"ⴽⵓⴼⵉⴷ-19" : ⵖⵜⵙⵏⵜ ⵜⵏⴱⴰⴹⵉⵏ ⵜⴳⴷⵓⴷⴰⵏⵉⵏ ⵎⴰⵙ ⵉⵅⵙⵙⴰ ⴰⴷ ⵜⵜⵓⵍⵙⴰⵏⵜ ⵜⵉⵙⵓⵏⴰ ⵏ ⵓⵃⵟⵟⵓ ⵙⴳ ⵍⴱⴷⵓ ⵏ ⴰⵙⵙ ⴰⴷ ⵏ ⵓⵙⵉⵏⴰⵙ

07 ⵉⴱⵔⵉⵔ 2020 Version Imprimable

ⵕⵕⴱⴰⵟ - ⵖⵜⵙⵏⵜ ⵜⵏⴱⴰⴹⵉⵏ ⵜⴳⴷⵓⴷⴰⵏⵉⵏ ⵉⴹ ⵍⵍⵉ ⵏ ⴰⵙⵙ ⵏ ⵓⵢⵏⴰⵙ ⵎⴰⵙ ⵉⵅⵙⵙⴰ ⴰⴷ ⵜⵜⵓⵍⵙⴰⵏⵜ ⵜⵉⵙⵓⵏⴰ ⵏ ⵓⵃⵟⵟⵓ ⴳ ⵜⴳⵍⴷⵉⵜ ⵙⴳ ⵍⴱⴷⵓ ⵏ ⴰⵙⵙ ⴰⴷ ⵏ ⵓⵙⵉⵏⴰⵙ ⵙⴳ ⴰⴽⴽⵯ ⵉⴼⴳⴰⵏⵏ ⵍⵍⵉ ⵖⵓⵔⵙⵏ ⵓⵣⵔⴼ ⴰⴷ ⵙⵙⴰⵢⵏ ⴱⵕⵕⴰ ⵏ ⵜⵎⴷⵣⴷⴰⵖⵉⵏ ⵏⵏⵙⵏ ⴳ ⵉⴷⴷⴰⴷⵏ ⵉⵙⵍⵉⴳⵏ ⵍⵍⵉ ⵢⵜⵓⵖⵜⴰⵙⵏ ⵢⴰⴷ ⵍⵍⵉ.

ⵉⵏⵏⴰ ⵢⴰⵏ ⵓⵙⵉⵡⴹ ⵉⵛⵛⴰⵔⵏ ⵏ ⵜⵎⴰⵡⴰⵙⵜ ⵏ ⵓⴳⵏⵙⵓ, ⴷ ⵏ ⵜⴷⵓⵙⵉ, ⴷ ⵏ ⵜⴷⵎⵙⴰ ⴷ ⵓⵣⵕⴼ ⴳ ⵓⵙⴳⴷ ⵏ ⵜⵎⵙⵙⵓⴳⵓⵔⵜ ⴷ ⵜⵎⴳⵓⵔⵉ ⴷ ⵜⵙⴱⴱⴰⴱⵜ ⴷ ⵜⴷⵎⵙⴰ ⵜⵣⴳⵣⴰⵡⵜ ⴷ ⵜⴰⵎⴰⵟⵟⵓⵏⵜ, ⵎⴰⵙ ⵜⵖⵜⴰⵙⵜ ⴰⴷ ⵜⵓⵛⴽⴰⴷ "ⴳ ⵓⵙⴰⵜⵉ ⵏ ⵜⵓⴳⴳⴰⵣ ⵉⵍⵍⴰⵏ ⴰⴼ ⴰⴷ ⵉⴱⵉⴷⴷ ⵓⴼⵉⵔⵓⵙ "ⴽⵓⵕⵓⵏⴰ" (ⴽⵓⴼⵉⴷ-19) ⴷ ⵙ ⵓⵣⵣⵉⴳⵔ ⵏ ⵉⴹⵏ ⵢⴰⵜⵜⵓⵢⵏ ⵍⵍⵉ ⵢⴼⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⴼ ⴰⴷ ⵜⵓⵎⴰⵥⵏ ⴰⴽⴽⵯ ⵉⵎⴰⴽⵏ ⵉⵅⵚⵚⴰⵏ ⴰⴼ ⴰⴷ ⵍⴽⵎⵏⵜ ⵜⵉⵙⵓⵏⴰ ⵏ ⵓⵃⵟⵟⵓ ⵉ ⴰⴽⴽⵯ ⵉⵏⴰⵎⵓⵔⵏ ⵙ ⵢⴰⵜ ⵓⵜⵉⴳ ⵉⴼⵓⵍⴽⵉⵏ, ⵖⵉⴽ ⵍⵍⵉ ⵜⵏⵏⴰ ⵜⵎⵜⵜⴰ ⵜⵉⵙⵙ ⴽⵕⴰⴹ ⵏ ⵓⵎⵕⵚⵓⵎ ⵏ ⵓⵙⵍⴳⴰⵏ ⵡⵉⵙⵙ 2.20.292".

ⵉⵙⵓⵍ ⵉⵏⵏⴰ ⵡⵙⵉⵡⴹ ⵎⴰⵙ "ⴰⴼ ⴰⴷ ⵉⵍⵉⵏⵜ ⵜⵉⵙⵓⵏⴰ ⵉⵅⵚⵚⴰⵏ ⴷ ⵙ ⵓⵙⴰⵜⵉ ⵏ ⵓⵣⵣⵉⴳⵔ ⵏ ⵉⴹⵏ ⵢⴰⵜⵜⵓⵢⵏ, ⵙⵎⵓⵙⵙⴰⵏⵜ ⵜⵏⴱⴰⴹⵉⵏ ⵎⵏⵏⴰⵡ ⵏ ⵉⵎⴳⵓⵔⵉⵏ ⵉⵏⴰⵎⵓⵔⵏ ⴰⴼ ⴰⴷ ⵙⵙⵓⴼⵖⵏ ⵜⵉⵙⵓⵏⴰ ⵏ ⵓⵃⵟⵟⵓ ⴳ ⵓⴳⴷⴰⵣ ⴰⵎⵓⵔ", ⵉⵙⵓⵍ ⵉⵏⵏⴰ ⵎⴰⵙ "ⵉⴱⵉⴷⴷ ⵡⴰⵜⵉⴳ ⵏ ⵜⵙⵙⴰⵖⵜ ⵏ ⵜⵙⵓⵏⴰ ⵢⴰⴷ ⴳ 80 ⵙⴰⵏⵜⵉⵎ ⵉ ⵡⴳⵣⵣⵓⵎ ⵙ ⵓⵏⵏⴰⵍ ⵏ ⵜⴼⵏⵉⵇⵜ ⵉⵥⵍⵉⵏ ⵙ ⵓⵙⵡⵓⴷⴷⵓ ⵏ ⵓⴼⵉⵔⵓⵙ "ⴽⵓⵕⵓⵏⴰ" (ⴽⵓⴼⵉⴷ 19).

ⵉⵏⵏⴰ ⵡⵙⵉⵡⴹ ⵎⴰⵙ ⵡⴰⵏⵏⴰ ⵡⵔ ⵉⵍⵙⵉⵏ ⵜⴰⵙⵓⵏⴰ ⵏⵏⵙ ⵉⵖ ⵉⴼⴼⵖ ⵉⵥⴹⴰⵕ ⴰⴷ ⵉⵅⵍⵍⵚ 300 ⴰⵔ 1300 ⴷⵔⵀⵎ ⴷ ⴰⴷ ⵉⵣⵣⵔⵉ ⴳⵔ ⵢⴰⵏ ⴷ ⴽⵕⴰⴹ ⵏ ⵉⵢⵢⵉⵔⵏ ⴳ ⵓⵖⵣⵓ, ⵏⵖⴷ ⵢⴰⵜ ⴳⵔ ⵙⵏⴰⵜ ⵏ ⵜⵎⵔⵔⵓⵜⵉⵏ ⴰⴷ, ⵖⵉⴽ ⵍⵍⵉ ⵢⵏⵏⴰ ⵡⵎⵕⵚⵓⵎ ⵏ ⵓⵙⵍⴳⴰⵏ ⵡⵉⵙⵙ 2.20.292.

Source URL: https://www.mapnews.ma/am/actualites/%E2%B4%B0%E2%B5%8F%E2%B5%8E%E2%B5%8F%E2%B4%B0%E2%B4%B9/%E2%B4%BD%E2%B5%93%E2%B4%BC%E2%B5%89%E2%B4%B7-19-%E2%B5%96%E2%B5%9C%E2%B5%99%E2%B5%8F%E2%B5%9C-%E2%B5%9C%E2%B5%8F%E2%B4%B1%E2%B4%B0%E2%B4%B9%E2%B5%89%E2%B5%8F-%E2%B5%9C%E2%B4%B3%E2%B4%B7%E2%B5%93%E2%B4%B7%E2%B4%B0%E2%B5%8F%E2%B5%89%E2%B5%8F-%E2%B5%8E%E2%B4%B0%E2%B5%99-%E2%B5%89%E2%B5%85%E2%B5%99%E2%B5%99%E2%B4%B0-%E2%B4%B0%E2%B4%B7-%E2%B5%9C%E2%B5%9C%E2%B5%93%E2%B5%8D%E2%B5%99%E2%B4%B0%E2%B5%8F%E2%B5%9C-%E2%B5%9C%E2%B5%89%E2%B5%99%E2%B5%93%E2%B5%8F%E2%B4%B0-%E2%B5%8F-%E2%B5%93%E2%B5%83%E2%B5%9F%E2%B5%9F%E2%B5%93-%E2%B5%99%E2%B4%B3-%E2%B5%8D%E2%B4%B1%E2%B4%B7%E2%B5%93-%E2%B5%8F