ⴰⴼⵉⵔⵓⵙ "ⴽⵓⵕⵓⵏⴰ" : ⵜⵜⵓⵣⵎⵎⴻⵎⵏ 73 ⵓⵎⴷⵢⴰ ⴰⵎⴰⵢⵏⵓ ⴳ 24 ⵜⵙⵔⴰⴳⵜ ⵉⵣⵔⵉⵏ, ⴷ 35 ⵓⵎⴷⵢⴰ ⵏ ⵜⵊⵊⵉⵜ (ⵜⴰⵎⴰⵡⴰⵙⵜ ⵏ ⵜⴷⵓⵙⵉ)

12 ⵢⵓⵏⵢⵓ 2020 Version Imprimable

ⵕⵕⴱⴰⵟ - ⵜⵙⴳⵓⵔⴰ ⵜⵎⴰⵡⴰⵙⵜ ⵏ ⵜⴷⵓⵙⵉ ⵎⴰⵙ, ⴰⵔ ⵖⵉⵍ ⴰⴷ, ⵜⵜⵓⵣⵎⵎⴻⵎⵏ 73 ⵓⵎⴷⵢⴰ ⴰⵎⴰⵢⵏⵓ ⵙ ⵓⴼⵉⵔⵓⵙ "ⴽⵓⵕⵓⵏⴰ" ⴰⵎⵎⴰⵙ ⵏ 24 ⵜⵙⵔⴰⴳⵜ, ⴷ 35 ⵓⵎⴷⵢⴰ ⵏ ⵜⵊⵊⵉⵜ.

ⵉⵏⵏⴰ ⵡⵎⵣⴷⵓⵢ ⵏ ⵓⵎⵎⴰⵙ ⴰⵏⴰⵎⵓⵔ ⵏ ⵜⵎⵀⵍⵉⵡⵉⵏ ⵏ ⵓⵖⴰⵡⵍ ⵏ ⵜⴷⵓⵙⵉ ⵜⴰⵎⴰⵜⴰⵢⵜ, ⵎⴰⵙⵙ ⵎⵓⵄⴰⴷ ⵍⵎⵕⴰⴱⵟ, ⴳ ⵢⴰⵜ ⵜⵙⴳⵓⵔⵉ ⵍⵍⵉ ⵜⵙⵙⵣⵔⵉ ⵜⵙⵏⵓⵕⴰⵢⵜ ⵜⵎⵖⵔⴰⴱⵉⵜ ⵏ ⵉⵏⵖⵎⵉⵙⵏ (ⵍⴰⵎⴰⴱ), ⴳ ⵓⵙⵔⵉⴷ ⵏ ⵓⵙⴰⵔⵓ ⵏⵏⵙ "M24" ⴷ "ⵔⵉⵎ ⵕⴰⴷⵢⵓ", ⵎⴰⵙ ⵜⵖⵍⵉ ⵜⵎⴰⵖⵓⵏⵜ ⵏ ⵉⵎⴷⵢⴰⵡⵏ ⵍⵍⵉ ⵢⵓⵜ ⵓⴼⵉⵔⵓⵙ "ⴽⵓⵕⵓⵏⴰ" ⴰⵔ 8610 ⵓⵎⴷⵢⴰ, ⵙⴳ ⵓⵎⴷⵢⴰ ⴰⴽⴽⵯ ⵉⵣⵡⴰⵔⵏ ⵍⵍⵉ ⵢⵜⵜⵓⵣⵎⵎⴻⵎⵏ ⴰⵙⵙ ⵏ 02 ⵎⴰⵕⵚ ⵉⵣⵔⵉⵏ. ⵅⴼ ⵖⵉⴽⴰⵏⵏ, ⵜⵍⴽⵎ ⵜⵎⴰⵖⵓⵏⵜ ⵏ ⵎⴷⴷⵏ ⵉⵊⵊⵉⵏ 7618 ⴷ ⵉⵍⴽⵎ ⵓⵙⵖⵏ ⵏ ⵜⵊⵊⵉⵜ 88,5%.

ⵉⵙⵓⵍ ⵉⵏⵏⴰ ⵎⴰⵙⵙ ⵍⵎⵕⴰⴱⵟ ⵎⴰⵙ ⵉⵜⵜⵓⵣⵎⵎⴻⵎ ⵢⴰⵏ ⵓⵎⴷⵢⴰ ⵏ ⵜⵎⵜⵜⴰⵏⵜ ⵙ "ⴽⵓⴼⵉⴷ-19" ⴳ 24 ⵜⵙⵔⴰⴳⵜ ⵉⵣⵔⵉⵏ, ⴷ ⵜⵖⵍⵉ ⵜⵎⴰⵖⵓⵏⵜ ⴰⵔ ⵖⵉⵍ ⴰⴷ ⴰⵔ 212 ⵓⵎⴷⵢⴰ. ⴷ ⵉⵔⵏⴰ ⵢⵏⵏⴰ ⵎⴰⵙ ⵉⵔⴳⴳ ⴰⵙⵖⵍ ⵏ ⵜⵎⵜⵜⴰⵏⵜ ⴳ 2,5%.

ⵜⵙⵓⵍ ⵜⴹⴰⵍⴱ ⵜⵎⴰⵡⴰⵙⵜ ⵉ ⵢⵏⴰⵎⵓⵔⵏ ⴷ ⵜⵏⴰⵎⵓⵔⵉⵏ ⴰⴷ ⴹⴼⵕⵏ ⵉⵍⵓⴳⵏ ⵏ ⵓⵃⵟⵟⵓ ⴷ ⵙⵙⵍⴰⵎⵜ ⵏ ⵓⵖⵡⵙ, ⴷ ⵍⵜⵖⵏ ⴳ ⵉⵎⴰⴽⵏ ⵏ ⵓⵃⵟⵟⵓ ⵍⵍⵉ ⵓⵎⵥⵏⵜ ⵜⵏⴱⴰⴹⵉⵏ ⵜⵎⵖⵔⴰⴱⵉⵏ ⵙ ⴰⴽⴽⵯ ⵜⵎⵙⵙⵓⴳⵓⵔⵜ ⴷ ⵜⵎⵓⵔⵉ.

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B4%B0%E2%B4%BC%E2%B5%89%E2%B5%94%E2%B5%93%E2%B5%99-%E2%B4%BD%E2%B5%93%E2%B5%95%E2%B5%93%E2%B5%8F%E2%B4%B0-%E2%B5%9C%E2%B5%9C%E2%B5%93%E2%B5%A3%E2%B5%8E%E2%B5%8E%E2%B4%BB%E2%B5%8E%E2%B5%8F-73-%E2%B5%93%E2%B5%8E%E2%B4%B7%E2%B5%A2%E2%B4%B0-%E2%B4%B0%E2%B5%8E%E2%B4%B0%E2%B5%A2%E2%B5%8F%E2%B5%93-%E2%B4%B3-24-%E2%B5%9C%E2%B5%99%E2%B5%94%E2%B4%B0%E2%B4%B3%E2%B5%9C-%E2%B5%89%E2%B5%A3%E2%B5%94%E2%B5%89%E2%B5%8F-%E2%B4%B7-35-%E2%B5%93%E2%B5%8E%E2%B4%B7%E2%B5%A2%E2%B4%B0-%E2%B5%8F-%E2%B5%9C%E2%B5%8A%E2%B5%8A%E2%B5%89%E2%B5%9C