ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ ⴳ ⴰⵙⵙ ⴰⴷ ⵏ ⵡⴰⵢⵢⵓⵔ ⵏ ⵕⵎⴹⴰⵏ ⴰⵎⴱⴰⵕⴽⵉ, ⵏⵙⵙⴽⵜⵉ ⴽⵓⵍⵍⵓ ⵢⴰⵖ ⴰⵙⵙⴽⵜⵉ ⵡⵉⵙⵙ 64 ⵏ ⵜⵎⵔⵙⵍⵜ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ, ⵎⴰ ⵢⴰⴷ ⵉⴳⴰⵏ ⵢⴰⵏ ⵓⵣⵎⵣⵣⵓ ⵍⵍⵉ ⵏⵙⴼⵓⴳⵍⴰ ⴱⴷⴷⴰ ⴷ ⵍⵍⵉ ⵖⵓⵔⵙ ⵉⵜⵉⴳⵏ ⵉⵇⴱⵓⵔⵏ ⵉⵎⴰⵏⵏ ⴷ ⵓⵙⵙⵓⴼⵖ ⵏ ⵜⴳⴳⴰⵍⵉⵏ ⴰⴷ ⵙⴳ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⵓⵃⵎⵎⴷ ⵡⵉⵙⵙ ⵙⵎⵎⵓⵙ, ⴷ ⵓⵎⴷⴰⴽⴽⵯⵍ ⵏⵏⵙ ⴳ ⵓⵖⴰⵔⴰⵙ ⵏ ⵜⵓⵚⴽⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵍⵃⴰⵙⴰⵏ ⵡⵉⵙⵙ ⵙⵉⵏ, ⴰⴷ ⵜⵏ ⵉⵕⵃⵎ ⵕⴱⴱⵉ.
ⴳ ⵓⵙⴰⵜⵉ ⴷⵖ, ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵎⴰⵙ "ⵍⵍⵉⵖ ⵏⴳⴰ ⴰⵏⵙⵙⵉⵅⴼ ⴰⵏⴰⴼⵍⵍⴰ ⵏ ⵍⵉⵟⴰ ⵎⴰⵊⵓⵕ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ, ⵏⵙⵏⵎⵎⵔ ⵜⵓⴳⴳⴰⵣ ⵏⵏⵓⵏ ⵉⵔⵏⴰⵏ ⵏ ⵓⵙⴷⵓⵙ ⴷ ⵓⵔⴰⵢ ⵓⵜⵜⴰⵡ ⴳ ⵉⵍⵍ ⴷ ⵡⴰⴹⵓ, ⵙ ⵓⵎⵓⵙⵙⵓ ⵏ ⵓⴼⴳⴰⵏ ⴳ ⵜⵓⵚⴽⴰ ⵏ ⵉⵎⴰⵙⵙⵏ ⵏ ⵜⵉⴹⴰⴼ ⵉⵎⵣⵔⵓⵔⴰⵏ, ⵎⴰ ⵢⴰⴷ ⵜ ⵢⵓⵊⵊⴰⵏ ⴰⴷ ⵉⵙⴱⵉⴷⴷ ⵉⵎⵏⵣⵏ" ⵉⵍⵍⴰⵏ ⴷⴰⵜ ⵏ ⵜⴳⵍⴷⵉⵜ.
ⵉⵙⵎⵖⵔ ⵙⵓⵍ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵜⵉⵍⵉⵜ ⵏ ⵉⵄⵚⴽⵕⵉⵏ ⵉⵍⵍⴰⵏ ⴳ ⵜⵙⴳⴰⵡⵉⵏ ⵏ ⵓⴼⴼⵓⵙ ⵉⵎⵎⴰⵖⵏ ⵅⴼ ⵓⴳⵣⵣⵓⵎ ⵏ ⵡⴰⴽⴰⵍ ⴰⵏⴰⵎⵓⵔ ⴳ ⴽⵔⴰ ⵢⴳⴰⵜⵜ ⵓⴼⵔⴷⵉⵙ ⵏ ⵜⴳⴳⴰⵍⵉⵏ ⵉⵍⵍⴰⵏ ⴳ ⵜⵏⴼⵔⵓⵜ ⵏ ⵓⵡⵜⵜⴰ ⴳ ⵉⵡⵉⵣ.
ⵉⴼⵔⴰ ⵢⵙⵏⵉⵎⵎⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵎⴰⵏ ⴰⵏⴰⴼⵍⵍⴰ ⵍⵍⵉ ⵎⵍⴰⵏⵜ ⵜⵓⴳⴳⴰⵣ ⵏ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴳ ⵓⴳⵏⵙⵓ ⵏ ⵜⵎⵓⵔⵜ, ⵎⴰ ⵢⴰⴷ ⵉⵔⵏⴰⵏ ⵉⴳⵔⴰⵡⵏ ⵏⵏⵙⵏ ⴷ ⵜⵡⵓⵔⵉⵡⵉⵏ ⵉⴼⵓⵍⴽⵉⵏ ⴳ ⵓⵙⴰⵜⵉ ⵏ ⵜⵎⵀⵍⵉⵡⵉⵏ ⵏ ⵓⴼⴰⵔⴽ ⵏ ⵙⵙⵍⴰⵎⵜ ⴳ ⵍⴽⵓⵏⴳⵓ ⵜⴰⴷⵉⵎⵓⵇⵕⴰⵟⵉⵜ ⴷ ⵉⴼⵔⵉⵇⵢⴰ ⵜⴰⵏⴰⵎⴰⵙⵜ ⴷ ⴰⴳⴰⵍⵓⴼ ⵏ ⵚⵚⴱⵉⵟⴰⵕ ⴰⵄⵚⴽⵕⵉ ⵏ ⵓⵎⵎⴰⵙ ⴳ ⵣⵄⵜⴰⵔⵉ.
ⵉⵏⵏⴰ ⴱⴰⴱ ⵏ ⵡⴰⴷⴷⵓⵔ ⵎⴰⵙⵙ ⵙ ⵜⵎⴷⵢⴰⵙⵜ ⵏ ⵜⴱⴷⴷⴰⴷⵜ ⵉⵏⴼⴳⴰⵏ ⵉⵇⴱⵓⵕⵏ ⴳ ⵓⵎⵣⵔⵓⵢ ⵏⵏⵙ, ⴷⵔⴰⵏⵜ ⵜⴳⴳⴰⵍⵉⵏ ⵜⵉⵍⴰⴼⵉⵏ ⵜⵉⴳⵍⴷⴰⵏⵉⵏ ⴳ ⵉⴳⵍⵉ ⵏ ⵓⵎⵓⵙⵙⵓ ⵏ ⵜⴳⵍⴷⵉⵜ ⴳ ⵉⴳⵔ ⴰⴷ ⴷⴼⴼⵉⵔ ⵏ ⵓⵙⵏⵎⴰⵍⴰ ⴳ ⵎⵏⵏⴰⵡ ⵏ ⵜⵏⴰⵡⵉⵏ ⵉⵎⴰⴹⵍⴰⵏⵉⵏ ⵙ ⵜⴷⵔⴰⵡⵜ ⵏ ⵜⵎⵜⵜⴰ ⵢⵎⴰⵏ, ⵙ ⵉⵜⵉⴳⵏ ⴷ ⵉⵔⵉⵎⵏ ⵍⵍⵉ ⵙⵎⴰⵏⵏ ⴷ ⵍⵍⵉ ⵢⵟⵟⴰⴼⵏ ⵎⵉⵚⴹⴰⵇⵢⵢⴰ.
ⵉⵙⵓⵍ ⵉⵙⵎⵖⵔ ⴱⴰⴱ ⵏ ⵡⴰⴷⴷⵓⵔ ⴰⴳⵍⵍⵉⴷ ⵉⵎⴰⴽⵏ ⵉⵣⵣⴳⵉⵔⵏ ⵏ ⵉⴹⵏ ⵢⴰⵜⵜⵓⵢⵏ ⵏ ⴱⴰⴱ ⵏ ⵡⴰⴷⴷⵓⵔ ⴳ ⵉⴳⵔ ⵏ ⵜⵏⴼⵔⵓⵜ ⵜⴰⵄⵚⴽⵕⵉⵜ, ⵎⴰ ⵢⴰⴷ ⵉⴳⴰⵏ ⵢⴰⵏ ⵓⵏⴰⵡ ⵏ ⵓⴼⵓⵍⴽⵉ ⵏ ⵓⵙⵡⵓⴷⴷⵓ ⴳ ⴽⵔⴰ ⵢⴳⴰⵜⵜ ⵜⴽⵍⵉⵜ ⵍⵍⵉ ⵢⵎⴰⵏⵏ ⴷ ⵜⵎⵀⵍⴰ ⵏ ⵉⵙⵉⴷⴼ ⵏ ⵓⴳⵔⴰⵡ ⵡⵉⵙⵙ 36 ⴷ ⵜⵉⴽⴽⵉ ⵏ ⵜⵓⵚⴽⵉⵡⵉⵏ ⵜⵉⵏⴰⴷⴷⴰⵡⵉⵏ ⴷ ⵜⵉⵙⴰⵜⵉⵏ ⵏ ⵓⵏⵎⵍⴰⵏ ⴷ ⵜⵎⵜⵜⴰ ⵜⵉⴱⵉⴷⴰⵖⵓⵊⵉⵏ, ⵎⵔⴰ ⴰⴷ ⵥⴹⵉⵕⵏ ⵉⵄⵚⴽⵕⵉⵏ ⴷ ⵜⵉⵄⵚⴽⵕⵉⵏ ⴰⴷ ⵟⵟⴼⵏ ⵓⵙⵎⵓⵜⵜⴳ ⴰⵣⵣⵓⵍⴰⵏ ⵏ ⵜⵙⵏⵙⵉ ⵉⵔⴰⵔⵏ ⵅⴼ ⵜⵔⴰⵜⵉⵏ ⵏ ⵜⵉⵄⵄⵓⵔⵎⴰ ⵏⵏⵖ ⴳ ⵉⵙⵉⴷⴼ ⵏ ⵓⵣⵟⵟⴰ ⴷ ⵓⵍⵜⵖ ⴳ ⵉⵙⵉⵜⵏ ⵏ ⵜⵓⵚⴽⴰ ⴷ ⵉⵎⴰⵏ ⴰⵏⴰⵎⵓⵔ ⴷ ⵜⵎⵙⵙⵓⴳⵔⵜ.