Published on MAPNews (https://www.mapnews.ma/am)

Accueil > ⴰⵙⵉⵡⴹ ⵏ ⵓⴱⵔⵙⵉⵔⴰ ⴰⴳⵍⴷⴰⵏ
  1. Accueil
  2. Activités royales

ⴰⵙⵉⵡⴹ ⵏ ⵓⴱⵔⵙⵉⵔⴰ ⴰⴳⵍⴷⴰⵏ

16 ⵏⵓⵡⴰⵏⴱⵉⵔ 2020 Version Imprimable
ⵕⵕⴱⴰⵟ - ⵀⴰ ⵎⴰⴷ ⵉⵏⵏⴰ ⵢⴰⵏ ⵓⵙⵉⵡⴹ ⵏ ⵓⴱⵔⵙⵉⵔⴰ ⴰⴳⵍⴷⴰⵏ:

"ⵉⵙⴽⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴳ ⴰⵙⵙ ⴰⴷ, ⵢⴰⵏ ⵓⵎⵙⴰⵡⴰⵍ ⴰⵜⵉⵍⵉⴼⵓⵏⵉ ⴷ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵢⵎⴰⵏⵏ, ⵎⴰⵙⵙ ⴰⵏⵟⵓⵏⵢⵓ ⴳⵓⵜⵉⵔⵉⵙ.  

ⴰⵎⵙⴰⵡⴰⵍ ⴰⴷ ⵉⵙⴰⵡⵍ ⵅⴼ ⵜⵎⵔⵏⵉⵡⵉⵏ ⵉⴳⴳⵯⵔⴰⵏ ⵉⴳⴳⵔⵏ ⵉ ⵡⵙⵇⵙⵉ ⴰⵏⴰⵎⵓⵔ, ⵙⵍⴰⵡⴰⵏ ⴰⴽⴽⵯ ⴰⵙⵓⵔⵙ ⴳ ⵓⴷⵖⴰⵔ ⵏ ⵍⴳⵔⴳⴰⵔⴰⵜ ⴳ ⵚⵚⵃⵕⴰ ⵜⵎⵖⵔⴰⴱⵉⵜ.   

ⴰⵎⵎⴰⵙ ⵏ ⵓⵎⵙⴰⵡⴰⵍ ⴰⴷ, ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⴷⴼⴼⵉⵔ ⵍⵍⵉⵖ ⵓⵔ ⵎⵓⵔⵙⵏ ⴰⴽⴽⵯ ⵉⵔⵎⵏ ⵉⴼⵓⵍⴽⵉⵏ ⵍⵍⵉ ⵢⵙⴽⵔ ⵓⵏⴼⵍⵓⵙ ⴰⵎⴰⵜⴰⵢ, ⵜⵓⵎⵥ ⵜⴳⵍⴷⵉⵜ ⵜⵉⵎⵙⵜⴳⴳⴰⵔⵉⵏ ⵏⵏⵙ ⴳ ⵓⵙⴰⵜⵉ ⵏ ⵓⵣⵔⴼ ⵉⵖⵥⴰⵏⵏ ⵏⵏⵙ, ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⵓⵔ ⵉⴳⴰ ⵍⵃⴰⵍ ⵜⴽⵍⵉⵜ ⵉⵣⵡⴰⵔⵏ ⵍⵍⵉⵖ ⵉⵙⴽⵔ "ⵍⴱⵓⵍⵉⵥⴰⵕⵢⵓ" ⵜⵉⴳⴰⵡⵉⵏ ⵓⵔ ⵉⵜⵜⵓⵇⴱⴰⵍⵏ.  

ⵍⵎⵖⵔⵉⴱ ⵢⴰⵙⵜⵡⴰ ⴰⵙⵓⵔⵙ ⴷ ⵉⴼⵙⵉ ⵙ ⵢⴰⵜ ⵜⵖⴰⵔⴰⵙⵜ ⵉⴳⴳⵯⵔⴰⵏ ⵜⴰⵎⵓⴽⵔⵉⵙⵜ ⴰⴷ, ⴷ ⵉⵙⴳⵔⴰⵡⵍ ⵓⵙⵉⴽⵍ.   

ⵉⵔⵏⴰ ⵢⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⵎⴰⵙ ⵜⴰⴳⵍⴷⵉⵜ ⵏ ⵍⵎⵖⵔⵉⴱ ⵔⴰⴷ ⴱⴷⴷⴰ ⵜⵙⴽⵔ ⵜⵖⴰⵡⵙⵉⵡⵉⵏ ⵉⵅⵚⵚⴰⵏ ⴰⴼ ⴰⴷ ⵉⵃⵟⵟⵓ ⴰⵏⵎⴰⵍⴰ ⴷ ⵓⵙⵉⴽⵍ ⵉⵏⴼⵔⴰⵏ ⴷ ⵉⴼⵙⵙⵓⵙⵏ ⵏ ⵎⴷⴷⵏ ⴷ ⵙⵙⵍⵉⵄⵜ, ⴳ ⵜⵙⴳⴰ ⵢⴰⴷ ⵉⵍⵍⴰⵏ ⴳ ⵓⵡⵜⵜⵓ ⴳⵔ ⵜⴳⵍⴷⵉⵜ ⴷ ⵜⴳⴷⵓⴷⴰⵏⵜ ⵜⵉⵙⵍⴰⵎⵉⵜ ⵏ ⵎⵓⵕⵉⵟⴰⵏⵢⴰ.  

ⵉⵎⵍⴰ ⴷⴰⵖ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉ ⵎⴰⵙⵙ ⴳⵓⵜⵉⵔⵉⵙ ⴰⵣⵔⴰⴽ ⵉⵍⵍⴰⵏ ⴱⴷⴷⴰ ⴷⴰⵔ ⵍⵎⵖⵔⵉⴱ ⴷⴰⵜ ⵏ ⵓⵙⴱⵉⴷⴷ ⵏ ⵡⴰⴼⴰ. ⵙ ⵣⵓⵏⴷ ⵜⴳⴳⴰⵍⵜ ⴰⵏⵏ, ⵔⴰⴷ ⴱⴷⴷⴰ ⵜⵔⴰⵔ ⵜⴳⵍⴷⵉⵜ, ⴳ ⵓⵙⴰⵜⵉ ⵏ ⵓⵎⵣⴰⵖ ⵓⵍⴳⵉⵏ, ⵅⴼ ⴽⵔⴰ ⵢⴳⴰⵜⵜ ⵓⵙⴷⵉⴷⵉ ⵏ ⵜⵏⴼⵔⵓⵜ ⴷ ⵜⵏⴰⴳⵔⵉⵜ ⵏ ⵉⵏⵎⵓⵔⵉⵏ ⵏⵏⵙ.  

ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴳ ⵓⵇⵇⵏ ⵏ ⵓⵎⵙⴰⵡⴰⵍ ⴰⴷ, ⵉ ⵓⵏⴼⵍⵓⵙ ⴰⵎⴰⵜⴰⵢ ⵏ ⵜⵎⵜⵜⴰ ⵢⵎⴰⵏⵏ ⵎⴰⵙ ⵔⴰⴷ ⵉⵔⵏⵓ ⵍⵎⵖⵔⵉⴱ ⵜⵓⴳⴳⴰⵣ ⵏⵏⵙ ⴳ ⵓⵙⴰⵜⵉ ⵏ ⵜⵣⵉⴳⵣⵜ ⵜⴰⵙⵔⵜⴰⵏⵜ, ⵍⵍⵉ ⵢⵅⵚⵚⴰⵏ ⴰⴷ ⵜⵔⵏⵓ ⵅⴼ ⵜⴰⵙⵉⵍⴰ ⵏ ⵜⵙⵖⵍⵉⵏ ⵉⴱⴰⵢⵢⵏⵏ, ⵉⵙⵎⴰⵏⵏ ⵜⵉⴼⵓⵍⵉⵏ ⵏ ⵚⵚⴰⵃⵜ ⵉⴽⵛⵎⵏ ⴳ ⵓⵎⵏⵣⴰⵖ ⴰⵏⵎⵏⴰⴹ ⴰⴷ, ⴷ ⵉⵥⴹⴰⵕⵏ ⴰⴷ ⵜⴰⵡⵉ ⵢⴰⵏ ⵓⴼⵙⵙⴰⵢ ⴰⵏⵉⵍⴰⵡ ⴷ ⵉⵥⴹⴰⵕⵏ ⴰⴷ ⵉⴼⴼⵖ ⴳ ⵓⵙⴰⵜⵉ ⵏ ⵜⵏⴱⴰⴹⵜ ⵏ ⵜⴳⵍⴷⵉⵜ".  

Dernière modification : 16 ⵏⵓⵡⴰⵏⴱⵉⵔ 2020
Source URL: https://www.mapnews.ma/am/activites-royales/%E2%B4%B0%E2%B5%99%E2%B5%89%E2%B5%A1%E2%B4%B9-%E2%B5%8F-%E2%B5%93%E2%B4%B1%E2%B5%94%E2%B5%99%E2%B5%89%E2%B5%94%E2%B4%B0-%E2%B4%B0%E2%B4%B3%E2%B5%8D%E2%B4%B7%E2%B4%B0%E2%B5%8F-37