Published on MAPNews (https://www.mapnews.ma/am)

Accueil > ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵏ ⵉⵏⴰⵡ ⴰⵎⴰⵜⴰⵢ ⴳ ⵓⵣⵎⵣⵣⵓ ⵏ ⵓⵙⵙⴽⵜⵉ ⵡⵉⵙⵙ 45 ⵏ ⵜⵡⴰⴷⴰ ⵜⴰⵣⴳⵣⴰⵡⵜ
  1. Accueil
  2. Activités royales

ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵏ ⵉⵏⴰⵡ ⴰⵎⴰⵜⴰⵢ ⴳ ⵓⵣⵎⵣⵣⵓ ⵏ ⵓⵙⵙⴽⵜⵉ ⵡⵉⵙⵙ 45 ⵏ ⵜⵡⴰⴷⴰ ⵜⴰⵣⴳⵣⴰⵡⵜ

07 ⵏⵓⵡⴰⵏⴱⵉⵔ 2020 Version Imprimable
ⵕⵕⴱⴰⵟ - ⵉⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⵙⵉⴹⵢⴰⵙ, ⵢⴰⵏ ⵉⵏⴰⵡ ⴰⵎⴰⵜⴰⵢ ⴳ ⵓⵣⵎⵣⵣⵓ ⵏ ⵓⵙⵙⴽⵜⵉ ⵡⵉⵙⵙ 45 ⵏ ⵜⵡⴰⴷⴰ ⵜⴰⵣⴳⵣⴰⵡⵜ.

ⵓⵔ ⵜⴳⴰ ⵜⵡⴰⴷⴰ ⵜⴰⵣⴳⵣⴰⵡⵜ ⵖⴰⵔ ⴰⵙⴽⴽⵉⵏ ⴰⵏⴰⵎⵓⵔ ⴰⵅⴰⵜⴰⵔ ⴳ ⵓⵖⴰⵔⴰⵙ ⵏ ⵜⵔⵏⵓⵜ ⵏ ⵓⴳⵣⵣⵓⵎ ⵏ ⵡⴰⴽⴰⵍ, ⵎⴰⵛ ⵜⴳⴰ ⵙⵓⵍ ⵢⴰⵜ ⵜⴰⵡⴰⴷⴰ ⵉⵙⵎⵓⵢⵏⴰⵏ ⴷ ⵉⵔⵏⴰⵏ ⴳ ⵜⵡⵓⵔⵉ ⵏ ⵜⵖⴱⵉ ⵏ ⵜⵎⵖⵔⴰⴱⵉⵜ ⵏ ⵚⵚⵃⵕⴰ, ⵎⴰ ⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⴳ ⵉⵏⴰⵡ ⴰⴷ.

ⴳ ⵓⵙⵡⵉⵔ ⵏ ⵜⵎⵜⵜⴰ ⵢⵎⴰⵏⵏ, ⵎⴹⵍⵏⵜ ⵜⵖⵜⴰⵙⵉⵏ ⵉⴳⴳⵯⵔⴰⵏ ⵏ ⵓⵙⵇⵇⵉⵎ ⵏ ⵜⵏⴼⵔⵓⵜ ⵜⵉⵎⴷⵢⴰⵙⵉⵏ ⵉⵜⵜⵓⵣⵔⴰⵢⵏ ⴷ ⵓⵔ ⵖⵓⵔⵙⵏ ⵉⵍⵍⴰⵏ ⵜⵉⴷⴷⵜ, ⴷ ⵙⴷⵓⵙⵏⵜ ⵓⵍⴰ ⵜⵎⴷⵔⴰⵡⵜ ⵏ ⵜⵏⴰⴼⵓⵜⵉⵏ ⵏ ⵚⵚⴰⵃⵜ ⵉⴽⵯⵛⵎⵏ  ⴳ ⵓⵎⵣⴰⵖ ⴰⵙⴳⵡⴰⵏ ⴰⴷ, ⵎⴰ ⵢⴰⴷ ⵉⵣⴷⵉⵏ ⴷ ⵜⵙⵏⵜⴰⵢⵜ ⵜⵎⵖⵔⴰⴱⵉⵜ ⵏ ⵓⵙⵉⵎⴰⵏ ⵍⵍⵉ ⵢⵙⵎⴰⵏⵏ ⵓⵏⵏⴰⵍ ⵏ ⵓⵙⵇⵇⵉⵎ ⵏ ⵜⵏⴼⵔⵓⵜ ⴷ ⵉⵡⴰⵏⴽⵏ ⵉⵎⵇⵕⴰⵏ ⴰⵎ ⴰⵙⵜⴰⵢ ⴰⵎⵢⵉⵏⴰⵡ ⵏ ⵓⵎⵙⴰⵙⴰ ⵏ ⵓⵎⵏⵣⴰⵖ ⴰⴷ, ⵎⴰ ⵢⴰⴷ ⵙⵓⵍ ⵉⴼⵔⴰ ⵢⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ. 

ⴰⵎⵎⴰ ⴳ ⵓⵙⵡⵉⵔ ⵏ ⵜⵎⵓⵏⵜ ⵜⵉⴼⵔⵉⵇⵉⵜ, ⵜⵓⵊⵊⴰ ⵜⵏⵎⴰⵍⴰⵢⵜ ⴰⴷ, ⴷⴼⴼⵉⵔ ⵏ ⵓⴷⵡⴰⵍ ⵏ ⵍⵎⵖⵔⵉⴱ ⵙ ⵜⴰⴷⴷⴰⵔⵜ ⵜⵉⴼⵔⵉⵇⵉⵜ ⵏⵏⵙ, ⵉⵃⵕⵛⵏ ⵍⵍⵉ ⵜⴳⴰ ⵜⴰⵏⴳⵉⵙⵜ ⵏⵏⵙ ⵎⵏⵏⴰⵡ ⵏ ⵉⵙⴳⴳⵯⴰⵙⵏ ⴰⵢ ⴰⴷ, ⵎⴰ ⵢⴰⴷ ⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵉⴼⵔⴰ ⵢⵏⵏⴰ ⵎⴰⵙ ⵜⵓⵎⵥ ⵢⴰⵜ ⵜⵎⵙⴷⴰⵡⵜ ⵜⵓⵚⴽⴰⵡⵉⵜ ⵉⴱⵉⴷⴷⵏ ⵅⴼ ⵜⵉⴽⴽⵉ ⵏ ⵓⵏⵏⴰⵍ ⵉ ⵜⵓⴳⴳⴰⵣ ⵍⵍⵉ ⴰⵔ ⵜⵙⴽⴰⵔ ⵜⵎⵜⵜⴰ ⵉⵎⴰⵏⵏ ⵖⴰⵔ ⵏⵜⵜⴰⵜ, ⵙ ⵓⵏⴼⵍⵓⵙ ⴰⵎⴰⵜⴰⵢ ⵏⵏⵙ ⴷ ⵓⵙⵇⵇⵉⵎ ⵏ ⵜⵏⴼⵔⵓⵜ.

ⴰⵎⵎⴰ ⴳ ⵓⵙⵡⵉⵔ ⴰⵙⵍⴳⴰⵏ ⴷ ⴰⴷⵉⴱⵍⵓⵎⴰⵙⵉ, ⵉⵙⵙⴽⵜⵉ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⵕⵥⵎⵏ ⵎⵏⵏⴰⵡ ⵏ ⵉⵡⴰⵏⴽⵏ ⵉⵏⴳⵯⵎⴰⵜⵏ ⵜⵉⵇⵓⵏⵙⵓⵍⵉⵏ ⵜⵉⵎⴰⵜⴰⵢⵉⵏ ⵏⵏⵙⵏ ⴳ ⵜⵖⵔⵎⵉⵡⵉⵏ ⵏ ⵍⵄⵢⵓⵏ ⴷ ⴷⴷⴰⵅⵍⴰ, ⵎⴰ ⵢⴰⴷ ⵉⴳⴰⵏ ⵜⵓⵙⵙⵏⴰ ⵜⴰⵎⴰⴼⴰⵡⵜ ⵙ ⵜⵎⵖⵔⴰⴱⵉⵜ ⵏ ⵚⵚⵃⵕⴰ, ⴷ ⵜⵖⵍⵉⴼⵜ ⵏ ⵜⵏⴼⵔⵓⵜ ⴷ ⵓⴳⵣⵣⵓⵎ ⴷ ⵕⵕⵅⴰ ⵍⵍⵉ ⵙⵏⵏⵜ ⵜⵙⴳⴰⵡⵉⵏ ⵏ ⵉⴼⴼⵓⵙ ⵏⵏⵖ.

ⵜⵏⴳⴹ ⵜⵓⴳⵜ ⵜⴰⵅⴰⵜⴰⵔⵜ ⵏ ⵡⴰⵎⵓⵏ ⴰⴷⵖⵔⴰⵏ ⴰⴷ ⵜⵓⴹⴼⴰⵕⵏ ⵉⵎⵏⵖⵉⵏ ⵏ ⵜⵏⴰⴼⵓⵜⵉⵏ ⵢⴰⴹⵏⵉⵏ, ⵎⴰ ⵢⴰⴷ ⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵉⵙⵙⴽⵯⵜⵉ ⵎⴰⵙ ⵉⵍⴽⵎ ⵓⵎⴰⴹⴰⵏ ⵏ ⵉⵡⴰⵏⴽⵏ ⵍⵍⵉ ⵓⵔ ⵙⵉⵏⵏ ⵙ ⵜⴳⴷⵓⴷⴰⵏⵜ ⵓⵔ ⴰⴽⴽⵯ ⵉⵍⵍⴰⵏ 163 ⴰⵡⴰⵏⴽ, ⵎⴰ ⵢⴰⴷ ⵉⴳⴰⵏ 85% ⵏ ⵉⵡⴰⵏⴽⵏ ⵉⴳⵎⴰⵎⵏ ⵏ ⵜⵎⵜⵜⴰ ⵢⵎⴰⵏⵏ. 

ⵜⵜⵓⵙⴷⵓⵙ ⵜⵖⴰⵔⴰⵙⵜ ⴰⴷ ⵍⵍⵉⵖ ⴹⴼⴰⵕⵏⵜ ⵜⴳⴳⴰⵍⵉⵏ ⵜⵉⵎⴰⴹⵍⴰⵏⵉⵏ ⵉⴷⴷⴰⴷⵏ ⵉⵅⴰⵜⴰⵔⵏ, ⵣⵓⵏⴷ ⵜⵉⵎⴷⵔⴰⵡⵉⵏ ⵜⵉⵙⵜⵔⴰⵜⵉⵊⵉⵏ ⴷ ⵜⵉⴷⵎⵙⴰⵏⵉⵏ ⵍⵍⵉ ⵃⴱⴰⵏⵜ, ⴱⵍⴰ ⴽⵔⴰ ⵢⴳⴰⵜⵜ ⵓⵙⵍⵉⴷ, ⵜⵉⵙⴳⴰⵡⵉⵏ ⵏ ⵉⴼⴼⵓⵙ ⵏ ⵜⴳⵍⴷⵉⵜ ⴰⵎⵎ ⵜⴼⵓⵍⵜ ⵉⴽⵛⵎⵏ ⴳ ⵡⴰⴽⴰⵍ ⴰⵎⵖⵔⴰⴱⵉ, ⵎⴰ ⵢⴰⴷ ⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

"ⴳ ⵓⵣⵎⵣⵣⵓ ⵢⴰⴷ, ⵏⴻⵏⴳⴹ ⴱⴰⵀⵔⴰ ⵜⵉⵙⵔⵜⴰⵏⵉⵏ ⵉⵔⴰⵏ ⴰⴷ ⴱⴱⵉⵏⵜ ⴰⵃⵕⵛ ⴰⵏⴳⵎⴰⵎ ⴳⵔ ⵍⵎⵖⵔⵉⴱ ⴷ ⵎⵓⵕⵉⵟⴰⵏⵢⴰ, ⵏⵖⴷ ⴰⴷ ⵙⵏⴼⵍⵏⵜ ⴰⴷⴷⴰⴷ ⵓⵙⵍⴳⴰⵏ ⴷ ⴰⵎⵣⵔⵓⵢ ⵉⵍⵍⴰ ⴳ ⵍⵇⴱⵍⵜ ⵏ ⵓⴳⴰⴷⵉⵔ ⵏ ⵜⵏⴼⵔⵓⵜ, ⵏⵖⴷ ⴽⵔⴰ ⵢⴳⴰⵜⵜ ⵓⵎⴰⵥ ⵓⵔ ⵉⵙⵍⴳⵏⵏ ⵏ ⵜⵎⴰⵅⵉⵔⵜ ⵉⵍⵍⴰⵏ ⴳ ⵜⵙⴳⴰ", ⵎⴰ ⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴳ ⵉⵏⴰⵡ ⴰⴷ ⵢⴰⵜⵜⵓⵢⵏ.

ⵙ ⵜⵔⵏⵓⵜ ⵏ ⵉⵙⵏⵜⵉⵏ ⵉⵎⵇⵕⴰⵏⵉⵏ ⵍⵍⵉ ⵢⵍⵍⴰⵏ ⴳ ⵜⵙⴳⴰⵡⵉⵏ ⵏ ⵉⴼⴼⵓⵙ ⵏⵏⵖ, ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⵉⵍⴽⵎ ⵓⵣⵎⵣ ⵏ ⵓⵙⵙⴰⵔⵓ ⵏ ⵜⵉⵥⵥⵉⴹⵕⵉⵏ ⵉⴳⴳⵓⵜⵏ ⵉⵍⵍⴰⵏ ⴳ ⵜⵉⵔⵉⵡⵜ ⵏ ⵉⵍⵍ ⵜⴰⵎⵖⵔⴰⴱⵉⵜ. 

ⴳ ⵓⵙⴰⵜⵉ ⴷⵖ, ⵉⵔⵏⴰ ⵍⵎⵖⵔⵉⴱ ⴳ ⵓⵙⴳⴳⵯⴰⵙ ⴰⴷ ⵜⴰⵎⴰⴷⴷⵓⴷⵜ ⵏ ⵉⵏⵙⴰⵏ ⵏ ⵉⵍⵍ ⵏⵏⵙ, ⵍⵍⵉⵖ ⵜⵏ ⵉⵙⵎⴰⵏ ⴳ ⵓⴳⵏⵙ ⵏ ⵓⵏⴳⵔⴰⵡ ⵏ ⵓⵙⵍⴳⵏ ⴰⵎⵖⵔⴰⴱⵉ, ⴷ ⵙ ⵜⵣⴷⵉⵜ ⴷ ⵉⵎⵏⵣⴰⵢⵏ ⵏ ⵓⵙⵍⴳⵏ ⴰⴳⵔⴰⵖⵍⴰⵏ, ⵎⴰ ⵢⴰⴷ ⵙⵓⵍ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.

ⵔⴰⴷ ⴱⴷⴷⴰ ⵢⵣⵔⴽ ⵍⵎⵖⵔⵉⴱ ⴰⵎⵙⴰⵡⴰⵍ ⴷ ⵜⴰⴹⴹⵊⴰⵕⵜ ⵏⵏⵙ ⵜⴰⵚⴱⵍⵢⵓⵏⵉⵜ ⴳ ⵉⵏⵙⴰⵏ ⵍⵍⵉⵖ ⵣⴷⵉⵏ ⵡⴰⵎⴰⵏ ⵉⵙⴳⴰⵡⵉⵏ ⵏ ⵙⵏⴰⵜ ⵜⵎⵉⵣⴰⵔ ⵜⵉⵎⴷⴷⵓⴽⴰⵍ ⴰⴷ, ⴳ ⵓⵙⴰⵜⵉ ⵏ ⵓⵙⵍⴳⵏ ⵏ ⵉⵍⵍ, ⴷ ⵙ ⵓⵣⵔⴰⴽ ⵏ ⵜⵎⴷⵔⴰⵡⵜ ⵍⵍⵉ ⵢⵙⵎⴰⵏⵏ ⵙⵏⴰⵜ ⵜⵎⵉⵣⴰⵔ ⴰⴷ, ⵎⴰ ⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ.  

ⵉⴼⵔⴰ ⵢⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ ⵎⴰⵙ ⵉⴳⴰ ⴰⵙⴱⵢⵢⵏ ⵏ ⵉⵡⵜⵜⵓⵏ ⵏ ⵜⵔⵉⵡⵉⵏ ⵏ ⵉⵍⵍ ⵉⵍⵍⴰⵏ ⴷⴷⵓ ⵏ ⵜⵏⴱⴰⴹⵜ ⵏ ⵍⵎⵖⵔⵉⴱ ⵔⴰⴷ ⵉⵏⵏⵍ ⵓⵖⴰⵡⴰⵙ ⵉⵔⴰⵏ ⴰⴷ ⵉⵙⴷⵓⵙ ⵜⴰⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⴷ ⵜⵓⵏⵏⵓⵏⵜ. 

ⵅⴼ ⵖⵉⴽⴰⵏⵏ, ⵔⴰⴷ ⵜⴳ ⵜⵙⴳⴰ ⵜⴰⵟⵍⴰⵏⵟⵉⵜ ⵉⵍⵍⴰⵏ ⴳ ⵓⴼⴼⵓⵙ ⵏ ⵜⴳⵍⴷⵉⵜ ⴷ ⴷⴰⵜ ⵏ ⵚⵚⵃⵕⴰ ⵜⵎⵖⵕⴰⴱⵉⵜ, ⵢⴰⵜ ⵜⵙⴳⴰ ⵏ ⵉⵍⵍ ⵍⵍⵉⵖ ⵔⴰⴷ ⵜⵉⵍⵉ ⵢⴰⴷ ⵜⴰⴷⵉⵏⴰⵎⵉⵜ ⵜⴰⴷⵎⵙⴰⵏⵜ ⵉⴼⵓⵍⴽⵉⵏ ⵍⵍⵉ ⵔⴰⴷ ⵉⵎⵍ ⵓⴼⵜⴰⵙ ⴰⵟⵍⴰⵏⵟⵉ ⵏ ⴷⴷⴰⵅⵍⴰ, ⵎⴰ ⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵉⴼⵔⴰ ⵢⵏⵏⴰ ⵎⴰⵙ ⵔⴰⴷ ⵜⵔⵏⵓ ⵜⵡⵓⵔⵉ ⴰⴼ ⴰⴷ ⵜⵉⵍⵉ ⵢⴰⵜ ⵜⴷⵎⵙⴰ ⵉⵅⴰⵜⴰⵔⵏ ⴳ ⵜⵙⴳⴰⵡⵉⵏ ⴰⴷ, ⴰⴼ ⴰⴷ ⴳⵉⵏⵜ ⵢⴰⵜ ⵍⵇⵏⴹⵕⵜ ⵉⵙⵎⴰⵏⵏ ⵍⵎⵖⵔⵉⴱ ⴷ ⵜⵖⴱⵉ ⵜⵉⴼⵔⵉⵇⵉⵜ ⵏⵏⵙ.

ⴳ ⵓⵙⴰⵜⵉ ⵢⴰⴷ, ⵉⵅⵚⵚⴰ ⴰⴷ ⴷⴷⵓⵏ ⵉⵙⵙⴰⵔⵓⵏ ⵙ ⵜⵉⵔⵉⵡⵉⵏ ⵏ ⵉⵍⵍ, ⵙⵡⴰ ⵉⵖ ⵉⴳⴰ ⵍⵃⴰⵍ ⴰⵙⵎⵎⵉⵎ ⵏ ⵡⴰⵎⴰⵏ ⵏ ⵉⵍⵍ, ⵏⵖⴷ ⵜⵉⵣⵎⴰⵔⵉⵡⵏ ⵉⵜⵜⵓⵙⵎⴰⵢⵏⵓⵏ, ⵓⵍⴰ ⴰⴷ ⵉⵜⵜⵓⵏⴽⴰⵔ ⵙ ⵉⴳⵔ ⵏ ⵜⴳⵎⵔⵜ ⵜⴰⵢⵍⴰⵏⵜ ⵍⵍⵉ ⵢⵟⵟⴰⴼⵏ ⵢⴰⵜ ⵜⵉⵍⴰⵍⵜ ⵜⴰⵎⵇⵇⵕⴰⵏⵜ ⴳ ⵜⵏⴽⵔⴰ ⵙ ⵜⴷⵎⵙⴰ ⵏ ⵜⵙⴳⴰ, ⵎⴰ ⵢⴰⴷ ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⵉⵖⵔⴰ ⵙⵓⵍ ⴰⴼ ⴰⴷ ⵜⵉⵍⵉ ⵢⴰⵜ ⵜⴰⴷⵉⵏⴰⵎⵉⵜ ⵢⴰⴹⵏⵉⵏ ⵉ ⵡⵖⴰⵡⴰⵙ ⴰⵣⴳⵣⴰ.  

Dernière modification : 08 ⵏⵓⵡⴰⵏⴱⵉⵔ 2020
Source URL: https://www.mapnews.ma/am/activites-royales/%E2%B5%89%E2%B4%BC%E2%B4%BD%E2%B4%B0-%E2%B4%B1%E2%B4%B0%E2%B4%B1-%E2%B5%8F-%E2%B5%A1%E2%B4%B0%E2%B4%B7%E2%B4%B7%E2%B5%93%E2%B5%94-%E2%B4%B0%E2%B4%B3%E2%B5%8D%E2%B5%8D%E2%B5%89%E2%B4%B7-%E2%B5%A2%E2%B4%B0%E2%B5%8F-%E2%B5%89%E2%B5%8F%E2%B4%B0%E2%B5%A1-%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2-%E2%B4%B3-%E2%B5%93%E2%B5%A3%E2%B5%8E%E2%B5%A3%E2%B5%A3%E2%B5%93-%E2%B5%8F-%E2%B5%93%E2%B5%99%E2%B5%99%E2%B4%BD%E2%B5%9C%E2%B5%89-%E2%B5%A1%E2%B5%89%E2%B5%99%E2%B5%99-45-%E2%B5%8F-%E2%B5%9C%E2%B5%A1%E2%B4%B0%E2%B4%B7%E2%B4%B0