Published on MAPNews (http://mapamazighe.ma/am)

Accueil > ⴰⵡⵔⵉⵔ: ⴰⵏⵎⵓⴳⴳⴰⵔ ⴰⵏⴰⵎⵓⵔ ⵏ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ

ⴰⵡⵔⵉⵔ: ⴰⵏⵎⵓⴳⴳⴰⵔ ⴰⵏⴰⵎⵓⵔ ⵏ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ

04 ⵏⵓⵡⴰⵏⴱⵉⵔ 2019 Version Imprimable
ⴰⵡⵔⵉⵔ - ⵜⵙⵏⵎⴰⵍⴰ ⵜⵎⵙⵎⵓⵏⵜ ⵏ ⴰⵡⵔⵉⵔ ⵉ ⵜⴷⵍⵙⴰ ⴷ ⵜⵓⵏⵏⵓⵏⵜ ⵙ ⵜⴷⵔⴰⵡⵜ ⴷ ⵜⴳⵔⴰⵡⵜ ⵜⴰⵔⴰⴽⴰⵍⵜ ⵏ ⴰⵡⵔⵉⵔ ⵜⴰⵙⵓⵜⵍⵜ ⵜⵉⵙⵙ 16 ⵏ ⵓⵏⵎⵓⴳⴳⴰⵔ ⴰⵏⴰⵎⵓⵔ ⵏ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ ⴷⴷⵓ ⵜⵎⴰⵜⴰⵔⵜ-ⵜⴰⵎⴷⵢⴰⵣⵜ ⵜⴰⵎⴰⵣⵉⵖⵜ ⴳⵔ ⴰⵏⵣⴰⵖ ⵏ ⵉⵎⵏⵜⵉⵍⵏ ⵉⴷⵖⴰⵔⴰⵏⵏ ⴷ ⵉⴳⵔⴰⵖⵍⴰⵏⵏ - ⵙⴳ ⵡⴰⵙⵙ ⵏ ⴰⴽⵡⴰⵙ ⴳ ⵡⴰⵢⵢⵓⵔ ⵏⵏⴰ ⵉⵣⵔⵉⵏ ⴰⵔ ⴰⵙⵙ ⵏ ⴰⵙⵉⴹⵢⴰⵙ ⴳ ⵡⴰⵢⵢⵓⵔ ⴰⴷ ⵏ ⵏⵓⵡⴰⵏⴱⵉⵔ.

ⴰⵏⵎⵓⴳⴳⴰⵔ ⴰⴷ ⵏⵏⴰ ⵉⵣⴷⵉⵏ ⴷ ⵜⴷⵍⵙⴰ ⴷ ⵜⵙⴽⵍⴰ ⴷ ⴽⵓ ⵎⴰⴷ ⵉⴳⴰⵏ ⵜⴰⵎⴷⵢⴰⵣⵜ,ⴰⵔ ⵉⵜⵜⴰⵡⵙⴽⴰⵔ ⴽⵓⵏ ⴰⵙⴳⴳⵯⴰⵙ ⵣⵓⵏⴷ ⵜⵉⵣⵉ ⴰⴷ ⵏⵉⵜ,ⵙⵍⴰⵡⴰⵏ ⴰⴽⴽⵯ ⵍⵍⵉⵖ ⴰⵔ ⵉⵙⵏⵓⴱⴳ ⵜⵓⴳⵜⵜ ⵏ ⵉⵎⴷⵢⴰⵣⵏ ⵉⵇⵇⴱⵓⵕⵏ ⵓⵍⴰ ⵉⵜⵔⴰⵔⵏ, ⴰⵔ ⴳⵉⵙ ⵜⵜⵓⵙⴽⴰⵔⵏ ⴰⵡⴷ ⵜⵓⴳⵜⵜ ⵏ ⵜⵖⵔⵉⵡⵉⵏ ⵏ ⵜⵎⴷⵢⴰⵣⵜ ⵜⴰⵜⵔⴰⵔⵜ, ⴷ ⵓⵙⴳⵎⴹ ⵏ ⵜⵣⵕⵉⴳⵉⵏ ⵏ ⵜⵎⴷⵢⴰⵣⵜ ⵏⵏⴰⴷ ⵉⴼⴼⴰⵖⵏ ⴷ ⵜⵉⵍⵍⵉ ⴳⴰⵏⵉⵏ ⵜⵉⵎⴰⵢⵏⵓⵜⵉⵏ.

ⵜⴰⵙⵓⵜⵍⵜ ⵏ ⵓⵙⴳⴳⵯⴰⵙ ⴰⴷ ⵏⵏⴰ ⵉⴳⴰⵏ ⵜⵉⵙⵙ 16 ⵎⵓⵏⵏⴷ ⴰⴽⴽⵯ ⴳⵉⵙ ⵉⵎⴷⵢⴰⵣⵏ ⵉⵎⴰⵣⵉⵖⵏ ⴳ ⵜⵓⴳⵜⵜ ⵏ ⵜⵖⵔⵎⵉⵏ ⵜⵉⵎⵖⵔⵉⴱⵉⵢⵢⵉⵏ, ⵙⵎⵔⴰⵔⴰⵏ ⴳⵉⵙ ⴰⵡⴰⵍ ⴼ ⵜⵓⴳⵜⵜ ⵏ ⵉⵎⵏⵜⵉⵍⵏ ⵏⵏⴰ ⵉⵣⴷⵉⵏ ⴷ ⵜⵎⴷⵢⴰⵣⵜ ⴷ ⵓⵙⵏⴼⵍⵓⵍ ⴰⵎⴰⵣⵉⵖ.

ⴳ ⵜⵣⵡⵉⵔⵉ ⵏ ⵡⴰⵀⵉⵍ ⵏ ⵡⴰⵙⵙ ⴰⵎⵣⵡⴰⵔⵓ ⵜⴻⵜⵜⵓⵖⵔⴰ ⵍⴼⴰⵜⵉⵃⴰ ⴼ ⵉⵎⴰⵏ ⵏ ⵍⴰⵍ ⵏ ⵓⵎⴷⵢⴰⵣ ⵄⵓⵎⴰⵔ ⴰⵢⵜ ⵙⵄⵉⴷ, ⴷ ⵜⴳⵓⵔⵉ ⵏ ⵜⵎⵙⵎⵓⵏⵜ ⵓⵍⴰ ⵡⵉⵏ ⵜⴳⵔⴰⵡⵜ ⵏ ⵡⴰⵡⵔⵉⵔ, ⵜⴻⵜⵜⵓⵙⴽⴰⵔ ⵓⵍⴰ ⵜⴳⵓⵔⵉ ⵏ ⵡⴰⵎⵎⴰⵙ ⵏ ⵙⵓⵙ ⵉ ⵜⵏⴼⵍⵉⵜ ⴷ ⵜⴷⵍⵙⴰ.

ⵜⵜⵓⵙⴽⴰⵔⵏⵜ ⴳⵉⵙ ⴰⵡⴷ ⵜⵉⵖⵔⴰ ⵏ ⵜⵎⴷⵢⴰⵣⵉⵏ ⵜⵉⵎⴰⵣⵉⵖⵉⵏ ⵏ ⵉⵎⴷⵢⴰⵣⵏ, ⵄⴱⴷⵙⵙⵍⴰⵎ ⴰⵎⴰⵅⵅⴰ ⵙⴳ ⴰⴳⴰⴷⵉⵔ, ⴷ ⵓⵎⴷⵢⴰⵣ ⵄⴱⴷⵓⵍⵍⴰⵀ ⵓⵏⴰⵚⵕ ⵙⴳ ⵡⴰⵡⵔⵉⵔ ⵏⵉⵜ, ⴷ ⵎⴰⵙⵙⴰ ⵜⴰⵎⴷⵢⴰⵣⵜ ⴼⴰⴹⵎⴰ ⴼⵉⵕⴰⵙ, ⴷ ⵓⵥⴰⵡⴰⵏ ⴰⵜⵔⴰⵔ ⵏ ⵓⵎⴷⵢⴰⵣ ⴷ ⵓⵏⴰⵥⵓⵕ ⵄⵓⵎⴰⵕ ⴰⵢⵜ ⵙⵄⵉⴷ.

ⵉⵜⵜⵓⵙⴽⴰⵔ ⴰⵡⴷ ⵢⴰⵏ ⵓⵙⵎⵖⵕ ⵏ ⵓⵎⵙⴽⴰⵔ ⴰⵎⵣⵡⴰⵔⵓ ⵏ ⵜⵎⵙⵎⵓⵏⵜ ⵎⴰⵙⵙ ⴰⴽⵔⵉⵎ ⵟⵟⴰⵢⵢⵉⴱ ⴷ ⵎⴰⵙⵙ ⴽⵓⵔⵣⵉ ⴱⵕⴰⵀⵉⵎ.

ⴳ ⵜⵙⴳⴰ ⵢⴰⴹⵏⵉⵏ ⵉⵜⵜⵓⵙⴽⴰⵔ ⴰⵡⴷ ⵢⴰⵏ ⵓⵙⴼⵙⵔ ⵏ ⵉⴼⴰⵔⵙⵏ ⵏ ⵡⴰⵔⴳⴰⵏ,ⴷ ⵢⴰⵜ ⵜⵉⵏⴰⵡⵜ ⵜⴰⵎⵣⵡⴰⵔⵓⵜ ⵏⵏⴰ ⵙⴽⵔⵏ ⵉⴷ ⵎⴰⵙⵙ ⵄⴱⴷⵍⵃⴰⴽⵉⵎ ⴱⵓ ⵍⵍⵓⵣ ⴷ ⵎⴰⵙⵙ ⵄⵣⵣ ⴷⴷⵉⵏ ⵍⵅⵕⵕⴰⵟ ⵙ ⵓⵜⵓⵢ ⵏ ⵎⴰⵙⵙ ⴱⵍⵉⵍⵉⴹ ⵎⵓⵃⵎⵎⴰⴷ, ⴷⴼⴼⵉⵔ ⵏⵏⵙ ⵜⵜⴰⵡⵙⴽⴰⵔⵏⵜ ⴷⴰⵖ ⵜⵉⵖⵔⴰ ⵏ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ.

ⵉⵏⵏⴰ ⵢⴰⵏ ⴳ ⵉⵎⴷⵔⴰⵡⵏ ⵏ ⵓⵏⵎⵓⴳⴳⴰⵔ ⴰⴷ ⵏ ⵜⵎⴷⵢⴰⵣⵜ ⵜⴰⵎⴰⵣⵉⵖⵜ ⵎⴰⵙ ⵜⴳⴰ ⵜⵙⵙⵓⵜⵍⵜ ⴰⴷ ⵜⴰⵍⵍⵉ ⴳ ⵉⵡⵙⵏ ⵜⵓⴳⵜⵜ ⵏ ⵉⵎⴷⵢⴰⵣⵏ ⵉⵎⴰⵣⵉⵖⵏ ⵜⵜⵓⵙⴽⴰⵔ ⴰⵡⴷ ⵢⴰⵜ ⵜⵎⵣⵉⵣⵣⵍⵜ ⵏ ⵜⵉⵔⵔⴰ ⵏ ⵜⵎⴷⵢⴰⵣⵜ, ⵜⵜⴼⴽⵉⵏⵜ ⵜⵙⵎⵖⵓⵔⵉⵏ ⴳ ⵡⴰⵙⵙ ⴰⵎⴳⴳⴰⵔⵓ ⴳ ⵜⴼⵓⴳⵍⴰ ⵏ ⵢⵉⴹ ⴰⵙⴽⵍⴰⵏ ⴷ ⵓⵥⵓⵕⴰⵏ, ⵉⵜⵜⵓⵙⴽⴰⵔ ⴰⵡⴷ ⵓⵙⴳⵎⴹ ⵏ ⵓⴷⵍⵉⵙ ⵏ ⵓⵎⴷⵢⴰⵣ ⵉⴳⵍⵍⵉⵏ ⵏ ⵙⵉⴹⵇⵉ ⵄⵍⵉ ⴰⵣⴰⵢⴽⵓ-ⵉⵏⴹⴳⴳⵯⵉⴳⵏ ⵉⵖⴰⵎⴰⵏ- ⴷ ⵓⵙⵎⵖⵕ ⵏ ⵎⴰⵙⵙ ⵃⴰⵙⴰⵏ ⵓⴱⵕⴰⵀⵉⵎ ⴰⵎⵓⵔⵉ ⴷ ⵜⵏⴰⵥⵓⵕⵜ ⵜⴰⵎⵙⵙⵓⴼⵖⵜ ⴽⴰⵔⵉⵎⴰ ⵎⵓⵅⴰⵔⵉⵊ ⴷ ⵎⴰⵙⵙ ⴰⵎⴷⵢⴰⵣ ⵄⵓⵎⴰⵕ ⴰⵢⵜ ⵙⵄⵉⴷ, ⵉⵡⵉⵣ ⴰⵥⵓⵕⴰⵏ ⵜⴷⵔⴰ ⴳⵉⵙ ⵜⵏⴰⵥⵓⵕⵜ ⵎⴰⵙⵙⴰ ⵣⵓⵕⴰ ⵜⴰⵏⵉⵔⵜ ⵙ ⵓⵎⴰⵔⴳ ⵏⵏⵙ ⴱⴰⵀⵔⴰ ⵉⵥⵉⵍⵏ.

Dernière modification : 04 ⵏⵓⵡⴰⵏⴱⵉⵔ 2019
Source URL: http://mapamazighe.ma/am/actualites/%E2%B5%9C%E2%B4%B0%E2%B4%B7%E2%B5%8D%E2%B5%99%E2%B4%B0/%E2%B4%B0%E2%B5%A1%E2%B5%94%E2%B5%89%E2%B5%94-%E2%B4%B0%E2%B5%8F%E2%B5%8E%E2%B5%93%E2%B4%B3%E2%B4%B3%E2%B4%B0%E2%B5%94-%E2%B4%B0%E2%B5%8F%E2%B4%B0%E2%B5%8E%E2%B5%93%E2%B5%94-%E2%B5%8F-%E2%B5%9C%E2%B5%8E%E2%B4%B7%E2%B5%A2%E2%B4%B0%E2%B5%A3%E2%B5%9C-%E2%B5%9C%E2%B4%B0%E2%B5%8E%E2%B4%B0%E2%B5%A3%E2%B5%89%E2%B5%96%E2%B5%9C