ⵎⴰⵙⵙ ⴰⵎⵣⴰⵣⵉ : ⵓⵔ ⵏⵥⴹⴰⵕ ⴰⴷ ⵏⴰⵊⵊ ⴰⴽⵛⵛⵓⵎ ⴰⵏⵎⵍⴰⵏ ⴰⵛⴽⵓ ⵉⵛⵇⵇⴰ ⴰⴷ ⵏⵙⵙⵏ ⵎⴰⵏⵉⴽ ⴰⵙ ⵔⴰⴷ ⵉⵣⵣⵉⴳⵉⵣ ⵓⴱⴰⵢⵢⵓⵕ "ⴽⵓⴼⵉⴷ-19"

26 ⵖⵓⵛⵜ 2020 Version Imprimable

ⵕⵕⴱⴰⵟ - ⵉⵙⴷⴷⵉⴷ ⵓⵎⴰⵡⵙⴰⵙ ⵏ ⵓⵙⴳⵎⵉ ⴰⵏⴰⵎⵓⵔ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴷ ⵓⵙⵍⵎⴰⴷ ⴰⵏⴰⴼⵍⵍⴰ ⴷ ⵓⵔⵣⵣⵓ ⴰⵎⴰⵙⵙⴰⵏ, ⴰⵎⵙⵉⵡⵍ ⵙ ⵢⵙⵎ ⵏ ⵜⵏⴱⴰⴹⵜ, ⵎⴰⵙⵙ ⵙⴰⵄⵉⴷ ⴰⵎⵣⴰⵣⵉ, ⴰⵙⵙ ⵏ ⵓⴽⵕⴰⵙ ⴳ ⵕⵕⴱⴰⵟ, ⵎⴰⵙ ⵓⵔ ⵉⵥⴹⴰⵕ ⴰⴷ ⵢⴰⵊⵊ ⴰⴽⵛⵛⵓⵎ ⴰⵏⵎⵍⴰⵏ 2020-2021, ⵉⵏⵏⴰ ⵎⴰⵙ "ⵓⵔ ⵉⵎⴽⵉⵏ ⴰⴷ ⵏⵙⵙⵏ ⵎⴰⵏⵉⴽ ⴰⵙ ⵔⴰⴷ ⵉⵣⵣⵉⴳⵉⵣ ⵓⴱⴰⵢⵢⵓⵕ" ⵉⵣⴷⵉⵏ ⴷ ⵓⴼⵉⵔⵓⵙ "ⴽⵓⵕⵓⵏⴰ" ⴰⵎⴰⵢⵏⵓ.

ⵉⴼⵔⴰ ⵢⵏⵏⴰ ⵎⴰⵙⵙ ⴰⵎⵣⴰⵣⵉ ⴳ ⵢⴰⵏ ⵓⴼⵙⴰⵔ ⵍⵍⵉ ⵢⵙⵎⵏⵉⴷ ⴳ ⵜⵙⵎⵓⵏⵉ ⵏ ⵓⴳⵔⴰⵡ ⵏ ⵓⵙⵍⵎⴰⴷ ⴷ ⵜⴷⵍⵙⴰ ⴷ ⵓⵎⵢⴰⵡⴰⴹ ⴳ ⵓⵙⵇⵇⵉⵎ ⵏ ⵉⵎⵓⵔⴰ ⵉⵥⵍⵉⵏ ⵙ ⵜⵖⵓⵔⵉ ⵏ ⵉⵙⴳⴰⵎⵏ ⵏ ⵓⴽⵛⵛⵓⵎ ⴰⵏⵎⵍⴰⵏ ⴷ ⴰⵎⵙⴷⴰⵡ ⴷ ⵓⵙⵎⵓⵜⵜⴳ ⴰⵣⵣⵓⵍⴰⵏ ⴰⴷ ⵢⵓⵛⴽⴰⵏ 2020-2021, ⴷ ⵉⵔⵉⵎⵏ ⵏ ⵓⵙⴳⴳⵯⴰⵙ ⴰⵎⵣⵡⴰⵔⵓ ⵏ ⵍⴱⴰⴽⴰⵍⵓⵕⵢⴰ, ⴷ ⵉⵔⵉⵎⵏ ⵏ ⵜⵙⴷⴰⵡⵉⵏ, ⵎⴰⵙ ⵜⵍⴽⴰⵎⵉⵏ ⵓⵔ ⵉⵃⵍⵉⵏ ⵏ ⵜⵓⵊⵊⴰ ⵏ ⵓⴽⵛⵛⵓⵎ ⴰⵏⵎⵍⴰⵏ ⵉⵜⵜⵓⵙⵢⴰⴼⴰ ⴰⵎⵎⴰⵙ ⵏ ⵉⵏⵍⵎⴰⴷⵏ ⵓⴳⴳⴰⵔ ⵏ ⵓⴱⴰⵢⵢⵓⵕ ⴰⵏⵏ ⵏⵉⵜ, ⵖⵉⴽ ⵍⵍⵉ ⵎⵍⴰⵏⵜ ⵜⵖⵓⵔⵉⵡⵉⵏ ⵜⵉⵎⴰⴹⵍⴰⵏⵉⵏ ⵏ "ⵍⵢⵓⵏⵉⵙⵉⴼ" ⴷ "ⵜⵎⵜⵜⴰ ⵢⵎⴰⵏⵏ".

ⵉⵙⵙⴽⵯⵜⵉ ⵓⵎⵙⵜⴳⴳⴰⵔ ⵓⵏⴱⵉⴹ ⵎⴰⵙ ⵜⵡⵓⵔⵉ ⵜⵎⴰⵡⴰⵙⵜ ⵅⴼ ⵓⴱⵔⵉⴷ ⴰⵏⵎⵍⴰⵏ ⵍⵍⵉ ⵢⵜⵜⵓⵙⵎⵏⴰⴷⵏ ⴷ ⵙⵙⵉⵏⴰⵔⵢⵓⵀⴰⵜ ⵉⵍⵍⴰⵏ ⴳ ⵜⵏⴽⵔⴰ ⵙ ⵡⴰⴷⴷⴰⴷ ⵏ ⵓⴱⴰⵢⵢⵓⵕ ⵙⴳ ⵍⴱⴷⵓ ⵏ ⵢⵓⵍⵢⵓⵣ, ⵉⵎⵍⴰ ⴳ ⵓⵙⴰⵜⵉ ⴷⵖ ⴽⵕⴰⴹ ⵏ ⵙⵙⵉⵏⴰⵔⵢⵓⵀⴰⵜ, ⵎⴰ ⵢⴰⴷ ⵉⴳⴰⵏ ⴰⴽⵛⵛⵓⵎ ⴰⵏⵎⵍⴰⵏ ⴰⵙⵏⵡⴰⵏ ⴷⴷⵓ ⵏ ⵓⴱⴰⵢⵢⵓⵕ ⴰⵙⵏⵡⴰⵏ, ⵏⵖⴷ ⴰⴹⴼⴼⴰⵕ ⵏ ⵓⵙⵍⵎⴰⴷ ⵙ ⵡⴰⴳⴳⵓⴳ ⴳ ⵓⴷⴷⴰⴷ ⵉⵛⵇⵇⴰⵏ ⴷ ⵓⵇⵇⵉⵎ ⴰⴷⵓⵙⴰⵏ ⴷ ⴰⵇⵇⵏ ⵏ ⴽⵔⴰ ⵏ ⵜⵖⵔⵎⵉⵡⵉⵏ, ⴷ ⵙⵙⵉⵏⴰⵕⵢⵓ ⵡⵉⵙⵙ ⴽⵕⴰⴹ ⴰⵎⵎ ⴰⴼⵙⵙⴰⵢ ⵏ ⵜⵓⵥⵥⵓⵎⵜ ⵍⵍⵉ ⵢⵜⵜⵓⵙⵎⵏⵉⴷⵏ, ⵎⴰ ⵢⴰⴷ ⵉⴳⴰⵏ ⴰⵛⵛⴰⵔ ⴳⵔ ⵙⵉⵏ ⵉⴱⵔⵉⴷⵏ ⵎⴰ ⵢⴰⴷ ⵉⴳⴰⵏ ⴰⵙⵍⵎⴷ ⵙ ⵡⴰⴳⴳⵓⵔ ⴷ ⴰⵙⵍⵎⴷ ⵏ ⵜⵉⵍⵉⵜ.

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B5%8E%E2%B4%B0%E2%B5%99%E2%B5%99-%E2%B4%B0%E2%B5%8E%E2%B5%A3%E2%B4%B0%E2%B5%A3%E2%B5%89-%E2%B5%93%E2%B5%94-%E2%B5%8F%E2%B5%A5%E2%B4%B9%E2%B4%B0%E2%B5%95-%E2%B4%B0%E2%B4%B7-%E2%B5%8F%E2%B4%B0%E2%B5%8A%E2%B5%8A-%E2%B4%B0%E2%B4%BD%E2%B5%9B%E2%B5%9B%E2%B5%93%E2%B5%8E-%E2%B4%B0%E2%B5%8F%E2%B5%8E%E2%B5%8D%E2%B4%B0%E2%B5%8F-%E2%B4%B0%E2%B5%9B%E2%B4%BD%E2%B5%93-%E2%B5%89%E2%B5%9B%E2%B5%87%E2%B5%87%E2%B4%B0-%E2%B4%B0%E2%B4%B7-%E2%B5%8F%E2%B5%99%E2%B5%99%E2%B5%8F-%E2%B5%8E%E2%B4%B0%E2%B5%8F%E2%B5%89%E2%B4%BD-%E2%B4%B0%E2%B5%99-%E2%B5%94%E2%B4%B0%E2%B4%B7-%E2%B5%89%E2%B5%A3%E2%B5%A3%E2%B5%89%E2%B4%B3%E2%B5%89%E2%B5%A3