ⵜⵉⵖⵜⴰⵙⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵖⵎⵙⴰ ⵓⵔ ⵙⵙⵓⵃⵉⵍⵏ ⵉ ⵢⵏⵖⵎⴰⵙⵏ ⵏ ⵉⴳⵔ ⴰⴳⴷⵓⴷ, ⵍⵍⵉⵖ ⵜⵍⵍⴰ "ⵍⴰⵎⴰⴱ" (ⴰⵎⵛⵛⵉⵡⵕ)

25 ⵎⴰⵕⵚ 2020 Version Imprimable

ⵕⵕⴱⴰⵟ - ⵜⵉⵖⵜⴰⵙⵉⵏ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵖⵎⵙⴰ, ⵍⵍⵉ ⵡⵔ ⴰⴽⴽⵯ ⵉⴳⴰⵏ ⵜⵎⵔⵙⵍⵜ ⵜⴰⴷⵓⵙⵜⵓⵔⵉⵜ, ⴳⴰⵏⵜ ⵜⵖⵜⴰⵙⵉⵏ ⵜⵉⵎⵙⵙⵓⴳⵓⵔⵉⵏ ⴽⴰ, ⴰⵛⴽⵓ ⵓⵔ ⵙⵏⵎⴰⵍⴰⵏ ⵜⵡⵓⵔⵉ ⵏ ⵉⵏⵖⵎⵉⵙⵏ ⴳ ⵉⴳⵔ ⵓⵙⵍⵉⴳ, ⴷ ⵓⵔ ⵙⵙⵓⵃⵉⵍⵏ ⵉ ⵢⵏⵖⵎⴰⵙⵏ ⵏ ⵉⴳⵔ ⴰⴳⴷⵓⴷ, ⵣⵓⵏⴷ ⵉⵏⵖⵎⵉⵙⵏ ⵏ ⵜⵙⵏⵓⵔⴰⵢⵜ ⵜⵎⵖⵔⴰⴱⵉⵜ ⵏ ⵜⵏⵖⵎⴰⵙⵜ (ⵍⴰⵎⴰⴱ), ⵎⴰ ⵢⴰⴷ ⵉⵏⵏⴰ ⵡⵎⵛⵛⵉⵡⵕ ⵏ ⵜⵎⴰⵡⴰⵙⵜ ⵏ ⵜⴷⵍⵙⴰ, ⴰⵎⵙⵙⵉⵡⵍ ⵙ ⵉⵙⵎ ⵏ ⵜⵏⴱⴰⴹⵜ ⵉⵎⵙⵜⴳⴳⴰⵔⵏ ⵙ ⵓⵎⵢⴰⵡⴰⴹ ⴷ ⵓⵏⵖⵎⵉⵙ, ⵎⴰⵙⵙ ⵅⴰⵍⵉⵍ ⵛⵛⵕⵇⴰⵡⵉ ⵙⵎⵎⵓⵏⵉ.

ⴰⵎⵎⴰⵙ ⵏ ⵢⴰⵜ ⵜⵙⴳⵓⵔⵉ ⵉ "ⵎⴰⵏⴰⴱⵉⵔⴱⵔⵉⵙ.ⴽⵓⵎ", ⵍⵍⵉⵖ ⵉⵔⴰⵔ ⵅⴼ ⵎⴰⴷ ⵉⵏⵏⴰ ⵡⵏⵙⵙⵉⵅⴼ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵜⵖⵎⵙⴰ, ⵉⵏⵏⴰ ⵎⴰⵙⵙ ⵙⵎⵎⵓⵏⵉ ⵎⴰⵙ ⵓⵙⵍⴳⵏ ⵡⵉⵙⵙ 90.13 ⵉⵎⵍⴰ ⵎⴰⴷ ⵉⴳⴰⵏ ⵜⵡⵓⵔⵉⵡⵉⵏ ⵏ ⵓⵙⵇⵇⵉⵎ, ⵉⵔⵏⴰ ⵢⵏⵏⴰ ⵎⴰⵙⵙ ⵜⵖⴰⵡⵙⵉⵡⵉⵏ ⵏ ⵓⵙⵇⵇⵉⵎ ⴰⴷ ⵓⵔ ⵣⵔⵉⵏⵜ ⴰⵙⴰⵜⵉ ⵏ ⵓⵙⵙⵍⴳⵏ ⵏ ⵜⵡⵓⵔⵉⵡⵉⵏ ⵏ ⵉⵏⵖⵎⴰⵙⵏ ⵉⵍⵍⴰⵏ ⴳ ⵉⴳⵔ ⵓⵙⵍⵉⴳ, ⴷ ⵓⵔ ⴰⴽⴽⵯ ⴳⴳⵔⵏ ⵉ ⵢⵏⵖⵎⵉⵙⵏ ⵏ ⵉⴳⵔ ⴰⴳⴷⵓⴷ, ⵣⵓⵏⴷ ⵡⵉⵏⵏ ⵏ "ⵍⴰⵎⴰⴱ".

ⵉⵏⵖⵎⵉⵙⵏ ⵏ "ⵍⴰⵎⴰⴱ" ⴳⴰⵏ ⵉⵎⵙⵖⴰⵏⵏ ⵏ ⵜⵙⵏⵓⵔⴰⵢⵜ ⴷ ⴹⴼⴰⵕⵏ ⴰⵙⵙⵍⴳⵏ ⴰⴳⵏⵙⴰ ⵏⵏⵙ, ⵖⵉⴽ ⵍⵍⵉ ⵢⵏⵏⴰ ⵢⵎⵉⵔ ⵡⵉⵙⵙ ⴽⵕⴰⴹ ⵏ ⵓⵙⵍⴳⵏ ⵡⵉⵙⵙ 89.13 ⵏ 27 ⵉⴱⵔⵉⵔ 2016 ⵅⴼ ⵓⵙⵓⵔⵙ ⵏ ⵉⵏⵖⵎⴰⵙⵏ ⵉⵣⵣⵓⵍⴰⵏ.

ⵉⵔⴰⵏ ⵢⵏⵏⴰ ⵡⵎⵛⵛⵉⵡⵕ ⵎⴰⵙ ⴰⵡⴰⵍ ⵉⵏⵏⴰⵏ ⵉⵙ ⵉⴳⴰ ⵡⵙⵇⵇⵉⵎ ⴰⵏⴰⵎⵓⵔ ⵏ ⵜⵖⵎⵙⴰ ⵢⴰⵜ ⵜⵎⵔⵙⵍⵜ ⵜⴰⴷⵓⵙⵜⵓⵔⵉⵜ "ⵓⵔ ⵉⴳⴰ ⴰⵎⵥⵍⴰⵏ" ⴷ "ⵜⴼⴼⵖ ⵜ ⴽⵔⴰ ⵢⴳⴰⵜⵜ ⵜⵙⵉⵍⴰ ⵜⴰⵣⵔⴼⴰⵏⵜ", ⴰⵛⴽⵓ ⴳⴰⵏⵜ ⵜⵎⵔⵙⵍⵉⵏ ⵜⵉⴷⵓⵙⵜⵓⵔⵉⵏ ⵅⵜⵉⵏⵏ ⵍⵍⵉ ⵅⴼ ⵉⵙⴰⵡⵍ ⵓⴷⵓⵙⵜⵓⵔ ⵏ 2011.

Source URL: https://www.mapnews.ma/am/actualites/%E2%B4%B0%E2%B5%8E%E2%B4%B0%E2%B5%9C%E2%B4%B0%E2%B5%A2/%E2%B5%9C%E2%B5%89%E2%B5%96%E2%B5%9C%E2%B4%B0%E2%B5%99%E2%B5%89%E2%B5%8F-%E2%B5%8F-%E2%B5%93%E2%B5%99%E2%B5%87%E2%B5%87%E2%B5%89%E2%B5%8E-%E2%B4%B0%E2%B5%8F%E2%B4%B0%E2%B5%8E%E2%B5%93%E2%B5%94-%E2%B5%8F-%E2%B5%9C%E2%B5%96%E2%B5%8E%E2%B5%99%E2%B4%B0-%E2%B5%93%E2%B5%94-%E2%B5%99%E2%B5%99%E2%B5%93%E2%B5%83%E2%B5%89%E2%B5%8D%E2%B5%8F-%E2%B5%89-%E2%B5%A2%E2%B5%8F%E2%B5%96%E2%B5%8E%E2%B4%B0%E2%B5%99%E2%B5%8F-%E2%B5%8F-%E2%B5%89%E2%B4%B3%E2%B5%94-%E2%B4%B0%E2%B4%B3%E2%B4%B7%E2%B5%93%E2%B4%B7-%E2%B5%8D%E2%B5%8D%E2%B5%89%E2%B5%96-%E2%B5%9C%E2%B5%8D%E2%B5%8D%E2%B4%B0-%E2%B5%8D%E2%B4%B0%E2%B5%8E%E2%B4%B0%E2%B4%B1