ⵎⴰⵙⵙ ⴱⵏⵛⵄⴱⵓⵏ : ⵜⴰⵎⴰⵖⵓⵏⵜ ⵏ ⵉⵙⴰⴳⵎⵏ ⵏ ⵜⴼⵏⵉⵇⵜ ⵏ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ "ⴽⵓⴼⵉⴷ-19" ⵜⵍⴽⵎ ⴰⵔ ⴰⵙⵙ ⵏ 24 ⵉⴱⵔⵉⵔ 32 ⵓⵎⵍⵢⴰⵕ ⵏ ⴷⴷⵔⵀⵎ

27 ⵉⴱⵔⵉⵔ 2020 Version Imprimable

ⵕⵕⴱⴰⵟ - ⵉⵎⵍⴰ ⵡⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⴳⴷ ⵏ ⵜⵎⵙⵙⵓⴳⵓⵔⵜ, ⵎⴰⵙⵙ ⵎⵓⵃⵎⵎⴷ ⴱⵏ ⵛⵄⴱⵓⵏ, ⴰⵙⵙ ⵏ ⵓⵢⵏⴰⵙ, ⵎⴰⵙ ⵜⵎⴰⵖⵓⵏⵜ ⵏ ⵉⵙⴰⴳⵎⵏ ⵏ ⵜⴼⵏⵉⵇⵜ ⵏ ⵓⵙⵡⵓⴷⴷⵓ ⵏ ⵓⴱⴰⵢⵢⵓⵕ "ⴽⵓⴼⵉⴷ-19" ⵜⵍⴽⵎ ⴰⵔ ⴰⵙⵙ ⵏ 24 ⵉⴱⵔⵉⵔ ⴰⴷ, 32 ⵓⵎⵍⵢⴰⵕ ⵏ ⴷⴷⵔⵀⵎ.

ⵉⵙⵓⵍ ⵉⵏⵏⴰ ⵎⴰⵙⵙ ⴱⵏ ⵛⵄⴱⵓⵏ, ⵍⵍⵉⵖ ⵉⵔⴰⵔ ⵅⴼ ⵢⴰⵏ ⵓⵙⵇⵙⵉ ⴰⵎⵉⵡⴰⵏ ⵉⵥⵍⵉⵏ ⵙ "ⵉⵙⵡⵓⴷⴷⵓⵏ ⵉⴷⵎⵙⴰⵏ ⴷ ⵉⵥⵕⴼⴰⵏ ⴷⴰⵜ ⵏ ⵜⵙⵙⴰⵙⵜ ⵏ ⵉⵍⴽⴰⵎⵏ ⵏ "ⴽⵓⵕⵓⵏⴰ ⴽⵓⴼⵉⴷ-19" ⴳ ⵜⵎⴰⵣⵉⵔⵜ ⵏⵏⵖ", ⴳ ⵓⵙⵇⵇⵉⵎ ⵏ ⵉⵎⵓⵔⴰ, ⵎⴰⵙ ⵉⴽⴽⵉⵏ ⵏ ⵜⴼⵏⵉⵇⵜ ⵍⴽⵎⵏ 6,2 ⵓⵎⵍⵢⴰⵕ ⵏ ⴷⴷⵔⵀⵎ, 02 ⵓⵎⵍⵢⴰⵕ ⴳⵉⵜⵙⵏ ⵥⵍⵉⵏ ⵙ ⵜⵚⵖⵉ ⵏ ⵜⵎⴰⵡⴰⵙⵜ ⵏ ⵜⴷⵓⵙⵉ ⵏ ⵉⵎⴰⵙⵙⵏ ⵉⵅⵚⵚⴰⵏ ⴷⴰⵜ ⵏ ⵓⴱⴰⵢⵢⵓⵕ, ⵎⴰⴷ ⵢⵉⵡⵉⵏ, ⴰⵔ ⵓⵎⵣⵔⵓⵢ ⴰⴷ, ⵜⵚⵖⵉ ⵏ 460 ⵜⵉⵙⵉ ⵏ ⵍⵉⵏⵄⴰⵛ, ⴷ 580 ⵜⵉⵙⵉ ⵏ ⵓⵙⴳⵏⴰⴼ ⴰⵙⵡⴰⵏ, ⴷ 410 ⵉⵎⴰⵙⵙⵏ ⵏ ⵉⵎⴰⵏ.

ⵉⵙⴷⴷⵉⴷ, ⴳ ⵓⵙⴰⵜⵉ ⴷⵖ, ⵎⴰⵙ ⵔⴰⴷ ⵜⵎⵓⵏ ⵜⵎⴰⵡⴰⵙⵜ ⵏ ⵜⴷⵎⵙⴰ ⴷ ⵜⵎⴰⵡⴰⵙⵜ ⵏ ⵜⴷⵓⵙⵉ ⵙ ⵎⴰⴷ ⵜ ⵉⵅⵚⵚⴰⵏ ⴰⵎⵎⴰⵙ ⵏ ⵜⵉⴽⴽⵉ ⵉⵥⵕⴼⵏ ⵉⵎⴰⵏⵏ ⴷ ⵜⵓⵜⵔⴰ ⴷⴷⵓ ⵏⵏⵙ ⴰⴼ ⴰⴷ ⵜⵏⴽⵔ ⵙ ⵡⴰⴷⴷⴰⴷ ⵏ ⵓⴱⴰⵢⵢⵓⵕ ⴳ ⵜⴳⵍⴷⵉⵜ, ⵉⵙⵓⵍ ⵉⵏⵏⴰ ⵎⴰⵙ ⵔⴰⴷ ⵜⵥⴹⵕ ⵜⴼⵏⵉⵇⵜ ⴰⵏⵏⴰⵍ ⵉⵅⵚⵚⴰⵏ ⵉ ⵜⴷⵎⵙⴰ ⵜⴰⵏⴰⵎⵓⵔⵜ ⵉⵥⴹⴰⵕⵏ ⴰⴷ ⵉⵙⵙⵓⵎ ⵜⵉⵙⵙⵉⵏ ⵉⵅⵛⵏⵏ ⵏ ⵓⴱⴰⵢⵢⵓⵕ ⵅⴼ ⵎⴰⴷ ⵉⴳⴳⵔⵏ ⴰⵏⵇⵙ ⵏ ⵓⵎⵓⵙⵙⵓ ⴳ ⴽⵔⴰ ⵢⴳⴰⵜⵜ ⵉⴳⵔ ⴷ ⵜⵊⵍⵓⵜ ⵏ ⵉⵏⵙⴰⵏ ⵏ ⵜⵡⵓⵔⵉ ⵍⵍⵉ ⴷ ⵜⵉⵡⵉ.

Source URL: https://www.mapnews.ma/am/actualites/%E2%B5%9C%E2%B4%B0%E2%B4%B7%E2%B4%B0%E2%B5%8E%E2%B5%99%E2%B4%B0/%E2%B5%8E%E2%B4%B0%E2%B5%99%E2%B5%99-%E2%B4%B1%E2%B5%8F%E2%B5%9B%E2%B5%84%E2%B4%B1%E2%B5%93%E2%B5%8F-%E2%B5%9C%E2%B4%B0%E2%B5%8E%E2%B4%B0%E2%B5%96%E2%B5%93%E2%B5%8F%E2%B5%9C-%E2%B5%8F-%E2%B5%89%E2%B5%99%E2%B4%B0%E2%B4%B3%E2%B5%8E%E2%B5%8F-%E2%B5%8F-%E2%B5%9C%E2%B4%BC%E2%B5%8F%E2%B5%89%E2%B5%87%E2%B5%9C-%E2%B5%8F-%E2%B5%93%E2%B5%99%E2%B5%A1%E2%B5%93%E2%B4%B7%E2%B4%B7%E2%B5%93-%E2%B5%8F-%E2%B5%93%E2%B4%B1%E2%B4%B0%E2%B5%A2%E2%B5%A2%E2%B5%93%E2%B5%95-%E2%B4%BD%E2%B5%93%E2%B4%BC%E2%B5%89%E2%B4%B7-19-%E2%B5%9C%E2%B5%8D%E2%B4%BD%E2%B5%8E-%E2%B4%B0%E2%B5%94-%E2%B4%B0%E2%B5%99%E2%B5%99