴰⴷ, ⵉⵙⵎⵏⴷ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ ⴷⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵏ ⵓⵙⵏⵜⵉ ⵏ ⵓⵙⵍⴳⵏ ⴰⵙⴰⵜⵉ ⵏ ⵍⵉⵚⵍⴰⵃ ⴰⵔⴳⴰⵢ.

ⴰⵙⵏⵜⵉ ⵢⴰⴷ ⵉⵔⴰ ⴰⴷ ⵉⵙⵔⵙ ⵉⵎⵏⵣⴰⵢⵏ ⵏ ⵜⵙⵉⵍⴰ ⴷ ⵉⵡⵜⵜⴰⵙⵏ ⵉⵣⴷⵉⵏ ⴷ ⵍⵉⵚⵍⴰⵃ ⴰⴷ, ⴷ ⵉⴳⴳⵔⵏ ⵉ:

- ⴰⵙⴷⵓⵙ ⵏ ⵉⵣⵔⴼⴰⵏ ⵉⴷⴷⵓⵔⵏ ⵙ ⵓⵏⴳⵔⴰⵡ ⴰⵔⴳⴰⵢ ⵉⴱⵉⴷⴷⵏ ⵅⴼ ⵓⵣⵔⴰⴽ ⵏ ⴽⵔⴰ ⵢⴳⴰⵜⵜ ⵢⴰⵏ ⴷⴰⵜ ⵏ ⵓⵔⴳⴰⵢ.

- ⴰⵔⴰⵢ ⵏ ⵎⴷⴷⵏ ⵉⵜⵅⵍⵍⴰⵚⵏ ⵓⵔⴳⴰⵢ ⴷⴰⵜ ⵏ ⴽⵔⴰ ⵢⴳⴰⵜⵜ ⵓⴼⴰⵙⵔ ⵉⵛⵇⵇⴰⵏ ⵏ ⵉⴹⵕⵉⵚⵏ ⵉⵣⵔⴼⴰⵏ ⵙⴳ ⵜⵎⵙⵙⵓⴳⵓⵔⵜ ⵜⴰⵔⴳⴰⵢⵜ

- ⴰⵙⵔⵙ ⵏ ⵢⴰⵏ ⵓⵏⴳⵔⴰⵡ ⴰⵔⴳⴰⵢ ⵅⴼ ⵓⵎⵃⵉⵥⵡⵕ

- ⴰⵙⵡⴰⵍⴰ ⵏ ⵓⵏⴳⵔⴰⵡ ⵏ ⵓⵔⴳⴰⵢ ⵙ ⵓⵙⴷⵓⵙ ⵏ ⵜⴱⴷⴰⴷⵜ

ⴷⴼⴼⵉⵔ ⵏ ⵖⵉⴽⴰⵏⵏ, ⵉⵙⵎⵏⴷ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ ⴷⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵣⵔⵉⵔⵉⵏ ⵉⵎⵇⵇⵓⵕⵏ ⵏ ⵓⵙⵍⴳⵏ ⴰⵙⴰⵜⵉ ⵉⴳⴳⵔⵏ ⵉ ⵍⵉⵚⵍⴰⵃ ⵏ ⵜⵎⵔⵙⵍⵉⵏ ⴷ ⵜⵎⵙⵙⵏⵜⵉⵜⵉⵏ ⵜⵉⴳⴷⵓⴷⴰⵏⵉⵏ. ⴰⵙⵏⵜⵉ ⵢⴰⴷ ⵉⵔⴰ ⴰⴷ ⵉⵙⵔⵙ ⵉⵎⵏⵣⴰⵢⵏ ⵉⵙⵙⵓⵜⵍⵏ ⵍⵉⵚⵍⴰⵃ ⴰⵖⵣⵓⵔⴰⵏ ⴷ ⵉⵣⵣⵉⴳⵉⵣⵏ ⵏ ⵜⵎⵔⵙⵍⵉⵏ ⵏ ⵉⴳⵔ ⴰⴳⴷⵓⴷⴰⵏ. 

ⵉⴹⴼⵕ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ ⵙⵉⵏ ⵉⵙⵏⵜⵉⵏ: ⵢⴰⵏ ⵓⵙⵏⵜⵉ ⵏ ⵓⵙⵍⴳⵏ ⴰⵙⴰⵜⵉ ⵉⴳⴳⵔⵏ ⵉ ⵍⵉⵚⵍⴰⵃ ⴰⵔⴳⴰⵢ, ⴷ ⵓⵙⵏⵜⵉ ⵏ ⵓⵙⵍⴳⵏ ⴰⵙⴰⵜⵉ ⵉⴳⴳⵔⵏ ⵉ ⵍⵉⵚⵍⴰⵃ ⵏ ⵜⵎⵔⵙⵍⵉⵏ ⴷ ⵜⵎⵙⵙⵏⵜⵉⵜⵉⵏ ⵜⵉⴳⴷⵓⴷⴰⵏⵉⵏ.

ⵉⴹⴼⵕ ⵙⵓⵍ ⵓⵙⵇⵇⵉⵎ ⵢⴰⵏ ⵓⵙⵏⵜⵉ ⵏ ⵓⵙⵍⴳⵏ ⵉⵙⵏⴼⵍⵏ ⴷ ⵉⵔⵏⴰⵏ ⴰⵙⵍⴳⵏ ⵏ ⵓⴳⴷⴷⵓⵍ ⵏ ⵓⵙⵙⵓⴼⵖ ⴷ ⵓⵃⴹⵓ ⴷ ⵓⵙⵡⵓⵔⵉ ⵏ ⵙⵙⵍⴰⵃ ⴰⴽⵉⵎⵉ ⴷ ⵜⵕⵥⵉ ⵏⵏⵙ, ⵍⵍⵉ ⵢⵜⵜⵓⴹⴼⴰⵕⵏ ⴳ ⵓⵙⴰⵜⵉ ⵏ ⵓⵙⵖⵜⵙ ⵏ ⵜⴳⵍⴷⵉⵜ ⵏ ⵜⵙⵇⵇⵉⵎⵜ ⵜⴰⴳⵔⴰⵖⵍⴰⵏⵜ ⴳ ⵓⵙⴰⵜⵉ ⵢⴰⴷ.

ⵉⴼⴽⴰ ⵙⵓⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⵉⵔⴰⵜ ⵏⵏⵙ ⵉ ⵢⴰⵏ ⵓⵙⵏⵜⵉ ⵏ ⵓⵎⵕⵚⵓⵎ ⵅⴼ ⵍⵉⵄⴼⴰⴻ ⵏ ⴰⵢⵜ ⵛⵛⵓⵀⴰⴷⴰ ⵏ ⵜⵎⵜⵜⵉ ⴷ ⵉⵎⴰⴳⵓⵙⵏ ⵏ ⵜⵎⵀⵍⵉⵡⵉⵏ ⵜⵉⵄⵙⴽⵔⵉⵏ ⴷ ⵉⵄⵙⴽⵔⵉⵏ ⵉⵜⵜⵢⵓⵎⴰⵥⵏ ⵢⴰⴷ ⵍⵍⵉ, ⵅⴼ ⵉⵣⵔⴼⴰⵏ ⵏ ⵜⵙⵀⴹⴰⵡⵜ ⵜⴼⵔⴽⴰⵏⵜ ⴷ ⴰⴷ ⴼⵍⵍⴰⵜⵏ ⵜⵅⵍⵍⵚ ⵜⵙⵏⵓⵔⴰⵢⵜ ⵜⴰⵏⴰⵎⵓⵔⵜ ⵏ ⵜⵙⵀⴹⴰⵡⵜ ⵜⴼⵔⴽⴰⵏⵜ ⴷ ⵏ ⵓⵙⵖⵍ ⴰⴼⵔⴽⴰⵏ ⴷ ⵜⴽⴰⵕⵟⵓⴳⵔⴰⴼⵜ ⵜⵉⵎⵇⵕⴰⴷ ⵏ ⵓⵙⵙⵓⴼⵖ ⵏ ⵉⵙⴷⴰⵡⵏ ⵉⵜⵉⵇⵏⵉⵢⵏ ⵍⵍⵉ ⵢⴰⵜⵏ ⵉⵜⵜⵓⵙⴽⴰⵔⵏ.

ⴰⵎⵎⴰⵙ ⴳ ⵉⴳⵔ ⴰⵄⵙⴽⵔⵉ, ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⵏⵙⵙⵉⵅⴼ ⴰⵏⴰⴼⵍⵍⴰ ⴷ ⵓⵏⵙⵙⵉⵅⴼ ⵏ ⵍⵉⵟⴰ ⵎⴰⵊⵓⵕ ⴰⵎⴰⵜⴰⵢ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⵜⵉⵔⴰⵜ ⵏⵏⵙ ⵉ ⵙⵉⵏ ⵉⵙⵏⵜⵉⵏ ⵏ ⵓⵎⵕⵚⵓⵎ ⵉⴳⴳⵔⵏ ⵉ ⵜⵙⵏⵙⵉ ⵏ ⵓⵙⵍⴳⵏ ⵉⴳⴳⵔⵏ ⵉ ⵓⵎⴰⵜⵜⵉⵡ ⴷ ⵉⵎⴰⵙⵙⵏ ⵏ ⵓⵎⵣⴰⵢ ⴷ ⵏ ⵜⵏⴼⵔⵓⵜ ⴷ ⵙⵙⵍⴰⵃ, ⵓⵍⴰ ⵡⴰⵏⵏ ⵉⴳⴳⵔⵏ ⵉ ⵜⵏⵔⵓⵜ ⵜⴰⵙⵉⴱⵉⵔⵉⵜ. 

ⴳ ⵓⵙⴰⵜⵉ ⵏ ⵓⵣⵔⴰⴽ ⵏ ⵜⵎⴰⵣⵉⵔⵜ ⵏⵏⵖ ⵏ ⵉⵙⵓⵖⵏⵏ ⵉⴳⵔⴰⵖⵍⴰⵏ ⵏⵏⵙ ⴷ ⵜⵓⴳⴳⴰⵣ ⵏⵏⵙ ⴰⴼ ⴰⴷ ⵉⵙⴷⵓⵙ ⵓⵎⵢⴰⵡⴰⵙ ⴷ ⵜⵎⴷⵔⴰⵡⵜ ⴷ ⵎⵏⵏⴰⵡ ⵏ ⵜⵎⵉⵣⴰⵔ ⵓⵍⵜⵎⴰⵜⵏ ⴷ ⵜⵉⵎⴷⴷⵓⴽⴽⴰⵍ, ⵉⴹⴼⵕ ⵓⵙⵇⵇⵉⵎ ⵏ ⵉⵎⴰⵡⵙⴰⵙⵏ 11 ⵜⵙⵇⵇⵉⵎⵜ ⵜⴰⴳⵔⴰⵖⵍⴰⵏⵜ, ⴰⵎⵎⴰⵙ ⴳⵉⵜⵙ ⴽⵕⴰⴹ ⵏ ⵜⵙⵇⵇⵉⵎⵉⵏ ⵜⵉⵙⵉⵏⵔⴰⵏⵉⵏ ⴷ ⵜⴰⵎ ⵏ ⵜⵙⵇⵇⵉⵎⵉⵏ ⵜⵉⴳⵜⵉⵔⴰⵏⵉⵏ. ⵜⵉⵎⵢⴰⵇⵇⴰⵏⵉⵏ ⵜⵉⴳⵜⵉⵔⴰⵏⵉⵏ ⴳⴳⵔⵏ ⵉ ⵢⵙⴰⵢⵔⴰⵔⵏ ⵉⴼⵔⵉⵇⵉⵢⵏ, ⴷ ⵉⵄⵕⴰⴱⵏ ⵉⵎⵓⵙⵍⵎⵏ, ⴷ ⵉⴳⵔⴰⵖⵍⴰⵏⵉⵏ.

ⴷⴼⴼⵉⵔ ⵏ ⵜⵡⵡⵓⵔⵉⵡⵉⵏ ⵏ ⵓⵙⵇⵇⵉⵎ, ⴷ ⵖⵉⴽ ⵍⵍⵉ ⵢⵔⴰ ⵓⵎⵏⵏⵉ ⵡⵉⵙⵙ 49 ⵏ ⵓⴷⵓⵙⵜⵓⵔ ⴷ ⵙ ⵜⵙⵓⵎⵔⵜ ⵏ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⴷ ⵙ ⵜⵙⵏⵜⴰⵢⵜ ⵏ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ, ⵉⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⴰⴷ ⵉⵙⵜⵉ ⵎⴰⵙⵙ ⵀⵉⵛⴰⵎ ⵣⵣⵏⴰⵜⵉ ⵙⵙⵔⵖⵉⵏⵉ ⴰⴷ ⵉⴳ ⵓⵏⵎⵀⴰⵍ ⴰⵎⴰⵜⴰⵢ ⵏ ⵜⵎⵙⵙⵓⵔⵜ ⵜⴰⵏⴰⵎⵓⵔⵜ ⵏ ⵜⵏⴼⵔⵓⵜ ⴷ ⵓⵙⵙⵥⵕⴼ ⵏ ⵜⵎⵙⵙⵏⵜⵉⵜ.

ⴷ ⵙ ⵜⵙⵏⵜⴰⵢⵜ ⵏ ⵓⵎⴰⵡⵙⴰⵙ ⵏ ⵜⵎⴳⵓⵔⵉ ⴷ ⵓⵙⵙⴰⵔⵓ ⴷ ⵜⵙⴱⴱⴰⴱⵜ ⴷ ⵜⴷⵎⵙⴰ ⵜⴰⵣⴳⵣⴰⵡⵜ ⴷ ⵜⴰⵎⵓⵟⵟⵓⵏⵜ, ⵉⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵉⵙⵜⵉ ⵎⴰⵙⵙ ⵢⵓⵙⴼ ⵍⴱⴰⵔⵉ ⴰⴷ ⵉⴳ ⵓⵏⵎⵀⴰⵍ ⴰⵎⴰⵜⴰⵢ ⵏ ⵜⵙⵏⵓⵕⴰⵢⵜ ⵜⵎⵖⵔⴰⴱⵉⵜ ⵏ ⵜⴳⵎⵉ ⵏ ⵉⵙⵙⴰⵔⵓⵏ ⴷ ⵏ ⵉⵙⵉⴼⴰⴹ.

ⴷ ⵙ ⵜⵙⵏⵜⴰⵢⵜ ⵏ ⵓⵎⴰⵡⵙⴰⵙ ⵏ ⵜⴷⵍⵙⴰ ⴷ ⵜⵄⵄⵓⵔⵎⴰ ⴷ ⵜⵓⵏⵏⵓⵏⵜ, ⵉⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵉⵙⵜⵉ ⵎⴰⵙⵙ ⵎⵓⵃⵎⵎⴷ ⴽⵏⴱⵉⴱ ⴰⴷ ⵉⴳ ⵓⵏⵎⵀⴰⵍ ⵏ ⵓⵙⵉⵏⴰⴳ ⴰⴳⵍⴷⴰⵏ ⵏ ⵓⵙⵉⴳⴳⵍ ⵅⴼ ⵓⵎⵣⵔⵓⵢ ⵏ ⵍⵎⵖⵔⵉⴱ. 

Dernière modification : 28 ⵢⵓⵏⵢⵓ 2021
Source URL: https://www.mapnews.ma/am/activites-royales/%E2%B5%89%E2%B5%99%E2%B5%99%E2%B5%89%E2%B5%85%E2%B4%BC-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94-%E2%B4%B0%E2%B4%B3%E2%B5%8D%E2%B5%8D%E2%B5%89%E2%B4%B7-%E2%B5%8E%E2%B5%93%E2%B5%83%E2%B5%8E%E2%B5%8E%E2%B4%B7-%E2%B5%A1%E2%B5%89%E2%B5%99%E2%B5%99-%E2%B5%9A%E2%B4%B9%E2%B5%89%E2%B5%9A-%E2%B5%A2%E2%B4%B0%E2%B5%8F-%E2%B5%93%E2%B5%99%E2%B5%87%E2%B5%87%E2%B5%89%E2%B5%8E-%E2%B5%8F-%E2%B5%89%E2%B5%8E%E2%B4%B0%E2%B5%A1%E2%B5%99%E2%B4%B0%E2%B5%99%E2%B5%8F-1