ⵉⴼⵙⵉ ⵡⵙⵉⵔⴰ ⴰⵏⴰⵎⵎⴰⵙ ⵏ ⵉⵔⵣⵣⵓⵜⵏ ⵉⵣⵔⴼⴰⵏⵏ ⵢⴰⵜ ⵜⵖⵔⴰⵙⵜ ⵜⴰⴱⵔⵙⴳⴳⵯⴰⴷⵜ ⵉⵣⴷⵉⵏ ⴳⵔⴰⵜⵙⵏ ⴳ ⵎⵏⵏⴰⵡ ⵏ ⵜⵖⵔⵎⵉⵡⵉⵏ ⵜⵉⵎⵖⵔⴰⴱⵉⵢⵏ (ⴰⵙⵉⵡⴹ)

10 ⵛⵓⵜⴰⵏⴱⵉⵔ 2020 Version Imprimable

ⵕⵕⴱⴰⵟ - ⵉⵥⴹⴰⵕ ⵓⵙⵉⵔⴰ ⴰⵏⴰⵎⵎⴰⵙ ⵏ ⵉⵔⵣⵣⵓⵜⵏ ⵉⵣⵔⴼⴰⵏⵏ, ⵉⴹⴼⴰⵕⵏ ⵉ ⵜⵎⵀⵍⴰ ⵜⴰⵎⴰⵜⴰⵢⵜ ⵏ ⵓⵎⴰⵜⵔ ⵏ ⵡⴰⴽⴰⵍ ⴰⵏⴰⵎⵓⵔ, ⴰⵙⵙ ⵏ ⵓⴽⵡⴰⵙ, ⵙ ⵜⴼⴰⵡⵜ ⵏ ⵉⵏⵖⵎⵉⵙⵏ ⵏ ⵓⵎⵍⵉ ⴰⵎⵏⵖⵓⴷ, ⴰⴷ ⵉⴼⵙⵉ ⵢⴰⵜ ⵜⵖⵔⴰⵙⵜ ⵜⴰⴱⵔⵙⴳⴳⵯⴰⴷⵜ ⵉⴹⴼⴰⵕⵏ ⵉ ⵎⴰ ⵎⵓ ⵢⵙⵎ "ⴰⵡⴰⵏⴽ ⴰⵎⵓⵙⵍⵉⵎ", ⴷ ⴰⴷ ⵉⵙⵙⴱⵉⴷⴷ ⵜⵖⴰⵡⵙⵉⵡⵉⵏ ⵍⵍⵉ ⵜⵔⴰ ⴰⴷ ⵜⵙⴽⵔ ⴷ ⵍⵍⵉ ⵢⵛⵇⵇⴰⵏ ⴱⴰⵀⵔⴰ, ⴷ ⵉⵣⴷⵉⵏ ⴷ ⵉⴳⵔⴰⵡⵏ ⵢⴰⴹⵏⵉⵏ ⴳ ⵎⵏⵏⴰⵡ ⵜⵖⵔⵎⵉⵡⵉⵏ ⵜⵉⵎⵖⵔⴰⴱⵉⵢⵏ ⴳ ⵓⵙⴰⵜⵉ ⵏ ⵜⵓⴳⴳⴰⵣ ⵉⵔⵏⴰⵏ ⴷⴰⵜ ⵉⵎⵣⴰⵢⵏ ⵉⴱⵔⵙⴳⴳⵯⴰⴷⵏ.

ⵉⵏⵏⴰ ⵢⴰⵏ ⵓⵙⵉⵡⴹ ⵏ ⵓⵙⵉⵔⴰ ⴰⵏⴰⵎⵎⴰⵙ ⵎⴰⵙ ⵜⵜⵓⵣⴳⴰⵣⵏⵜ ⵜⵎⵀⵍⵉⵡⵉⵏ ⵏ ⵜⵏⴼⵔⵓⵜ ⴰⴷ ⴳ ⵜⵖⵔⵎⵉⵡⵉⵏ ⵏ ⵟⴰⵏⵊⴰ ⴷ ⵜⵉⴼⴼⵍⵜ ⴷ ⵜⵎⴰⵔⴰ ⴷ ⵚⵚⵅⵉⵕⴰⵜ ⴳ ⵜⵙⵔⵓⴳⵉⵏ ⵉⵣⵡⴰⵔⵏ ⴳ ⵜⴼⴰⵡⵜ ⴰⴷ, ⵎⴰ ⵢⴰⴷ ⵢⵉⵡⵉⵏ ⴰⵎⵎⴰⵥ ⵏ ⵙⵎⵎⵓⵙ ⵏ ⵎⴷⴷⵏ ⵉⵟⵟⵓⵕⴼⵏ ⵍⵍⴰⵏ ⴷⴰⵔⵜⵏ ⴳⵔ 29 ⴷ 43 ⵓⵙⴳⴳⵯⴰⵙ.

ⵎⴰⵛ ⵢⴰⵏ ⴰⵎⵎⴰⵙ ⵏ ⵎⴷⴷⵏ ⵍⵍⵉ ⵜⵏ ⵉⴼⴼⵖ ⵛⵛⴽ ⵉⵎⵍⴰ ⴰⵎⵏⵣⴰⵖ ⵉⴳⴳⵓⵜⵏ ⴳ ⵜⵖⵔⵎⵜ ⵏ ⵜⵉⴼⴼⵍⵜ, ⴷ ⵉⵔⴰ ⴰⴷ ⵉⵙⴽⵔ ⴰⵙⵓⴳⵉ ⴰⴱⵔⴳⴳⴰⴷ ⴷⴰⵜ ⵏ ⵉⴼⵔⴷⴰⵙⵏ ⵏ ⵓⴽⵛⵛⵓⵎ ⵉⴼⵙⵙⵓⵙⵏ, ⴷ ⵢⵓⵜ ⵢⴰⵏ ⴷⵉⴳⵙⵏ ⴷ ⵉⵏⴳⵯⵙ ⵜ ⴳ ⵓⵙⵡⵉⵔ ⵏ ⵓⴼⵓⵙ ⵙ ⵓⵙⵎⵔⵙ ⵏ ⵢⴰⵏ ⵙⵍⴰⵃ ⵓⵎⵍⵉⵍ, ⴷⴰⵜ ⴰⴷ ⵉⵜⵜⵢⵓⵎⴰⵥ ⴷⴼⴼⵉⵔ ⵍⵍⵉⵖ ⵉⵏⵏⵓⵕⵥⵎ ⴰⴼⴰ ⴷ ⵉⴱⵉⵇⵇⵉⵏ ⵙ ⵢⴰⵜ ⵜⵡⵍⴰⴼⵜ ⵏ ⵓⵎⵙⵓ.

ⴷ ⵉⵔⴰ ⵡⴰⵏⵏ ⵍⵍⵉ ⵜ ⵉⴼⴼⵖⵏ ⵛⵛⴽ ⴳ ⵜⵖⵔⵎⵜ ⵏ ⵜⵎⴰⵔⴰ ⴰⴷ ⵉⵙⴱⵉⵇⵇⵉ ⵉⵅⴼ ⵏⵏⵙ ⵙ ⵓⵙⵎⵔⵙ ⵏ ⵢⴰⵜ ⵜⵛⴱⵔⵉⵜ ⵜⴰⵎⵇⵕⴰⵏⵜ, ⴷ ⵉⵎⵍⴰ ⵢⴰⵏ ⵓⵎⵏⵣⵖ ⵉⴳⴳⵓⵜⵏ ⵎⴰ ⵢⴰⴷ ⵢⵓⵊⵊⴰⵏ ⵉⴽⵛⵛⵓⵎⵏ ⵉⵖⴰⵡⵍⵏ ⴰⴷ ⵕⵥⵎⵏ ⴽⴽⵓⵥ ⵏ ⵜⴽⵍⴰⵢ ⴰⴼⴰ ⴷ ⴰⵔ ⵕⵥⵎⵏ ⵉⵙⴱⵉⵇⵇⵉⵏ ⴷ ⴰⴳⴳⵕⴹ ⵢⴰⴹⵏⵉⵏ ⵉⵎⴰⵏⵏ ⵙ ⴷⴷⵅⴰⵏ ⵎⵔⴰ ⴰⴷ ⵓⵔ ⵉⵥⵕ ⵓⴼⴳⴰⵏ ⴰⵏⵏ, ⵎⴰ ⵢⴰⴷ ⵢⵉⵡⵉⵏ ⴰⴽⴽⵙ ⵏ ⵓⵎⵏⵣⴰⵢ ⴷ ⵓⵙⴼⵙⵉ ⵏ ⵉⵎⵣⴰⵢⵏ ⵍⵍⵉ ⴷ ⵢⵉⵡⵉ.

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B5%89%E2%B4%BC%E2%B5%99%E2%B5%89-%E2%B5%A1%E2%B5%99%E2%B5%89%E2%B5%94%E2%B4%B0-%E2%B4%B0%E2%B5%8F%E2%B4%B0%E2%B5%8E%E2%B5%8E%E2%B4%B0%E2%B5%99-%E2%B5%8F-%E2%B5%89%E2%B5%94%E2%B5%A3%E2%B5%A3%E2%B5%93%E2%B5%9C%E2%B5%8F-%E2%B5%89%E2%B5%A3%E2%B5%94%E2%B4%BC%E2%B4%B0%E2%B5%8F%E2%B5%8F-%E2%B5%A2%E2%B4%B0%E2%B5%9C-%E2%B5%9C%E2%B5%96%E2%B5%94%E2%B4%B0%E2%B5%99%E2%B5%9C-%E2%B5%9C%E2%B4%B0%E2%B4%B1%E2%B5%94%E2%B5%99%E2%B4%B3%E2%B4%B3%E2%B5%AF%E2%B4%B0%E2%B4%B7%E2%B5%9C-%E2%B5%89%E2%B5%A3%E2%B4%B7%E2%B5%89%E2%B5%8F-%E2%B4%B3%E2%B5%94%E2%B4%B0%E2%B5%9C%E2%B5%99%E2%B5%8F-%E2%B4%B3-%E2%B5%8E%E2%B5%8F%E2%B5%8F%E2%B4%B0%E2%B5%A1-%E2%B5%8F