"ⵉⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵚⴹⵉⵚ, ⴰⴷ ⵜ ⵉⵏⵚⵕ ⵕⴱⴱⵉ, ⴰⵙⵙ ⵏ ⵓⵙⵉⵏⴰⵙ ⴳ ⵜⴳⴰⴷⵉⵔⵜ ⵜⴰⴳⵍⴷⴰⵏⵜ ⵏ ⵎⵕⵕⴰⴽⵯⵛ, ⵢⴰⵜ ⵜⵉⵔⵎⵜ ⵏ ⵜⵡⵓⵔⵉ ⵉⵙⴰⵡⵍⵏ ⵅⴼ ⵓⵖⴰⵡⴰⵙ ⴰⵎⵣⵡⴰⵔⵓ ⴰⵏⴰⵎⵓⵔ ⵏ ⵓⴷⴰⴼ ⵙ ⵡⴰⵎⴰⵏ ⵉⵜⵜⵓⵙⵡⴰⵏ ⴷ ⵜⵉⵙⵙⵉ 2020-2027.
ⵜⴽⵛⵎ ⵜⵉⵔⵎⵜ ⴰⴷ ⴳ ⵓⵙⴰⵜⵉ ⵏ ⵜⵙⵎⵓⵏⵉⵏ ⵍⵍⵉ ⵢⵙⵙⵉⵅⴼ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ, ⴰⴷ ⵜ ⵉⵏⵚⵕ ⵕⴱⴱⵉ, ⴰⴼ ⴰⴷ ⵉⵙⵔⵙ ⵢⴰⵏ ⵓⵙⴰⵜⵉ ⵉⵜⵜⵓⵙⵉⴷⴼⵏ ⵏ ⵓⵖⴰⵡⴰⵙ ⴰⴷ, ⵍⵍⵉ ⵢⵃⴱⴰⵏ ⴽⵔⴰ ⵢⴳⴰⵜⵜ ⵜⵙⴳⴰ ⴳ ⵜⴳⵍⴷⵉⵜ.
ⴰⵎⵎⴰⵙ ⵏ ⵜⵉⵔⵎⵜ ⴰⴷ, ⵙⴽⵔⵏ ⵓⵎⴰⵡⵙⴰⵙ ⵏ ⵓⵎⴰⵡⴰ ⴷ ⵡⴰⵙⵙⴰⵢ ⴷ ⵜⵍⵓⵊⵉⵙⵜⵉⴽⵜ ⴷ ⵡⴰⵎⴰⵏ, ⴷ ⵓⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⵍⴰⵏⵜ ⴷ ⵜⵉⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴳⴰⵏⵉⵏ, ⴷ ⵓⵎⴰⵡⵙⴰⵙ ⵏ ⵓⴳⵏⵙⵓ, ⴷⴰⵜ ⵏ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵢⴰⵏ ⵓⵙⵎⵏⵉⴷ ⵅⴼ ⴽⵔⴰ ⵢⴳⴰⵜⵜ ⵜⴼⵔⵉⵙⵜ ⵏ ⵓⵖⴰⵡⴰⵙ ⴰⴷ, ⵙⵍⴰⵡⴰⵏ ⴰⴽⴽⵯ ⵎⴰ ⵢⴰⴷ ⵉⴳⴳⵔⵏ ⵉ ⵡⵙⴳⵓⵎⵏ ⴰⴷ:
- ⴰⵙⴼⴰⵍⴽⵉ ⵏ ⵓⵙⴽⴰⵏ ⵏ ⵡⴰⵎⴰⵏ, ⵙⵍⴰⵡⴰⵏ ⴰⴽⴽⵯ ⵙ ⵍⴱⵏⵓ ⵏ ⵓⴳⴳⵓⴳⵏ.
- ⴰⵙⵡⵓⴷⴷⵓ ⵏ ⵓⵙⵇⵇⵙⵉ ⴷ ⴰⵙⵓⵜⴳ ⵏ ⵡⴰⵎⴰⵏ, ⵙⵍⴰⵡⴰⵏ ⴰⴽⴽⵯ ⴳ ⵉⴳⵔ ⴰⵏⴼⵍⴰⵃ
- ⴰⵙⴷⵓⵙ ⵏ ⵡⴰⴷⴰⴼ ⵙ ⵡⴰⵎⴰⵏ ⵉⵜⵜⵓⵙⵡⴰⵏ ⴰⵎⵎⴰⵙ ⵏ ⵜⵎⴰⵣⵉⵔⵜ
- ⴰⵙⵎⵔⵙ ⴰⵎⴰⵢⵏⵓ ⵏ ⵡⴰⵎⴰⵏ ⵓⵜⵜⵓⵙⵎⵓⵔⵙⵏ ⴰⵎⵎⴰⵙ ⵏ ⵜⵉⵙⵙⵉ ⵏ ⵜⵉⵔⵉⵡⵜ ⵜⴰⵣⴳⵣⴰⵡⵜ
- ⴰⵎⵢⴰⵡⴰⴹ ⴷ ⵓⵙⴼⵔⴽ ⴰⴼ ⴰⴷ ⵉⵜⵜⵓⵙⴷⵓⵙ ⵓⴼⵔⴰⴽ ⵉⵣⴷⵉⵏ ⴷ ⵓⵃⵟⵟⵓ ⵏ ⵉⵙⴰⴳⵎⵏ ⵏ ⵡⴰⵎⴰⵏ ⴷ ⵓⵎⵏⵍⵍⵉ ⵏ ⵓⵙⵎⵔⵙ ⵏⵏⵙ
ⵉⵔⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⴰⴷ ⵉⴼⴽ ⵉⵏⴹⵏ ⵏⵏⵙ ⵢⴰⵜⵜⵓⵢⵏ ⴰⴼ ⴰⴷ ⵉⵜⵜⵓⵙⵔⴰⵙ ⵓⵖⴰⵡⴰⵙ ⴰⴷ ⵍⵍⵉ ⵔⴰⴷ ⵉⵍⴽⵎ ⴰⵜⵉⴳ ⵏⵏⵙ 115 ⴰⵎⵍⵢⴰⵕ ⵏ ⴷⴷⵔⵀⵎ.
ⵃⴰⴹⵕⵏ ⴳ ⵜⵉⵔⵎⵜ ⴰⴷ ⵓⵏⵙⵙⵉⵅⴼ ⵏ ⵜⵏⴱⴰⴹⵜ, ⵎⴰⵙⵙ ⵙⵄⴷ ⴷⴷⵉⵏ ⵍⵄⵜⵎⴰⵏⵉ, ⴷ ⵓⵎⴰⵡⵙⴰⵙ ⵏ ⵓⴳⵏⵙⵓ, ⵎⴰⵙⵙ ⵄⴱⵍⵡⴰⴼⵉ ⵍⴼⵜⵉⵜ, ⴷ ⵓⵎⴰⵡⵙⴰⵙ ⵏ ⵜⴷⵎⵙⴰ ⴷ ⵓⵥⵕⴼ ⴷ ⵓⵙⵓⴷⴷⵓ ⵏ ⵜⵎⵙⵙⵓⴳⵓⵔⵜ, ⵎⵓⵃⵎⵎⴷ ⴱⵏ ⵛⵄⴱⵓⵏ, ⴷ ⵓⵎⴰⵡⵙⴰⵙ ⵏ ⵜⴼⵍⵍⴰⵃⵜ ⴷ ⵜⴳⵎⵔⵜ ⵜⴰⵢⵍⵍⴰⵏⵜ ⴷ ⵜⵉⴳⵎⵉ ⵜⴰⴼⴰⵔⴰⵏⵜ ⴷ ⵡⴰⵎⴰⵏ ⴷ ⵜⴰⴳⴰⵏⵜ, ⵄⴰⵣⵉⵣ ⴰⵅⵏⵏⵓⵛ, ⴷ ⵓⵎⴰⵡⵙⴰⵙ ⵏ ⵓⵎⴰⵡⴰ ⴷ ⵡⴰⵙⵙⴰⵢ ⴷ ⵜⵍⵓⵊⵉⵙⵜⵉⴽⵜ ⴷ ⵡⴰⵎⴰⵏ, ⵄⴱⴷⵍⵇⴰⴷⵔ ⵄⵎⴰⵕⴰ, ⴷ ⵓⵎⴰⵡⵙⴰⵙ ⵏ ⵜⵣⴹⴰⵔⵜ ⴷ ⵓⵣⴰⵖⵓⵣ ⴷ ⵜⵉⴳⵎⵉ ⵜⴰⵙⵓⵍⴰⵏⵜ, ⵄⴰⵣⵉⵣ ⵔⴱⴱⴰⵃ, ⴷ ⵓⵏⵎⵀⴰⵍ ⵏ ⵓⵙⵇⵇⵉⵎ ⴰⵏⴰⵎⵓⵔ ⵏ ⵓⵥⴰⵕⵓⵕ ⴷ ⵡⴰⵎⴰⵏ, ⵎⴰⵙⵙ ⵄⴱⴷⵕⵕⴰⵃⵉⵎ ⵍⵃⴰⴼⵉⴹⵉ".